Vakamatailalai ni ivakatakarakara ni Siga ni Sucu e Copper kei Umber, mai vei J. Kirk Richards

22–28 ni Tiseba: Na iSolisoli Sega ni Vakatauvatani Rawa ni Luvena Tabu na Kalou

Siganisucu

E vakavuvulitaka na Parofita o Josefa Simici: “Na yavu bibi ni ivakavuvuli ni noda Lotu sai koya na nodra ivakadinadina na iApositolo kei na Parofita me baleti Jisu Karisito, ni a mate, bulu, ka tucake tale ena ikatolu ni siga ka lako cake ki lomalagi; kei na veika kece tale e so e salavata kei na noda Lotu era sa tokona walega” (Nodra iVakavuvuli na Peresitedi ni Lotu: Josefa Simici [2011], 49). Ni oti e 160 na yabaki, a vakauqeti ira na Mataveiliutaki Taumada kei na Kuoramu ni iApositolo Le Tinikarua na itukutuku oqo me ra tabaka “Se Bula na Karisito: Nodra iVakadinadina na iApositolo” ena ivakananumi ni 2,000 na yabaki ni nona sucu na iVakabula (raica na Russell M. Nelson,“Vagoleya Mai na Mana i Jisu Karisito ki na Noda Bula,” Liaona, Me 2017, 40).

Me vaka na Yalododonu Edaidai, eda rekitaka na veivakalougatataki ni tomani tiko na ivakatakila mai vua na parofita ni gauna oqo kei ira na iapositolo. Eda sa vakavinavinaka ki na nodra vosa veivakauqeti vakayalo ni vakasala, vakaro, kei na veivakayaloqaqataki. Ia na kena bibi duadua, eda sa vakalougatataki ena nodra ivakadinadina kaukauwa sara baleti Jisu Karisito—ena gauna ni Siganisucu kei na loma taucoko ni yabaki. Oqo sa uasivi cake mai na nodra vosa veivakauqeti walega na kenadau ni volavola se dauvosa raraba se nodra raiyawa na kenadau ni ivolanikalou. Oqo na nodra vosa sa digitaka, kaciva ka vakadonuya na Kalou me “ivakadinadina digitaki ni yacai Karisito ki vuravura raraba” (Vunau kei na Veiyalayalati 107: 23).

Vakasama eso ni Vuli e Vale kei na Lotu

“Sega ni dua tale e a bau veivakauqeti vakabibi me vakaoqo.”

Na cava o na kaya me veitokoni ki na itukutuku ni “sega ni dua tale e a bau veivakauqeti vakabibi [me vakataki Jisu Karisito] vei ira kece era bula tiko kei ira era na qai mai bula e vuravura”? Vakasaqara na dina e tiko ena “Se Bula na Karisito” e vakamacalataka na veivakauqeti bibi sara ni iVakabula. E vakauqeti iko vakacava o Koya?

Vakacava ke dua e sega ni kila na vakabauta Vakarisito e tarogi iko se cava na vuna o marautaka kina na Siganisucu. Mo na cakava vakacava? Railesuva na “Se Bula Na Karisito” ni vakasamataki tiko na taro oqo, ka navuca mo vola eso na vakasama se vakanananu e lako mai vei iko.

Raica talega na “Why We Need a Savior” (vidio), Valenivola Vakosipeli.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

“Sa tucake o Koya mai na ibulubulu.”

Ena “Se Bula na Karisito,” era a vakadinadinataka na iApositolo na Tucaketale mai na Mate ni iVakabula, ka vakamacalataka na nona rairai vakatolu na Turaga (raica na parakaravu 5). Sa rawa mo wilika na veisiko oqo ena Joni 20; 3 Nifai 11; kei na Josefa Simici—Ai Tukutuku 1:14–20. Na cava o sa vulica baleta na iVakabula mai na Nona vosa kei na veika a cakava ena gauna ni rairai oqo?

Vakanamata kivua na iVakabula. “Na wiliki ena masumasu ni ‘Se Bula na Karisito’ sa vaka na wiliki ni ivakadinadina i Maciu, Marika, Luke, Joni, kei ira na parofita ena iVola i Momani. Ena vakalevutaka na nomu vakabauta na iVakabula ka vukei iko mo vakanamata tikoga Vua” (M. Russell Ballard, “Lesu ka Ciqoma,” Liaona, Me 2017, 65).

“Na Nona matabete kei na Nona Lotu sa vakalesui mai.”

Ni ko vulica tiko na Vunau kei na Veiyalayalati ena yabaki oqo, sa nomu na madigi mo vulica vakalevu tale ena kena sa “vakalesui mai na matabete kei na Nona Lotu” na iVakabula. Na dina vakalesuimai se ivakavuvuli cava e vakaibalebale vakalevu vei iko? Sa rawa mo railesuva eso na ivolanikalou oqo e vakavulica na Veivakalesuimai: Vunau kei na Veiyalayalati 1:17–23; 13; 20:1–12; 65; 110; 112: 30–32; 124: 39–42; 128:19–21. Vakasamataka vakatitobu na sala e vukei iko kina na dina ni kosipeli vakalesuimai mo kila ka lomani Jisu Karisito.

“Dua na siga ena lesu mai o Koya ki vuravura.”

Na Siganisucu sa gauna me raici lesu kina na siga a sucu kina o Jisu Karisito eda vakanamata kina siga ena lesu tale mai kina o Koya. Na cava o sa vulica me baleta na Nona lesu mai ena ikarua ni iotioti ni parakaravu ni “Se Bula na Karisito”? E rawa talega ni ka talei na wiliki, lagati, se rogoci ni sere ni Siganisucu e vakavulica na veika e baleta na iKarua ni Lako Mai, me vaka na “Meda Marau” se “Bogi Buto Rorogo Mai” (Sere ni Lotu, naba 116, 122).

“O Koya na rarama, na bula, kei na inuinui kei vuravura.”

Ena iotioti ni parakaravu ni “Se Bula na Karisito,” raica matua na ivakarau ni bula kei na itutu e soli vua na iVakabula. Vakasamataka mo vakayagataka na gauna mo vulica kina eso vei ira. Me kena ivakaraitaki:

Rarama: E tautauvata vakacava kei iko na rarama o Jisu Karisito? E rawa nio vakasamataka mo droinitaka e dua na iyaloyalo se taura e dua na itaba, vei iko, e matataka na rarama e solia vei iko o Koya. Na cava o sa vakauqeti mo cakava mo wasea kina na Nona rarama? Raica talega na Joni 8:12; 3 Nifai 18:24; Vunau kei na Veiyalayalati 50:24.)

Bula: Na cava na vuna o nanuma kina ni dua na vosa vinaka na bula me vakamacalataki Jisu Karisito? Ena vakasama cava e solia kina vei iko o Koya na bula? Ena duatani vakacava na nomu bula ke sega o Koya kei na Nona kosipeli? (Raica talega na Joni 10:10; 1 Korinica 15:19–23; Vunau kei na Veiyalayalati 66:2.)

iNuinui: Na cava o nuitaka me baleti Jisu Karisito kei na Nona kosipeli? O kila beka e dua e sega tu nona inuinui me baleta na veisiga ni mataka? Vakasamataka vakatitobu na sala o rawa ni wasea kina vua na tamata o ya na inuinui o vakila vei Jisu Karisito. (Raica talega na Roma 8:24–25; Ica 12:4; Moronai 7:41.)

Raica talega na Ulutaga kei na Taro, “Jisu Karisito,” Valenivola Vakosipeli.

“Me vakavinavinakataki na Kalou me baleta na [Nona] isolisoli e sega ni vakatautauvatataki rawa.”

Mai “Se Bula na Karisito,” era cavuta na iApositolo ni iVakabula e “isolisoli” mai vei Tamada Vakalomalagi. Yavutaki ena veika o kunea ena “Se Bula na Karisito,” mo na vakacavara vakacava na iyatuvosa oqo: “Mai vei Jisu Karisito, sa solia vei au na Kalou na isolisoli ni …” Vakasamataka vakatitobu na cava o rawa ni cakava mo ciqoma vakataucoko kina na isolisoli oqo.

E sa mana vakacava na vulici ni “Se Bula na Karisito” kina nomu vakabauta ka lomana na iVakabula?

Raica talega Russell M. Nelson, “Va na iSolisoli e Sa Solia vei Iko o Jisu Karisito” (Nodratou Lotu ni Siganisucu na Mataveiliutaki Taumada, 2 ni Tise., 2018), Valenivola Vakosipeli; “Vakatotomi mai na ‘Se Bula na Karisito: Na Nodra iVakadinadina na iApositolo’” (vidio), ChurchofJesusChrist.org.

Excerpts from "The Living Christ: The Testimony of the Apostles"

As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Au rawa ni “wasea na [noqu] ivakadinadina” me marautaki kina na sucu i Jisu.

• Vakasamataka na sala o rawa ni vakaveikilaitaki ira kina na nomu gone kina “Se Bula na Karisito.” E rawa beka ni o vukei ira mera dusia na yaca Karisito ena itutu kei na saini ni Mataveiliutaki Taumada kei na Le Tinikarua. Sa rawa mo vakamacalataka ni oqo na nodra ivakadinadina baleti Jisu Karisito era vinakata mera wasea ivuravura.

• Sa rawa mo solia vei ira yadua na gone e dua na malanivosa mai na “Se Bula na Karisito” ka kerei ira mera vaqara se droinitaka e dua na iyaloyalo ni malanivosa oya. Sa rawa mo qai vukei ira mera kunea na malanivosa ena “Se Bula na Karisito.” E rawa mo dou qai biuta vata na iyaloyalo kei na malanivosa me dua na ivola.

• Veiwaseitaka na sala o a rawata kina na nomu ivakadinadina kei Jisu Karisito. E rawa beka nio veisoliyaka wavoki e dua na iyaloyalo ni iVakabula ka veivukevuke ena nomuni wasea e dua na ka oni kila me baleti Koya (oka kina na dina e vakavulici ena “Se Bula na Karisito”).

“Ko koya ka lako voli ka daucaka vinaka.”

• Ni o wilika kei ira na na nomu gone na ikarua ni parakaravu ni “Se Bula na Karisito,” veitalanoa vata kei ira me baleta eso na ka a cakava o Jisu. Sa rawa talega mo raica na iyaloyalo mai na Nona bula (raica na tabana ni itaviqaravi ni macawa oqo ke na Vola ni iYaloyalo Vakosipeli). Sureti ira na luvemu me ra veivosakitaka na veika e cakava tiko na iVakabula ena iyaloyalo. E rawa vakacava ni da veiqaravi vei ira na tani me vakataki Koya? Na vidio ni “Light the World” ena vidio ena Valenivola Vakosipeli e rawa ni solia vei iko eso na vakasama.

“O Koya na rarama, na bula, kei na inuinui kei vuravura.”

• Vukei ira na gone me digia na serenilotu ni Siganisucu eso e tukuna na rarama, bula, kei na inuinui e kauta mai ivuravura na nona sucu na iVakabula — me kena ivakaraitaki, “Koro ko Peceliema“ (Sere ni Lotu, naba 123). Ni laga sere vata, ka mera wasea na gone na sala e kauta mai kina ki ena nodra bula o Jisu na rarama, bula, kei na inuinui.

“Me vakavinavinakataki na Kalou me baleta na isolisoli sega ni vakatauvatani rawa ni Luvena tabu.”

• Na isolisoli cava soti eda sa ciqoma ena vukui Jisu Karisito? Ena rawa beka nio vakasaqara kei ira na nomu gone na isolisoli oqo ena “Se Bula na Karisito” se ena dua na sere me vaka na “Tala Mai Na Luvena” (iVolanisere ni Lalai, 20). Sa rawa nira qai ologa e dua na isolisoli me matataka na veisolisoli oqori. E rawa nio vakatura me a dolava na nomu gone na iloloma ena Siganisucu me vukea nodra nanuma na iVakabula kei na Nona isolisoli vei keda.

Me baleta na vakasama tale eso, raica na ilavelave ni mekasini ni iTokani ni vula oqo.