“Oktubre 6–12: ‘Ako Mohan-ay sa Tanan nga mga Butang alang sa Inyong Kaayohan’: Doktrina ug mga Pakigsaad 111–114,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Doktrina ug mga Pakigsaad 111–114,” Dali, Sunod Kanako—Alang sa Panimalay ug sa Simbahan: 2025
Oktubre 6–12: “Ako Mohan-ay sa Tanan nga mga Butang alang sa Inyong Kaayohan”
Doktrina ug mga Pakigsaad 111–114
Ikaw ba adunay espirituwal nga kasinatian nga nakapabati nimo nga masaligon ug segurado sa imong hugot nga pagtuo diha ni Kristo—apan ang mga kasakit sa kinabuhi misulay sa imong hugot nga pagtuo, ug nakaplagan nimo ang imong kaugalingon nga nanglimbasog nga mahibalik ang kalinaw nga imong gibati kaniadto? Ang susama nga butang nahitabo ngadto sa mga Santos sa Kirtland. Wala pay usa ka tuig human sa espirituwal nga mga pagbubo nga konektado sa pagpahinungod sa Templo sa Kirtland, ang mga kasamok mitungha. Ang pinansyal nga krisis, panagbangi diha sa Korum sa Napulog Duha, ug ubang mga pagsulay maoy hinungdan nga pipila ka Santos napaling sa ilang hugot nga pagtuo bisan pa man sa ilang mga kasinatian bag-ohay lang.
Dili kita makalikay og mga pagsulay, busa unsaon nato pagpugong niini gikan sa paghulga sa atong hugot nga pagtuo ug pagpamatuod? Tingali ang usa ka bahin sa tubag makaplagan diha sa tambag sa Ginoo diha sa Doktrina ug mga Pakigsaad 112, nga gihatag samtang ang kalisdanan sa Kirtland nagtubo. Ang Ginoo miingon, “Limpyoha ang inyong mga kasingkasing diha sa akong atubangan” (bersikulo 28), “Ayaw pagsukol” (bersikulo 15), “Baksi ang inyong mga bat-ang alang sa buhat” (bersikulo 7), ug “Magpaubos ka” (bersikulo 10). Samtang kita nagsunod niini nga tambag, ang Ginoo “moagak [kanato] pinaagi sa kamot” sa tibuok kalisdanan ug ngadto sa pagkaalim ug kalinaw (tan-awa sa mga bersikulo 10, 13).
Mga Ideya alang sa Pagkat-on diha sa Panimalay ug sa Simbahan
Ang Ginoo “mohan-ay sa tanan nga mga butang alang sa [akong] kaayohan.”
Sa pagka-1836, ang Simbahan nakapundok og dagko nga mga utang sa pagbuhat sa buluhaton sa Ginoo. Si Joseph Smith ug ang uban nabalaka mahitungod niini nga mga utang ug naghunahuna og mga paagi nga mabayran kini (tan-awa sa ulohan sa seksiyon sa Doktrina ug mga Pakigsaad 111).
Samtang magbasa ka sa seksiyon 111, ikonsiderar kon sa unsang paagi nga ang mga pulong sa Ginoo ngadto ni Joseph mahimong magamit nimo—ug sa mga butang nga imong gikabalak-an. Pananglitan, kanus-a ka mibati sa gugma sa Dios “bisan pa sa inyong walay pulos nga mga buhat” (bersikulo 1)? Giunsa sa Ginoo pagtabang kanimo nga makaplagan ang wala damha nga mga “bahandi” (bersikulo 10)? Unsa ang Iyang gihimo sa “[pag]han-ay sa tanan nga mga butang alang sa imong kaayohan” (bersikulo 11)? Unsa ang gitudlo kanimo sa hugpong sa mga pulong “kutob sa inyong mahimo sa pagdawat kanila” mahitungod sa Langitnong Amahan?
Tan-awa usab sa Mateo 6:19–21, 33; “More Treasures Than One,” diha sa Revelations in Context, 229–34.
Doktrina ug mga Pakigsaad 112:3–15, 22
Ang Ginoo mogiya nako kon ako mapaubsanong magtinguha sa Iyang kabubut-on.
Si Thomas B. Marsh, Presidente sa Korum sa Napulog Duha ka Apostoles, nasuko nga si Joseph Smith, wala mokonsulta niya, mitawag og duha ka sakop sa iyang korum aron sa pagsangyaw sa ebanghelyo didto sa England. Nakigkita siya sa Propeta, kinsa nakadawat og pagpadayag nga nakatabang ni Thomas nga ihiklin ang iyang nasakitan nga mga pagbati. Kini nga pagpadayag narekord diha sa Doktrina ug mga Pakigsaad 112.
Hunahunaa kini nga konteksto samtang magtuon ka sa Doktrina ug mga Pakigsaad 112. Unsa ang imong nakita nga tingali nakaayo sa nasakitan nga mga pagbati ni Thomas? Diha sa mga bersikulo 3–15 ug 22, mahimo nimong pangitaon ang mga tubag sa mga pangutana nga sama niini: Unsa ang kamapainubsanon? Unsa ang ipasabot nga ang Ginoo moagak kanimo “pinaagi sa kamot”? Sa imong hunahuna ngano nga ang pagpaubos makatabang nimo nga madawat ang giya sa Ginoo? Mahimo nimong makita ang dugang nga mga tubag diha sa “Sundanan sa Kamapainubsanon” sa mensahe ni Elder Joseph W. Sitati “Mga Sundanan sa Pagkadisipulo” (Liahona, Nob. 2022, 87–88).
Paghunahuna og tawo nga imong nailhan nga mapainubsanon. Unsa ang gibuhat niini nga tawo nga nagpakita og kamapainubsanon? Unsa ang imong nakat-onan gikan sa Manluluwas mahitungod sa pagkahimong mapainubsanon? Tingali mahimo ka nga mangita og mga hulagway sa mga panahon sa Iyang kinabuhi nga Siya nagpakita og kamapainubsanon.
Kanus-a nga ikaw mibati nga gigiyahan sa Ginoo sa dihang nagpaubos ka sa imong kaugalingon?
Tan-awa usab sa Ulisses Soares, “Magmaaghop ug Magmapaubsanon sa Kasingkasing,” Liahona, Nob. 2013, 9–11; “The Faith and Fall of Thomas Marsh,” diha sa Revelations in Context, 54–60; Mga Hilisgotan ug mga Pangutana, “Pagpaubos,” Librarya sa Ebanghelyo; “Magmapainubsanon Ka,” Mga Himno, nu. 76.
Iapil ang mga tigkat-on. Hunahunaa kon unsaon nga makatabang ka sa mga tawo nga imong gitudloan nga aktibong moapil sa pagkat-on sa mga kamatuoran diha sa mga kasulatan. Pananglitan, sa pagtabang nila nga makasabot sa unsay gisulti sa Ginoo diha sa Doktrina ug mga Pakigsaad 112:10, mahimo nimong taptapan ang mga mata sa usa ka tawo ug mainampingon moagak niya libot sa gamayng dalan nga may nag-ali nga mga lingkoranan o ubang mga butang. Unsa ang atong makat-onan mahitungod sa kamapainubsanon gikan niini nga demonstrasyon?
Doktrina ug mga Pakigsaad 112:12–26, 28, 33–34
Kadtong kinsa tinuod nga nakabig makaila ni Jesukristo.
Ang kamatuoran nga ang pipila ka Apostoles niadtong 1837 mibatok sa Propeta usa ka maayong pahinumdom nga bisan unsa pa ang atong calling sa Simbahan o unsa ka dako ang atong nahibaloan sa ebanghelyo, kita kinahanglang moseguro sa tinagsa-tagsa nga kita moamuma sa atong pagkakabig ngadto ni Jesukristo. Tingali mahimo nimong basahon ang Doktrina ug mga Pakigsaad 112:12–26, 28, 33–34 ug pangitaon ang mga kamatuoran nga makatabang nimo sa pagbuntog sa usa ka pagsulay sa hugot nga pagtuo o mahimong mas hingpit nga nakabig ngadto sa Ginoo. Tingali mibati ka nga nadasig sa pagpakigbahin sa unsay imong nakaplagan aron sa pagtabang sa laing tawo nga mapalig-on ang ilang pagkakabig ngadto ni Kristo.
Si Joseph Smith “usa ka sulugoon diha sa mga kamot ni Kristo.”
Si propeta Isaias mipasabot sa usa sa mga kaliwatan ni Jese isip usa ka “saha” ug usa ka “gamot” (Isaias 11:1, 10). Diha sa seksiyon 113, ang Ginoo mipasabot nga kini nga kaliwatan, usa ka sulugoon ni Kristo, mahimong instrumento sa pagpundok sa katawhan sa ulahing mga adlaw (tan-awa sa Doktrina ug mga Pakigsaad 113:4, 6). Kini nga panagna naghulagway gayod kang Propeta Joseph Smith. Sa unsang paagi nga kini ug ang ubang mga kamatuoran diha sa seksiyon 113 nakapadasig sa mga Santos atol sa kagubot nga ilang nasinati didto sa Kirtland? Unsa ang imong nakita niini nga pagpadayag nga makapadasig nimo nga magpabiling lig-on ug magpadayon sa pag-apil sa buhat sa Ginoo karon?
Tan-awa usab sa Giya ngadto sa mga Kasulatan, “Jesse,” Gospel Library; 2 Nephi 21:10–12; Joseph Smith—Kasaysayan 1:40.
Si Isaias misulat bahin sa usa ka “saha” ug “mga gamot” gikan sa “punoan ni Isai” (Isaias 11:1).
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Tawo, Mga Dapit, Mga Panghitabo
Mga Ideya sa Pagtudlo sa mga Bata
Doktrina ug mga Pakigsaad 111:2, 10–11
Ang mga butang sa Dios mahimong usa ka bahandi ngari kanako.
-
Ikaw ug ang imong mga anak mahimong magdrowing kon unsay mosantop sa hunahuna sa higayon nga madungog ninyo ang pulong nga bahandi. Dayon mahimo ninyong basahon og dungan ang Doktrina ug mga Pakigsaad 111:2, 10–11 ug itandi ang yutan-ong mga bahandi ngadto sa mga butang nga gipakabahandi sa Ginoo. (Tan-awa ang pahina sa kalihokan niini nga semana.) Sa unsang paagi nga atong mas ipakabahandi ang mga butang sa Dios?
Doktrina ug mga Pakigsaad 112:10
Ang Ginoo moagak kanako pinaagi sa kamot ug motubag sa akong mga pag-ampo.
-
Human sa pagbasa og dungan sa Doktrina ug mga Pakigsaad 112:10, ikaw ug ang imong mga anak mahimong manganta og dungan sa “Magmapainubsanon Ka” (Mga Himno, nu. 76). Mahimo usab kamo nga magdula og usa ka dula nga naglangkob sa pag-agak sa usag-usa “pinaagi sa kamot” (sama sa usa ka agianan nga adunay mga babag). Sa unsang paagi nga ang Ginoo nag-agak nato “pinaagi sa kamot,” bisan kon Siya dili kauban nato sa pisikal nga paagi? Ngano nga kita nagkinahanglan man sa Ginoo nga moagak nato? Kanus-a nga kita mibati nga ang Ginoo nag-agak nato?
-
Ikaw o ang imong mga anak mahimong mosulat sa mga pulong sa Doktrina ug mga Pakigsaad 112:10 ug badlisan sa ubos ang mga panalangin nga ihatag sa Ginoo kon kita mapainubsanong modangop ngadto Kaniya. Awhaga ang imong mga anak sa pagpakigbahin og mga higayon nga sila mapaubsanong nangayo og tabang sa Ginoo ug nakadawat og tubag sa ilang mga pag-ampo o gigiyahan sa paghimo og usa ka butang nga maayo (tan-awa sa Moroni 7:13, 16).
Detalye gikan sa Arise and Walk [Bangon ug Lakaw], ni Simon Dewey
Doktrina ug mga Pakigsaad 112:11
Gusto ni Jesus nga higugmaon nako ang tanan.
-
Ikaw ug ang imong mga anak mahimong magpulipuli og basa sa “Kapitulo 41: Kasamok sa Kirtland” (diha sa Mga Istorya sa Doktrina ug mga Pakigsaad, 158–60). Kinsa man diha sa istorya ang nakapasamot sa mga problema sa Kirtland? Kinsa man ang misulay aron mahimo silang mas maayo? Dayon mahimo ninyong basahon ang Doktrina ug mga Pakigsaad 112:11 ug hisgotan kon ngano nga gusto sa Manluluwas nga kita mohigugma sa tanan. Kanus-a Siya mipakita og gugma alang sa katawhan nga dili mabination Kaniya? (pananglitan, tan-awa sa Lucas 23:34). Mahimo usab ninyong kantahon ang usa ka awit mahitungod sa paghigugma sa uban, sama sa “Mouban Ko Nimo” (Songbook sa mga Bata, 78–79).
Chapter 41: Trouble in Kirtland: 1837–1838
Doktrina ug mga Pakigsaad 112:11–14, 24–26
Kadtong kinsa tinuod nga nakabig makaila ni Jesukristo.
-
Human sa pagbasa sa Doktrina ug mga Pakigsaad 112:24–26, ikaw ug ang imong mga anak mahimong maghisgot mahitungod sa kalainan tali sa pagkahibalo sa ngalan sa usa ka tawo ug sa pagkaila nila. Unsa nga mga pagtulun-an gikan sa mga bersikulo 11–14 ang makatabang nato nga makasabot kon unsay kahulogan sa ipasabot nga makaila sa Ginoo?
Alang sa dugang nga mga ideya, tan-awa ang isyu karong bulana sa Higala nga magasin.
Be Thou Humble [Magmapainubsanon Ka], ni Julie Rogers