“ວັນທີ 1–7 ເດືອນທັນວາ: ‘ພາບນິມິດກ່ຽວກັບການໄຖ່ຄົນຕາຍ’: ຄຳສອນ ແລະ ພັນທະສັນຍາ 137–138,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 137–138,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ Christ Preaching in the Spirit World [ພຣະຄຣິດກຳລັງສັ່ງສອນຢູ່ໃນໂລກວິນຍານ], ໂດຍ ຣໍເບີດ ທີ ແບແຣັດ

ວັນທີ 1–7 ເດືອນທັນວາ: “ພາບນິມິດກ່ຽວກັບການໄຖ່ຄົນຕາຍ”

ຄຳສອນ ແລະ ພັນທະສັນຍາ 137–138

ການເປີດເຜີຍທີ່ບັນທຶກຢູ່ໃນ ຄຳສອນ ແລະ ພັນທະສັນຍາ 137 ແລະ 138 ໄດ້ຖືກແຍກຈາກກັນຫລາຍກວ່າ 80 ປີ ແລະ ເປັນໄລຍະທາງ 1,500 ໄມ (2,400 ກມ). ພາກທີ 137 ໄດ້ຮັບໂດຍສາດສະດາໂຈເຊັບ ສະມິດ ໃນປີ 1836 ຢູ່ໃນພຣະວິຫານເຄີດແລນ, ແລະ ພາກທີ 138 ໄດ້ຮັບໂດຍໂຈເຊັບ ແອັຟ ສະມິດ, ປະທານຂອງສາດສະໜາຈັກຄົນທີຫົກ, ໃນປີ 1918 ຢູ່ໃນເມືອງເຊົາເລັກ. ແຕ່ໂດຍທາງຄຳສອນແລ້ວ, ພາບນິມິດທັງສອງນີ້ແມ່ນຄຽງຄູ່ກັນໄປ. ທັງສອງພາກໄດ້ຕອບຄຳຖາມທີ່ຫລາຍຄົນ—ລວມທັງສາດສະດາຂອງພຣະເຈົ້າຫລາຍທ່ານ—ທີ່ມີກ່ຽວກັບຊີວິດຫລັງຈາກຄວາມຕາຍ. ໂຈເຊັບ ສະມິດ ສົງໄສກ່ຽວກັບຊາຕາກຳຂອງອ້າຍເພິ່ນ ອາລ໌ວິນ, ຜູ້ໄດ້ເສຍຊີວິດໄປໂດຍທີ່ບໍ່ທັນໄດ້ຮັບບັບຕິສະມາ. ໂຈເຊັບ ແອັຟ ສະມິດ, ຜູ້ທີ່ສູນເສຍພໍ່ແມ່ ແລະ ລູກໆ 13 ຄົນໄປຈາກການເສຍຊີວິດກ່ອນໄວອັນຄວນ, ໄດ້ຄິດເປັນປະຈຳກ່ຽວກັບໂລກວິນຍານ ແລະ ສົງໄສກ່ຽວກັບການສັ່ງສອນພຣະກິດຕິຄຸນຢູ່ທີ່ນັ້ນ.

ພາກທີ 137 ໃຫ້ຄວາມຮູ້ກ່ຽວກັບໂຊກຊາຕາຂອງລູກໆຂອງພຣະເຈົ້າໃນຊີວິດໜ້າ, ແລະ ພາກທີ 138 ເປີດຜ້າມ່ານອອກກວ້າງກວ່າເກົ່າ. ການເປີດເຜີຍທັງສອງ, ໄດ້ເປັນພະຍານເຖິງ “ຄວາມຮັກອັນຍິ່ງໃຫຍ່ ແລະ ປະເສີດທີ່ພຣະບິດາ ແລະ ພຣະບຸດໄດ້ສະແດງໃຫ້ປະຈັກ” (ຄຳສອນ ແລະ ພັນທະສັນຍາ 138:3).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 137; 138:30–37, 57–60

ລູກໆທັງໝົດຂອງພຣະບິດາເທິງສະຫວັນຈະມີໂອກາດໄດ້ເລືອກຊີວິດນິລັນດອນ.

ອາລ໌ວິນ ສະມິດ, ຜູ້ເປັນອ້າຍທີ່ຮັກຂອງສາດສະດາໂຈເຊັບ, ໄດ້ເສຍຊີວິດຫົກປີກ່ອນການຟື້ນຟູສິດອຳນາດແຫ່ງການໃຫ້ບັບຕິສະມາ. ຄວາມເຂົ້າໃຈທົ່ວໄປໃນບັນດາຊາວຄຣິດຈຳນວນໜຶ່ງ ໃນປີ 1836 ແມ່ນວ່າ ຖ້າຫາກບຸກຄົນໃດໜຶ່ງຕາຍໄປໂດຍປາດສະຈາກການບັບຕິສະມາ, ບຸກຄົນນັ້ນບໍ່ສາມາດໄປສະຫວັນ. ໂຈເຊັບໄດ້ສົງໄສກ່ຽວກັບຄວາມລອດນິລັນດອນຂອງອາລ໌ວິນ ເປັນເວລາຫລາຍປີ—ຈົນກວ່າເພິ່ນໄດ້ຮັບການເປີດເຜີຍໃນ ຄຳສອນ ແລະ ພັນທະສັນຍາ 137.

ຫລາຍຄົນໃນປະຈຸບັນນີ້ກໍມີຄຳຖາມທີ່ຄ້າຍຄືກັນ. ເປັນຫຍັງພຣະເຈົ້າຈຶ່ງຮຽກຮ້ອງໃຫ້ມີພິທີການ ແລະ ພັນທະສັນຍາໃນເມື່ອມີຄົນຈຳນວນຫລວງຫລາຍທີ່ບໍ່ໄດ້ມີໂອກາດຈະໄດ້ຮັບພິທີການ ແລະ ພັນທະສັນຍານັ້ນ? ທ່ານຈະເວົ້າແນວໃດກັບຜູ້ທີ່ສົງໄສກ່ຽວກັບເລື່ອງນີ້? ທ່ານຈະສ້າງສັດທາຂອງພວກເຂົາໃນພຣະເຈົ້າ ແລະ ຂໍ້ກຳນົດຂອງພຣະອົງສຳລັບຄວາມລອດໄດ້ແນວໃດ? ໃຫ້ຊອກຫາຄວາມຈິງທີ່ທ່ານສາມາດແບ່ງປັນໄດ້ ຢູ່ໃນ ພາກທີ 137 ແລະ ໃນ ພາກທີ 138:30–37, 57–60. ທ່ານຍັງສາມາດຊອກຫາຄວາມຈິງເຫລົ່ານີ້ທີ່ໄດ້ສະແດງອອກໃນເພງສວດ “The Glorious Gospel Light Has Shone” (Hymns, no. 283) ແລະ ໃນຂ່າວສານຂອງປະທານເຮັນຣີ ບີ ໄອຣິງ “Gathering the Family of God” (Liahona, May 2017, 19–22) ນຳອີກ.

ຂະນະທີ່ທ່ານສຶກສາ ແລະ ໄຕ່ຕອງຢູ່, ທ່ານອາດບັນທຶກຄວາມປະທັບໃຈຂອງທ່ານໄວ້ໄດ້ໂດຍການປະກອບປະໂຫຍກເຫລົ່ານີ້ໃຫ້ສົມບູນ:

ຍ້ອນການເປີດເຜີຍເຫລົ່ານີ້, ເຮົາຈຶ່ງຮູ້ວ່າພຣະບິດາເທິງສະຫວັນ .
ຍ້ອນການເປີດເຜີຍເຫລົ່ານີ້, ເຮົາຈຶ່ງຮູ້ວ່າແຜນແຫ່ງຄວາມລອດຂອງພຣະບິດາຄື .
ຍ້ອນການເປີດເຜີຍເຫລົ່ານີ້, ເຮົາຈຶ່ງຕ້ອງການທີ່ .

ເບິ່ງ Saints, 1:232–35 ນຳອີກ.

ຄຳສອນ ແລະ ພັນທະສັນຍາ 138:1–11, 25–30

ການອ່ານ ແລະ ການໄຕ່ຕອງພຣະຄຳພີ ກະກຽມເຮົາໃຫ້ຮັບເອົາການເປີດເຜີຍ.

ບາງເທື່ອການເປີດເຜີຍເກີດຂຶ້ນແມ່ນແຕ່ເມື່ອເຮົາບໍ່ໄດ້ສະແຫວງຫາມັນ. ແຕ່ສ່ວນຫລາຍມັນເກີດຂຶ້ນເພາະເຮົາສະແຫວງຫາ ແລະ ກະກຽມສຳລັບມັນຢ່າງພາກພຽນ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 138:1–11, 25–30, ໃຫ້ສັງເກດເບິ່ງສິ່ງທີ່ປະທານໂຈເຊັບ ແອັຟ ສະມິດ ໄດ້ໄຕ່ຕອງເມື່ອ “ຕາແຫ່ງຄວາມເຂົ້າໃຈ [ຂອງເພິ່ນ] ໄດ້ເປີດ”. ທ່ານຍັງສາມາດປຽບທຽບປະສົບການຂອງເພິ່ນກັບ 1 ນີໄຟ 11:1–6; ໂຈເຊັບ ສະມິດ—ປະຫວັດ 1:12–19 ນຳອີກ. ແລ້ວໃຫ້ພິຈາລະນາວິທີທີ່ທ່ານສາມາດເຮັດຕາມຕົວຢ່າງຂອງປະທານສະມິດ. ຕົວຢ່າງເຊັ່ນ, ທ່ານຮູ້ສຶກໄດ້ຮັບການດົນໃຈໃຫ້ປ່ຽນແປງຫຍັງແດ່ໃນການສຶກສາພຣະຄຳພີຂອງທ່ານ ເພື່ອໃຫ້ໄດ້ຮັບການເປີດເຜີຍສ່ວນຕົວຫລາຍຂຶ້ນ?

ໃນຂ່າວສານຂອງເພິ່ນ “The Vision of the Redemption of the Dead” (Liahona, Nov. 2018, 71–74), ປະທານເອັມ ຣະໂຊ ບາເລີດ ໄດ້ແນະນຳວິທີອື່ນ ທີ່ປະທານສະມິດໄດ້ກະກຽມທີ່ຈະໄດ້ຮັບການເປີດເຜີຍນີ້. ທ່ານຮຽນຮູ້ຫຍັງແດ່ຈາກປະສົບການຂອງເພິ່ນ? ໃຫ້ພິຈາລະນາວ່າພຣະຜູ້ເປັນເຈົ້າໄດ້ກຽມທ່ານສຳລັບປະສົບການຕ່າງໆທີ່ທ່ານກຳລັງປະເຊີນຢູ່ແນວໃດ—ແລະ ວ່າພຣະອົງອາດຈະກຳລັງກຽມທ່ານໃຫ້ພ້ອມສຳລັບປະສົບການຕ່າງໆໃນອະນາຄົດຂອງທ່ານແນວໃດ.

ເບິ່ງ Saints, 3:202–5; “Ministry of Joseph F. Smith: A Vision of the Redemption of the Dead” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

Ministry of Joseph F. Smith: A Vision of the Redemption of the Dead
Nearing death, President Joseph F. Smith receives revelation from God regarding redemption of the dead.

ປະທານໂຈເຊັບ ແອັຟ ສະມິດ — Joseph F. Smith [ໂຈເຊັບ ແອັຟ ສະມິດ], ໂດຍ ອາລ໌ເບີດ ອີ ຊາລ໌ບະເຣັນເນີ

ເຊື້ອເຊີນພຣະວິນຍານ. “ທ່ານໄດ້ສັງເກດເຫັນຫຍັງແດ່ທີ່ມີສ່ວນຊ່ວຍໃຫ້ກັບສະພາບແວດລ້ອມທາງວິນຍານສໍາລັບການຮຽນຮູ້ພຣະກິດຕິຄຸນ? ແມ່ນຫຍັງທີ່ເຮັດໃຫ້ພຣະວິນຍານລົດນ້ອຍລົງ?” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 18). ຂະນະທີ່ທ່ານສຶກສາປະສົບການຂອງປະທານໂຈເຊັບ ແອັຟ ສະມິດ ໃນ ຄຳສອນ ແລະ ພັນທະສັນຍາ 138:1–11, ໃຫ້ພິຈາລະນາວ່າທ່ານຈະສາມາດສົ່ງເສີມການໄຕ່ຕອງ ແລະ ເຊື້ອເຊີນຄວາມປະທັບໃຈທາງວິນຍານໃຫ້ກັບຕົວທ່ານເອງ ແລະ, ຖ້າວ່າທ່ານເປັນຄູສອນເດ, ທ່ານຈະຊ່ວຍຄົນທີ່ທ່ານສິດສອນແນວໃດ.

ຄຳສອນ ແລະ ພັນທະສັນຍາ 138:25–60

ວຽກງານຂອງພຣະຜູ້ຊ່ວຍໃຫ້ລອດຈະສືບຕໍ່ຢູ່ຟາກມ່ານເບື້ອງນັ້ນ.

ປະທານຣະໂຊ ເອັມ ແນວສັນ ໄດ້ສິດສອນວ່າ, “ຂ່າວສານຂອງພວກເຮົາຕໍ່ໂລກແມ່ນລຽບງ່າຍ ແລະ ຈິງໃຈ ທີ່ວ່າ: ພວກເຮົາຂໍເຊື້ອເຊີນລູກໆຂອງພຣະເຈົ້າທຸກຄົນ ທັງສອງຟາກມ່ານ ໃຫ້ມາຫາພຣະຜູ້ຊ່ວຍໃຫ້ລອດ, ຮັບເອົາພອນຂອງພຣະວິຫານທີ່ສັກສິດ, ມີຄວາມສຸກທີ່ຍືນຍາວ, ແລະ ເໝາະສົມສຳລັບຊີວິດນິລັນດອນ” (“Let Us All Press On,” Liahona, May 2018, 118–19). ໃຫ້ໄຕ່ຕອງຂໍ້ຄວາມນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 138:25–60. ທ່ານກໍສາມາດພິຈາລະນາກ່ຽວກັບຄຳຖາມດັ່ງຕໍ່ໄປນີ້ຄືກັນ:

ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບວິທີທີ່ວຽກງານຂອງພຣະຜູ້ຊ່ວຍໃຫ້ລອດກຳລັງດຳເນີນຢູ່ໃນໂລກວິນຍານ? ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້ວ່າ ວຽກງານນີ້ກຳລັງເກີດຂຶ້ນຢູ່?
ແມ່ນຫຍັງທີ່ປະທັບໃຈທ່ານກ່ຽວກັບຜູ້ສົ່ງຂ່າວຂອງພຣະຜູ້ເປັນເຈົ້າໃນໂລກວິນຍານ?
ການເປີດເຜີຍນີ້ໃຫ້ຄວາມເຂັ້ມແຂງແກ່ສັດທາຂອງທ່ານ ໃນແຜນແຫ່ງການໄຖ່ຂອງພຣະເຈົ້າແນວໃດ?

ຖ້າທ່ານຕ້ອງການຮຽນຮູ້ເພີ່ມເຕີມກ່ຽວກັບໂລກວິນຍານ, ທ່ານສາມາດສຶກສາຂ່າວສານຂອງປະທານດາລິນ ເອັຈ ໂອກສ໌ “Trust in the Lord” (Liahona, Nov. 2019, 26–29).

ເບິ່ງ “Susa Young Gates and the Vision of the Redemption of the Dead,” ໃນ Revelations in Context, 315–22; “A Visit from Father” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

A Visit from Father
President Russell M. Nelson recounts a personal family history story that bears testimony of the importance of temple and family history work for all families.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 137:5–10; 138:18–35

ລູກໆທັງໝົດຂອງພຣະບິດາເທິງສະຫວັນຈະມີໂອກາດໄດ້ຍິນພຣະກິດຕິຄຸນ.

ເພື່ອຮຽນຮູ້ກ່ຽວກັບວ່າໂຈເຊັບ ສະມິດ ຮູ້ສຶກແນວໃດເມື່ອເພິ່ນເຫັນສະມາຊິກໃນຄອບຄົວຂອງເພິ່ນໄດ້ຢູ່ນຳກັນໃນອານາຈັກຊັ້ນສູງ, ລູກໆຂອງທ່ານສາມາດເບິ່ງວິດີໂອ “Ministry of Joseph Smith: Temples” (ຫ້ອງສະໝຸດພຣະກິດຕິຄຸນ), ຫລື ທ່ານສາມາດແບ່ງປັນ ເລື່ອງລາວຕ່າງໆໃນຄຳສອນ ແລະ ພັນທະສັນຍາ, 152–53 (ຫລື ວິດີໂອທີ່ສອດຄ່ອງກັນໃນຫ້ອງສະໝຸດພຣະກິດຕິຄຸນ). ບາງທີພວກທ່ານກໍສາມາດເວົ້າລົມກັນກ່ຽວກັບບາງຄົນທີ່ພວກທ່ານຮູ້ຈັກ ທີ່ໄດ້ເສຍຊີວິດປາດສະຈາກໂອກາດໄດ້ຮັບບັບຕິສະມາ. ຄຳສອນ ແລະ ພັນທະສັນຍາ 137:5–10 ສິດສອນຫຍັງແດ່ກ່ຽວກັບບຸກຄົນນັ້ນ?

2:3
Ministry of Joseph Smith: Temples
Joseph Smith establishes temple work as an essential purpose for the Saints of God.

2:17
Chapter 39: The Kirtland Temple Is Dedicated: January–March 1836
ໃຫ້ພິຈາລະນາການນຳໃຊ້ຮູບພາບອຸບມຸງຂອງພຣະຜູ້ຊ່ວຍໃຫ້ລອດ (ເບິ່ງ ປື້ມຮູບພຣະກິດຕິຄຸນ, ເລກທີ 58, ຫລື ຮູບຖ່າຍໃນພຣະຄຣິສຕະທຳຄຳພີ, ເລກທີ 14) ແລະ ຮູບພາບຢູ່ໃນທ້າຍຂອງໂຄງຮ່າງນີ້ ເພື່ອສິດສອນລູກໆຂອງທ່ານວ່າພຣະວິນຍານຂອງພຣະເຢຊູໄດ້ໄປບ່ອນໃດໃນຕອນທີ່ພຣະກາຍຂອງພຣະອົງຢູ່ທີ່ອຸບມຸງ. ຈາກນັ້ນພວກທ່ານກໍສາມາດອ່ານ ຄຳສອນ ແລະ ພັນທະສັນຍາ 138:18–19, 23–24, 27–30 ນຳກັນ ເພື່ອຮຽນຮູ້ສິ່ງທີ່ພຣະເຢຊູໄດ້ກະທຳຂະນະທີ່ພຣະອົງຢູ່ທີ່ນັ້ນ. ພຣະອົງໄດ້ຢ້ຽມຢາມໃຜ? ພຣະອົງໄດ້ຂໍໃຫ້ພວກເຂົາເຮັດຫຍັງ? ເປັນຫຍັງພຣະອົງຈຶ່ງເຮັດແບບນີ້?
ທ່ານຍັງສາມາດນຳໃຊ້ ໜ້າກິດຈະກຳ ຂອງອາທິດນີ້ ເພື່ອຊ່ວຍໃຫ້ລູກໆຂອງທ່ານປຽບທຽບກ່ຽວກັບສິ່ງທີ່ຜູ້ສອນສາດສະໜາສິດສອນຢູ່ຟາກມ່ານເບື້ອງນີ້ (ເບິ່ງ, ຍົກຕົວຢ່າງ, ຫລັກແຫ່ງຄວາມເຊື່ອ 1:4) ກັບສິ່ງທີ່ຜູ້ສອນສາດສະໜາສິດສອນໃນໂລກວິນຍານ (ເບິ່ງ ຄຳສອນ ແລະ ພັນທະສັນຍາ 138:33). ແມ່ນຫຍັງທີ່ຄ້າຍຄືກັນໃນຂໍ້ເຫລົ່ານີ້, ແລະ ແມ່ນຫຍັງແດ່ທີ່ແຕກຕ່າງ? ສິ່ງນີ້ສິດສອນເຮົາຫຍັງແດ່ກ່ຽວກັບພຣະບິດາເທິງສະຫວັນ ແລະ ແຜນຂອງພຣະອົງ?

ເດັກນ້ອຍກຳລັງອ່ານພຣະຄຳພີ — ການໄຕ່ຕອງພຣະຄຳພີເຊື້ອເຊີນພຣະວິນຍານບໍລິສຸດ.

ຄຳສອນ ແລະ ພັນທະສັນຍາ 138:1–11

ເມື່ອເຮົາໄຕ່ຕອງພຣະຄຳພີ, ພຣະວິນຍານບໍລິສຸດສາມາດຊ່ວຍເຮົາໃຫ້ເຂົ້າໃຈມັນ.

ຂະນະທີ່ທ່ານ ແລະ ລູກໆຂອງທ່ານອ່ານ ຄຳສອນ ແລະ ພັນທະສັນຍາ 138:1–11 ນຳກັນ, ທ່ານສາມາດເຊື້ອເຊີນພວກເຂົາໃຫ້ທຳທ່າວ່າຕົວເອງເປັນປະທານໂຈເຊັບ ແອັຟ ສະມິດ ແລະ ສະແດງຕາມຂໍ້ຄວາມທີ່ຢູ່ໃນ ຂໍ້ທີ 6 ແລະ 11. ທ່ານອາດຈະສະແດງຮູບຂອງປະທານສະມິດໃຫ້ພວກເຂົາເບິ່ງນຳອີກ (ຊຶ່ງມີຢູ່ໃນໂຄງຮ່າງນີ້ແລ້ວ) ແລະ ອະທິບາຍວ່າເພິ່ນຄືປະທານຄົນທີຫົກຂອງສາດສະໜາຈັກ. ພວກທ່ານກໍຍັງສາມາດເວົ້າລົມກັນກ່ຽວກັບເວລາທີ່ພວກທ່ານໄຕ່ຕອງກ່ຽວກັບບາງສິ່ງບາງຢ່າງ ໃນພຣະຄຳພີ ແລະ ພຣະວິນຍານບໍລິສຸດກໍໄດ້ຊ່ວຍເຫລືອໃຫ້ພວກທ່ານເຂົ້າໃຈ.
ໃຫ້ຄິດທີ່ຈະຮ້ອງເພງນຳກັນກ່ຽວກັບການສຶກສາພຣະຄຳພີ, ເຊັ່ນ ຈາລຶກທອງຄຳ” (ເພງສວດ ແລະ ເພງຂອງເດັກນ້ອຍ, 71). ເພງນີ້ເວົ້າວ່າ ເຮົາຄວນເຮັດຫຍັງແດ່ເພື່ອທີ່ຈະເຂົ້າໃຈພຣະຄຳພີ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະເຢຊູຄຣິດຢູ່ໃນໂລກວິນຍານ — The Commissioned [ການມອບໝາຍ], ໂດຍ ແຮໂຣນ ໄອ ຮອບຄິນສັນ