Vakamatailalai mai na Vunau tiko o Karisito ena Vuravura ni Yalo, mai vei Robert T. Barrett

Tiseba 1–7: “Na Raivotu ni Nodra Vueti na Mate

Vunau kei na Veiyalayalati 137–138

Na ivakatakila e volai ena Vunau kei na Veiyalayalati 137 kei na 138 erau veiyawaki ena 80 vakacaca na yabaki kei na 1,500 na maile (2,400 km). A ciqomi naWase 137 mai vei Parofita Josefa Simici ena 1836 ena loma ni Valetabu e Katiladi ni se tara tiko, kei na wase 138 mai vei Josefa F. Simici, na ikaono ni Peresitedi ni Lotu, ena 1918 e Salt Lake City. Ia vakaivunau, oi rau na raivotu oqo e rau lako vata tikoga. Erau sauma ruarua na nodra taro e vuqa na tamata—oka kina na parofita ni Kalou—me baleta na bula ni oti na mate. A vakananuma voli o Josefa Simici na vanua ena tini kina o Alvin na tuakana, a mate ni se bera tu ni papitaiso. A dau vakananuma vakawasoma o Joseph F. Smith, ka rau a yali ruarua na nona itubutubu kei na 13 na tacina ena nodra mate dole me baleta na vuravura ni yalo kei na vunautaki ni kosipeli mai kea.

Nawase 137 e vakacilava eso na rarama taumada ena nodra icavacava na luve ni Kalou ena bula ka tarava, kei na wase138 e dolava vakarabailevu cake sara na ilati. E rau sa vakadinadinataka vata na “loloma cecere ka vakasakiti e rau sa vakaraitaka na Tamada kei na Luvena” (Vunau kei na Veiyalayalati 138:3).

Vakasama eso ni Vuli e Vale kei na Lotu

Vunau kei na Veiyalayalati 137; 138:30–37, 57–60

O ira kece na luvei Tamada Vakalomalagi ena yaco mai na gauna me ra na rogoca kina na kosipeli.

A mai takali o Alvin Smith, na tacina daulomani na Parofita o Josefa Simici ni vo e ono na yabaki me vakalesuya mai na Kalou na lewa me ia na veipapitaisotaki. Na nodra vakabauta e vuqa vei ira na Lotu va-Karisito ena 1836 o ya ni gauna sa mate kina e dua ka se bera tu ni papitaisotaki, na tamata o ya ena sega ni gole ki lomalagi. A vakananuma o Josefa me baleta na vakabulai tawamudu nei Alaveni ena vuqa na yabaki—me yacova ni sa qai ciqoma na ivakatakila ena Vunau kei na Veiyalayalati 137.

E vuqa na tamata nikua e tu vei ira na mataqali taro vata oya. Na cava na vuna e gadreva kina na Kalou na cakacaka vakalotu kei na veiyalayalati ni vuqa na tamata e sega na nodra madigi me ra ciqoma? Na cava o rawa ni tukuna vua e dua e vaqori nona taro? Ona tara cake vakacava na nodra vakabauta na Kalou kei na Nona gagadre me baleta na veivakabulai? Vakaraica na dina o rawa ni wasea ena wase 137 kei na wase 138:30–37, 57–60. Sa rawa talega mo vakasaqara na dina eso oqo e vakaraitaki tiko ena serenilotu “The Glorious Gospel Light Has Shone” (Sere ni Lotu, naba 283) kei na itukutuku nei Peresitedi Henry B. Eyring “Vakasoqoni Vata na Matavuvale ni Kalou” (Liaona, Me 2017, 19–22).

Nio vulica ka vakasamataka vakatitobu, e rawa nio vola na veika o vakauqeti kina ena nomu vakacavara na iyatuvosa vakaoqo:

• Ena vuku ni ivakatakila oqo, au kila kina ni Tamada Vakalomalagi .

• Ena vuku ni ivakatakila oqo, au kila kina ni ituvatuva ni veivakabulai nei Tamada .

• Ena vuku ni ivakatakila oqo, au vinakata meu .

Raica talega na Yalododonu,, 1:232–35.

Vunau kei na Veiyalayalati 138:1–11, 25–30

Niu wilika ka vakasamataka vakatitobu na ivolanikalou ena vakarautaki au meu ciqoma na ivakatakila.

Ena so na gauna e yaco mai na ivakatakila ena gauna mada ga eda sega ni vakasaqara kina. Ia e vakavuqa, e dau yaco mai baleta nida vakasaqara vagumatua yani ka vakavakarau tiko kina. Ni o wilika na Vunau kei na Veiyalayalati 138:1–11, 25–30, raica na ka a vakananuma tiko vakatitobu o Peresitedi Joseph F. Smith ena gauna “sa dolavi [kina] na mata ni [yalona].” E rawa talega nio vakatauvatana na veika a sotava ki na 1 Nifai 11:1–6; Josefa Simici—Ai Tukutuku 1:12–19. Mo qai raica na sala mo muria kina na ivakaraitaki nei Peresitedi Smith. Taura mada vaqo, na veisau cava soti o vakauqeti kina mo cakava ki na nomu vuli ivolanikalou mo ciqoma e levu cake na ivakatakila?

Ena nona itukutuku “Na Raivotu me Baleta na Nodra Vueti na Mate” (Liaona, Nove. 2018, 71–74), a vakatura kina o Peresitedi M. Russell Ballard eso tale na sala a vakarau tu kina o Peresitedi Smith me ciqoma na ivakatakila oqo. Na cava o vulica mai na veika osotava? Vakasamataka na sala sa vakarautaki iko kina na Turaga me baleta na veika o sotava tiko—kei na sala e rawa ni vakarautaki iko tiko kina o Koya me baleta na veika o na sotava ena nomu veisiga ni mataka.

Raica talega na Yalododonu, 3:202–5; “Ministry of Josefa F. Simici: A Vision of the Redemption of the Dead” (vidio), Valenivola Vakosipeli.

Ministry of Joseph F. Smith: A Vision of the Redemption of the Dead

Nearing death, President Joseph F. Smith receives revelation from God regarding redemption of the dead.

Josefa F. Simici,, mai vei Albert E. Salzbrenner

Sureta na Yalo Tabu. “Na cava o sa dikeva rawa e cau ki na dua na draki vakayalo ni kena vulici na kosipeli? Na cava e veivagolei tani kina? Veivakavulici ena iVakarau ni iVakabula, 18). Nio vulica na veika a sotava o Peresitedi Joseph F. Smith ena Vunau kei na Veiyalayalati 138:1–11, vakasamataka na sala o rawa ni vakayaloqaqataka kina na vakasama vakatitobu ka sureta na veivakauqeti vakayalo vei iko, kevaka o qasenivuli, me baleti ira o vakavulica.

Vunau kei na Veiyalayalati 138:25–60

E tomani tiko na cakacaka ni iVakabula ena yasa kadua ni ilati.

A vakavulica o Peresitedi Russell M. Nelson, “Na noda itukutuku ki vuravura e rawarawa ka dina: eda sureti ira na luveni Kalou taucoko ena yasa ni ilati ruarua me ra lako mai vua na iVakabula, ciqoma na kalougata ni valetabu savasava, reki bulatiko, ka bula tawamudu.” (“Me Da Sa Gu Tiko,” Liaona, Me 2018, 118–19). Vakasamataka na itukutuku oqo nio wilika na Vunau kei na Veiyalayalati 138:25–60. Sa rawa talega mo raica na veitaro oqo:

• Na cava o vulica mai na veitikina oqo me baleta na cakacaka ni veivakabulai e sa qaravi rawa tiko ena vuravura ni yalo? Na cava na vuna e bibi kina vei iko mo kila ni sa vakayacori tiko na cakacaka oqo?

• Na cava e vakauqeti kemuni me baleti ira na italai ni Turaga ena vuravura ni yalo?

• E vaqaqacotaka vakacava na nomu vakabauta na ituvatuva ni veivueti ni Kalou?

Kevaka o gadreva mo vulica eso tale na ka me baleta na vuravura ni yalo, sa rawa mo vulica na itukutuku nei Peresitedi Dallin H. Oaks “Vakararavi vua na Turaga” (Liaona, Nove. 2019, 26–29).

Raica talega na “Susa Young Gates and the Vision of the Redemption of the Dead,” ena Revelations in Context, 315–22; “A Visit from Father” (vidio) ”Valenivola Vakosipeli.

A Visit from Father

President Russell M. Nelson recounts a personal family history story that bears testimony of the importance of temple and family history work for all families.

Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 137:5–10; 138:18–35

O ira kece na luvei Tamada Vakalomalagi ena yaco na gauna mera na rogoca kina na kosipeli.

• Mera vulica me baleta na kena ibalebale vei Joseph Smith me raica e vica na nona lewe ni matavuvale ena matanitu vakasilesitieli, e rawa nira sarava na luvemu na vidio “Ministry of Joseph Smith: Temples” (Gospel Library), se rawa ni o wasea na iTalanoa mai na Vunau kei na Veiyalayalati, 152–53 (se na kena vidio ena Valenivola Vakosipeli). Sa rawa tale ga me veivosakitaki e dua o kila sa mate ka sega na nona madigi me papitaiso kina. Na cava e vakavulica vei keda na Vunau kei na Veiyalayalati 137:5-10 me baleta na tamata o ya?

  Ministry of Joseph Smith: Temples

  Joseph Smith establishes temple work as an essential purpose for the Saints of God.

  Chapter 39: The Kirtland Temple Is Dedicated: January–March 1836

• Sa rawa mo vakayagataka e dua na iyaloyalo ni ibulubulu ni iVakabula (raica na Vola ni iYaloyalo Vakosipeli, naba 58, se iTaba ni iVola Tabu, naba 14) kei na iyaloyalo ena iotioti ni ituvatuva oqo mo vakavulici ira kina na luvemu ena vanua a lako kina na yaloi Jisu ena gauna a tiko kina na Yagona ena ibulubulu. Mo ni qai wilika vata na Vunau kei na Veiyalayalati 138:18–19, 23–24, 27–30 mo vulica na veika a cakava o Jisu ni tiko e kea. O cei a sikova o Koya? Na cava a kerea o Koya me ra cakava? Cava e cakava kina o Koya?

  

• E rawa talega nio vakayagataka na tabana ni itaviqaravi ena macawa oqo me vukei ira na luvemu mera vakatauvatana na veika era vakavulica na daukaulotu ena yasa ni ilati oqo (raica, me ivakaraitaki, Yavu ni Vakabauta1:4) kei na veika era vakavulica na daukaulotu ena vuravura ni yalo (raica na Vunau kei na Veiyalayalati 138:33). Na cava e tautauvata ena veitikina oqo, kei na cava e duidui? Na cava e vakavulica vei keda na ivakatakila oqo me baleta na Tamada Vakalomalagi kei na Nona ituvatuva?

Na vakasamataki vakatitobu ni ivolanikalou ena sureta na Yalo Tabu.

Vunau kei na Veiyalayalati 138:1–11

Niu vakasamataka vakatitobu na ivolanikalou, na Yalo Tabu e rawa ni vukei au meu kila na kena ibalebale.

• Nio wilika vata kei ira na nomu gone na Vunau kei na Veiyalayalati 138:1–11 e rawa nio sureti ira me ra vakatasuasuataka nio ira o Peresitedi Josefa F. Simici ka cakava na ivukivuki e salavata kei na vosa ena tikina e 6 kei na 11. E rawa talega nio vakaraitaka vei ira e dua na iyaloyalo kei Peresitedi Smith (e tiko e dua ena ituvatuva oqo) ka vakamacalataka nio koya na ikaono ni Peresitedi ni Lotu. E rawa talega nio wasea na gauna o vakasamataka kina edua ena volanikaou ka qai vukei iko na Yalo Tabu.

• Lagata vata e dua na sere ni vuli ivolanikalou, vaka na “Vaqaqara ka Masu” (Volanisere ni Gonelalai, 66). Na cava e tukuna na sere oqo meda vakayacora meda kila vakavinaka kina na ivolanikalou?

Me baleta na vakasama tale eso, raica na ilavelave ni mekasini ni iTokani ni vula oqo.

Ira Na Lesi, mai vei Harold Hopkinson.