“Mga Tingog sa Pagpahiuli: Bilanggoan sa Liberty,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Bilanggoan sa Liberty,” Dali, Sunod Kanako—Alang sa Panimalay ug sa Simbahan: 2025
Mga Tingog sa Pagpahiuli
Bilanggoan sa Liberty
Samtang nabilanggo didto sa Liberty, Missouri, nadawat ni Joseph Smith ang mga sulat nga nagpahibalo kaniya mahitungod sa makuyaw nga sitwasyon sa mga Santos sa Ulahing mga Adlaw kinsa gipapahawa gikan sa estado pinaagi sa mando sa gobernador. Usa ka mahinuklugong sulat miabot gikan sa iyang asawa nga si Emma. Ang iyang mga pulong, ug ang mga sulat ni Joseph, nagpahayag sa ilang mga pag-antos ug sa ilang hugot nga pagtuo niining malisod nga panahon sa kasaysayan sa Simbahan.
Si Joseph Smith ug ang uban pa gibalhog dinhi niini nga bilanggon sa tingtugnaw niadtong 1838–39.
Sulat gikan ni Emma Smith ngadto ni Joseph Smith, Marso 7, 1839
Mahal nga Bana
Nakabaton og oportunidad sa pagpadala pinaagi sa usa ka higala, misulay ko sa pagsulat, apan dili ko mosulay sa pagsulat sa tanan kong mga pagbati, tungod sa imong sitwasyon, sa mga pader, sa mga barandilya, ug mga trangka, sa nagdahunog nga mga suba, nagdagan nga mga sapa, tag-as nga mga bungtod, nagkalawom nga mga walog ug lapad nga mga kakahoyan nga nagbulag kanato, ug ang walay kaangayan nga unang mibalhog kanimo diha, uban sa daghan pang mga hunahunaon, nagbutang sa akong mga pagbati nga dili gayod mahulagway.
Kon dili pa tungod sa akong nahibaloan nga kita walay sala ug ang balaang kaluoy wala pa mopataliwala, sa labing tinuod dili gayod ako makahimo sa paglahutay sa mga nakaingon sa pag-antos nga akong naagian … ; apan sa gihapon magpadayon ug gani andam sa pag-antos pa kon kini kabubut-on sa maluluy-ong Dios nga ako kinahanglan alang sa imong kaayohan.
Maayo kaming tanan sa pagkakaron, gawas ni Fredrick kinsa may sakit.
Ang gamay nga bata nga si Alexander nga karon akong gikugos maoy usa sa labing nindot nga gamay nga tawo nga sukad imong nakita sa imong kinabuhi. Kusgan kaayo siya nga sa tabang sa usa ka lingkoranan modagan siya libot sa kwarto. …
Walay lain gawas sa Dios ang nasayod sa mga pamalandong sa akong hunahuna ug sa mga pagbati sa akong kasingkasing sa dihang mibiya ako sa atong balay ug panimalay, ug sa hapit tanan nga atong gipanag-iya gawas sa atong gagmay nga mga Anak, ug mibiyahe pagawas sa estado sa Missouri, nagbiya kanimo nga nabalhog diha nianang mingaw nga bilanggoan. Apan ang paghinumdom labaw pa sa kalisod kay sa masinati sa usa ka tawo. …
… Nanghinaot ako nga aduna pay mas maayong mga adlaw nga moabot kanato. … [Ako] nahigugma kanimo kanunay.
Emma Smith
Sulat gikan ni Joseph Smith ngadto ni Emma Smith, Abril 4, 1839
Mahal—ug mahigugmaon—nga Asawa.
Huwebes sa gabii milingkod ako sa pagsalop gyod sa adlaw, samtang milili kami sa mga rehas niining mamingaw nga bilanggoan, sa pagsulat kanimo aron ako makapahibalo kanimo sa akong sitwasyon. Kini karon sa akong pagtuo mga lima na ka bulan ug unom ka adlaw sukad ako gibutang nga giguwardiyahan adlaw ug gabii, ug sulod sa mga pader, mga rehas, ug nagtig-ik nga pultahang puthaw sa usa ka mingaw, ngitngit, hugaw nga bilanggoan. Uban sa mga pagbati nga Dios lamang ang nasayod gihimo ko kini nga sulat. Ang mga paghinuktok ubos niini nga mga sitwasyon mosalikway sa pluma [pen], o sa pulong, o sa mga Anghel, sa paghulagway, o sa pagpintura, ngadto sa tawo kinsa wala gayod makasinati sa unsay among nasinati. … Misalig kami sa kalig-on ni Jehova, ug wala nay lain, alang sa among kaluwasan, ug kon siya dili mobuhat niini, dili kini mabuhat, kamo makaseguro, tungod kay adunay gustong mopatay kanamo dinhi niini nga estado; dili tungod kay kami adunay sala. … Minahal kong Emma, kanunay akong naghunahuna kanimo ug sa mga bata. … Gusto kong makakita sa gamay nga si Frederick, Joseph, Julia, Alexander, Joana, ug sa tigulang nga medyor [ang iro sa pamilya]. … Malipayon akong molakaw gikan diri nganha kanimo nga magtiniil, ug walay sampong sa ulo, ug kulang sa sapot ang lawas, aron sa pagtan-aw kanimo ug maghunahuna niini nga dako kaayong kalipay, ug dili maghunahuna niini nga malisod. … Gipas-an ko uban sa kaisog ang tanang pagdaugdaog kanako, ingon man niadtong kinsa uban kanako; walay pay usa kanamo nga misibog. Gusto ko nga ikaw dili motugot sa [atong mga anak] nga makalimot kanako. Sultihi sila nga si Papa naghigugma kanila uban sa hingpit nga paghigugma, ug naghimo siya sa tanan nga iyang mahimo nga makalingkawas gikan sa manggugubot aron sa pag-anha kanila. … Sultihi sila nga si Papa nag-ingon nga sila kinahanglan gayod nga buotan nga mga bata, ug maminaw sa ilang inahan. …
Imo gayod,
Joseph Smith Jr.