Detalye gikan sa Christ Preaching in the Spirit World [Si Kristo Nagsangyaw didto sa Kalibotan sa mga Espiritu], ni Robert T. Barrett

Disyembre 1–7: “Ang Panan-awon bahin sa Katubsanan sa mga Patay”

Doktrina ug mga Pakigsaad 137–138

Ang mga pinadayag nga girekord diha sa Doktrina ug mga Pakigsaad 137 ug 138 adunay gintang nga sobra sa 80 ka tuig ug 1,500 ka milya (2,400 km). Ang seksiyon 137 nadawat ni Propeta Joseph Smith niadtong 1836 didto sa Kirtland Temple, ug ang seksiyon 138 nadawat ni Joseph F. Smith, ikaunom nga Presidente sa Simbahan, pagka 1918 didto sa Siyudad sa Salt Lake. Apan sa doktrinal nga paagi, kining duha ka panan-awon may kalambigitan sa usag usa. Pareho kining motubag sa mga pangutana nga anaa sa daghang tawo—lakip na sa mga propeta sa Dios—mahitungod sa kinabuhi human sa kamatayon. Si Joseph Smith naghunahuna mahitungod sa kahimtang sa iyang igsoong lalaki nga si Alvin, kinsa namatay nga wala mabunyagi. Si Joseph F. Smith, kinsa nawad-an sa iyang duha ka ginikanan ug 13 ka anak nga nangamatay og sayo, naghunahuna kanunay mahitungod sa kalibotan sa mga espiritu ug naghunahuna mahitungod sa pagsangyaw sa ebanghelyo didto.

Ang seksiyon 137 naghatag og pipila ka pasiuna nga impormasyon bahin sa padulngan sa mga anak sa Dios sa sunod nga kinabuhi, ug ang seksiyon 138 naghatag og mas detalyado nga impormasyon. Manag-uban, ang duha ka pagpadayag nagpamatuod “sa dako nga katingalahan nga gugma gihimo nga gipakita sa Amahan ug sa Anak” (Doktrina ug mga Pakigsaad 138:3).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 137; 138:30–37, 57–60

Ang tanang anak sa Langitnong Amahan makabaton sa kahigayonan sa pagpili sa kinabuhing dayon.

Si Alvin Smith, ang pinangga nga igsoong lalaki ni Propeta Joseph, namatay unom ka tuig sa wala pa gipahiuli sa Dios ang awtoridad sa pagbunyag. Ang kasagaran nga pagsabot taliwala sa mga Kristiyanos niadtong 1836 mao nga kon ang usa ka tawo namatay nga wala mabunyagi, kana nga tawo dili makaadto sa langit. Si Joseph naghunahuna mahitungod sa mahangtorong kaluwasan ni Alvin sulod sa daghang katuigan—hangtod nga nadawat niya ang pagpadayag diha sa Doktrina ug mga Pakigsaad 137.

Daghang tawo karon nga adunay susama nga mga pangutana. Ngano nga ang Dios nagkinahanglan man sa mga ordinansa ug mga pakisaad nga daghan man kaayong mga tawo nga wala gayoy oportunidad nga makadawat niini? Unsay imong isulti ngadto sa usa ka tawo nga naghunahuna niini? Unsaon nimo sa pagpalig-on sa iyang hugot nga pagtuo diha sa Dios ug sa Iyang mga gikinahanglan alang sa kaluwasan? Pangitaa ang mga kamatuoran nga mahimo nimong ipakigbahin diha sa seksiyon 137 ug diha sa seksiyon 138:30–37, 57–60. Mahimo usab nimong pangitaon kini nga mga kamatuoran nga gipahayag diha sa himno “The Glorious Gospel Light Has Shone” (Hymns, no. 283) ug diha sa mensahe ni Presidente Henry B. Eyring “Pagpundok sa Pamilya sa Dios” (Liahona, Mayo 2017, 19–22).

Samtang magtuon ug mamalandong ka, mahimo nimong irekord ang imong mga hunahuna pinaagi sa pagkompleto sa mga kapahayag sama niini:

• Tungod niini nga mga pagpadayag, ako nasayod nga ang Langitnong Amahan .

• Tungod niini nga mga pagpadayag, ako nasayod nga ang plano sa Amahan sa kaluwasan .

• Tungod niini nga mga pagpadayag, gusto ko nga .

Tan-awa usab sa mga Santos, 1:263–66.

Doktrina ug mga Pakigsaad 138:1–11, 25–30

Ang pagbasa ug pagpamalandong sa mga kasulatan nag-andam kanako sa pagdawat og pagpadayag.

Usahay ang pagpadayag moabot bisan kon kita wala magtinguha niini. Apan kasagaran moabot kini tungod kay kita makugihong nangita ug nangandam alang niini. Samtang magbasa ka sa Doktrina ug mga Pakigsaad 138:1–11, 25–30, hinumdomi kon unsay gipamalandongan ni Presidente Joseph F. Smith sa dihang “ang mga mata sa [iyang] salabotan nabuksan.” Mahimo usab nimong itandi ang iyang kasinatian ngadto sa 1 Nephi 11:1–6; Joseph Smith—Kasaysayan 1:12–19. Dayon hunahunaa unsaon nimo nga makasunod sa ehemplo ni Presidente Smith. Pananglitan, unsa nga mga kausaban ang imong gibati nga nadasig nga himoon nganha sa imong pagtuon sa kasulatan aron makadawat og dugang nga personal nga pagpadayag?

Diha sa iyang mensahe “Ang Panan-awon sa Katubsanan sa mga Patay” (Liahona, Nob. 2018, 71–74), si Presidente M. Russell Ballard misugyot og ubang mga paagi nga si Presidente Smith naandam sa pagdawat niini nga pagpadayag. Unsay imong nakat-onan gikan sa iyang mga kasinatian? Ikonsiderar kon sa unsang paagi nga ang Ginoo miandam nimo alang sa mga kasinatian nga imong nabatonan—ug kon sa unsang paagi nga Siya tingali nag-andam nimo alang sa mga kasinatian sa imong umaabot.

Tan-awa usab sa Mga Santos, 3:256–60; “Ministry of Joseph F. Smith: A Vision of the Redemption of the Dead” (video), Gospel Library.

Ministry of Joseph F. Smith: A Vision of the Redemption of the Dead

Nearing death, President Joseph F. Smith receives revelation from God regarding redemption of the dead.

Joseph F. Smith, ni Albert Salzbrenner

Dapita ang Espiritu. “Unsa ang imong naobserbahan nga nakatampo ngadto sa usa ka espirituhanong palibot alang sa pagkat-on sa ebanghelyo? Unsa ang nakapalinga gikan niini?” (Pagtudlo sumala sa Pamaagi sa Manluluwas, 18). Samtang magtuon ka sa kasinatian ni Presidente Joseph F. Smith diha sa Doktrina ug mga Pakigsaad 138:1–11, ikonsiderar kon unsaon nga ikaw makaawhag og pagpamalandong ug makadapit og espirituhanong mga hunahuna alang sa imong kaugalingon ug, kon ikaw usa ka magtutudlo, alang sa mga tawo nga imong gitudloan.

Doktrina ug mga Pakigsaad 138:25–60

Ang buhat sa Manluluwas nagpadayon didto sa pikas habig sa tabil.

Si Presidente Russell M. Nelson mitudlo, “Ang among mensahe ngadto sa kalibotan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, dawata ang mga panalangin sa balaan nga templo, magbaton og molahutay nga kalipay, ug mahimong angayan sa kinabuhing dayon” (“Magpadayon Tang Tanan,” Liahona, Mayo 2018, 118–19). Pamalandonga kini nga pahayag samtang ikaw magbasa diha sa Doktrina ug mga Pakigsaad 138:25–60. Mahimo usab nga imong hunahunaon kini nga mga pangutana:

• Unsa ang imong nakat-onan gikan niini nga mga bersikulo mahitungod kon giunsa nga ang buhat sa Manluluwas gipatuman didto sa kalibotan sa espiritu? Nganong importante alang kanimo nga mahibalo nga kini nga buluhaton nagpanghitabo?

• Unsa ang nakapadayeg nimo mahitungod sa mga mensahero sa Ginoo didto sa kalibotan sa mga espiritu?

• Sa unsang paagi nga kini nga pagpadayag nakapalig-on sa imong hugot nga pagtuo diha sa plano sa Dios sa katubsanan?

Kon gusto ka nga makat-on pa og dugang mahitungod sa kalibotan sa mga espiritu, mahimo nimong tun-an ang mensahe ni Presidente Dallin H. Oaks “Salig sa Ginoo” (Liahona, Nob. 2019, 26–29).

Tan-awa usab sa “Susa Young Gates and the Vision of the Redemption of the Dead,” diha sa Revelations in Context, 315–22; “A Visit from Father” (bidyo), Gospel Library.

A Visit from Father

President Russell M. Nelson recounts a personal family history story that bears testimony of the importance of temple and family history work for all families.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Alvin Smith

• Joseph F. Smith

• Panan-awon bahin sa Katubsanan sa mga Patay (D&P 138)

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 137:5–10; 138:18–35

Ang tanang anak sa Langitnong Amahan adunay kahigayonan nga makadungog sa ebanghelyo.

• Sa pagkat-on mahitungod kon unsa ang gipasabot ni Joseph Smith nga makita ang pipila ka sakop sa iyang pamilya didto sa celestial nga gingharian, ang imong mga anak mahimong motan-aw sa bidyo nga “Ministry of Joseph Smith: Temples” (Gospel Library), o mahimo nimong ipakigbahin ang Mga Istorya sa Doktrina ug mga Pakigsaad, 152–53 (o ang katukma nga bidyo diha sa Librarya sa Ebangheyo). Tingali mahimo usab ikaw nga mosulti mahitungod sa usa ka tawo nga imong kaila kinsa namatay nga walay higayon nga mabunyagan. Unsa ang gitudlo kanato sa Doktrina ug mga Pakigsaad 137:5–10 mahitungod niana nga tawo?

  Ministry of Joseph Smith: Temples

  Joseph Smith establishes temple work as an essential purpose for the Saints of God.

  Chapter 39: The Kirtland Temple Is Dedicated: January–March 1836

• Ikonsiderar ang paggamit og usa ka hulagway sa lubnganan sa Manluluwas (tan-awa sa Libro sa mga Hulagway sa Ebanghelyo, nu. 58, o Bible Photographs, no. 14) ug hulagway nga anaa sa kataposan niini nga latid aron sa pagtudlo sa imong mga anak kon asa miadto ang espiritu ni Jesus sa dihang ang Iyang lawas anaa sa lubnganan. Dayon mahimo ninyong basahon og dungan ang Doktrina ug mga Pakigsaad 138:18–19, 23–24, 27–30 aron sa pagkat-on kon unsa ang gihimo ni Jesus samtang anaa Siya didto. Kinsa ang Iyang gibisitahan? Unsa ang gihangyo Niya nga buhaton nila? Nganong gibuhat Niya kini?

  

• Mahimo usab nimong gamiton ang pahina sa kalihokan niini nga semana aron matabangan ang imong mga anak sa pagtandi kon unsa ang gitudlo sa mga misyonaryo dinhi niini nga habig sa tabil (tan-awa, pananglitan sa Mga Artikulo sa Hugot nga Pagtuo 1:4) ngadto sa unsay gitudlo sa mga misyonaryo didto sa kalibotan sa mga espiritu (tan-awa sa Doktrina ug mga Pakigsaad 138:33). Unsay magkapareho niining mga bersikulo, ug unsay magkalahi? Unsa ang gitudlo niini kanato mahitungod sa Langitnong Amahan ug sa Iyang plano?

Ang pagpamalandong sa mga kasulatan nagdapit sa Epiritu Santo.

Doktrina ug mga Pakigsaad 138:1–11

Kon mamalandong ko sa mga kasulatan, ang Espiritu Santo makatabang kanako nga masabtan kini.

• Samtang ikaw ug ang imong mga bata magbasa og dungan sa Doktrina ug mga Pakigsaad 138:1–11, mahimo nimo silang dapiton sa pagpakaaron-ingnon nga sila si Presidente Joseph F. Smith ug mohimo og mga aksiyon nga idungan sa mga pulong diha sa mga bersikulo 6 ug 11. Mahimo usab ka nga mopakita nila og litrato ni Presidente Smith (adunay usa dinhi niini nga latid) ug ipasabot nga siya mao ang ikaunom nga Presidente sa Simbahan. Mahimo usab ka nga maghisgot mahitungod sa usa ka higayon sa dihang namalandong ka sa mga kasulatan ug ang Espiritu Santo mitabang nimo nga makasabot niini.

• Ikonsiderar ang pagkanta og dungan sa usa ka awit mahitungod sa pagtuon sa kasulatan, sama sa “Pagsiksik, Pamalandong, ug Pag-ampo” (Songbook sa mga Bata, 66). Unsa ang gisulti niini nga awit nga kinahanglan natong buhaton aron makasabot sa mga kasulatan?

Alang sa dugang nga mga ideya, tan-awa ang isyu karong bulana sa Higala nga magasin.

The Commissioned [Ang Pagkatinugyanan], ni Harold I. Hopkinson