Xtiqb’al li aatin C

Choq’ re li Tzoleb’aal reheb’ li Kok’al—Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak

Eb’ li loq’laj b’ich numtajenaq xwankileb’ re xtenq’ankileb’ li kok’al chi tzolok chirix lix k’uub’anb’il na’leb’ li qaChoxahil Yuwa’ re sahil ch’oolejil ut chirixeb’ li na’leb’ re lix evangelio li Jesukristo. Naq eb’ li kok’al neke’b’ichan chirixeb’ li na’leb’ re li evangelio, li Santil Musiq’ej naxch’olob’ xyaalalileb’ li na’leb’ a’an. Eb’ li aatin ut li son te’kanaaq sa’ xk’a’uxleb’ ut raameb’ li kok’al chiru chixjunil lix yu’ameb’.

Sik’omaq xtenq’ li Musiq’ej naq nekekawresi eerib’ chixk’utb’al li evangelio rik’in li b’ichank. Wotzomaq lix nawom eech’ool chirixeb’ li yaal nekeb’icha. Tenq’ahomaqeb’ li kok’al chixk’eeb’al reetal chan ru naq li b’ichank naxk’am rib’ rik’in li yookeb’ chixtzolb’al ut chixnumsinkil sa’ rochocheb’ ut sa’ li Tzoleb’aal reheb’ li Kok’al.

Li tenq’anel na’leb’ chirix li k’anjel reheb’ li kok’al sa’ li ch’utam re li loq’laj wa’ak

Rik’in xb’eresihom li obiisp, li k’anjel reheb’ li kok’al sa’ li ch’utam re li loq’laj wa’ak nak’ulman chi kok’ aj xsa’ sa’ jun reheb’ li po sa’ xraqik li chihab’. Jo’ awa’b’ejil re li Tzoleb’aal reheb’ li Kok’al ut aj b’eresinel b’ich, k’anjelanqex rik’in laj tenq’ aj k’ehol na’leb’ re li obiisp li naxjolomi li Tzoleb’aal reheb’ li Kok’al re xk’uub’ankil li k’anjel.

Tento naq li k’anjel tixk’e xhoonaleb’ li kok’al chixwotzb’al k’a’ru xe’xtzol a’an ut lix junkab’aleb’ sa’ ochoch ut sa’ li Tzoleb’aal reheb’ li Kok’al chirix li Tzol’leb’ ut Sumwank, jo’eb’ ajwi’ li b’ich li xe’xb’icha chiru li chihab’. Naq nekek’uub’ li k’anjel a’in, k’oxlahomaq chan ru naru tixtenq’aheb’ li komon chixk’oxlankil li Kolonel ut eb’ lix k’utum.

Wi ka’ajwi’ junjunqeb’ li kok’al wan sa’ li teep malaj uq’ej, k’oxlahomaq chan ru lix junkab’aleb’ naru neke’tz’aqon sa’ li k’anjel rochb’eeneb’ lix kok’al. Jun komon sa’ li obiispil naru taa’aatinaq re xraqb’al li ch’utam.

Naq nekek’uub’ li k’anjel, chijultiko’q eere li na’leb’ a’in:

• Ink’a’ us xb’aanunkil li practica choq’ re li k’anjel li tixmaq’ raj naab’al hoonal reheb’ li tzoleb’aal sa’ li Tzoleb’aal reheb’ li Kok’al malaj li junkab’al.

• Ink’a’ us roksinkileb’ li jalam-uuch, li disfraz, ut li video sa’ li ch’utam re li loq’laj wa’ak.

Chi’ilmanq Jolomil K’anjenel Hu: Li k’anjelak sa’ Lix Iglees li Jesukristo Reheb’ laj Santil Paab’anel sa’ Roso’jikeb’ li Kutan, 12.2.1.2, Biblioteca del Evangelio.

Xch’olob’ankil li hoonal re b’ichank

5 k’asal (awa’b’ejil re li Tzoleb’aal reheb’ li Kok’al): Li tijok sa’ xtiklajik, jun raqal sa’eb’ li loq’laj hu malaj eb’ lix raqalil li paab’aal, ut jun yaab’asinb’il aatin

20 k’asal (aj b’eresinel b’ich): Hoonal re b’ichank

Li awa’b’ejil re li Tzoleb’aal reheb’ li Kok’al ut aj b’eresinel b’ich neke’xsik’eb’ ru li b’ich rajlal po re xka’jultikankileb’ li na’leb’ yookeb’ chixtzolb’aleb’ li kok’al sa’ xtzoleb’aaleb’ ut sa’ rochocheb’. Jun xtusulaleb’ li b’ich li neke’xka’jultikaheb’ li na’leb’ a’in naru neke’tawman sa’ li hu a’in.

Naq nakak’uteb’ li b’ich chiruheb’ li kok’al, kanab’eb’ chixwotzb’al li ak xe’xtzol chirixeb’ li seraq’ ut li tzol’leb’ li k’utb’ileb’ sa’eb’ li b’ich. Patz’ reheb’ li kok’al naq te’xwotz li neke’xk’oxla ut neke’reek’a chirixeb’ li na’leb’ sa’eb’ li b’ich.

Li B’ichleb’aal choq’ reheb’ li Kok’al a’an li tz’aqal k’anjeleb’aal choq’ re li b’ichank sa’ li Tzoleb’aal reheb’ li Kok’al. Us ajwi’ roksinkileb’ li b’ich sa’ xb’ichleb’aaleb’ li ninq ut sa’ li hu Amigos. Yalaq k’a’ paay chik chi b’ich li taa’oksimanq sa’ li Tzoleb’aal reheb’ li Kok’al, tento naq k’ulub’anb’ilaq xb’aan li obiispil (chi’ilmanq Jolomil K’anjenel Hu, 12.3.4).

Eb’ li b’ich choq’ re li hoonal re b’ichank

Enero

• Jun li profeet,” B’ichleb’aal choq’ reheb’ li Kok’al, 58–59

• “Tintzol, tink’oxla, tintijoq,” B’ichleb’aal choq’ reheb’ li Kok’al, 66

Febrero

• “Sik’ xb’aanunkil li tiikilal,” B’ichleb’aal choq’ reheb’ li Kok’al, 80

• “Natijok jun ch’ina al,” B’ichleb’aal choq’ reheb’ li Kok’al, 6–7

Marzo

• “Naq nakub’e lin ha’,” B’ichleb’aal choq’ reheb’ li Kok’al, 53

Abril

• “Naq taak’ulunq li Kolonel,” B’ichleb’aal choq’ reheb’ li Kok’al, 46–47

• “Ma yaal naq li Jesus xwakli?,” B’ichleb’aal choq’ reheb’ li Kok’al, 45

Mayo

• “Li roq li ha’ naxye,” B’ichleb’aal choq’ reheb’ li Kok’al, 116.

• “Lemtz’un,” B’ichleb’aal choq’ reheb’ li Kok’al, 96.

Junio

• “Li Santil Musiq’ej,” B’ichleb’aal choq’ reheb’ li Kok’al, 56

• “Nawaj tinwanq choq’ jun li misioneer,” B’ichleb’aal choq’ reheb’ li Kok’al, 90

Julio

• “Saqaq aawu,” B’ichleb’aal choq’ reheb’ li Kok’al, 81

• “Kixtaqla li Ralal,” B’ichleb’aal choq’ reheb’ li Kok’al, 20–21

Agosto

• “Chinwanq raj jo’ li Jesus,” B’ichleb’aal choq’ reheb’ li Kok’al, 40–41

• “Ninnaw naq raab’ilin,” B’ichleb’aal choq’ reheb’ li Kok’al, 42–43

Septiembre

• “Sa’ li santil ochoch,” B’ichleb’aal choq’ reheb’ li Kok’al, 99

Octubre

• “Jun li resilal li qajunkab’al,” B’ichleb’aal choq’ reheb’ li Kok’al,, 100

• “Lix iglees li Jesukristo,” B’ichleb’aal choq’ reheb’ li Kok’al, 48

Noviembre

• “Paab’eb’ li taqalahom,” B’ichleb’aal choq’ reheb’ li Kok’al, 68;

• “Re wank choqʼ tehol bʼe,” B’ichleb’aal choq’ reheb’ li kok’al, 138–139

Diciembre

• “Laa’in jun ralal li Dios,” B’ichleb’aal choq’ reheb’ li Kok’al, 2–3

• “At chʼina tenamit Belen,” Eb’ li B’ich, 130.

Oksi li b’ich re xk’utb’al li tzol’leb’

Nab’aanuman li hoonal re b’ichank re naq eb’ li kok’al neke’ru chixtzolb’aleb’ li na’leb’ re li evangelio. Eb’ li na’leb’ a’in naru tatxmusiq’a naq nakak’uub’ chan ru xk’utb’aleb’ li na’leb’ re li evangelio li wankeb’ sa’eb’ li b’ich ut sa’eb’ li b’ich choq’ reheb’ li kok’al.

Rilb’aleb’ ru li raqal reheb’ li loq’laj hu. Choq’ re naab’al reheb’ li b’ich sa’ li B’ichleb’aal choq’ reheb’ li Kok’al ut xb’ichleb’aaleb’ li ninq, tz’iib’anb’ileb’ li raqal sa’eb’ li loq’laj hu wankeb’ rilom rik’in li b’ich. Tenq’aheb’ li kok’al chirilb’aleb’ ru junjunq reheb’ li raqal a’an, ut aatinanqex chirix chan ru naq eb’ li raqal reheb’ li loq’laj hu wankeb’ rilom rik’in li b’ich. Naru ajwi’ nakatz’iib’a xtusulal junjunq reheb’ li raqal reheb’ li loq’laj hu chiru li pizarron ut taakanab’eb’ li kok’al chixjuntaq’eetankil li junjunq raqal rik’in jun li b’ich malaj rik’in jun raqal sa’ jun li b’ich.

Xnujob’resinkil li yamyo. Tz’iib’a raatinul jun raqal re li b’ich chiru li pizarron chi ink’a’ taatz’iib’a junjunq reheb’ li aatin mas aajeleb’ ru sa’ li b’ich a’an. Chirix a’an, patz’ reheb’ li kok’al naq te’xb’icha li b’ich, ut naq te’rab’iheb’ li aatin li neke’xnujob’resiheb’ li yamyo. Naq neke’xnujob’resi li junjunq yamyo, aatinan chirixeb’ li na’leb’ re li evangelio nakatzol rik’ineb’ li aatin li yookex chixnujob’resinkil.

Xwotzb’al jun xnawom ch’oolej. Wotz sa’ junpaat lix nawom aach’ool chiruheb’ li kok’al chirixeb’ li na’leb’ re li evangelio li neke’tawman sa’ li b’ich. Tenq’aheb’ li kok’al chixtawb’al ru naq rik’in li b’ichank, naru neke’xwotz lix nawom xch’ooleb’ ut neke’reek’a li Musiq’ej.

Xaqliik jo’ aj yehol nawom. Patz’ reheb’ li kok’al naq te’xk’eheb’ xhoonal re xaqliik ut xwotzb’al li neke’xtzol sa’ li b’ich li yookeb’ chixb’ichankil malaj li neke’reek’a chirixeb’ li na’leb’ k’utb’il sa’ li b’ich. Patz’ reheb’ k’a’ru neke’reek’a naq yookeb’ chi b’ichank, ut tenq’aheb’ chixk’eeb’al reetal lix wankil li Santil Musiq’ej.

Roksinkileb’ li jalam-uuch. Patz’ reheb’ li kok’al naq tate’xtenq’a chixtawb’al malaj chixyiib’ankileb’ jalam-uuch li neke’xk’ul rib’ rik’in li aajel ruhil aatin malaj ch’ol aatin sa’ li b’ich. Patz’ reheb’ naq te’xwotz chan ru naq eb’ li jalam-uuch neke’xk’ul rib’ rik’in li b’ich ut li k’a’ru k’utb’il sa’ li b’ich. Qayehaq, wi yookat chixk’utb’al li b’ich “Naq taak’ulunq li Kolonel” (B’ichleb’aal choq’ reheb’ li Kok’al, 46–47), taaruuq taak’eheb’ li jalam-uuch sa’ li tzoleb’aal li neke’xk’ut li aajel ruhil aatin sa’ li b’ich (jo’ anjel,, saqb’ach, ut chahim). Patz’ reheb’ li kok’al naq te’xxokeb’ li jalam-uuch ut te’xtaqsiheb’ sa’ iq’ sa’ tz’aqal xtusulaleb’ ru naq yooqex chixb’ichankil li b’ich sa’ komonil.

Roksinkil jun ch’ina k’anjeleb’aal. Naru nakawoksi k’a’ruhaq li tixmusiq’a li aatinak chirix jun li b’ich. Qayehaq, naq teeb’icha li b’ich “Li roq li haʼ naxye” (B’ichleb’aal choq’ reheb’ li kok’al, 116), naru nakak’ut chiruheb’ li kok’al xjalam-uuch jun roq ha’, pach’aya’, hab’, ut uutz’u’uj. Li na’leb’ a’in naru nekexxk’e chi aatinak chirix chan ru naq li kok’ k’a’aq re ru naru narosob’tesiheb’ lee ras eeriitz’in.

Xkanab’ankileb’ chixwotzb’al lix numsihomeb’ a’an. Tenq’aheb’ li kok’al chixk’eeb’al reetal chan ru naq laq’lookeb’ li na’leb’ k’utb’il sa’ li b’ich rik’in li neke’xnumsi rik’ineb’ li na’leb’ a’in sa’ xyu’ameb’. Rub’elaj naq teeb’icha “Sa’ li santil ochoch” (B’ichleb’aal choq’ reheb’ li Kok’al, 99) naru nakapatz’ reheb’ li kok’al naq te’xtaqsiheb’ li ruq’ wi rilomeb’ jun sutaq jun li santil ochoch. Naq yooqeb’ chi b’ichank, b’oqeb’ chi k’oxlak chirix li neke’reek’a naq neke’ril jun li santil ochoch.

Roksinkileb’ li patz’om. Wan naab’al paay chi patz’om naru nakawoksi naq yookex chi b’ichank. Naru nakapatz’ reheb’ li kok’al k’a’ru xe’xtzol sa’ li junjunq raqal re li b’ich. Naru ajwi’ nakapatz’ reheb’ naq te’xk’oxlaheb’ li patz’om li neke’sumeek xb’aan li b’ich. A’in naru nekexxk’am sa’ jun aatinak chirixeb’ li na’leb’ k’utb’il sa’ li b’ich.

Roksinkileb’ li uq’ej. Patz’ reheb’ li kok’al naq te’xk’oxla chan ru naru te’reek’asi li ruq’ re xtenq’ankileb’ chixjultikankil li raatinul jun li b’ich. Qayehaq, naq teeb’icha “Tintzol, tinkʼoxla, tintijoq” (B’ichleb’aal choq’ reheb’ li kok’al, 109) naru nakapatz’ reheb’ li kok’al naq te’xk’ut chiruq’ li xsa’ ruheb’ naq neke’b’ichan chirix li xsik’b’aleb’ li loq’laj hu, te’xk’ut chiruq’ li xjolomeb’ naq neke’bichan chirix li k’oxlak, ut te’xq’alu lix teleb’ naq neke’b’ichan chirix li tijok.