Liberty Jail [Bilanggoan sa Liberty], ni Welden Andersen

Oktubre 20–26: “O Dios, Hain Ba Ikaw?”

Doktrina ug mga Pakigsaad 121–123

Ang kinailawman sa bilanggoan sa Liberty Missouri, nabantog nga “lawak nga ngitngit ilawom sa yuta [dungeon].” Ang mga pader baga, ang semento nga mga salog bugnaw ug hugaw, ang pagkaon diyotay kaayo ug pan-os, ug ang duha ka gamay, gibarandilyahan nga mga bintana duol sa kisame ang naghatag og gamay kaayong kahayag. Kini ang dapit diin si Joseph Smith ug ang pipila nga uban pa migahin og upat ka tugnaw nga mga bulan atol sa tingtugnaw sa 1838–39. Atol niini nga panahon, si Joseph kanunay nga nakadawat og mga balita mahitungod sa pag-antos sa mga Santos. Ang kalinaw ug pagkamalaomon nga gibati didto sa Far West milungtad lamang og pila ka bulan, ug karon ang mga Santos usab wala nay mga panimalay, gipapahawa ngadto sa kamingawan nangita og laing dapit aron magsugod na usab—nga niining higayona ang ilang Propeta anaa sa bilanggoan.

Ug gani, bisan pa man nianang alaot nga bilanggoan, ang “kahibalo gikan sa langit” “gibubo” (Doktrina ug mga Pakigsaad 121:33). Ang pangutana ni Joseph’ “O Dios, hain ba ikaw?” klaro ug gamhanan nga gitubag: “Ayaw kahadlok … , kay ang Dios mouban kanimo hangtod sa kahangtoran” (Doktrina ug mga Pakigsaad 121:1; 122:9).

Tan-awa sa Mga Santos, 1:365–451; “Within the Walls of Liberty Jail,” diha sa Revelations in Context, 256–63.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 121:1–10, 23–33; 122

Uban sa Dios, ang kalisdanan mahimong “alang sa [akong] kaayohan.”

Kon kita o ang mga tawo nga atong gimahal nag-antos, normal ra nga maghunahuna kon ang Dios nagpakabana ba kanato. Samtang magbasa ka sa Doktrina ug mga Pakigsaad 121:1–6, paghunahuna og mga higayon nga ikaw adunay mga pangutana o mga pagbati nga susama sa kang Joseph Smith. Unsa ang imong nakita sa tubag sa Ginoo nga makatabang nimo kon ikaw aduna niini nga mga pangutana o mga pagbati? Pananglitan, diha sa mga bersikulo 7–10, 26–33, timan-i ang mga panalangin nga Iyang gisaad. Sa imong hunahuna unsa ang ipasabot sa “molahutay pag-ayo”? Sa unsang paagi nga ang Manluluwas nagtabang nimo nga mahimo nimo kini?

Samtang magbasa ka sa seksiyon 122, ikonsiderar kon unsa ang gusto sa Ginoo nga ikaw motan-aw sa imong mga kalisdanan. Mahimo nimong pamalandongan ang mga kasinatian nga miabot gikan sa imong mga pagsulay ug kon sa unsang paagi nga kini “alang sa [imong] kaayohan” (bersikulo 7).

Tan-awa usab sa Quentin L. Cook, “Personal nga Kalinaw sa mga Panahon nga Mahagiton,” Liahona, Nob. 2021, 89–92; “Ang Kalinaw Asa Ko Pangitaa?,” Mga Himno, nu. 75.

Doktrina ug mga Pakigsaad 121:34–46

Ang tinuod nga gahom ug impluwensya gibase sa “mga baroganan sa pagkamatarong.”

Ang kalibotanon nga gahom mipugos sa mga Santos sa pagpahawa sa Missouri ug sa pagbilanggo ni Joseph Smith. Apan samtang si Joseph anaa didto, ang Ginoo mitudlo niya mahitungod sa lahi nga matang sa gahom: Iyang gahom, “ang mga gahom sa langit.” Ang pagbasa mahitungod niana nga gahom diha sa Doktrina ug mga Pakigsaad 121:34–46 makatabang nimo sa pagkat-on kon unsaon nga makadawat niana nga gahom—ug kon unsaon kini sa paggamit aron sa pagpanalangin sa uban. Tingali mahimo nimong irekord ang unsay imong nakat-onan diha sa tsart nga may mga kolum nga gisulatan og Mga Gahom sa Langit ug Kalibotanon nga Gahom. Sa unsang paagi nga kining duha ka matang sa gahom managlahi? Unsa ang gitudlo niining mga paghulagway sa gahom sa Ginoo nganha nimo mahitungod Kaniya?

Mahimo usab nimong pamalandongan ang pulong nga impluwensya diha sa bersikulo 41. Unsa ang pipila ka sitwasyon diin gusto ka nga mahimong impluwensya alang sa kaayohan—tingali diha sa relasyon sa pamilya, sa eskwelahan, sa trabahoan, o sa buluhaton sa Simbahan? Unsa ang imong nakat-onan gikan sa mga bersikulo 41–46 mahitungod kon sa unsang paagi nga ang Dios nag-impluwensya sa Iyang mga anak? Mahimo nimong iminubo ang unsay imong nakat-onan pinaagi sa pagkompleto sa kapahayag sama niining usa: “Aron makaimpluwensya alang sa kaayohan, ako .”

Tan-awa usab sa Jeffrey R. Holland, “Dili sama sa Hinatagan sa Kalibotan,” Liahona, Mayo 2021, 35–38; David A. Bednar, “Ang Gahom sa Langit,” Liahona, Mayo 2012, 48–51; “The Powers of Heaven” (bidyo), Gospel Library.

"The Powers of Heaven"

(D&C 121:34-46) The components and processes involved in providing electricity to a home are compared to the principles the Lord outlined in section 121 for those who would exercise His priesthood in power.

Pagkuha og usa ka hugpong sa mga pulong ug tun-i og maayo. Aron makakat-on mahitungod sa nindot nga mga panalangin nga gihulagway diha sa mga bersikulo 45–46, mahimo ka nga mokuha og usa ka hugpong sa mga pulong nga nakapatandog nimo ug tun-i kini og maayo. Pananglitan, unsa ang ipasabot sa pulong nga modayandayan, ug kon sa unsang paagi nga ang hiyas modayandayan sa imong hunahuna? O tingali mangita ka og hulagway sa yamog ug magkat-on mahitungod kon sa unsang paagi nga ang yamog maporma diha sa mga tanom. Sa unsang paagi nga susama kini sa paagi sa pagtudlo sa Ginoo sa Iyang doktrina? Ipakigbahin ang unsay imong nadiskobrehan sa imong pamilya o mga higala, lakip na sa imong mga higala diha sa simbahan.

Doktrina ug mga Pakigsaad 122:8

Si Jesukristo mikunsad ubos sa tanang butang aron Siya motuboy nako.

Sa imong hunahuna unsa ang ipasabot nga moingon nga si Jesukristo “mikunsad ubos … sa tanang [butang]”? Ania ang pipila ka dugang nga mga bersikulo nga tingali makatabang nimo nga makasabot niini nga hugpong sa mga pulong: Isaias 53:3–4; Mga Hebreohanon 2:17–18; 1 Nephi 11:16–33; Alma 7:11–13. Base sa unsay imong nakat-onan, ikonsiderar ang pagsulti pag-usab sa Doktrina ug mga Pakigsaad 122:8 sa imong kaugalingong mga pulong. Sa unsang paagi nga ikaw makapakita sa imong pasalamat ngadto ni Jesukristo alang sa pagkunsad ubos sa tanang butang?

Sa unsang paagi nga kining ideya gikan ni Presidente Dallin H. Oaks nakaapekto sa imong pagsabot? “Mahimo pa gani kitang moingon nga tungod kay mikunsad sa tanan nga mga butang, [si Jesukristo] hingpit nga nakapahimutang sa pagtuboy kanato ug paghatag kanato og kalig-on nga atong gikinahanglan aron makalahutay sa atong mga kasakit” (“Nalig-on pinaagi sa Pag-ula ni Jesukristo,” Liahona, Nob. 2015, 64).

Detalye gikan sa Not My Will, But Thine [Dili ang Akong Pagbuot Maoy Matuman, Kondili ang Imo], ni Walter Rane

Doktrina ug mga Pakigsaad 123

“Kita magmalipayon sa pagbuhat sa tanan nga mga butang nga ubos sa atong gahom.”

Diha sa Doktrina ug mga Pakigsaad 123:7–8, si Joseph Smith nagpasabot ngadto sa sayop nga mga tinuohan nga misangpot ngadto sa pag-antos, lakip na sa pagpanglutos sa mga Santos. Niadtong Marso 1839, maingon og wala kaayoy daghang mabuhat ang mga Santos mahitungod niana. Apan diha sa iyang mga sulat gikan sa Bilanggoan sa Liberty, gisultihan sila ni Joseph kon unsa ang ilang mabuhat: “pagtigom sa kasayoran sa tanan nga mga hitabo” ug “magmalinawon, uban ang labing dako nga kasiguroan, nga makasaksi, sa kaluwasan sa Dios” (Doktrina ug mga Pakigsaad 123:1, 17). Samtang imong ikonsiderar ang mga problema sa kalibotan karon, paghunahuna og mga paagi aron matubag kini nga “ubos sa [imong] gahom” (mga bersikulo 12, 17). Ug ayaw ibaliwala ang ingon og “walay hinungdan nga mga butang” (bersikulo 15). Nganong importante ang pagbuhat niini nga mga butang nga “magmalipayon”? (bersikulo 17).

Daghan sa mga asoy nga gipangayo ni Joseph niini nga sulat gihatag ngadto sa gobyerno ug gimantala isip usa ka 11 ka bahin nga serye diha sa pamantalaan sa Nauvoo, ang Times and Seasons (tan-awa sa “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Joseph Smith Jr.

• Bilanggoan sa Liberty

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 121:1–9; 122:7–9

Uban sa Dios, ang akong mga pagsulay mahimong alang sa akong kaayohan.

• Aron matabangan ang imong mga anak sa paghunahuna kon unsa kaha ang gibati ni Joseph Smith ug sa iyang mga higala didto sa Bilanggoan sa Liberty, mahimo ninyong basahon og dungan ang “Kapitulo 46: Si Joseph Smith Sulod sa Bilanggoan sa Liberty” (diha sa Mga Istorya sa Doktrina ug mga Pakigsaad, 172–74) o “Voices of the Restoration: Liberty Jail” o tan-awon ang parte sa bidyo nga “Joseph Smith: Prophet of the Restoration” (Gospel Library, sugod sa 41:30). Dayon, samtang basahon ninyo og dungan ang Doktrina ug mga Pakigsaad 121:1–9, mahimo ninyong hisgotan ang mahitungod kon giunsa sa Manluluwas sa pagtabang ni Joseph nga mobati og kalinaw. Sa unsang paagi nga kita makakaplag og kalinaw diha sa Manluluwas, bisan atol sa lisod nga mga panahon?

  Chapter 46: Joseph Smith in Liberty Jail: November 1838–April 1839

  Joseph Smith: The Prophet of the Restoration

  A motion picture about the life and legacy of Joseph Smith, the founding prophet of The Church of Jesus Christ of Latter-day Saints.

• Aron matabangan ang imong mga anak nga makaila nga ang atong mga pagsulay mahimong “alang sa [atong] kaayohan” (Doktrina ug mga Pakigsaad 122:7), mahimo nimong hisgotan nila kon sa unsang paagi nga ang atong mga braso modako kon kita magkarga og bug-at nga butang. Mahimo usab nimo silang dapiton sa pag-alsa og bug-at nga butang. Dayon mahimo nimong hisgotan kon sa unsang paagi nga ang paglahutay sa lisod nga mga panahon makatabang sa atong espiritu nga malig-on—kon kita modangop sa Ginoo alang sa tabang. Pagpakigbahin og pipila ka ehemplo sa imong kinabuhi.

Doktrina ug mga Pakigsaad 121:34–46

Ang pagkamatarong magdala sa “mga gahom sa langit.”

• Tingali ang usa ka analohiya makatabang sa imong mga bata nga masabtan “ang mga gahom sa langit.” Pananglitan, mahimo nimong itandi ang gahom sa Dios ngadto sa kuryente. Unsa man ang makapugong sa de kuryente nga himan nga makadawat og kuryente? Unsa ang makapakunhod sa atong espirituhanong gahom? Unsa ang makadugang niini? (Pangitaa ang mga pulong ug hugpong sa mga pulong diha sa Doktrina ug mga Pakigsaad 121:34–46; tan-awa usab sa Kinatibuk-ang Tamdanan nga Basahon, 3.5, 3.6, Librarya sa Ebanghelyo.)

Doktrina ug mga Pakigsaad 122:7–9

Si Jesukristo nasayod kon unsay akong giagian.

• Human sa pagbasa sa Doktrina ug mga Pakigsaad 122:7–9 uban sa imong mga anak, mahimo ka nga mopakigbahin og usa ka kasinatian sa dihang imong gibati nga ang Manluluwas nagauban nimo atol sa usa ka lisod nga pagsulay. Mahimo ninyong kantahon og dungan ang usa ka awit sama sa “Sa Bata pa si Jesus” (Songbook sa mga Bata, 34) ug mopamatuod nga si Jesukristo makatabang nato tungod kay Siya nasayod kon unsay atong gibati.

Doktrina ug mga Pakigsaad 123:15–17

Bisan ang gagmay nga mga butang makahimo og dakong kalainan diha sa pagserbisyo sa Dios.

• Aron matabangan ang imong mga anak nga makasabot sa Doktrina ug mga Pakigsaad 123:15–17, mahimo ka nga mopakigbahin nila og usa ka hulagway sa dakong barko ug usa ka gamayng timon, o mopakigbahin nila sa pagpasabot ni Elder David A. Bednar diha sa “Ang mga Baroganan sa Akong Ebanghelyo” (Liahona, Mayo 2021, 125–26). Dayon mahimo kamo nga maghisgot mahitungod sa gagmay nga mga paagi nga kita mahimong malipayong moserbisyo sa atong pamilya ug mga higala.

“The Principles of My Gospel”

Elder Bednar teaches that correct gospel principles help us make wise choices and stay on the covenant path.

Sama sa gamay nga timon sa usa ka dakong barko, ang atong ginagmay nga mga paningkamot makahimo og dakong kalainan.

Alang sa dugang nga mga ideya, tan-awa ang isyu karong bulana sa Higala nga magasin.

Joseph Smith sa Liberty Jail [Si Joseph Smith sa Bilanggoan sa Liberty], ni Greg Olsen