Detalye gikan sa Nativity in Copper and Umber [Pasko sa Pagkatawo nga hinimo sa Tumbaga ug Dagtumon nga Brown], ni J. Kirk Richards

Disyembre 22–28: Ang Dili Katupngan nga Gasa sa Balaang Anak sa Dios

Pasko

Si Propeta Joseph Smith namahayag, “Ang sukaranan nga mga baroganan sa atong relihiyon mao ang pagpamatuod sa Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabotan sa atong relihiyon sumpay lamang niini” (Mga Pagtulon-an sa mga Presidente sa Simbahan: Joseph Smith [2011], 58). Sobra sa 160 ka tuig ang milabay, kini nga pamahayag nakadasig sa Unang Kapangulohan ug sa Korum sa Napulog Duha ka Apostoles nga imantala ang “Ang Buhi nga Kristo: Ang Pagpamatuod sa mga Apostoles” agi og pagpasidungog sa ika-2,000 nga anibersaryo sa pagkatawo sa Manluluwas (tan-awa sa Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 40).

Isip mga Santos sa Ulahing mga Adlaw, nagmaya kita diha sa panalangin sa nagpadayong pagpadayag pinaagi sa moderno nga mga propeta ug mga apostoles. Mapasalamaton kita sa ilang dinasig nga mga pulong sa pagtambag, pasidaan, ug pag-awhag. Apan labaw sa tanan, napanalanginan kita pinaagi sa ilang gamhanang mga pagpamatuod kabahin ni Jesukristo—sa panahon sa Pasko ug sa tibuok tuig. Kini labaw pa kay sa makapadasig lamang nga mga pulong sa hanas nga mga manunulat o mamumulong sa publiko o mga panabot gikan sa mga batid sa kasulatan. Mga pulong kini sa pinili sa Dios, gitawag, ug may pagtugot nga “talagsaon nga mga saksi sa ngalan ni Kristo sa tibuok kalibotan” (Doktrina ug mga Pakigsaad 107:23).

Mga Ideya alang sa Pagkat-on diha sa Panimalay ug sa Simbahan

“Walay lain sukad nga adunay hilabihan ka dili matugkad nga impluwensya.”

Unsa ang imong isulti agi og suporta sa pahayag nga “walay lain sukad nga adunay hilabihan ka dili matugkad nga impluwensya [sama ni Jesukristo] diha sa tanan kinsa nakapuyo ug mopuyo pa ibabaw sa yuta”? Pangitaa ang tudling sa mga pulong diha sa “Ang Buhi nga Kristo” nga nagpamatuod sa dili matugkad nga impluwensya sa Manluluwas. Sa unsang paagi nga Siya nakaimpluwensya nimo?

Pananglitan kon adunay usa ka tawo nga dili pamilyar sa Kristiyanismo nangutana nimo kon nganong magsaulog ka og Pasko. Unsaon nimo pagtubag? Rebyoha ang “Ang Buhi nga Kristo” nga maghunahuna niini nga pangutana, ug ikonsiderar ang pagsulat sa bisan unsa nga mga hunahuna o mga pagbati nga moabot nimo.

Tan-awa usab sa “Why We Need a Savior” (bidyo), Gospel Library.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

“Siya mibangon gikan sa lubnganan.”

Diha sa “Ang Buhi nga Kristo,” ang Apostoles nagpamatuod sa Pagkabanhaw sa Manluluwas, naghisgot og tulo ka pagpakita sa nabanhaw nga Ginoo (tan-awa sa parapo 5). Ikonsiderar ang pagbasa sa pipila ka asoy bahin niini nga mga pagbisita diha sa Juan 20; 3 Nephi 11; ug Joseph Smith—Kasaysayan 1:14–20. Unsa ang imong nakat-onan mahitungod sa Manluluwas gikan sa Iyang mga pulong ug mga gibuhat atol niini nga mga pagpakita?

Tutok diha sa Manluluwas. “Ang mainampoong pagbasa sa ‘Ang Buhi nga Kristo’ sama ra sa pagbasa sa mga pagmapamatuod nila ni Mateo, Marcos, Lucas, Juan, ug sa mga propeta diha sa Basahon ni Mormon. Mopalambo kini sa inyong pagtuo sa Manluluwas ug motabang kaninyo nga magpabiling nakatutok diha Kaniya” (M. Russell Ballard, “Mobalik ug Modawat,” Liahona, Mayo 2017, 65).

“Ang Iyang pagkapari ug ang Iyang Simbahan gipahiuli.”

Sa panahon sa imong pagtuon sa Doktrina ug mga Pakigsaad niini nga tuig, ikaw dihay oportunidad sa pagkat-on pa mahitungod sa unsa nga paagi “gipahiuli ang pagkapari ug Simbahan” sa Manluluwas.” Hain nga gipahiuling mga kamatuoran o mga baroganan ilabi ka makahuloganon kanimo? Hunahunaa ang pagrebyo sa pipila sa mosunod nga mga kasulatan nga nagtudlo mahitungod sa Pagpahiuli: Doktrina ug mga Pakigsaad 1:17–23; 13; 20:1–12; 65; 110; 112:30–32; 124:39–42; 128:19–21. Pamalandongi kon sa unsang paagi nga ang mga kamatuoran sa gipahiuli nga ebanghelyo nakatabang nimo nga makaila ug mahigugma kang Jesukristo.

“Siya sa umaabot nga adlaw mobalik nganhi sa yuta.”

Ang Pasko mao ang panahon sa pagtan-aw og balik sa adlaw nga si Jesukristo natawo ug sa pagtan-aw sa unahan ngadto sa adlaw nga Siya moanhi pag-usab. Unsa ang imong nakat-onan mahitungod sa Iyang pagbalik gikan sa ikaduha nga parapo gikan sa kataposan sa “Ang Buhi nga Kristo”? Mahimo usab nimong ikonsiderar ang pagbasa, pagkanta, o pagpaminaw sa mga himno sa Pasko nga nagtudlo mahitungod sa Ikaduhang Pag-anhi, sama sa “Kalipay sa Kalibotan” o “Miabot Nianang Hayag nga Tungang Gabii” (Mga Himno, mga nu. 120, 125).

“Siya mao ang kahayag, ang kinabuhi, ug ang paglaom sa kalibotan.”

Diha sa kataposan nga parapo sa “Ang Buhi nga Kristo,” hinumdomi ang mga kinaiya ug mga titulo nga gihatag alang sa Manluluwas. Ikonsiderar ang paggahin og panahon sa pagkat-on mahitungod sa pipila niini. Pananglitan:

Kahayag: Sa unsang paagi si Jesukristo nahisama sa usa ka kahayag nganha nimo? Mahimo nimong ikonsiderar ang pagdrowing og usa ka hulagway o sa pagkuha og litrato nga, alang nimo, nagrepresentar sa kahayag nga Iyang gihatag nimo. Unsa ang imong gibati nga nadasig nga buhaton aron ipakigbahin ang Iyang kahayag? (Tan-awa usab sa Juan 8:12; 3 Nephi 18:24; Doktrina ug mga Pakigsaad 50:24.)

Kinabuhi: Sa imong hunahuna ngano nga ang kinabuhi usa ka maayong pulong sa paghulagway ni Jesukristo? Sa unsang paagi nga Siya naghatag nimo og kinabuhi? Sa unsang paagi nga ang imong kinabuhi mahimong lahi unta kon wala pa Siya ug ang Iyang ebanghelyo? (Tan-awa usab sa Juan 10:10; 1 Mga Taga-Corinto 15:19–23; Doktrina ug mga Pakigsaad 66:2.)

Paglaom: Unsa man ang imong gilaoman tungod ni Jesukristo ug sa Iyang ebanghelyo? Aduna ka bay kaila nga mibati og kawalay paglaom mahitungod sa umaabot? Pamalandongi kon unsaon kaha nimo sa pagpakigbahin ngadto niana nga tawo sa paglaom nga imong gibati diha ni Jesukristo. (Tan-awa usab sa Mga Taga-Roma 8:24–25; Ether 12:4; Moroni 7:41.)

Tan-awa usab sa Mga Hilisgotan ug mga Pangutana, “Jesukristo,” Librarya sa Ebanghelyo.

“Salamat ngadto sa Dios sa [Iyang] dili katupngan nga gasa.”

Diha sa “Ang Buhi nga Kristo,” ang mga Apostoles mitawag sa Manluluwas nga usa ka “gasa” gikan sa atong Langitnong Amahan. Base sa unsay imong nakita diha sa “Ang Buhi nga Kristo,” unsaon nimo sa pagkompleto niini nga kapahayag: “Pinaagi ni Jesukristo, ang Dios naghatag nako og gasa sa …” Pamalandongi kon unsay imong mahimo aron hingpit nga makadawat niini nga mga gasa.

Sa unsa nga paagi nga ang pagtuon sa “Ang Buhi nga Kristo” nakaapekto sa imong hugot nga pagtuo ug gugma alang sa Manluluwas?

Tan-awa usab sa Russell M. Nelson, “Upat ka Gasa nga Gitanyag ni Jesukristo Kaninyo” (debosyonal sa Pasko sa Unang Kapangulohan, Dis. 2, 2018), Librarya sa Ebangheyo; “Excerpts from ‘The Living Christ: The Testimony of the Apostles’” (bidyo), ChurchofJesusChrist.org.

Excerpts from "The Living Christ: The Testimony of the Apostles"

As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Bata

Makahimo ko sa “paghalad sa [akong] pagpamatuod” sa pagsaulog sa pagkatawo ni Jesus.

• Ikonsiderar kon unsaon nimo sa pagpaila sa mga bata ang “Ang Buhi nga Kristo.” Tingali mahimo nimo silang tabangan sa pagtudlo sa ngalan nga Kristo diha sa ulohan ug sa mga pirma sa Unang Kapangulohan ug sa Napulog Duha. Mahimo nimong ipasabot nga mao kini ang ilang pagpamatuod kang Jesukristo nga gusto nilang ipakigbahin sa kalibotan.

• Mahimo nimong hatagan ang matag bata og usa ka hugpong sa mga pulong gikan sa “Ang Buhi nga Kristo” ug hangyoon sila sa pagpangita o sa pagdrowing og hulagway niana nga hugpong sa mga pulong. Dayon mahimo nimo silang tabangan sa pagpangita sa hugpong sa mga pulong diha sa “Ang Buhi nga Kristo.” Mahimo gani nimong tigomon kadto nga mga hulagway ug mga hugpong sa mga pulong ngadto sa usa ka libro.

• Mopakigbahin sa usag usa kon sa unsang paagi nga kamo nakabaton sa inyong pagpamatuod ni Jesukristo. Tingali mahimo ninyong ipasapasa ang usa ka hulagway sa Manluluwas ug magpulipuli sa pagpakigbahin og usa ka butang nga inyong nahibaloan mahitungod Kaniya (lakip sa mga kamatuoran nga gitudlo diha sa “Ang Buhi nga Kristo”).

“Siya mipadayon sa paghimog mga kaayohan.”

• Samtang ikaw ug ang imong mga anak magbasa sa ikaduhang parapo sa “Ang Buhi nga Kristo,” hisgoti kanila ang mahitungod sa mga butang nga gihimo ni Jesus. Mahimo usab ninyong tan-awon ang mga hulagway gikan sa Iyang kinabuhi (tan-awa ang pahina sa kalihokan niini nga semana ug ang Libro sa mga Hulagway sa Ebanghelyo). Dapita ang imong mga anak sa paghisgot mahitungod sa unsay gibuhat sa Manluluwas diha sa mga hulagway. Sa unsang paagi nga kita makaserbisyo sa uban sama sa Iyang gihimo? Ang “Light the World” nga mga bidyo diha sa Gospel Library makahatag nimo og mga ideya.

“Siya mao ang kahayag, ang kinabuhi, ug ang paglaom sa kalibotan.”

• Tabangi ang imong mga anak sa pagpangita og mga himno sa Pasko nga naghisgot bahin sa kahayag, kinabuhi, ug paglaom nga gidala sa pagkatawo sa Manluluwas nganhi sa kalibotan, sama sa “Gamay nga Lungsod sa Bethlehem” (Mga Himno, nu. 126). Manganta og dungan sa mga himno, ug tugoti ang imong mga anak sa pagpakigbahin kon sa unsang paagi nga si Jesus nagdala og kahayag, kinabuhi, ug paglaom nganha sa ilang mga kinabuhi.

“Salamat ngadto sa Dios sa dili katupngan nga gasa sa Iyang balaan nga Anak.”

• Unsa nga mga gasa ang atong nadawat tungod ni Jesukristo? Tingali ikaw ug ang imong mga anak mahimong mangita niini nga mga gasa diha sa “Ang Buhi nga Kristo” o diha sa usa ka awit sama sa “Mipadala sa Bugtong Anak” (Songbook sa mga Bata, 20–21). Dayon mahimo sila nga magputos og usa ka butang aron sa pagrepresentar niana nga mga gasa. Mahimo nimong isugyot nga ablihan sa imong mga anak ang mga gasa sa Adlaw sa Pasko aron sa pagtabang nila nga mahinumdom sa Manluluwas ug sa Iyang mga gasa ngari kanato.

Alang sa dugang nga mga ideya, tan-awa ang isyu karong bulana sa Higala nga magasin.