“ວັນທີ 8–14 ເດືອນທັນວາ: ‘ພວກເຮົາເຊື່ອ’: ຫລັກແຫ່ງຄວາມເຊື່ອ ແລະ ຂໍ້ປະກາດຢ່າງເປັນທາງການ 1 ແລະ 2,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຫລັກແຫ່ງຄວາມເຊື່ອ ແລະ ຂໍ້ປະກາດຢ່າງເປັນທາງການ 1 ແລະ 2,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ To All Worthy Male Members [ຕໍ່ສະມາຊິກຜູ້ຊາຍທີ່ມີຄ່າຄວນທຸກຄົນ], ໂດຍ ເອມມາ ອາລີເບສ

ວັນທີ 8–14 ເດືອນທັນວາ: “ພວກເຮົາເຊື່ອ”

ຫລັກແຫ່ງຄວາມເຊື່ອ ແລະ ຂໍ້ປະກາດຢ່າງເປັນທາງການ 1 ແລະ 2

ຕັ້ງແຕ່ພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ, ພຣະເຈົ້າກໍໄດ້ສືບຕໍ່ນຳພາສາດສະໜາຈັກຂອງພຣະອົງໂດຍການເປີດເຜີຍ. ໃນບາງກໍລະນີ, ການເປີດເຜີຍດັ່ງກ່າວໄດ້ລວມການປ່ຽນແປງນະໂຍບາຍ ແລະ ແນວທາງປະຕິບັັດຂອງສາດສະໜາຈັກ. ຂໍ້ປະກາດຢ່າງເປັນທາງການ 1 ແລະ 2 ໄດ້ປະກາດການເປີດເຜີຍປະເພດນີ້—ຢ່າງໜຶ່ງໄດ້ນຳໄປສູ່ການຍົກເລີກການແຕ່ງເມຍຫລາຍຄົນ, ແລະ ອີກຢ່າງໜຶ່ງແມ່ນໄດ້ເຮັດໃຫ້ພອນຂອງຖານະປະໂລຫິດ ມີໃຫ້ຜູ້ຄົນທຸກເຊື້ອຊາດ. ການປ່ຽນແປງເຊັ່ນນີ້ ເປັນສ່ວນໜຶ່ງຂອງຄວາມໝາຍຂອງການມີ “ສາດສະໜາຈັກທີ່ແທ້ຈິງ ແລະ ດຳລົງຢູ່” (ຄຳສອນ ແລະ ພັນທະສັນຍາ 1:30), ພ້ອມດ້ວຍສາດສະດາທີ່ແທ້ຈິງ ແລະ ມີຊີວິດຢູ່, ນຳພາໂດຍພຣະເຈົ້າທີ່ແທ້ຈິງ ແລະ ຊົງພຣະຊົນຢູ່.

ແຕ່ຄວາມຈິງນິລັນດອນບໍ່ປ່ຽນແປງ, ເຖິງແມ່ນຄວາມເຂົ້າໃຈຂອງເຮົາກ່ຽວກັບມັນຈະປ່ຽນແປງໄປກໍຕາມ. ແລະ ບາງເທື່ອ ການເປີດເຜີຍກໍສ່ອງແສງເພີ່ມເຕີມໃສ່ຄວາມຈິງ. ຫລັກແຫ່ງຄວາມເຊື່ອ ເຮັດໃຫ້ຈຸດປະສົງນີ້ກະຈ່າງແຈ້ງ. ສາດສະໜາຈັກໄດ້ຖືກກໍ່ຕັ້ງຂຶ້ນຢ່າງແຂງແກ່ນເທິງຄວາມຈິງນິລັນດອນທີ່ສາມາດເຕີບໂຕ ແລະ ປ່ຽນແປງໄດ້ “ຕາມທີ່ພຣະຜູ້ເປັນເຈົ້າຈະປະສົງ, ເໝາະສົມຕໍ່ຄວາມເມດຕາຂອງພຣະອົງຕາມສະພາບຂອງລູກຫລານມະນຸດ” (ຄຳສອນ ແລະ ພັນທະສັນຍາ 46:15). ໃນອີກຄຳໜຶ່ງ, “ພວກເຮົາເຊື່ອທັງໝົດທີ່ພຣະເຈົ້າໄດ້ເປີດເຜີຍມາ, ທັງໝົດທີ່ພຣະອົງເປີດເຜີຍຢູ່ໃນຂະນະນີ້ ແລະ ພວກເຮົາເຊື່ອວ່າ ພຣະອົງຈະເປີດເຜີຍເລື່ອງສຳຄັນ ແລະ ຍິ່ງໃຫຍ່ອີກຫລາຍເລື່ອງກ່ຽວກັບອານາຈັກຂອງພຣະເຈົ້າ” (ຫລັກແຫ່ງຄວາມເຊື່ອ 1:9).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຫລັກແຫ່ງຄວາມເຊື່ອ

ຫລັກແຫ່ງຄວາມເຊື່ອ ບັນຈຸຮາກຖານແຫ່ງຄວາມຈິງຂອງພຣະກິດຕິຄຸນທີ່ຖືກຟື້ນຟູ.

ໃຫ້ພິຈາລະນາແນວທາງນີ້ໃນການສຶກສາຫລັກແຫ່ງຄວາມເຊື່ອ: ສຳລັບຫລັກແຫ່ງຄວາມເຊື່ອແຕ່ລະຂໍ້, ໃຫ້ເຮັດ “ບົດຮຽນນ້ອຍໆ” ເພື່ອອະທິບາຍສິ່ງທີ່ທ່ານເຊື່ອ. ບົດຮຽນນ້ອຍໆສາມາດລວມມີຂໍ້ພຣະຄຳພີທີ່ກ່ຽວຂ້ອງ, ຮູບພາບ, ເພງສວດ ຫລື ເພງຂອງເດັກນ້ອຍ, ຫລື ປະສົບການສ່ວນຕົວກ່ຽວກັບຄວາມຈິງທີ່ມີຊີວິດ ທີ່ຫລັກແຫ່ງຄວາມເຊື່ອສິດສອນ.

ຄວາມຈິງເຫລົ່ານີ້ສ້າງຄວາມແຕກຕ່າງໃຫ້ກັບຄວາມສຳພັນຂອງທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດແນວໃດ? ຫລັກແຫ່ງຄວາມເຊື່ອໄດ້ປັບປຸງການສຶກສາພຣະກິດຕິຄຸນຂອງທ່ານ ຫລື ຊ່ວຍໃຫ້ທ່ານແບ່ງປັນພຣະກິດຕິຄຸນກັບຄົນອື່ນໄດ້ແນວໃດ?

ເບິ່ງ ຄູ່ມືພຣະຄຳພີ, “ຫລັກແຫ່ງຄວາມເຊື່ອ,” ຫ້ອງສະໝຸດພຣະກິດຕິຄຸນ; L. Tom Perry, “The Doctrines and Principles Contained in the Articles of Faith,” Liahona, Nov. 2013, 46–48; “Chapter 38: The Wentworth Letter,” ໃນ Teachings of Presidents of the Church: Joseph Smith (2011), 435–47 ນຳອີກ.

ຫລັກແຫ່ງຄວາມເຊື່ອ 1:9; ຂໍ້ປະກາດຢ່າງເປັນທາງການ 1 ແລະ 2

ສາດສະໜາຈັກຂອງພຣະເຢຊູຄຣິດຖືກນຳພາໂດຍການເປີດເຜີຍ.

“ພວກເຮົາເຊື່ອວ່າ [ພຣະເຈົ້າ] ຈະເປີດເຜີຍເລື່ອງສຳຄັນ ແລະ ຍິ່ງໃຫຍ່ອີກຫລາຍເລື່ອງກ່ຽວກັບອານາຈັກຂອງພຣະເຈົ້າ” (ຫລັກແຫ່ງຄວາມເຊື່ອ 1:9). ໂດຍທີ່ມີຫລັກທຳຂໍ້ນີ້ຢູ່ໃນໃຈ, ໃຫ້ທົບທວນ ຂໍ້ປະກາດຢ່າງເປັນທາງການ 1 ແລະ 2, ແລະ ຊອກຫາຄຳ ແລະ ວະລີທີ່ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານ ໃນການເປີດເຜີຍອັນຕໍ່ເນື່ອງ. ການເປີດເຜີຍເຫລົ່ານີ້ມີຜົນກະທົບຕໍ່ຊີວິດຂອງທ່ານແນວໃດ? ການເປີດເຜີຍເຫລົ່ານີ້ໄດ້ຊ່ວຍໃຫ້ວຽກງານອານາຈັກຂອງພຣະບິດາເທິງສະຫວັນກ້າວໜ້າໄດ້ແນວໃດ?

ທ່ານເຫັນຫລັກຖານອັນໃດແດ່ວ່າ ສາດສະໜາຈັກໄດ້ຖືກນຳພາ “ໂດຍການດົນໃຈຈາກພຣະເຈົ້າຜູ້ຊົງລິດອຳນາດຍິ່ງໃຫຍ່” ໃນສະໄໝນີ້? (ຂໍ້ປະກາດຢ່າງເປັນທາງການ 1). ບາງທີທ່ານກໍສາມາດທົບທວນ ຂ່າວສານກອງປະຊຸມໃຫຍ່ສາມັນລ່າສຸດ, ບົດໜຶ່ງ ຫລື ຫລາຍກວ່າ, ເພື່ອຊອກຫາວິທີທີ່ພຣະຜູ້ເປັນເຈົ້ານຳພາສາດສະໜາຈັກຂອງພຣະອົງ—ແລະ ຊີວິດຂອງທ່ານ. ຂ່າວສານລ່າສຸດທີ່ສຸດຈາກປະທານຂອງສາດສະໜາຈັກອາດເປັນບ່ອນເລີ່ມຕົ້ນທີ່ດີ.

ທ່ານສາມາດເຮັດຫຍັງໄດ້ແດ່ ຖ້າຫາກທ່ານ ຫລື ຄົນທີ່ທ່ານຮັກດີ້ນຮົນທີ່ຈະເຂົ້າໃຈ ຫລື ຍອມຮັບສິ່ງທີ່ພຣະຜູ້ເປັນເຈົ້າສິດສອນຜ່ານທາງບັນດາສາດສະດາຂອງພຣະອົງ? ເປັນຫຍັງທ່ານຈຶ່ງກະຕັນຍູສຳລັບສາດສະດາ?

ເບິ່ງ ອາໂມດ 3:7; 2 ນີໄຟ 28:30; Allen D. Haynie, “A Living Prophet for the Latter Days,” Liahona, May 2023, 25–28; Topics and Questions, “Prophets,” ຫ້ອງສະໝຸດພຣະກິດຕິຄຸນ; “ເຮົາຂອບພຣະໄທສຳລັບສາດສະດາ,” ເພງສວດ ແລະ ເພງຂອງເດັກນ້ອຍ, 40 ນຳອີກ.

ຂໍ້ປະກາດຢ່າງເປັນທາງການ 1

ວຽກງານຂອງພຣະເຈົ້າຕ້ອງດຳເນີນໄປໜ້າ.

ໃນ “ຂໍ້ຄວາມທີ່ຂັດເລືອກອອກມາຈາກຄຳປາໄສສາມບົດ ຊຶ່ງກ່າວໂດຍປະທານວິວເຝີດ ວູດຣັບ ກ່ຽວກັບຄຳຖະແຫລງນະໂຍບາຍ” (ທີ່ຢູ່ໃນທ້າຍ ຂໍ້ປະກາດຢ່າງເປັນທາງການ 1), ມີເຫດຜົນໃດແດ່ທີ່ສາດສະດາໄດ້ໃຫ້ໄວ້ ເຖິງເຫດຜົນທີ່ພຣະຜູ້ເປັນເຈົ້າໄດ້ຍົກເລີກການແຕ່ງເມຍຫລາຍຄົນ? ສິ່ງນີ້ສິດສອນທ່ານຫຍັງແດ່ກ່ຽວກັບວຽກງານຂອງພຣະເຈົ້າ?

ສຳລັບຂໍ້ມູນເພີ່ມເຕີມກ່ຽວກັບປະຫວັດຄວາມເປັນມາຂອງ ຂໍ້ປະກາດຢ່າງເປັນທາງການ 1, ໃຫ້ເບິ່ງ Saints, 2:602–15; “The Messenger and the Manifesto,” ໃນ Revelations in Context, 323–31; Topics and Questions, “Plural Marriage and Families in Early Utah,” ຫ້ອງສະໝຸດພຣະກິດຕິຄຸນ.

ຂໍ້ປະກາດຢ່າງເປັນທາງການ 2

ເຮົາສາມາດໄວ້ວາງໃຈໃນພຣະຜູ້ເປັນເຈົ້າ, ແມ່ນແຕ່ຕອນທີ່ເຮົາບໍ່ມີຄວາມເຂົ້າໃຈທີ່ສົມບູນ.

ພວກເຮົາບໍ່ຮູ້ວ່າ ເປັນຫຍັງພິທີການແຕ່ງຕັ້ງສູ່ຖານະປະໂລຫິດ ແລະ ພິທີການພຣະວິຫານ ບໍ່ໄດ້ມີໃຫ້ສຳລັບສະມາຊິກຂອງສາດສະໜາຈັກທີ່ມີເຊື້ອສາຍອາຟຣິກາເປັນເວລາຊົ່ວໄລຍະໜຶ່ງ. ແມ່ນແຕ່ຕອນທີ່ປະເຊີນກັບຄຳຖາມທີ່ຍາກທີ່ບໍ່ມີຄຳຕອບກ່ຽວກັບນະໂຍບາຍນັ້ນກໍຕາມ, ໄພ່ພົນຍຸກສຸດທ້າຍຄົນອາຟຣິກາ ໄດ້ໄວ້ວາງໃຈໃນພຣະຜູ້ເປັນເຈົ້າ (ເບິ່ງ ສຸພາສິດ 3:5) ແລະ ຍັງຄົງຊື່ສັດຕໍ່ພຣະອົງໄປຕະຫລອດຊີວິດຂອງພວກເຂົາ. ການຮຽນຮູ້ກ່ຽວກັບສັດທາ ແລະ ປະສົບການຂອງພວກເຂົາ ສາມາດເປັນແຮງບັນດານໃຈແກ່ທ່ານໄດ້. ຕໍ່ໄປນີ້ແມ່ນເລື່ອງລາວຈຳນວນໜຶ່ງຂອງພວກເຂົາ, ຢູ່ໃນ history.ChurchofJesusChrist.org:

“Jane Elizabeth Manning James”
“In My Father’s House Are Many Mansions” (ເລື່ອງລາວຂອງ ກຣີນ ຟະເລັກ)
“You Have Come at Last” (ເລື່ອງລາວຂອງ ແອນຕະນີ ໂອບິນນາ)
“Break the Soil of Bitterness” (ເລື່ອງລາວຂອງ ຈູເລຍ ມາວິມເບລາ)
“I Will Take It in Faith” (ເລື່ອງລາວຂອງ ຈອດ ຣິກຝອດ)
“Long-Promised Day” (ເລື່ອງລາວຂອງ ໂຈເຊັບ ດັບເບິນຢູ ບີ ຈອນສັນ)

ຂະນະທີ່ທ່ານອ່ານ ຂໍ້ປະກາດຢ່າງເປັນທາງການ 2, ທ່ານຮຽນຮູ້ຫຍັງແດ່ກ່ຽວກັບຂັ້ນຕອນຂອງພຣະຜູ້ເປັນເຈົ້າໃນການນຳທາງນະໂຍບາຍຂອງສາດສະໜາຈັກຂອງພຣະອົງ? ໄຕ່ຕອງວິທີທີ່ທ່ານໄດ້ຮຽນຮູ້ທີ່ຈະໄວ້ວາງໃຈໃນພຣະຜູ້ເປັນເຈົ້າ ແມ່ນແຕ່ຕອນທີ່ທ່ານບໍ່ມີຄວາມເຂົ້າໃຈທີ່ສົມບູນ.

ເບິ່ງ 2 ນີໄຟ 26:33; “Witnessing the Faithfulness,” ໃນ Revelations in Context, 332–41; Topics and Questions, “Race and the Priesthood,” ຫ້ອງສະໝຸດພຣະກິດຕິຄຸນ; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org ນຳອີກ.

ມັນບໍ່ເປັນຫຍັງທີ່ຈະເວົ້າວ່າ “ຂ້ອຍບໍ່ຮູ້.” ຂະນະທີ່ທ່ານຄວນພະຍາຍາມສຸດຄວາມສາມາດເພື່ອຊ່ວຍຄົນທີ່ທ່ານສິດສອນຕອບຄຳຖາມຂອງພວກເຂົາກ່ຽວກັບພຣະກິດຕິຄຸນ, ພຣະຜູ້ເປັນເຈົ້າບໍ່ໄດ້ຄາດຫວັງໃຫ້ທ່ານຮູ້ທຸກຢ່າງ. ເມື່ອທ່ານບໍ່ຮູ້ຈັກທີ່ຈະຕອບບາງຢ່າງ, ໃຫ້ຍອມຮັບມັນ. ແລ້ວຊີ້ຜູ້ຮຽນໄປຍັງຄຳສອນທີ່ຖືກເປີດເຜີຍແລ້ວ, ແລະ ແບ່ງປັນປະຈັກພະຍານທີ່ຈິງໃຈກ່ຽວກັບສິ່ງທີ່ທ່ານຮູ້.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຫລັກແຫ່ງຄວາມເຊື່ອ

ເຮົາສາມາດເຊື່ອໃນພຣະກິດຕິຄຸນຂອງພຣະເຢຊູຄຣິດ.

ໃຫ້ພິຈາລະນາທີ່ຈະຊອກຫາ ແລະ ຮ້ອງເພງສວດ ຫລື ເພງຂອງເດັກນ້ອຍທີ່ສາມາດຊ່ວຍໃຫ້ລູກໆຂອງທ່ານເຂົ້າໃຈ ຫລັກແຫ່ງຄວາມເຊື່ອ ຂໍ້ໜຶ່ງ ຫລື ຫລາຍກວ່ານັ້ນ. ບາງທີພວກເຂົາກໍສາມາດຊ່ວຍທ່ານເລືອກເພງສວດ ແລະ ເພງຕ່າງໆໄດ້. ຊ່ວຍໃຫ້ລູກໆຂອງທ່ານເຫັນວ່າ ເພງຕ່າງໆກ່ຽວຂ້ອງກັບ ຫລັກແຫ່ງຄວາມເຊື່ອ.
ທ່ານ ແລະ ລູກໆຂອງທ່ານສາມາດເຮັດວຽກນຳກັນເພື່ອຂຽນຄຳຖາມທີ່ຄົນທັງຫລາຍອາດມີກ່ຽວກັບພຣະກິດຕິຄຸນຂອງພຣະເຢຊູຄຣິດ ຫລື ສາດສະໜາຈັກຂອງພຣະອົງ. ແລ້ວພວກທ່ານກໍສາມາດເຮັດວຽກນຳກັນ ເພື່ອຕອບຄຳຖາມເຫລົ່ານັ້ນ ໂດຍການໃຊ້ ຫລັກແຫ່ງຄວາມເຊື່ອ. ເຮົາສາມາດໄປໃສໄດ້ອີກ ເມື່ອເຮົາມີຄຳຖາມກ່ຽວກັບພຣະກິດຕິຄຸນ?

ຫລັກແຫ່ງຄວາມເຊື່ອ 1:9; ຂໍ້ປະກາດຢ່າງເປັນທາງການ 1 ແລະ 2

ພຣະຜູ້ເປັນເຈົ້ານຳພາສາດສະໜາຈັກຂອງພຣະອົງຜ່ານທາງສາດສະດາຂອງພຣະອົງ.

ເພື່ອຊ່ວຍໃຫ້ລູກໆຂອງທ່ານເຂົ້າໃຈ ຫລັກແຫ່ງຄວາມເຊື່ອຂໍ້ທີເກົ້າ, ບາງທີທ່ານກໍສາມາດເອົາພຣະຄຳພີຊຸດໜຶ່ງ ແລະ ຮູບຂອງສາດສະດາທີ່ມີຊີວິດຢູ່ (ຫລື Liahona ສະບັບກອງປະຊຸມໃຫຍ່ລ່າສຸດ) ໃຫ້ພວກເຂົາ. ຂໍໃຫ້ພວກເຂົາຍົກພຣະຄຳພີຂຶ້ນ ຂະນະທີ່ທ່ານອ່ານຖ້ອຍຄຳທີ່ວ່າ “ທັງໝົດທີ່ພຣະເຈົ້າໄດ້ເປີດເຜີຍມາ” ແລະ ຮູບຂອງວາລະສານ ເມື່ອທ່ານອ່ານ “ທັງໝົດທີ່ພຣະອົງເປີດເຜີຍຢູ່ໃນຂະນະນີ້” (ຫລັກແຫ່ງຄວາມເຊື່ອ 1:9). ເປັນຫຍັງເຮົາຈຶ່ງຕ້ອງການທັງສາດສະດາສະໄໝບູຮານ ແລະ ສາດສະດາສະໄໝໃໝ່?
ລູກໆຂອງທ່ານສາມາດຮຽນຮູ້ວິທີທີ່ຖ້ອຍຄຳຂອງສາດສະດານຳພາເຮົາ ໂດຍການຕິດຕາມຄຳແນະນຳໃນການເຮັດບາງຢ່າງ, ເຊັ່ນ ອາຫານ ຫລື ຂອງຫລິ້ນ. ທ່ານສາມາດປຽບທຽບຄຳແນະນຳທີ່ພຣະເຢຊູຄຣິດປະທານໃຫ້ແກ່ເຮົາຜ່ານທາງສາດສະດາ. ແມ່ນຫຍັງຄືບາງສິ່ງທີ່ພຣະຜູ້ເປັນເຈົ້າໄດ້ສິດສອນເຮົາຜ່ານທາງສາດສະດາທີ່ມີຊີວິດຢູ່ຂອງພຣະອົງໃນສະໄໝນີ້?

ເດັກນ້ອຍກຳລັງເບິ່ງກອງປະຊຸມໃຫຍ່ສາມັນ — ພຣະອົງເອີ້ນສາດສະດາເພື່ອນຳພາສາດສະໜາຈັກຂອງພຣະອົງ.

ຂໍ້ປະກາດຢ່າງເປັນທາງການ 1 ແລະ 2

ສາດສະດາຊ່ວຍໃຫ້ເຮົາຮູ້ຈັກພຣະປະສົງຂອງພຣະບິດາເທິງສະຫວັນ.

ບາງທີການເຫັນວ່າ ພຣະຄຳພີສະໄໝບູຮານກ່ຽວຂ້ອງກັບການເປີດເຜີຍສະໄໝໃໝ່ແນວໃດ ກໍສາມາດຊ່ວຍໃຫ້ລູກໆຂອງທ່ານເຂົ້າໃຈຂໍ້ປະກາດຢ່າງເປັນທາງການໄດ້. ທ່ານສາມາດຂໍໃຫ້ພວກເຂົາອ່ານ ກິດຈະການ 10:34–35 ແລະ ຢາໂຄບ 2:27–30 ແລະ ເຊື້ອເຊີນພວກເຂົາໃຫ້ພິຈາລະນາວ່າ ຂໍ້ພຣະຄຳພີໃດກ່ຽວຂ້ອງກັບ ຂໍ້ປະກາດຢ່າງເປັນທາງການ 1 (ຊຶ່ງນຳໄປສູ່ການຍົກເລີກການແຕ່ງເມຍຫລາຍຄົນ) ແລະ ຂໍ້ໃດກ່ຽວຂ້ອງກັບ ຂໍ້ປະກາດຢ່າງເປັນທາງການ 2 (ຊຶ່ງປະກາດວ່າ ພິທີການແຕ່ງຕັ້ງສູ່ຖານະປະໂລຫິດ ແລະ ພິທີການພຣະວິຫານ ແມ່ນມີໃຫ້ສຳລັບຄົນທຸກເຊື້ອຊາດ). ແບ່ງປັນປະຈັກພະຍານຂອງທ່ານວ່າ ພຣະຜູ້ເປັນເຈົ້າເປີດເຜີຍພຣະປະສົງຂອງພຣະອົງຕໍ່ສາດສະດາສະໄໝບູຮານ ແລະ ສາດສະດາສະໄໝໃໝ່.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.