Detalye gikan sa To All Worthy Male Members [Ngadto sa Tanang Takos nga Miyembro nga mga Lalaki], ni Emma Allebes

Disyembre 8–14:“Kami Nagtuo

Ang mga Artikulo sa Hugot nga Pagtuo ug Opisyal nga mga Pahayag 1 ug 2

Sukad sa Unang Panan-awon ni Joseph Smith, nagpadayon ang Dios sa paggiya sa Iyang Simbahan pinaagi sa pagpadayag. Sa pipila ka sitwasyon, kana nga pagpadayag naglakip og mga kausaban sa mga palisiya ug mga pamaagi sa Simbahan. Ang Opisyal nga mga Pahayag 1 ug 2 mipahibalo niini nga matang sa pagpadayag—ang usa migiya ngadto sa paghunong sa dinaghan nga kaminyoon, ug ang lain mihimo sa mga panalangin sa pagkapari nga maanaa sa mga katawhan sa tanang mga kaliwatan. Ang mga kausaban nga sama niini mga kabahin sa unsay gipasabot sa pagbaton og usa ka “tinuod ug buhi nga simbahan” (Doktrina ug mga Pakigsaad 1:30), uban sa usa ka tinuod ug buhing propeta, nga gigiyahan sa tinuod ug buhi nga Dios.

Apan ang mahangtorong kamatuoran dili mausab, bisan og ang atong pagsabot niini mausab. Ug usahay ang pagpadayag makahatag og dugang nga kahayag sa kamatuoran. Ang mga Artikulo sa Hugot nga Pagtuo nakahimo niining pagpasabot nga katuyoan. Ang Simbahan lig-on nga nagbase sa mahangtorong kamatuoran apan molambo ug mausab “sumala sa kabubut-on sa Ginoo, nga nagpahiangay sa iyang kaluoy sumala sa mga kahimtang sa katawhan” (Doktrina ug mga Pakigsaad 46:15). Sa lain nga pagkasulti, “Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabot sa Gingharian sa Dios” (Mga Artikulo sa Hugot nga Pagtuo 1:9).

Mga Ideya alang sa Pagkat-on diha sa Panimalay ug sa Simbahan

Ang mga Artikulo sa Hugot nga Pagtuo

Ang mga Artikulo sa Hugot nga Pagtuo naglangkob sa sukaranang mga kamatuoran sa gipahiuli nga ebanghelyo.

Ikonsiderar kini nga paagi sa pagtuon sa Ang mga Artikulo sa Hugot nga Pagtuo: Alang sa matag artikulo sa hugot nga pagtuo, paghimo og “mubo-kompleto-nga leksiyon” sa pagpasabot unsay imong gituohan. Ang imong mubo-kompleto-nga leksiyon mahimong maglakip sa usa ka may kalabotan nga kasulatan, litrato, himno o kanta sa mga bata, o personal nga kasinatian mahitungod sa pagsunod sa usa ka kamatuoran nga gitudlo sa artikulo sa hugot nga pagtuo.

Unsa ang kalainan nga nahimo niini nga mga kamatuoran diha sa imong relasyon sa Langitnong Amahan ug ni Jesukristo? Sa unsa nga paagi nga Ang mga Artikulo sa Hugot nga Pagtuo mipalambo sa imong pagtuon sa ebanghelyo o mitabang nimo sa pagpakigbahin sa ebanghelyo ngadto sa uban?

Tan-awa usab sa Ang Giya ngadto sa mga Kasulatan, “Ang mga Artikulo sa Hugot nga Pagtuo,” Librarya sa Ebangheyo; L. Tom Perry, “Ang mga Doktrina ug mga Baruganan nga Anaa sa mga Artikulo sa Hugot nga Pagtuo,” Liahona, Nob. 2013, 46–48; “Kapitulo 38: Ang Wentworth Letter,” sa Mga Pagtulun-an sa mga Presidente sa Simbahan: Joseph Smith (2011), 527–42.

Ang mga Artikulo sa Hugot nga Pagtuo 1:9; Opisyal nga mga Pahayag 1 ug 2

Ang Simbahan ni Jesukristo gigiyahan pinaagi sa pagpadayag.

“Kami nagtuo sa tanan nga ang [Dios], mopadayag pa og daghan nga dagko ug mahinungdanon nga mga butang kalabot sa Gingharian sa Dios” (Ang mga Artikulo sa Hugot nga Pagtuo 1:9). Naghunahuna mahitungod niini nga baroganan, rebyoha ang Opisyal nga mga Pahayag 1 ug 2 ug pangita og mga pulong ug mga hugpong sa mga pulong nga naglig-on sa imong pagtuo sa nagpadayon nga pagpadayag. Sa unsang paagi nakaapekto kini nga mga pagpadayag sa imong kinabuhi? Sa unsa nga paagi kini nakatabang sa buhat sa kauswagan sa gingharian sa Langitnong Amahan?

Unsa nga ebidensya ang imong nakita nga ang Simbahan gigiyahan “pinaagi sa inspirasyon sa Makagagahom nga Dios” karon? (Opisyal nga Pahayag 1). Tingali mahimo nimong rebyohon ang usa o daghan pa nga bag-ong mga mensahe sa kinatibuk-ang komperensiya, mangita kon giunsa sa Ginoo paggiya ang Iyang Simbahan—ug sa imong kinabuhi. Ang labing bag-o nga mensahe sa Presidente sa Simbahan tingali mao ang labing maayo sa pagsugod.

Unsay imong mahimo kon ikaw o usa ka tawo nga imong gimahal nakigbisog sa pagsabot o pagdawat unsa ang gitudlo sa Ginoo pinaagi sa Iyang mga propeta? Nganong ikaw mapasalamaton sa usa ka propeta?

Tan-awa usab sa Amos 3:7; 2 Nephi 28:30; Allen D. Haynie, “Buhing Propeta alang sa Ulahing mga Adlaw,” Liahona, Mayo 2023, 25–28; Mga Hilisgotan ug mga Pangutana, “Propeta, Mga,” Librarya sa Ebanghelyo; “Salamat, O Dios sa Propeta,” Mga Himno, nu. 13.

Opisyal nga Pahayag 1

Ang buhat sa Dios kinahanglan gayod nga magpadayon sa unahan.

Diha sa “Mga Kinutlo gikan sa Tulo ka mga Pakigpulong ni Presidente Wilford Woodruff kalabot sa Manipesto” (sa kataposan sa Opisyal nga Pahayag 1 ), unsa nga mga rason ang gihatag sa propeta alang sa Ginoo sa pagtapos sa pagbuhat og dinaghan nga kaminyoon? Unsa ang gitudlo niini kanimo mahitungod sa buhat sa Dios?

Alang sa dugang nga impormasyon mahitungod sa makasaysayanong kaagi sa Opisyal nga Pahayag 1, tan-awa sa Mga Santos, 2:747–62; “The Messenger and the Manifesto,” sa Revelations in Context, 323–31; Mga Hilisgotan ug mga Pangutana, “Dinaghan nga Kaminyoon ug mga Pamilya sa Unang Utah,” Librarya sa Ebanghelyo.

Wilford Woodruff, ni H. E. Peterson

Opisyal nga Pahayag 2

Ako makasalig sa Ginoo, bisan kon ako walay hingpit nga panabot.

Wala kita masayod ngano nga ang ordinasyon sa pagkapari ug mga ordinansa sa templo dili mahatag ngadto sa mga miyembro sa Simbahan nga kaliwat sa taga-Africa sulod sa usa ka panahon. Bisan kon nag-atubang sa malisod nga wala matubag nga mga pangutana mahitungod niana nga palisiya, daghang Itom nga mga Santos sa Ulahing mga Adlaw misalig sa Ginoo (tan-awa sa Mga Panultihon 3:5) ug nagpabilin nga matinud-anon ngadto Kaniya sa ilang tibuok nga mga kinabuhi. Ang pagkat-on mahitungod sa ilang hugot nga pagtuo ug mga kasinatian makapadasig kanimo. Ania ang pipila sa ilang mga istorya, makita sa history.ChurchofJesusChrist.org:

• “Jane Elizabeth Manning James”

• “In My Father’s House Are Many Mansions” (istorya ni Green Flake)

• “You Have Come at Last” (istorya ni Anthony Obinna)

• “Break the Soil of Bitterness” (istorya ni Julia Mavimbela)

• “I Will Take It in Faith” (istorya ni George Rickford)

• “Long-Promised Day” (istorya ni Joseph W. B. Johnson)

Samtang ikaw nagbasa sa Opisyal nga Pahayag 2, unsa ang imong nakat-onan mahitungod sa proseso sa Ginoo alang sa paggiya sa mga palisiya sa Iyang Simbahan? Palandonga giunsa nimo sa pagkat-on nga mosalig sa Ginoo bisan kon ikaw walay hingpit nga pagsabot.

Tan-awa usab sa 2 Nephi 26:33; “Witnessing the Faithfulness,” sa Revelations in Context, 332–41; Mga Hilisgotan ug mga Pangutana, “Kaliwat ug ang Pagkapari,” Library sa Ebanghelyo; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org.

OK ra nga moingon og “Wala ko kahibalo.” Samtang kinahanglan nimong paningkamotan ang imong labing maayo nga motabang sa mga tawo nga imong gitudloan nga matubag ang ilang mga pangutana mahitungod sa ebanghelyo, ang Ginoo wala magdahom nga makahibalo ka sa tanan. Kon wala ka mahibalo unsaon pagtubag sa usa ka butang, angkona kini. Dayon giyahi ang imong mga tigkat-on ngadto sa gipadayag nga doktrina, ug pagpahayag og sinserong pagpamatuod sa unsay imong nahibaloan.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Wilford Woodruff

• Spencer W. Kimball

• Dinaghan nga Kaminyoon human sa Manipesto

• Restriksyon sa Pagkapari [Priesthood] ug sa Templo

Iklik dinhi aron makakita pa og dugang

Mga Ideya sa Pagtudlo sa mga Bata

Ang mga Artikulo sa Hugot nga Pagtuo

Mituo ko sa ebanghelyo ni Jesukristo.

• Ikonsiderar ang pagpangita ug pagkanta og mga himno o mga kanta sa mga bata nga makatabang sa imong mga anak nga makasabot sa usa o daghan pa sa Ang mga Artikulo sa Hugot nga Pagtuo. Tingali makatabang sila kanimo sa pagpili sa mga himno ug mga kanta. Tabangi ang imong mga anak nga makakita kon sa unsa nga paagi nga ang mga kanta may kalabotan sa Ang mga Artikulo sa Hugot nga Pagtuo.

• Ikaw ug ang imong mga bata mahimong magtinabangay sa pagsulat og mga pangutana nga tingali aduna ang mga tawo mahitungod sa ebanghelyo ni Jesukristo o sa Iyang Simbahan. Dayon magtinabangay kamo sa pagtubag niadtong mga pangutana gamit Ang mga Artikulo sa Hugot nga Pagtuo. Asa man kita mopaingon kon kita adunay mga pangutana mahitungod sa ebanghelyo?

Ang mga Artikulo sa Hugot nga Pagtuo 1:9; Opisyal nga mga Pahayag 1 ug 2

Ang Ginoo naggiya sa Iyang Simbahan pinaagi sa Iyang propeta.

• Sa pagtabang sa imong mga anak nga makasabot sa ikasiyam nga artikulo sa hugot nga pagtuo, tingali makahatag ka nila og mga kasulatan ug usa ka litrato sa buhi nga propeta (o usa ka bag-o nga isyu sa komprensiya sa Liahona). Hangyoa sila sa pagpataas sa mga kasulatan samtang imong basahon ang mga pulong “ang tanan nga gipadayag sa Dios” ug ang litrato o magasin kon imong basahon ang “sa tanan nga gipadayag Niya karon” (Ang mga Artikulo sa Hugot nga Pagtuo 1:9). Nganong kita nagkinahanglan sa karaan ug moderno nga mga propeta?

• Ang imong mga anak makakat-on kon sa unsa nga paagi nga ang mga pulong sa mga propeta naggiya kanato pinaagi sa pagsunod sa mga instruksiyon sa paghimo og pipila ka butang, sama sa pagkaon o dulaan. Mahimo nimong itandi kini ngadto sa mga instruksiyon nga gihatag ni Jesukristo kanato pinaagi sa propeta. Unsa ang pipila ka butang nga gitudlo sa Ginoo kanato karon pinaagi sa Iyang buhi nga propeta?

Ang Dios nagtawag og mga propeta aron mangulo sa Iyang Simbahan.

Mga Opisyal nga mga Pahayag 1 ug 2

Ang mga propeta motabang kanato nga masayod sa kabubut-on sa Langitnong Amahan.

• Tingali ang pagkakita sa unsa nga paagi nga ang karaang mga kasulatan may kalabotan sa moderno nga pagpadayag makatabang sa imong mga bata nga makasabot sa Opisyal nga mga Pamahayag. Mahimo nimong hangyoon sila sa pagbasa sa Mga Buhat 10:34–35 ug Jacob 2:27–30 ug modapit kanila sa pagtino unsa nga kasulatan ang may kalabotan sa Opisyal nga Pahayag 1 (nga misangpot sa paghunong sa dinaghan nga kaminyoon) ug nga may kalabotan sa Opisyal nga Pahayag 2 (nga nagpahibalo nga ang ordinasyon sa pagkapari ug ang mga ordinansa sa templo anaa na alang sa tanang tawo sa tanang kaliwatan). Hatag sa imong pagpamatuod nga ang Ginoo nagpadayag sa Iyang kabubut-on ngadto sa karaan ug moderno nga mga propeta.

Alang sa dugang nga mga ideya, tan-awa ang isyu karong bulana sa Higala nga magasin.