“Na Matavuvale sa iTakele ni Nona iTuvatuva na Dauniveibuli”

Na Matavuvale: Na iVakaro iVuravura Raraba

Nida se bera mada ga ni sucu, eda a tiki tu ni dua na matavuvale—na nodrau matavuvale na noda itubutubu vakalomalagi. Na ivakarau oqori e tomani tikoga e vuravura. Na matavuvale eke, ena kedra vinaka duadua, era nakiti me a vakavoqataka na ivakarau e uasivi sara mai lomalagi.

E dina, ni sa sega na ivakadei ni matavuvale ena vuravura oqo mena totoka vakaoti se matata vinaka. Ia me vaka a vakavulica o Peresitedi Henry B. Eyring, na matavuvale “era solia kivei ira na luve ni Kalou na gauna vinaka duadua mera kidavaki kina e vuravura mai na loloma duadua ga e vuravura e volekata sara na ka eda a vakila mai lomalagi—na loloma vakaitubutubu” (“Vakasoqoni Vata na Matavuvale ni Kalou,” Liaona, Me 2017, 20). Na noda kila ni matavuvale e sega ni uasivi sara ka rawa ni valuti mai vua na meca, sa tala mai kina na Kalou na Luvena Daulomani me mai vueti keda ka vakabula na noda matavuvale. Ka sa talai ira mai na parofita edaidai kei na ivakaro raraba me taqomaka ka vaqaqacotaka na matavuvale. Kevaka eda na muri ira na parofita ka vakabauta tiko na iVakabula, e dina ga ni matavuvale vakayago sa sega ni yacova rawa na veika dodonu vakalou, sa tiko na inuinui ni matavuvale—e vuravura ka vakakina mai lomalagi.

Vakasama eso ni Vuli e Vale kei na Lotu

“Na Matavuvale sa iTakele ni Nona iTuvatuva na Dauniveibuli.”

“Na Matavuvale: Na iVakaro iVuravura Raraba” esa baleta sara ga na matavuvale. Ia esa baleta vakatautauvata na ituvatuva ni veivakabulai ni Kalou. E dua na sala me vulici kina na ivakaro o ya me volai na veimalanivosa ni bula taumada, bula oqo, kei na bula sa bera mai ena dua na tiki ni pepa ka vola na veika e vakavulica na ivakaro me baleta na veiulutaga yadua oqo. Na cava o kila rawa nio vulica na ivakaro ena sala oqo? Ena vukei iko vakacava oqo mo kila vakamatata na vuna e yaga vakalevu kina na vakamau kei na matavuvale ena ituvatuva ni Kalou? E vakayarayarataka vakacava na nomu digidigi na dina e tiko ena ivakaro raraba?

E vuqa na tamata, ena vuqa na iulubale, era na ririkotaka beka na vakawati se susu gone. Kevaka e kaya vei iko e dua na itokani, “Au sega ni via vakawati se vakamatavuvale,” na cava o na kaya? E rawa beka nio vakasaqara na ivakaro mo kunea e dua na ka ena vukea na nomu itokani me nuitaka na ituvatuva ni Kalou.

E dua tale na taro e rawa nio tarogi kina—se o na tarogi iko beka—ena vaqo beka: “Vakacava ke sega ni veisotari na ituvaki ni noqu matavuvale kei na veika e vakamacalataki ena ivakaro ni matavuvale?” Oqo e rua na vanua e rawa ni o vakasaqara kina na ivakasala vakaparofita: na iwase “E Dua na Veisau Levu” ena itukutuku nei Elder Dieter F. Uchtdorf “O Jisu Karisito sa iSakisaki ni iTubutubu” (Liaona, Me 2023, 55–59) kei na iotioti ni va na parakaravu ni itukutuku nei Elder D. Todd Christofferson “A Cava na Vu ni Vakawati, A Cava na Vuni Matavuvale” (Liaona, Me 2015, 52).

Na cava o vakauqeti kina mo cakava mai na veika o sa vulica?

Raica talega Dallin H. Oaks, “Na iTuvatuva kei na iVakaro,” Liaona, Nove. 2017, 28–31; Ulutaga kei na Taro, “Matavuvale,” Valenivola Vakosipeli.

O keda yadua eda “luvedrau tagane se yalewa lomani vakayalo na noda itubutubu vakalomalagi.”

Eda dau vakasamataka wasoma na ivakaro ni matavuvale me idusidusi ni bula vakamatavuvale. Ia e vakavuvulitaka talega na dina bibi me baleta na noda matavuvale vakalomalagi kei na keda ivakatakilakila tawamudu. Na cava e bibi kina vei iko mo kila nida sa tiki taucoko ni matavuvale oqo? E vakayarayarataka vakacava na digidigi o cakava na dina oqo?

Raica na “Au Luve ni Kalou,” Sere ni Lotu, naba 185.

“Ena qai rawati sara na marau ni bula vakamatavuvale ni sa yavutaki ena ivakavuvuli ni Turaga o Jisu Karisito.”

Vakasamataka mada na parakaravu 6 and 7 ni ivakaro raraba ni matavuvale me dua na ivkarau ni “bula marau ena bula vakamatavuvale.” Ni ko wilika na parakaravu oqo, vakatakila na ivakavuvuli ni “vakawati kei na matavuvale gugumatua.” O na vakasamataka beka na ivakaraitaki eso ni ivakavuvuli oqo o sa raica ena nomu matavuvale se matavuvale tale eso. E veivuke vakacava na ivakavuvuli oqo me yavu ni bula vakamatavuvale o Jisu Karisito?

Mo vakasamataka e dua na veiwekani vakamatavuvale o gadreva mo vaqaqacotaka. Cakava e dua na ituvatuva, ena veivuke ni iVakabula, mo cakacakataka na veivakauqeti o ciqoma.

Raica talega L. Whitney Clayton, “Na iTikotiko Uasivi,” Liaona, Me 2020, 107–9.

Mera susuga cake na itubutubu na luvedra ena loloma kei na buladodonu.

“Eda kacivi ira na lewenivanua yalomatua … me maroroya ka vaqaqacotaka na matavuvale.”

Na iotioti ni parakaravu ni ivakaro ni matavuvale e oka kina na veikacivi me cakacakataki. Nio vakasamataka na ivakarau mo na sauma kina na veikacivi oya, ena rawa ni veivuke me vulici na ulutaga ni ivakaro. Me vakataka, na cava na ivakaro? Na cava e tukuna vei iko na vosa oya me baleta na itukutuku oqo? Eratou donuia beka vakacava na Mataveiliutaki Taumada kei na Matabose ni iApositolo Le Tinikarua me ratou vakaroti vuravura raraba me baleta na matavuvale? E rawa talega nio cakava e dua na lisi ni veika o nanuma me itukutuku bibi ni ivakaro. Ona vakauqeta vakacava na itukutuku oqo ena nomu bula, ena nomu vuvale, kei na nomu itikotiko?

Raica talega na Bonnie L. Oscarson, “Ira na Dautaqomaka na iVakaro ni Matavuvale,” Liaona, Me 2015, 14–17; “Defenders of the Faith” (vidio), Valenivola Vakosipeli.

Defenders of the Faith

Marie Madeline Cardon and her family were holding a Church service in their home in Italy when an angry mob of men gathered and began shouting for the missionaries to be brought outside. It was Marie who marched out of the house to confront the mob.

Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Na matavuvale era sa tiki bibi ni ituvatuva nei Tamada Vakalomalagi

• Vukei ira na gone mera vakasamataka na veika e rui bibi kina mera na via tukuna vei ira taucoko me baleti ira. Vakaraitaka vei ira na gone e dua na ilavelave ni “Na Matavuvale: iVakaro ki Vuravura Raraba,” ka vakamacalataka nio ira na parofita kei na iApositolo era vola me tukuni vei ira kece na bibi ni matavuvale vua na Tamada Vakalomalagi. Cava na vuna era sa rui bibi kina Vua na matavuvale? (raica talega na vidio“What Is the Purpose of Family?” [ChurchofJesusChrist.org]).

  What Is the Purpose of Family?

  The family is the divine building block of society.

• Wasea vei ira nomu gone e dua na ka mai na ivakaro o nanuma nida gadreva kece meda kila. Sureti ira na gone mera wasea na nodra nanuma me baleta na dina oya. Ena duatani vakacava na noda bula kevaka eda sega ni kila na veika oqo? Sa rawa moni lagata vata e dua na sere e semati kina dina e kunei ena ivakaro, me vaka na “Meu Muria na Nona Lewa” (Nodra iVolanisere na Gonelalai, 86).

• Ena wase IV ni nona itukutuku “Na iTuvatuva kei na iVakaro” (Liaona, Nove. 2017, 30), a vakamacalataka kina o President Dallin H. Oaks na sal a volai kina na ivakaro ni matavuvale. Ena rawa beka vei iko kei ira na gone moni railesuva vata na nona ivakamacala ka veivosakitaka na vuna o vakavinavinakataka vakauqeti ira na Nona italai na Turaga mera vakavulica vei keda na dina oqo me baleta na matavuvale.

• E rawa talega nio vakaraitaka na iyaloyalo vei ira na gone (se sureti ira mera droinitaka eso) e vakatakarakarataka na dina e kune ena ivakaro ni matavuvale. Oqo sa rawa me iyaloyalo ni dua na valetabu, masumasu se era qito voli e dua na matavuvale, se dua na veiwatini vakamau. Oti mera qai raica na nomu gone na iyatuvosa ena ivakaro ni matavuvale ka semati ki na iyaloyalo. Na cava e vakavulica vei keda na Turaga me baleta na veika oqo ena ivakaro?

Vinakata na Tamada Vakalomalagi me bula marau na matavuvale.

Mo dau qarauna. Nio vakavulica na dina e vakavulici ena ivakaro ni matavuvale, yalovinaka mo kila tiko ni vuqa na gone e susugi ena matavuvale e sega ni veidonui kei na inaki e tukuni tiko ena ivakaro. Vakasamataka na sala mo vakayaloqaqataki ira ka vakauqeti ira kina.

O au na “luvena tagane se yalewa lomani vakayalo na noda itubutubu vakalomalagi.”

• Ni lagati vata na ”Au Luve ni Kalou” (iVolanisere ni Gonelalai 2– 3), e rawa nio viritaka e dua na polo vua e dua na gone ni ko kaya, “Au kila e dua na luve ni Kalou ka yacana o [yacana na gone].” Kerei ira na gone me viritaka na polo vua e dua tale na gone, cavuta na vosa vata ga ka vakacuruma na yacana na gone oya. Vukei ira na luvemu mera raica na malanivosa “na luvedrau tagane se yalewa lomani vakayalo na itubutubu vakalomalagi” ena ivakaro ni matavuvale, ka wasea na nomu ivakadinadina me baleta na dina oqo.

Na matavuvale e dau mamarau vakalevu duadua ena gauna era sa muri Jisu Karisito.

• Me tekivu e dua na veivosaki me baleta na vaqaqacotaki ni nomu matavuvale, sa rawa vei iko kei ira na luvemu meda veivosakitaka na veika eda cakava me kaukauwa kina na veika tale eso—me vaka na batida, yagoda, se dua na vale. Mo qai vakatauvatana oqori ena kena tarai cake e dua na matavuvale kaukauwa. Vukei ira na gone me ra kila na ivakavuvuli e veimuataki ki na bula marau ena bula vakamatavuvale, ka kunei ena ikavitu ni parakaravu ni ivakaro ni matavuvale (raica talega na tabana ni itaviqaravi).

Me baleta na vakasama tale eso, raica na ilavelave ni mekasini iTokani ni vula oqo.