Apendiks A

Alang sa mga Ginikanan—Pag-andam sa Inyong Mga Anak nga Maanaa sa Dalan sa Pakigsaad sa Dios sa Tibuok Kinabuhi

Tungod kay Siya nahigugma kanimo, misalig kanimo, ug nakahibalo sa imong potensyal, ang Langitnong Amahan naghatag kanimo sa oportunidad sa pagtabang sa inmong mga anak sa pagsulod ug pag-uswag subay sa dalan sa pakigsaad, ang dalan ngadto sa kinabuhing dayon (tan-awa diha sa Doktrina ug mga Pakigsaad 68:25–28). Kini naglakip sa pagtabang kanila sa pagpangandam sa paghimo ug sa paghupot og sagradong mga pakigsaad, ingon sa pakigsaad sa bunyag ug ang mga pakigsaad nga gihimo diha sa templo. Pinaagi niini nga mga pakigsaad, ang imong mga anak mobugkos sa malipayong paagi sa ilang mga kaugalingon ngadto sa Manluluwas, si Jesukristo.

Adunay daghang paagi sa pag-andam sa imong mga anak alang sa panaw diha sa dalan sa pakigsaad, ug ang Langitnong Amahan motabang kaninyo sa pagdiskobre sa labing maayo nga paagi sa pagtabang kanila. Samtang magtinguha ka og inspirasyon, ibutang sa hunahuna nga dili tanan nga pagkat-on mahitabo atol sa gieskedyul nga mga leksiyon. Sa tinuod, kabahin sa unsay nakahimo sa pagkat-on diha sa panimalay nga hilabihan ka gamhanan mao ang oportunidad sa pagkat-on pinaagi sa ehemplo ug pinaagi sa gagmay, yano nga mga higayon—ang matang nga mahitabo sa natural nga paagi sa dagan sa inadlaw nga pagpuyo. Sama lamang nga ang pagsunod sa dalan sa pakigsaad usa ka makanunayon, tibuok kinabuhi nga proseso, mao usab ang pagkat-on mahitungod sa dalan sa pakigsaad. (Tan-awa diha sa “Panimalay ug Pamilya,” Pagtudlo Sumala sa Pamaagi sa Manluluwas [2022], 30–31.)

Sa ubos mao ang pipila sa mga ideya nga mahimong mogiya ngadto sa dugang pa nga inspirasyon. Makakaplag kamo og dugang nga mga ideya alang sa pagtudlo sa mga bata nga Primary ang pangidaron diha sa “Apendiks B: Alang sa Primary—Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”

Bunyag ug Pagkompirma

Gitudlo ni Nephi nga “ang ganghaan pinaagi diin [kita] mosulod” sa dalan sa pakigsaad “mao ang paghinulsol ug bunyag pinaagi sa tubig” (2 Nephi 31:17). Ang imong mga paninguha sa pagtabang sa imong mga anak sa pag-andam alang sa bunyag ug pagkompirma makabutang sa ilang mga tiil sa lig-on nga paagi diha niana nga dalan. Kini nga mga paninguha pagasugdan sa pagtudlo mahitungod sa hugot nga pagtuo diha ni Jesukristo ug sa paghinulsol. Kini naglakip usab sa pagtudlo mahitungod kon unsaon nato sa pagbag-o sa atong mga pakigsaad sa bunyag pinaagi sa pag-ambit sa sakramento matag semana.

Gitudlo ni Nephi nga “ang ganghaan pinaagi diin [kita] mosulod” sa dalan sa pakigsaad “mao ang paghinulsol ug bunyag pinaagi sa tubig” (2 Nephi 31:17).

Aniay pipila ka kapanguhaan nga makatabang kaninyo: 2 Nephi 31; espesyal nga isyu sa Higala nga magasin mahitungod sa bunyag; Mga Hilisgotan ug mga Pangutana, “Bunyag,” Librarya sa Ebanghelyo.

• Kon aduna kay kasinatian nga naglig-on sa imong hugot nga pagtuo diha sa Langitnong Amahan ug ni Jesukristo, ipakigbahin kini ngadto sa imong anak. Tabangi siya sa pagsabot nga ang hugot nga pagtuo usa ka butang nga makatubo nga mas lig-on ug mas lig-on pa sa tibuok kinabuhi. Unsa ang pipila ka butang nga mabuhat sa imong mga anak sa pagpalambo og mas lig-on nga hugot nga pagtuo diha ni Kristo sa dili pa siya bunyagan?

• Kon ang imong anak nakahimo og sayop nga pagpili, hisgoti sa malipayong paagi ang gasa sa paghinulsol. Ug kon ikaw nakahimo og usa ka sayop nga pagpili, ipakigbahin ang kalipay nga moabot kon ikaw maghinulsol. Ipamatuod nga tungod kay si Jesukristo miantos ug namatay alang sa atong mga sala, kita makahinulsol kada adlaw, mapasaylo, ug makadawat sa gahom sa pag-usab. Kon ang imong anak nagtinguha og kapasayloan, gawasnon ug pagmalipayon sa pagpasaylo.

• Sultihi ang imong anak mahitungod sa imong bunyag. Pagpakita og mga litrato ug pakigbahin og mga panumdoman. Hisgoti kon unsa ang imong gibati, sa unsa nga paagi nga ang imong mga pakigsaad sa bunyag nakatabang kanimo nga mas makaila ni Jesukristo, ug sa unsa nga paagi nga ang imong mga pakigsaad nagpadayon sa pagpanalangin sa imong kinabuhi. Awhaga ang imong anak sa pagpangutana.

• Kon adunay bunyag sa inyong pamilya o sa inyong ward, dad-a ang imong anak sa pagtan-aw niini. Pag-istoryahanay mo kon unsay nakita ug gibati ninyo ug sa imong anak. Kon mahimo, pakigsulti ngadto sa tawo nga gibunyagan ug pangutana sama sa mosunod: “Giunsa nimo paghimo niini nga desisyon? Giunsa nimo pagpangandam?”

• Sa matag higayon nga imong mamatikdan nga ang imong anak nagbuhat og usa ka butang nga ilang gisaad nga buhaton, hatagi og kinasingkasing nga pagdayeg. Pasabta nga ang pagtuman sa mga pasalig nagtabang kanato sa pag-andam sa pagtuman sa mga pakigsaad nga atong himoon kon kita bunyagan. Unsay atong gisaad sa Dios kon kita bunyagan? Unsa ang Iyang gisaad kanato? (Tan-awa sa Mosiah 18:8–10, 13.)

• Hisgoti kon sa unsa nga paagi nga ang pagkanakompirmahan ug pagkahimo nga usa ka miyembro sa Ang Simbahan ni Jesukristo sa mga Santos sa Ulahing mga Adlaw nakapanalangin kanimo. Pananglitan, giunsa nimo nga mas napaduol ngadto sa Langitnong Amahan ug ni Jesukristo samtang ikaw nagserbisyo sa uban ug samtang ang uban nagserbisyo kanimo? Tabangi ang imong anak sa paghunahuna og mga paagi sa pagserbisyo ug paglig-on sa uban isip usa ka miyembro sa Simbahan. Tabangi usab sila nga makasinati ug makaila sa hingpit nga kalipay nga moabot gikan sa pagserbisyo.

• Kon ikaw ug ang imong anak adunay sagradong kasinatian (sama sa diha sa simbahan, samtang nagbasa sa mga kasulatan, o samtang nagserbisyo og usa ka tawo), sultihi sila mahitungod sa imong espirituwal nga mga pagbati o mga panghunahuna. Dapita ang imong anak sa pagpakigbahin unsa ang ilang gibati. Timan-i ang lainlaing mga paagi ang Espiritu makasulti ngadto sa mga tawo, lakip sa paagi nga Siya nagsulti nganha kanimo sa personal nga paagi. Tabangi ang imong anak sa pag-ila sa mga higayon nga sila nakasinati sa impluwensya sa Espiritu Santo.

• Pagdungan og tan-aw sa pipila ka bidyo diha sa koleksiyon sa Librarya sa Ebangheyo nga giulohan og “Paminaw Kaniya!” Pag-istoryahanay mo mahitungod sa lainlaing mga paagi nga makadungog ang mga sulugoon sa Ginoo sa Iyang tingog. Dapita ang imong anak sa pagdrowing og usa ka litrato o sa paghimo og usa ka bidyo mahitungod kon giunsa niya sa pagdungog sa tingog sa Manluluwas.

• Himoa ang sakramento nga usa ka sagrado ug malipayong hitabo sa inyong pamilya. Ipakigbahin sa imong anak giunsa nimo sa pagtutok ni Jesukristo atol sa sakramento. Tabangi ang imong anak nga maghimo og plano sa pagpakita nga ang sakramento sagrado ngadto kanila. Pananglitan, ang pagpaminaw sa mga pulong sa mga pag-ampo sa sakramento makapahinumdon nato sa atong mga pakigsaad sa bunyag.

• Daghang mga isyu sa Higala nga magasin naglakip og mga artikulo, mga istorya, ug mga kalihokan sa pagtabang sa mga bata sa pagpangandam alang sa bunyag ug pagkompirma. Papilia ang imong anak og pipila ka basahon ug kalingawan uban kaninyo. (Tan-awa usab ang koleksiyon “Pag-andam alang sa Bunyag” diha sa seksiyon sa kabataan sa Librarya sa Ebanghelyo.)

Gahom, Awtoridad, ug mga Yawe sa Pagkapari

Ang pagkapari mao ang awtoridad ug gahom sa Dios pinaagi diin Siya nagpanalangin sa Iyang mga anak. Ang pagkapari sa Dios ania sa yuta karon nga anaa diha sa Ang Simbahan ni Jesukristo sa mga Santos sa Ulahing mga Adlaw. “Ang tanang miyembro sa Simbahan kinsa motuman sa ilang mga pakigsaad—mga babaye, mga lalaki, ug mga bata—mapanalanginan sa gahom sa pagkapari sa Dios diha sa ilang mga panimalay aron sa paglig-on sa ilang kaugalingon ug sa ilang mga pamilya (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.6, Gospel Library). Kini nga gahom motabang sa mga miyembro sa paghimo sa buhat sa Dios bahin sa kaluwasan ug sa kahimayaan diha sa ilang personal nga mga kinabuhi ug sa mga pamilya (tan-awa sa Kinatibuk-ang Tamdanan nga Basahon, 2.2).

Kon ang mga lalaki ug mga babaye magserbisyo diha sa mga calling sa Simbahan, sila magbuhat sa mao uban sa awtoridad sa pagkapari, ubos sa pagdumala niadtong kinsa naghupot sa mga yawe sa pagkapari. Ang tanan nga mga anak sa Langitnong Amahan—Iyang mga anak nga lalaki ug Iyang mga anak nga babaye—mapanalanginan samtang mahimo sila nga mas makasabot sa pagkapari.

Kita magdawat og mga ordinansa pinaagi sa awtoridad sa pagkapari. “Ang takos nga mga miyembro sa Simbahan modawat sa awtoridad sa pagkapari pinaagi sa pagtugyan sa pagkapari ug ordinasyon ngadto sa mga katungdanan sa pagkapari” (Kinatibuk-ang Tamdanan nga Basahon, 3.4). Kadtong kinsa naghupot sa mga katungdanan sa pagkapari mahimong motugot sa usa ka tawo kinsa naghupot sa mga yawe sa pagkapari sa pagpahigayon og mga ordinansa sa pagkapari.

Sa pagkat-on pa mahitungod sa pagkapari, tan-awa sa Russell M. Nelson, “Espirituhanon nga mga Bahandi,” Liahona, Nob. 2019, 76–79; Russell M. Nelson, “Ang Bugti sa Gahom sa Priesthood [Pagkapari],” Liahona, Mayo 2016, 66–69; “Mga Baroganan sa Pagkapari,” kapitulo 3 sa Kinatibuk-ang Tamdanan nga Basahon.

• Himoa ang mga ordinansa sa pagkapari nga usa ka makanunayong bahin sa inyong kinabuhi sa pamilya. Sama pananglitan, tabangi ang imong anak sa pagpangandam sa espirtuhanong paagi alang sa sakramento matag semana. Awhaga ang imong anak sa pagtinguha og mga panalangin sa pagkapari kon siya nasakit o nagkinahanglan og paghupay o direksyon. Himoa kini nga batasan sa pagtudlo sa mga paagi ang Ginoo nagpanalangin sa inyong pamilya pinaagi sa gahom sa pagkapari.

• Samtang kamo mag-uban sa pagbasa sa mga kasulatan, bantayi ang mga oportunidad sa paghisgot kon giunsa sa Dios pagpanalangin ang mga tawo pinaagi sa Iyang gahom. Pakigbahin sa imong kaugalingong mga kasinatian sa dihang ang Dios mipanalangin kanimo pinaagi sa Iyang pagkapari. Alang sa mga ehemplo sa mga panalangin nga atong nadawat gikan sa Dios pinaagi sa pagkapari, tan-awa sa Kinatibuk-ang Tamdanan nga Basahon, 3.2, 3.5.

• Tudloi ang imong anak nga human sa bunyag, siya makadawat og gahom sa pagkapari pinaagi sa pagsunod sa pakigsaad sa bunyag. Rebyoha pagdungan ang mensahe ni Presidente Russell M. Nelson “Espirituhanon nga mga Bahandi” (Liahona, Nob. 2019, 76–79). Sultihi ang imong anak kon sa unsa nga paagi nga ang mga ordinansa sa pagkapari nakahatag og gahom sa Dios sa inyong kinabuhi. Alang sa usa ka lista sa pipila ka paagi kita napanalanginan pinaagi sa gahom sa pagkapari, tan-awa sa Kinatibuk-ang Tamdanan nga Basahon, 3.5.

• Hisgoti ang pangutana “Sama sa unsa ang usa ka sulugoon sa Ginoo?” Basaha og dungan ang Doktrina ug mga Pakigsaad 121:36–42, ug pangitaa ang mga tubag. Sa matag higayon nga ikaw makamatikod sa imong anak (o lain nga tawo) nga naggamit sa usa sa mga baroganan o mga hiyas niini nga mga bersikulo, itudlo kini.

• Kon kamo o ang imong anak naggamit sa mga yawe sa pag-abli og pultahan o sa pagpaandar og sakyanan, hunong sa makadiyot aron sa pagtandi niadto nga mga yawe ngadto sa mga yawe nga gihuptan sa mga lider sa pagkapari. (Alang sa usa ka kahulogan sa mga yawe sa pagkapari, tan-awa diha sa Kinatibuk-ang Tamdanan nga Basahon, 3.4.1). Unsay “giablihan” o “gipaandar” sa mga yawe sa pagkapari alang kanato? Tan-awa usab sa Gary E. Stevenson, “Asa ang mga Yawe ug Awtoridad sa Pagkapari?,” Liahona, Mayo 2016, 29–32. “Where Are the Keys?” (video), Gospel Library.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

• Kon ikaw gi-set apart alang sa usa ka calling, dapita ang imong anak nga motambong, kon mahimo. Pakitaa ang imong anak nga ikaw nagtuman sa imong calling. Mahimo gani nga mangita ka og tukma nga mga paagi nga sila makatabang kanimo. Ihulagway kon sa unsa nga paagi nga ikaw mibati sa gahom sa Ginoo sa imong calling.

Ang Pagpabunyag ug Pagpakompirma alang sa mga Katigulangan

Ang mga templo usa ka bahin sa plano sa Langitnong Amahan alang sa Iyang mga anak. Diha sa balay sa Ginoo, kita naghimo og sagradong mga pakigsaad uban sa Langitnong Amahan samtang moapil kita sa sagradong mga ordinansa, diin ang tanan nagpunting ngadto ni Jesukristo. Ang Langitnong Amahan naghatag og paagi alang sa Iyang tanan nga mga anak sa paghimo og mga pakigsaad ug sa pag-apil sa mga ordinansa, lakip niadtong kinsa wala makadawat niini dinhi nga kinabuhi. Sa sinugdanan sa tuig nga ang imong anak mag-edad og 12, igo na ka hingkod nga magpabunyag ug magpakompirma didto sa templo alang sa namatay nga mga katigulangan (tan-awa usab sa 1 Mga Taga-Corinto 15:29).

• Adto sa templo kutob sa itugot sa inyong panahon. Pakigsulti sa imong anak mahitungod kon nganong kamo moadto ug sa unsang paagi ang templo nagtabang kaninyo nga mobati nga mas duol ngadto sa Langitnong Amahan ug ni Jesukristo.

• Rebyoha ug hisgoti ang mga pangutana sa rekomend sa templo. Inyong makita ang mga pangutana sa mga pahina 36–37 sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili (2022). Pakig-istorya sa imong anak mahitungod kon unsa ang mahitabo sa usa ka interbiyo sa rekomend sa templo. Pakigbahin kon nganong ang pagbaton og rekomend sa templo importante kaninyo.

• Basaha pagdungan ang Malaquias 4:6. Pag-istoryahanay mahitungod kon sa unsa nga paagi nga ang inyong mga kasingkasing mahimong mobalik ngadto sa inyong mga katigulangan. Pagkat-on pa og dugang mahitungod sa inyong mga katigulangan pinaagi sa pagsuhid og dungan sa inyong kasaysayan sa pamilya diha sa FamilySearch.org. Pangita og mga katigulangan kinsa kinahanglan nga mabunyagan ug makompirmahan. Ang usa ka templo ug family history consultant sa ward makatabang kaninyo.

• Rebyoha og dungan ang pipila sa mga kapanguhaan diha sa koleksiyon nga giulohan og “Templo” diha sa seksiyon sa mga bata sa Librarya sa Ebangheyo. (Tan-awa usab sa “Preparing Your Child for Temple Baptisms and Confirmations” on ChurchofJesusChrist.org.)

Pagdawat og Patriyarkal nga Panalangin

Ang usa ka patriyarkal nga panalangin mahimong usa ka tinubdan sa giya, kahupayan, ug inspirasyon. Kini naglangkob og personal nga tambag gikan sa Langitnong Amahan ngari kanato ug nagtabang kanato sa pagsabot sa atong mahangtorong pagkatawo ug katuyoan. Tabangi ang imong anak sa pagdawat og usa ka patriyarkal nga panalangin pinaagi sa pagtudlo kaniya sa kamahinungdanon ug sa sagrado nga kinaiyahan sa patriyarkal nga mga panalangin.

Aron makat-on pa og dugang, tan-awa ang Mga Hilisgotan ug mga Pangutana, “Patriyarkal nga mga Panalangin,” Librarya sa Ebanghelyo; Julie B. Beck, “Ikaw Adunay Dungganon nga Katungod sa Pagkatawo,” Liahona, Mayo 2006, 106–8.

• Ipakigbahin sa imong anak ang imong kasinatian sa pagdawat og usa ka patriyarkal nga panalangin. Makahimo ka sa pagpakigbahin og mga butang kon giunsa nimo pag-andam sa pagdawat niini, kon sa unsa nga paagi kini nakatabang kanimo nga mas mapaduol ngadto sa Dios, ug sa unsa nga paagi nga Siya padayon nga migiya kanimo pinaagi niini nga panalangin. Mahimo usab nga imong dapiton ang imong anak nga makig-istorya sa ubang mga sakop sa pamilya kinsa nakadawat sa ilang patriyarkal nga mga panalangin.

• Rebyoha pagdungan ang mensahe ni Elder Randall K. Bennett “Ang Inyong Patriyarkal nga Panalangin—Dinasig nga Direksiyon gikan sa Langitnong Amahan” ug ang mensahe ni Elder Kazuhiko Yamashita “Kanus-a Ka Angay nga Makadawat og Patriyarkal nga Panalangin” (Liahona, Mayo 2023, 42–43, 88–90). Ipakigbahin sa usag usa unsay imong nakat-onan gikan niini nga mga mensahe mahitungod kon ngano nga ang Langitnong Amahan gusto nga kita modawat og patriyarkal nga panalangin. Sa pagkat-on mahitungod sa proseso sa pagdawat og usa ka patriyarkal nga panalangin, tan-awa diha sa Kinatibuk-ang Tamdanan nga Basahon, 18.17.

• Kon kamo adunay mga katigulangan kinsa nakadawat og patriyarkal nga mga panalangin, tingali makapadasig ang pagbasa og pipila niini uban sa imong anak. Sa paghangyo og mga panalangin sa mga katigulangan kinsa namatay, log in ngadto sa ChurchofJesusChrist.org, iklik ang Tools diha sa ibabaw sa tuong bahin sa screen, ug pilia ang Patriarchal Blessing.

• Human ang imong anak makadawat og usa ka patriyarkal nga panalangin, dapita ang bisan hain sa mga sakop sa pamilya kinsa anaa dinha aron sa pagrekord sa ilang mga pagbati ug sa pagpakigbahin niini ngadto sa imong anak.

Pagdawat sa Pagtuga

Ang Dios gusto nga motuga, o mopanalangin, sa Iyang tanan nga mga anak uban sa “gahom gikan sa kahitas-an” (Doktrina ug mga Pakigsaad 95:8). Kita moadto sa templo sa pagdawat sa atong kaugalingong pagtuga sa makausa lamang, apan ang mga pakigsaad nga atong gihimo uban sa Dios ug ang espirituhanong gahom nga Iyang gihatag kanato isip kabahin sa pagtuga makapanalangin kanato sa matag adlaw sa atong mga kinabuhi.

• Pagbutang og hulagway sa templo diha sa inyong panimalay. Sultihi ang imong anak mahitungod sa mga pagbati nga imong nasinati didto sa balay sa Ginoo. Paghisgot kanunay mahitungod sa imong gugma alang sa Ginoo ug sa Iyang balay ug sa mga pakigsaad nga imong nahimo didto. Pangita og mga oportunidad sa pag-adto sa templo uban sa imong anak aron mopahigayon og mga bunyag ug mga kompirmasyon alang sa ilang mga katigulangan.

• Mosuhid pagdungan sa temples.ChurchofJesusChrist.org. Basaha pagdungan ang mga artikulo sama sa “About the Temple Endowment” ug “Prepare for the House of the Lord.” Papangutan-a ang imong anak og bisan unsa nga mga pangutana mahitungod sa templo. Alang sa giya mahitungod kon unsay imong masulti gawas sa templo, tan-awa ang mensahe ni Elder David A. Bednar “Andam nga Makaangkon sa Matag Gikinahanglan nga Butang” (Liahona, Mayo 2019, 101–4; tan-awa ilabi na ang seksiyon nga giulohan og “Nakasentro sa Panimalay ug Gisuportahan sa Simbahan nga Pagkat-on ug Pagpangandam alang sa Templo”).

• Samtang ikaw ug ang imong anak nag-apil o nagsaksi sa ubang mga ordinansa (sama sa sakramento o usa ka pagpanalangin nga mamaayo), paggahin og higayon sa paghisgot sa simbolismo nga nalakip diha sa ordinansa. Unsa ang girepresentar sa mga simbolo? Sa unsang paagi kini nagpamatuod ni Jesukristo? Kini makatabang sa imong anak sa pag-andam sa pagpamalandong sa simbolikanhon nga kahulogan sa mga ordinansa sa templo, diin nagpamatuod usab ni Jesukristo.

• Tabangi ang imong anak nga makamatikod kon giunsa nila sa pagsunod ang pakigsaad sa bunyag nga gihulagway diha sa Mosiah 18:8–10, 13. Tabangi usab ang imong anak nga makamatikod kon giunsa sa Ginoo sa pagpanalangin kanila. Lig-ona ang pagsalig sa imong anak sa ilang abilidad sa pagtuman sa mga pakigsaad.

• Pakigsulti sa dayag ug kanunay mahitungod kon sa unsang paagi ang imong mga pakigsaad sa templo naggiya sa imong mga pagpili ug nagtabang kanimo sa paglambo nga mas maduol ngadto ni Jesukristo. Mahimong gamiton nimo ang Kinatibuk-ang Tamdanan nga Basahon, 27.2, sa pagrebyo sa mga pakigsaad nga atong himoon diha sa templo. Kon kamo nakadawat na sa pagtuga, sultihi ang imong mga anak mahitungod kon sa unsang paagi nga ang mga garment sa templo nakatabang nimo sa paghinumdom sa imong mga pakigsaad uban ni Jesukristo (tan-awa sa “Sacred Temple Clothing” [video], Gospel Library).

Sacred Temple Clothing

From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Pagserbisyo og Misyon

Si Elder David A. Bednar mitudlo: “Ang bugtong nga labing importanteng butang nga inyong mahimo sa pagpangandam alang sa usa ka tawag aron sa pagserbisyo mao ang pagkahimong usa ka misyonaryo sa dili pa kamo moadto sa usa ka misyon. … Ang isyu dili nga moadto sa usa ka misyon; kondili, ang isyu mao ang pagkahimong usa ka misyonaryo ug pagserbisyo sulod sa atong tibuok kinabuhi sa bug-os natong kasingkasing, gahom, hunahuna, ug kusog. … Nangandam kamo alang sa tibuok ninyong kinabuhi nga misyonaryong pagserbisyo” (“Pagkahimong usa ka Misyonaryo,” Liahona, Nob. 2005, 45–46). Ang mga kasinatian nga ang imong anak mahimong usa ka misyonaryo mopanalangin kanila sa kahangtoran, dili lamang alang sa mubo nga panahon nga sila nagserbisyo isip usa ka misyonaryo.

Aron makat-on og dugang pa, tan-awa sa Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6–7; M. Russell Ballard, “Misyonaryo nga Pagserbisyo Mipanalangin sa Akong Kinabuhi sa Kahangtoran,” Liahona, Mayo 2022, 8–10; “Misyonaryong Pagpangandam: Pag-adjust sa Kinabuhing Misyonaryo,” Librarya sa Ebanghelyo.

• Paghatag og panig-ingnan kon unsaon sa pagpakigbahin sa ebanghelyo sa natural nga mga paagi. Kanunay nga mag-alisto sa mga oportunidad sa pagpakigbahin ngadto sa uban sa imong mga pagbati mahitungod sa Langitnong Amahan ug sa Manluluwas ug sa mga panalangin nga imong nadawat gikan sa gipahiuli nga ebanghelyo sa Manluluwas ug isip usa ka miyembro sa Iyang Simbahan. Dapita ang uban sa pag-apil sa inyong pamilya sa mga kalihokan nga may kalabotan sa Simbahan ug sa pamilya.

• Pangita og mga oportunidad alang sa inyong pamilya sa pakig-uban sa mga misyonaryo. Dapita sila sa pagtudlo sa imong mga higala, o pagtanyag kanila sa pagtudlo sa mga tawo diha sa inyong panimalay. Pangutan-a ang mga misyonaryo mahitungod sa mga kasinatian nga ilang nasinati ug sa unsang paagi ang misyonaryong pagserbisyo nagtabang kanila nga mas mapaduol ngadto ni Jesukristo. Pangutana usab kon unsa ang ilang gibuhat (o panghinaot nga ila untang nabuhat) sa pag-andam nga mahimong mga misyonaryo.

• Kon kamo miserbisyo og usa ka misyon, sulti sa dayag nga paagi ug sa kanunay mahitungod sa imong mga kasinatian. O dapita ang mga higala o mga sakop sa pamilya kinsa miserbisyo og mga misyon sa paghisgot mahitungod sa ilang pagmisyon. Ikaw makahisgot usab mahitungod sa mga paagi nga ikaw mipakigbahin sa ebanghelyo ngadto sa uban sa tibuok nimong kinabuhi. Tabangi ang imong anak sa paghunahuna og mga paagi nga sila mahimong mopakigbahin sa ebanghelyo.

• Hatagi ang imong anak og mga oportunidad sa pagtudlo sa inyong pamilya og mga baroganan sa ebanghelyo. Ang imong anak makahimo usab sa pagbansay sa pagpakigbahin sa ilang mga pagtuo ngadto sa uban. Sama pananglitan, kamo makahisgot og mga pangutana sama sa “Unsaon nato sa pagpaila sa Basahon ni Mormon ngadto sa usa ka tawo nga wala gayod sukad makadungog niini?” o “Unsaon nato paghulagway ang panginahanglan alang sa Manluluwas ngadto sa usa ka tawo kinsa dili usa ka Kristiyano?”

• Tabangi ang imong anak nga mahimong komportable nga makigsulti ngadto sa mga tawo. Unsa ang pipila ka maayong mga paagi sa pagsugod og usa ka panagsultihanay? Awhaga ang imong anak sa pagkat-on kon unsaon sa pagpaminaw sa unsay gisulti sa uban, pagsabot kon unsay anaa sa ilang mga kasingkasing, ug sa pagpakigbahin og mga kamatuoran sa ebanghelyo nga makapanalangin sa ilang mga kinabuhi.

• Pangita og mga oportunidad alang sa imong anak sa pagkat-on mahitungod sa ubang kultura ug mga pagtuo. Tabangi sila sa pag-ila ug pagrespeto sa maayo ug tinuod nga mga baroganan sa ubang mga tinuohan.

Pagdawat sa Ordinansa sa Pagselyo

Diha sa templo, ang bana ug asawa mahimong magminyo alang sa kahangtoran. Kini mahitabo sa usa ka ordinansa nga gitawag og “pagselyo.” Bisan tuod og kini nga ordinansa tingali daghang mga tuig pa ka layo alang sa imong anak nga babaye o lalaki, ang gamay, yano, kanunay nga mga butang nga imong gibuhat nga mag-uban kanunay atol niadto nga mga katuigan makatabang kanila sa pag-andam alang niining talagsaon nga panalangin.

• Basaha pagdungan ang “Ang Pamilya: Usa ka Pamahayag ngadto sa Kalibotan” (Librarya sa Ebanghelyo). Unsa ang gitudlo niini nga pamahayag mahitungod sa kalipay sa kinabuhi sa pamilya ug mahitungod sa malamposon nga mga kaminyoon? Uban sa inyong anak, pagpili og usa sa mga baroganan nga gilista diha sa pamahayag nga tun-an. Makahimo kamo sa pagpangita og mga kasulatan nga kalabot ngadto niana nga baroganan diha sa Ang Giya ngadto sa mga Kasulatan. Makahimo usab kamo og mga tumong sa paggamit niana nga baroganan sa mas hingpit nga paagi diha sa inyong pamilya. Samtang kamo nagbuhat sa inyong mga tumong, hisgoti pagdungan ang epekto sa pagsunod niana nga baroganan sa kinabuhi sa pamilya.

• Uban sa imong anak, basaha ang mensahe ni Presidente Dieter F. Uchtdorf “Ang Pagdayeg Niadtong Miluwas” (Liahona, Mayo 2016, 77–80). Kon kamo moabot sa seksiyon nga giulohan og “Ang Katilingban nga Pagkahuman Ilabay,” mahimo kamong mangita sa mga butang sa inyong panimalay nga ilabay ug ubang mga butang nga dili mahimong ilabay. Paghisgot mahitungod kon sa unsang paagi inyong atimanon og lahi ang mga butang kon gusto ninyo kining molungtad og dugay nga panahon. Unsa ang gisugyot niini mahitungod kon kinahanglan unsaon nato sa pag-atiman ang kaminyoon ug mga relasyon sa pamilya? Unsa pa ang atong makat-onan gikan sa mensahe ni Presidente Uchtdorf mahitungod kon sa unsang paagi ang Manluluwas makatabang kanato sa pagtukod og lig-ong mga kaminyoon ug mga pamilya?

• Matinud-anon nga mosulti sa inyong anak mahitungod sa mga butang nga nakat-onan ninyo ug sa inyong kapikas mahitungod sa pagbaton og mahangtorong kaminyoon nga nakasentro diha ni Kristo ug sa mga paagi nga inyong gipaningkamotan nga palamboon. Kon kamo ug ang inyong kapikas naselyo diha sa templo, ipakita sa imong anak pinaagi sa ehemplo kon giunsa ninyo sa pagpaningkamot sa pagsunod sa inyong mga pakigsaad sa usag usa ug sa Ginoo. Sultihi ang imong anak kon giunsa nimo pagpaningkamot sa paghimo sa Langitnong Amahan ug ni Jesukristo nga sentro sa imong relasyon ug sa unsang paagi Sila nagtabang kaninyo (tan-awa usab sa Ulisses Soares, “Diha sa Panag-uban sa Ginoo,” Liahona, Nob. 2022, 42–45).

• Kon ang mga desisyon sa pamilya kinahanglan nga pagahimoon, paghimo og mga pagtambag ug mga panaghisgot sa pamilya. Seguroha nga ang tanang mga opinyon sa mga sakop sa pamilya paminawon ug hatagan og bili. Gamita kini nga mga panaghisgot isip oportunidad sa paghatag og panig-ingnan sa maayong komunikasyon ug kaluoy diha sa mga relasyon sa pamilya, bisan pa og dili tanan nakakita sa mga butang sa samang paagi. (Tan-awa sa M. Russell Ballard, “Mga Family Council,” Liahona, Mayo 2016, 63–65.)

• Diin adunay dili panag-uyon o panagbangi diha sa pamilya, pagpakita og pailob ug kaluoy. Tabangi ang imong anak nga makakita kon unsaon pagdumala og panagbangi sa Kristohanong mga paagi nga makatabang kaniya sa pagpangandam alang sa usa ka malipayong kaminyoon. Basaha pagdungan ang Doktrina ug mga Pakigsaad 121:41–42, ug hisgoti ang mahitungod kon sa unsang paagi ang mga baroganan dinhi niini nga mga bersikulo magamit sa kaminyoon.