Disyembre 15–21: “Ang Pamilya Mahinungdanon ngadto sa Plano sa Langitnong Amahan”

Ang Pamilya: Usa ka Pamahayag ngadto sa Kalibotan

Bisan sa wala pa kita matawo, kabahin kita sa usa ka pamilya—ang pamilya sa atong langitnong mga ginikanan. Ang sundanan nagpadayon dinhi sa yuta. Ang mga pamilya dinhi, sa ilang labing maayo, gitumong nga mosunod sa hingpit nga sundanan sa langit.

Dayag lang, nga walay mga garantiya nga ang yutan-ong mga pamilya mahimong hingpit o gani mapuslanon. Apan ingon nga gitudlo ni Presidente Henry B. Eyring, ang mga pamilya “naghatag sa mga anak sa Dios sa labing maayong higayon nga moanhi sa kalibotan uban sa bugtong gugma dinhi sa yuta nga masusama sa unsay gibati nato didto sa langit—gugma sa ginikanan” (“Pagpundok sa Pamilya sa Dios,” Liahona, Mayo 2017, 20). Nahibalo nga ang mga pamilya dili hingpit ug makasinati og mga pag-atake sa kaaway, gipadala sa Dios ang Iyang Hinigugmang Anak sa pagtubos kanato ug pag-ayo sa atong mga pamilya. Ug mipadala Siya og mga propeta sa ulahing mga adlaw nga adunay pamahayag sa pagpanalipod ug paglig-on sa mga pamilya. Kon kita mosunod sa mga propeta ug mobutang og hugot nga pagtuo diha sa Manluluwas, bisan tuod og ang mortal nga mga pamilya kulang sa balaang kahingpit, adunay paglaom alang sa mga pamilya—dinhi sa yuta ug didto sa langit.

Mga Ideya alang sa Pagkat-on diha sa Panimalay ug sa Simbahan

“Ang pamilya mahinungdanon ngadto sa plano sa Tiglalang.”

“Ang Pamilya: Usa ka Pamahayag ngadto sa Kalibotan” klaro nga mahitungod sa mga pamilya. Apan kini managsama mahitungod sa plano sa Dios sa kaluwasan. Usa ka paagi sa pagtuon sa pamahayag mao ang pagsulat sa hugpong sa mga pulong kinabuhi sa wala pa dinhi sa yuta, mortal nga kinabuhi, ug kinabuhi human sa kinabuhi dinhi sa yuta sa usa ka piraso sa papel ug ilista unsa ang gitudlo sa pamahayag mahitungod sa matag usa niini nga mga hilisgotan. Unsay imong nakat-onan sa dihang ikaw nagtuon sa pamahayag niini nga paagi? Sa unsa nga paagi ikaw matabangan sa pagsabot kon ngano ang kaminyoon ug ang pamilya importante sa plano sa Dios? Sa unsa nga paagi nga ang mga kamatuoran nga anaa sa pamahayag makaimpluwensya sa imong mga pagpili?

Adunay daghang tawo kinsa, tungod sa lain-laing mga rason, tingali mahadlok sa kaminyoon ug pagpadako og mga anak. Kon ang usa ka higala moingon kanimo, “Ako dili gayod gusto nga magminyo o magbaton og pamilya,” unsay imong isulti? Tingali mahimong mosiksik ka sa pamahayag nga mangita og butang nga motabang sa imong higala nga magbaton og paglaom sa plano sa Dios.

Laing pangutana nga mahimong ipangutana kanimo—o mahimong ipangutana sa imong kaugalingon—mao ang usa sama niini: “Unsa kon ang sitwasyon sa akong pamilya dili mohaom sa unsay gihulagway diha sa pamahayag sa pamilya?” Ania ang duha ka dapit nga mahimo nimong pangitaon ang mapanagnaon nga tambag: ang seksiyon “Dako nga Kausaban” sa Elder Dieter F. Uchtdorf’s message “Si Jesukristo Mao ang Kalig-on sa mga Ginikanan” (Liahona, May 2023, 55–59) ug ang kataposan nga upat ka parapo sa mensahe ni Elder D. Todd Christofferson “Nganong Kaminyoon, Nganong Pamilya” (Liahona, Mayo 2015, 52).

Unsay imong gibati nga nadasig nga buhaton tungod sa unsay imong nakat-onan?

Tan-awa usab sa Dallin H. Oaks, “Ang Plano ug ang Pamahayag,” Liahona, Nob. 2017, 28–31; Mga Hilisgotan ug mga Pangutana, “Pamilya,” Librarya sa Ebanghelyo.

“Ang matag [tawo] usa ka hinigugmang anak nga lalaki o babaye sa langitnong mga ginikanan.”

Kanunay kitang maghunahuna sa pamahayag sa pamilya isip usa ka giya alang sa kinabuhi sa pamilya. Apan nagtudlo usab kini sa importante nga mga kamatuoran mahitungod sa atong langitnong pamilya ug mahangtorong pagkatawo. Nganong importante alang nimo nga makahibalo nga kitang tanan kabahin niini nga pamilya? Sa unsa kaha nga paagi nga kining kamatuoran moimpluwensya sa mga pagpili nga imong himoon?

Tan-awa sa “Ako Anak sa Dios,” Mga Himno, nu. 189.

“Ang kalipay sa kinabuhi diha sa pamilya labaw nga makab-ot kon gipasikad diha sa mga pagtulon-an ni Ginoong Jesukristo.”

Hunahunaa ang mga parapo 6 ug 7 sa pamahayag sa pamilya isip usa ka sundanan alang sa “kalipay sa kinabuhi sa pamilya.” Samtang ikaw nagbasa niini nga mga parapo, ilha ang mga baroganan sa “malamposon nga mga kaminyoon ug mga pamilya.” Tingali makahunahuna ka mahitungod sa mga ehemplo niini nga mga baroganan nga imong nakita sa imong kaugalingong pamilya o sa ubang pamilya. Sa unsang paagi kini nga mga baroganan makatabang sa paghimo ni Jesukristo nga pundasyon sa kinabuhi sa pamilya?

Dayon ikaw tingali maghunahuna mahitungod sa usa ka relasyon sa pamilya nga gusto nimo nga lig-onon. Paghimo og usa ka plano, uban sa tabang sa Manluluwas, sa pagsunod sa mga impresyon nga imong nadawat.

Tan-awa usab sa L. Whitney Clayton, “Ang Labing Nindot nga mga Panimalay,” Liahona, Mayo 2020, 107–9.

Ang mga ginikanan kinahanglan nga mopatubo sa ilang mga anak pinaagi sa gugma ug pagkamatarong.

“Kami nagtawag sa may kapangakohan nga mga lumulupyo … sa pagpadayon ug sa paglig-on sa pamilya.”

Ang kataposan nga parapo sa pamahayag sa pamilya naglakip sa usa ka tawag sa paglihok. Sa imong pagkonsiderar unsaon nimo sa pagtubag niana nga tawag, tingali makatabang ang pagtuon sa titulo sa pamahayag. Pananglitan, unsa ang usa ka pamahayag? Unsa ang gipasabot niana nga pulong nganha kanimo mahitungod niining mensahe sa dokumento? Unsay nakapahimong kwalipikado sa Unang Kapangulohan ug Konseho sa Napulog Duha ka Apostoles sa pag-isyu og usa ka pamahayag ngadto sa kalibotan kalabot sa mga pamilya? Mahimo usab nga maghimo ka og lista sa unsay imong gikonsiderar nga importante nga mga mensahe sa pamahayag. Unsaon nimo sa pagsunod niini nga mga mensahe sa imong kinabuhi, sa imong panimalay, ug sa imong komunidad?

Tan-awa usab sa Bonnie L. Oscarson, “Mga Tigpanalipod sa Pamahayag bahin sa Pamilya,” Liahona, Mayo 2015, 14–17; “Defenders of the Faith” (video), Gospel Library.

Defenders of the Faith

Marie Madeline Cardon and her family were holding a Church service in their home in Italy when an angry mob of men gathered and began shouting for the missionaries to be brought outside. It was Marie who marched out of the house to confront the mob.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Hisgotanan sa Kasaysayan sa Simbahan

Iklik dinhi aron makakita pa og dugang

Mga Ideya sa Pagtudlo sa mga Bata

Ang mga pamilya importante diha sa plano sa Langitnong Amahan.

• Tabangi ang imong mga anak sa paghunahuna og mga butang nga importante kaayo nga gusto nilang isulti sa tanan mahitungod niini. Ipakita sa mga bata ang usa ka kopya sa “Ang Pamilya: Usa ka Pamahayag ngadto sa Kalibutan,” ug ipasabot nga ang mga propeta ug apostoles misulat niini aron sultihan kitang tanan kon unsa kaimportante ang mga pamilya ngadto sa Langitnong Amahan. Ngano nga ang mga pamilya importante kaayo ngadto Kaniya? (tan-awa usab sa bidyo nga “What Is the Purpose of Family?” [ChurchofJesusChrist.org]).

  What Is the Purpose of Family?

  The family is the divine building block of society.

• Ipakigbahin sa imong mga bata ang butang gikan sa pamahayag nga imong gibati nga kinahanglan nga mahibaloan natong tanan. Dapita ang mga bata sa pagpakigbahin sa ilang mga pagbati mahitungod niadtong mga kamatuoran. Unsa kaha ang kalainan sa atong kinabuhi kon wala pa kita mahibalo niini nga mga butang? Mahimo ninyong kantahon og dungan ang usa ka awit nga may kalabotan sa mga kamatuoran diha sa pamahayag, sama sa “Sundon Ko ang Plano sa Dios” (Songbook sa mga Bata, 86).

• Sa seksiyon IV sa iyang mensahe “Ang Plano ug ang Pamahayag” (Liahona, Nob. 2017, 30), si Presidente Dallin H. Oaks mihulagway giunsa pagsulat ang pamahayag sa pamilya. Tingali ikaw ug ang imong mga anak mahimong morebyo sa iyang paghulagway og dungan ug mohisgot ngano nga kamo mapasalamaton nga ang Ginoo midasig sa Iyang mga sulugoon sa pagtudlo nato niini nga mga kamatuoran mahitungod sa pamilya.

• Mahimo usab nga imong ipakita sa imong mga anak ang mga litrato (o modapit kanila sa pagdrowing sa pipila) ka naghulagway nga mga kamatuoran sa pamahayag sa pamilya. Mahimo kining mga hulagway sa usa ka templo, usa ka pamilya nga kaubang nag-ampo o nagdula, o magtiayon nga nagpakasal. Dayon ang imong mga bata makapangita sa mga kapahayag diha pamahayag sa pamilya nga may kalabotan sa mga litrato. Unsa ang gitudlo sa Ginoo kanato mahitungod niining mga butanga diha sa pamahayag?

Gusto sa Langitnong Amahan nga ang pamilya magmalipayon.

Magmahimong sensitibo. Samtang magtudlo ka sa mga kamatuoran nga gitudlo diha sa pamahayag sa pamilya, palihog hibaloi nga daghang bata ang gipadako diha sa mga pamilya nga wala mohaom sa mga mithi nga gihulagway sa pamahayag. Ikonsiderar unsaon nimo sa pag-awhag ug pagdasig kanila.

Ako usa ka “hinigugmang espiritu nga anak nga lalaki o babaye sa langitnong mga ginikanan.”

• Samtang kamo manganta og dungan “Ako Anak sa Dios” (Songbook sa mga Bata, 2), mahimo kang moitsa og bola ngadto sa usa ka bata samtang ikaw moingon, “Ako nakaila og usa ka anak sa Dios nga ginganlan og [ngalan sa bata].” Dayon kana nga bata moitsa sa butang ngadto sa lain, mosulti sa samang mga pulong ug iapil ang ngalan sa tawo. Tabangi ang imong mga anak sa pagpangita sa hugpong sa mga pulong nga “hinigugmang espiritu nga anak nga lalaki o babaye sa langitnong mga ginikanan,” sa pamahayag sa pamilya, ug ihatag ang imong pagpamatod niini nga kamatuoran.

Ang mga pamilya labing malipayon kon mosunod sila ni Jesukristo.

• Sa pagsugod og panag-istoryahanay mahitungod sa imong pamilya, ikaw ug ang imong mga anak mahimong mag-istorya mahitungod kon unsay atong buhaton sa paghimo sa ubang mga butang nga lig-on—sama sa atong ngipon, sa atong mga lawas, o sa usa ka gambalay. Dayon mahimo nimong itandi kana ngadto sa paghimo og lig-on nga pamilya. Tabangi ang imong mga anak sa pagpangita sa Kristohanong mga baroganan nga mosangpot ngadto sa kalipay sa kinabuhi sa pamilya, makita sa parapo 7 sa pamahayag sa pamilya (tan-awa usab sa pahina sa kalihokan niining semanaha).

Alang sa dugang nga mga ideya, tan-awa ang isyu karong bulana sa Higala nga magasin.