Disiembre 15–21: “Ti Kaamaan ti Sentro iti Plano ti Nailangitan nga Ama”

Ti Kaamaan: Maysa a Waragawag iti Lubong

Uray sakbay a nayanaktayo, pasettayo iti maysa a pamilia—ti pamilia dagiti nailangitan a nagannaktayo. Agtultuloy dayta a pagtuladan ditoy daga. Dagiti pamilia ditoy, iti kasayaatan a kasasaadda, ket nairanta a mangyallingag iti naan-anay a pagtuladan idiay langit.

Kinapudnona, awan dagiti pammasingked nga agbalinto a pagulidanan dagiti pamilia iti daga wenno managrebbeng. Ngem kas iti insuro ni Presidente Henry B. Eyring, dagiti pamilia ti “mangted kadagiti annak ti Dios iti kasayaatan a gundaway a mapasangbayda iti lubong iti kakaisuna nga ayat iti daga a kapada iti no ania ti nariknatayo iti langit—ayat ti nagannak” (“Gathering the Family of God,” Liahona, Mayo 2017, 20). Ti pannakaammo a saan a perpekto dagiti pamilia ken maipasangodanto kadagiti idadarup ti kabusor, imbaon ti Dios ti Patpatgenna nga Anak a mangsubbot kadatayo ken mangpaimbag kadagiti pamiliatayo. Ket impatulodna dagiti propeta iti ud-udina nga aldaw nga addaan iti maysa a waragawag a mangsaluad ken mangpapigsa kadagiti pamilia. No surotentayo dagiti propeta ken mamatitayo iti Mangisalakan, uray pay no agkurang dagiti mortal a pamilia iti nadiosan a pagulidanan, adda namnama para kadagiti pamilia—iti daga ken iti langit.

Dagiti Kapanunotan iti Panagsursuro iti Pagtaengan ken iti Simbaan

“Ti kaamaan ti kangrunaan iti plano ti Namarsua.”

“Ti Kaamaan: Maysa a Waragawag iti Lubong” ket nalawag a maipapan kadagiti pamilia. Ngem maipada daytoy maipapan iti plano ti Dios iti pannakaisalakan. Ti maysa a wagas a panagadal iti waragawag ket ti panangisurat kadagiti ragup ti balikas a biag sakbay daytoy a biag (premortal life), biag iti daga (mortal life), ken biag kalpasan daytoy a biag (post mortal life) iti maysa a papel ken ilista no ania ti isuro ti waragawag maipapan iti tunggal maysa kadagitoy a topiko. Ania ti masursuroyo no adalenyo ti waragawag iti kastoy a wagas? Kasano a makatulong daytoy kadakayo a makaawat no apay a napateg ti kallaysa ken ti pamilia iti plano ti Dios? Kasano nga impluensiaan dagiti kinapudno iti waragawag dagiti piliyo

Adu dagiti tao a, gapu iti nadumaduma a rason, mabalin a mabutengda maipapan iti panagasawa wenno panangpadakkel kadagiti annak. No kuna ti maysa a gayyem kadakayo, “Diak pulos kayat ti makiasawa wenno maaddaan iti pamilia,” ania koma ti isaoyo? Nalabit a mabalinyo a sukisoken ti waragawag a mangsapsapul iti maysa a banag a makatulong iti gayyemyo a maaddaan iti namnama iti plano ti Dios.

Ti sabali pay a saludsod a mabalin a madamag kadakayo—wenno mabalin nga isaludsodyo iti bagiyo—ket kas iti daytoy: “Kasano ngata no saan a maitunos ti kasasaad ti pamiliak iti nailadawan iti waragawag ti kaamaan? Adtoy ti dua a lugar a mabalinyo a sapulen ti naimpadtuan a balakad: ti benneg a “A Mighty Change” iti mensahe ni Elder Dieter F. Uchtdorf “Jesus Christ Is the Strength of Parents” (Liahona, Mayo 2023, 55–59) ken dagiti maudi nga uppat a parapo ti mensahe ni Elder D. Todd Christofferson “Why Marriage, Why Family” (Liahona, Mayo 2015, 52).

Ania ti mariknayo a makaparegta nga aramiden gapu iti no ania ti naadalyon?

Kitaen met iti Dallin H. Oaks, “The Plan and the Proclamation,” Liahona, Nob. 2017, 28–31; Topics and Questions, “Family,” Gospel Library.

“Tunggal [tao] ket maipatpateg nga espiritu nga anak a lalaki ken babai dagiti nailangitan a nagannak.”

Masansan a panunotentayo ti waragawag ti kaamaan a kas maysa a pangiwanwan para iti biag ti pamilia. Ngem isurona pay dagiti napateg a kinapudno maipapan iti nailangitan a pamiliatayo ken agnanayon a kinasiasinotayo. Apay a napateg a maammuanyo a pasettayo amin daytoy a pamilia? Kasano nga impluensiaan daytoy a kinapudno dagiti pili nga aramidenyo?

Kitaen met iti “I Am a Child of God,” Hymns, no. 301.

“Magun-od ti ragsak iti biag iti kaamaan no nabangon daytoy kadagiti pannursuro ni Apo Jesucristo.”

Panunoten dagiti parapo 6 ken 7 ti waragawag ti kaamaan a kas maysa a pagtuladan para iti “ragsak iti biag ti kaamaan.” Bayat ti panangbasayo kadagitoy a parapo, lasinen dagiti pagbatayan ti “naballigian a kallaysa ken kaamaan.” Mabalinyo a panunoten dagiti pagarigan dagitoy a pagbatayan a nakitayo iti bukodyo a pamilia wenno kadagiti dadduma pay a pamilia. Kasano a makatulong dagitoy a pagbatayan tapno agbalin ni Jesucristo a pundasion ti biag ti kaamaan?

Kalpasanna mabalinyo a panunoten ti maipapan iti maysa a relasion ti pamilia a kayatyo a patibkeren. Mangaramidkayo iti plano, babaen ti tulong ti Mangisalakan, nga agtignay segun kadagiti impresion a maawatyo.

Kitaen met iti L. Whitney Clayton, “The Finest Homes,” Liahona, Mayo 2020, 107–9.

Nasken a padakkelen dagiti nagannak dagiti annakda iti ayat ken kinalinteg.

“Awaganmi dagiti mapagtalkan nga umili …a mangpatalinaed ken mangpapigsa iti kaamaan.”

Ti maudi a parapo ti waragawag ti kaamaan iramanna ti awag nga agtignay. Bayat ti panangibilangyo no kasano ti panangsungbatyo iti dayta nga awag, mabalin a makatulong no adalenyo ti paulo ti waragawag. Kas pagarigan, ania ti maysa a waragawag? Ania ti ipasimudaag dayta a balikas kadakayo maipapan iti mensahe daytoy a dokumento? Ania ti nangpaikari iti Umuna a Panguluen ken Konseho dagiti Sangapulo-ket-dua nga Apostol tapno mangipaulog iti maysa a waragawag iti lubong maipanggep kadagiti kaamaan? Mabalinyo pay nga ilista no ania ti ibilangyo nga agbalin a kangrunaan a mensahe ti waragawag. Kasano a maitandudoyo dagitoy a mensahe iti biagyo, iti pagtaenganyo, ken iti komunidadyo?

Kitaen met iti Bonnie L. Oscarson, “Defenders of the Family Proclamation,” Liahona, Mayo 2015, 14–17; “Defenders of the Faith” (video), Gospel Library.

Defenders of the Faith

Marie Madeline Cardon and her family were holding a Church service in their home in Italy when an angry mob of men gathered and began shouting for the missionaries to be brought outside. It was Marie who marched out of the house to confront the mob.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Napateg dagiti pamilia iti plano ti Nailangitan nga Ama.

• Tulonganyo dagiti annakyo a mangpanunot kadagiti banag a napateg unay a kayatda nga ibaga iti tunggal maysa maipanggep kadagitoy. Ipakitayo kadagiti ubbing ti kopia ti “Ti Kaamaan: Maysa a Waragawag iti Lubong,” ken ilawlawag nga insurat dagiti propeta ken apostol daytoy tapno ibaga iti tunggal maysa no kasano ti kapateg dagiti pamilia iti Nailangitan nga Ama. Apay a napateg unay Kenkuana dagiti pamilia? (kitaen met iti video “What Is the Purpose of Family?” [ChurchofJesusChrist.org]).

  What Is the Purpose of Family?

  The family is the divine building block of society.

• Ibinglayyo kadagiti annakyo ti maysa a banag manipud iti waragawag a mariknayo a masapul a maammuantayo amin. Awisen dagiti ubbing a mangibinglay kadagiti riknada maipapan kadagita a kinapudno. Kasano a maiduma ti biagtayo no saantayo koma nga ammo dagitoy a banag? Mabalinyo ti aggigiddan nga agkansion iti maysa a kanta a mainaig kadagiti kinapudno a masarakan iti waragawag, kas iti “I Will Follow God’s Plan” (Children’s Songbook, 164–65).

• Iti benneg IV ti mensahena “The Plan and the Proclamation” (Liahona, Nob. 2017, 30), inladawan ni Presidente Dallin H. Oaks no kasano a naisurat ti waragawag ti kaamaan . Nalabit a mabalinyo ken dagiti annakyo ti mangrebyu nga aggigiddan iti panangiladawanna ken pagsasaritaan no apay nga agyamankayo a pinaregta ti Apo dagiti katulonganna tapno mangisuro kadatayo kadagitoy a kinapudno maipapan kadagiti pamilia.

• Mabalinyo pay ngaa ipakita kadagiti annakyo dagiti ladawan (wenno awisen ida nga agdrowing iti sumagmamano) a mangiladladawan kadagiti kinapudno a masarakan iti waragawag ti kaamaan. Mabalin a dagitoy ket ladawan ti maysa a templo, maysa a pamilia nga aggigiddan nga agkarkararag wenno agay-ayam, wenno maysa a pareha nga agsagsagana nga agkallaysa. Kalpasanna, mabalin a masarakan dagiti annakyo dagiti binatog iti waragawag ti kaamaan a mainaig kadagiti ladawan. Ania ti isuro ti Apo kadatayo maipapan kadagitoy a banag iti waragawag?

Kayat ti Nailangitan nga Ama nga agbalin a naragsak dagiti pamilia.

Agbalin a managrikna. Bayat ti panangisuroyo kadagiti kinapudno iti ti waragawag ti kaamaan, mannakaammokayo koma nga adu nga ubbing ti napadakkel kadagiti pamilia a saan a maitunos kadagiti pagulidanan a nailadawan iti waragawag. Ibilangyo no kasano a maallukoy ken maparegtayo ida.

Maysaak a “maipatpateg nga espiritu nga anak a lalaki wenno anak a babai dagiti nailangitan a nagannak.”

• Bayat ti panangkantayo iti “I Am a Child of God” (Children’s Songbook, 2–3), mabalinyo nga ipatulid ti bola iti maysa nga ubing bayat ti panangibagayo, “Am-ammok ti maysa nga anak ti Dios nga agnagan iti [nagan ti ubing].” Kalpasanna mabalin nga ipatulid ti ubing ti banag iti sabali pay nga ubing, a mangisasao met laeng dagiti isu met la a balikas ket ibagana ti nagan dayta nga ubing. Tulonganyo dagiti annakyo a mangsapul iti ragup ti balikas a “maipatpateg nga espiritu nga anak a lalaki wenno anak a babai dagiti nailangitan a nagannak” iti waragawag ti kaamaan, ket iburayyo ti pammaneknekyo maipapan iti daytoy a kinapudno.

Kararagsakan dagiti pamilia no surotenda ni Jesucristo.

• Tapno mairugi ti saritaan maipapan iti panangpapigsa iti pamiliayo, mabalinyo ken dagiti annakyo a pagsasaritaan maipapan iti ar-aramidentayo tapno pumigsa ti dadduma pay a banag—kas kadagiti ngipentayo, bagitayo, wenno maysa a pasdek. Kalpasanna, mabalinyo nga idilig dayta iti panangbangon iti natibker a pamilia. Tulonganyo dagiti annakyo a mangsapul kadagiti pagbatayan a kas ken ni Cristo a mangiturong iti kinaragsak iti biag ti pamilia, a masarakan iti parapo 7 ti waragawag ti kaamaan (kitaen met iti panid ti aktibidad).iti daytoy a lawas).

Para iti ad-adu pay a kapanunotan, kitaen iti isyu ti magasin a Friend iti daytoy a bulan.