Minerva K. Teichert (1888–1976), Ana Taetae ni Kabo te Uea ae Beniamina, 1935, te oera iaon te mitionaite, 36 x 48 te inti. Brigham Young University of Art

Eberi 13–19

Motiaea 1–3

“Kaonaki n Tangiran te Atua ma Aomata ni Kabane”

Te Uea Beniamina e anga teuana bukina ngkai ti na taui mwiin ara iango n tamnei: “Bwa e na bon aki kona tamara ae Riaai n uring bwaai aikai ni kabane, n reireiniia iai natina, ngke arona bwa akea te ibuobuoki man taian bwaatua aikai;” (Motiaea 1:4).

Korea Am Namakin

Ngke ko ongo te taeka te Uea, ko na iangoi baunuea, ana bwareti te uea, tooro, ao kaintokanuea. N Motiaea 1–3, ko na wareka iai taekaia uea aika kakaokoro. N aki maiu man aia mwakuri ana botanaomata, e a tia te Uea Beniamina “ni [beku] n oin baina” (Motiaea 2:14). Irarikin karekeaia tabeman bwa a na beku ibukina, e buokiia ana aomata “ma a na kona, a na kaantaninga ma korakorana ni kabane ake [e] a tia n [anganna] te Uea” (Motiaea 2:11). E aki tangiria te Uea bwa e na taromauriiaki irouia ana botanaomata; ma, e reireiia bwa a na neboa te Uea ae korakora riki nakoina, bukina bwa e ataia bwa bon “te Uea ae Moan te Mwaaka ae tautaeka” (Motiaea 3:5). N aroia taan kairiiri aika korakora n abanuean te Atua, ana taeka ao ana banna ni katooto te Uea ae Beniamina e uotiira nakon Uean Karawa, are bon te Tia Kamaiu, Iesu Kristo. Te Uea ae Beniamina e kakoaua bwa e “ruo mai i karawa” ao ni waaki nako “buakoia natiia aomata, ni karaoi kakai aika moan te korakora. … Ao nooria, e na kawaria ana botanaomata, bwa e aonga n reke te kamaiuaki nakoia natiia aomata eng, rinanon onimakinan arana” (Motiaea 3:5, 9).

Iango ibukin Kamatebwain Booki Aika Tabu i bon Iroum

Motiaea 2:1–9

Karekean ana taeka te Atua e tangira te katauraoi.

Ngke e kanakoa ana taeka te Uea Beniamina bwa e tangiria n taetae ma ana aomata, ao moan te mwaiti ake a roko “n te mwaiti are a bon aki kona ni warekaki” (Motiaea 2:2). A roko, n te kurubu, ibukin aia kakaitau ao aia tangira nakon aia mataniwi. Ma ae e kakawaki riki, a roko bwa a na reireinaki ana taeka te Atua.

Ngkana ko wareka Motiaea 2:1–9, tarai bwaai aika a karaoi aomata ni kaotia bwa e kakawaki irouia ana taeka te Atua. Tera te bwai ae tuangiia te Atua bwa a na karaoia ni katauraoia n ongora ana taeka te Atua? (taraa te kibu 9). Ko na kanga ni katauraoiko ni karekei ana taeka te Atua n am kamatebwai i bon iroum ma aia kamatebwai am utu ao n tain bootakin te Ekaretia?

Taraa naba Mataio 13:18–23; Aramwa 16:16–17.

Motiaea 2:10–26

Ngkana I beku ibukiia tabeman, ao I bon beku naba ibukin te Atua.

Iai am kaangaanga ni karekea am tai ni beku ke ni kantaningaia bwa e na karekea nakoim riki te kimwareirei am mwakuri? Tera am iango n te bwai ae e na taekinna te Uea Beniamina ngkana ko titirakinna bwa bukin tera e mwakuri ma “ana kona, ana kaantaninga, ma korakorana ni kabane”? (Motiaea 2:11). Ngkana ko wareka Motiaea 2:10–26, kakaai koaua ake e reirei te uea Beniamina ibukin te ibuobuoki ao iangoia bwa ko na kanga ni kabonganai i nanon maium. Te katooto, tera ae nanonaki i roum n ataakina bwa ngkana ko beku ibukiia aomata tabeman, ko bon beku naba ibukin te Atua? (taraa Motiaea 2:17). Iangoa te kawai ae ko kona ni buoka iai temanna n te wiiki aei!

Taraa naba Mataio 25:40.

Ngkana I beku ibukiia tabeman, ao I bon beku naba ibukin te Atua.

Motiaea 3:1–20

I kona n tokanikai iaon te aro n aomata ao n riki bwa te aomata ae itiaki rinanon ana Mwakuri ni Kamaiu Iesu Kristo.

Te Uea ae Beniamina, n aroia burabeti ni kabane, a kakoaua iroun Iesu Kristo bwa aonga ana aomata “ni kona ni karekea kamaunaan aia bure, ao a na onrake n te kimwareirei ae moan te bati” (Motiaea 3:13). E reirei naba bwa te Tia Kamaiu, rinanon Ana Mwakuri ni Kamaiu, e aki ti kaitiakiira ma e anganiira naba te mwaaka ni kamaunaa te “aro n aomata” ao n riki bwa “ae itiaki” (Motiaea 3:19; taraa naba te Kairi nakon Koroboki aika Tabu, “Te Aro n Aomata,” scriptures.ChurchofJesusChrist.org).

Unimwaane David A. Bednar e kabwarabwaraa: “Bon ana Mwakuri ni Kamaiu Iesu Kristo are e katauraoa te tmwaaka ni kaitiaka man kabooa te maiu are e buokira n tokanikai iaon te bure ao te mwaaka ae katabu man kakorakora are e buokiira ni katamaroaira riki n riaon are ti kona ni karekea n tii onimakinan oin korakorara. Te Mwakuri ni Kamaiu ae akea tokina bon ibukiia taan bure ao ibukiia aika itiaki imarenara n tatabemaniira” (“Baai aika Itiaki ao te Nano ae Itiaki,” Ensign ke Riaona, Nobembwa. 2007, 82).

Aikai tabeua titiraki aika ko na iangoi ngkana ko wareka ana koaua te Uea Beniamina iroun te Tia Kamaiu n Motiaea 3:1–20:

• Tera ae I reiakinna man kiibu aikai iaon taekan te Tia Kamaiu ao Ana mition?

• E kanga Iesu Kristo n tia ni buokaki n tokanikai iaon te bure? E kanga n tia ni buokai ni bita arou ao n riki n aiaron te aomata ae itiaki?

• Tera ae I reiakinna n taekan rikim bwa te aomata ae itiaki man Motiaea 3:19?

Motiaea 3:8

Bukin tera te Uea Beniamina e arana Iesu bwa “te Tama i Karawa ao n te aonaaba”?

Beretitenti Joseph F. E kabwarabwaraa Smith: “Iesu Kristo, n aron ae ti ataia naba bwa Iehova, bon te aomata ae iriiri ana kaetieti te Tama, Eroim, n te mwakuri ni karikibwai. … Iesu Kristo, ngkai ngaia te Tia Karikibwai, e teimatoa n aranaki bwa tamaia kaain karawa ao aon te aba … ; ao ngkai Ana karikibwai bon akea tokin tamaroana E bon tau n aranaki bwa te Tama ae Akea Tokina i karawa ao iaon te aba” (Aia Reirei Beretitenti n te Ekaretia: Joseph F. Smith [1998], 357).

Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki

Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.

Motiaea 1:1–7

A kanga bwaatua buraati ao ana bwaatua Nibwaai ni kakabwaiaia ana botanaomata te Uea ae Beniamina? A kanga booki aika tabu ni kakabwaia ara utu?

Motiaea 2–3

E na kakukurei ibukiia am utu ni karaoa ana taetae te Uea Beniamina. Ko kona ni karaoa te taua ae uarereke ao ni kariaia kain te utu bwa a na wareki ana taeka te Uea ae Beniamina ngkai ko tei iaona. Nikiraia kain te utu ana kona n ongora mai inanon te oning ae aki teimaan.

Motiaea 2:9–19

Tera ae ti reiakinna man ana mwakuri ao ana banna ni katooto te Uea Beniamina? Tera ae ti kaungaaki iai bwa ti na karaoia?

Motiaea 2:15–25

E na uaana nakoia am utu karaoan te marooro iaon taekan te nanorinano? Bukin tera te Uea Beniamina e aki taetae ni kamoamoa ibukin bwaai aika e a tia ni karaoi? Tera ae ti kona n reiakin man ana reirei iaon irekerekera ma te Atua?

Motiaea 2:36–41

Tera ae reirei te Uea Beniamina iaon mwiin atakin te koaua ma ko aki maiuakinna? Tera ae reirei iaona ibukin aron karekean te kukurei?

Motiaea 3:19

Tera ae ti kainnanoia ni karaoia bwa ti na riki bwa aomata aika itiaki? Tera katei man te kibu aei ae ti kona ni kabanea ara iango iaona iaon te rikirake n te utu?

Ibukin riki iango ibukin reiakinaia ataei, taraa te kabwarabwara n te wiiki aei inanon Nakomai, iriirai—Ibukin te Moanrinan.

Kanakoraoan te Kamatebwai I bon Iroum

Katei kouru aika a kona ni kanakoraoaki. Kabanean tabeua te miniti n te bongina ni kamatebwaii booki aika tabu e kona ni kakabwaiaa maium. Motinnanoia bwa ko na kamatebwai ni katoabong, ao kakaea te kawai ni kauringko n am motinnano.

Ana Taetae te Uea ae Beniamina, iroun Jeremy Winborg