Minerva K. Teichert (1888–1976), Ana Taeka ni Kaboo te Uea ae Beniamina, 1935, te oera iaon te mitionaite, 36 x 48 te inti. Brigham Young University of Art

Eberi 13–19

Motiaea 1–3

“Kaonaki n Tangiran te Atua ma Aomata ni Kabane”

Ngkai ko wareka Motiaea 1–3, tataro bwa ko na ataia bwa e kanga arom ni buokiia ataei ake ko reireiniia n ota ni kakawakin te koaua ake e reirei iaona te Uea ae Beniamina. Korea te iango are e roko iroum mairoun te Tamnei ae Raoiroi.

Korea am Namakin

Kaungaa te Tibwatibwa

Kaota tamnein te Uea ae Beniamina ngke e angareirei, are e reke n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Tuangiia ataei bwa a na tibwaua te bwai ae a ataia man te tamnei aei.

Reirei te Reirei: Ataei aika a Uarereke

Motiaea 2–3

Ngkana I beku ibukiia tabeman, I beku naba ibukin Atuau.

Tera ae ko kona ni karaoia ni buokiia ataei n ataia bwa buokakiia tabeman bon te kawai naba ni buoka te Atua?

Waaki ni Kakukurei aika a Kona ni Karaoaki

• Anganiia ataei bwa e na reke aia tai ni kabongana te bau (iteraniba n te waaki ni kakukurei n te wiiki aei iai te katooto iai) ao n tei iaon te kaintekateka ke te bao n riki bwa aongkoa te Uea ae Beniamina. A kona ni karaoa aei ngkai ko tibwauai bwaai tabeua are e reirei iaona te Uea ae Beniamina nakoia ana botanaomata, e reke n Motiaea 2–3. Taraa naba “Mwakoro 12: Te Uea ae Beniamina” (Karaki man Ana Boki Moomon, 32–35, ke witeo ake a rekereke mangaia iaon ChurchofJesusChrist.org.)

• Kaoiia ataei bwa a na kaokioka te tiententi n taekini taekana tabeua imwin tabeua ngkai a uboi baia ni katoai tangin tirebware ma ngkoe: “Ngkana kam beku ibukiia raomi ao kam bon beku naba iroun Atuami.” (Motiaea 2:17). Kaokioka aei ni karokoa ataei a reiakin tabeua ke ni kabane taekana. Kakoaua bwa ngkana ti buokiia tabeman, ti buokia naba Tamara are i Karawa ao Iesu ao ti kakukureia. Tuangiia ataei bwa a na tibwauai kawai ake a kona ni buokiia iai tabeman.

• Buokiia ataei ni kaewei tamnein baia iaon te mwakoro ni beeba ao korea te bwai teuana are a na kona ni karaoia ni buokiia aia utu. Anenea ni kabane te kuna iaon te ibuobuoki, n aron “When We’re Helping” (Aia Boki n Anene Ataei, 198).

Te Uea ae Beniamina e reirei bwa ti kona ni beku ibukin te Atua ngkana ti buokiia tabeman.

Motiaea 2:19–25

Kakabwaia ni kabane a roko mai iroun Tamara are i Karawa.

Ngkai ataei a ataa te Atua bwa ngaia ae e anganiia kakabwaia ni kabane, a na bon nanorinano ao ni kakaitau.

Waaki ni kakukurei aika a Kona ni Karaoaki

• Kabwarabwaraa bwa te Uea ae Beniamina e reirei bwa kakabwaiakira ni kabane a roko mai iroun Tamara are i Karawa. Kaoiia ataei bwa a na kakauongo nakon te kakabwaia are e anganiira Tamara are i Karawa ngkai ko wareka Motiaea 2:21. Tera riki kakabwaia ake e a tia n angaiira Tamara arei Karawa? Ti na kanga ni kaotia bwa ti kakaitau ibukin bwaai aikai? (taraa Motiaea 2:22).

• Karaoa te takakaro are a bwatina iai ataei te bwai ngkai a anenea te kuna ni kakaitau ke a ongora n teuana (taraa “Gratitude” n te bwai ae e taekinaki n te intekiti n Aia Boki n Anene Ataei). Katoka te anene ke katoka te katangitang ni katoaa te tai, ao kaoa are e reke irouna te bwai anne bwa e na tibwaua te kakabwaia are e kakaitau ibukina.

Motiaea 3:1–20

I kakoaua Iesu Kristo.

Te anera e tuanga te Uea ae Beniamina koaua aika kakawaki iaon maiun ao ana mwakuri Iesu Kristo. Taratarai kiibu aikai ibukin koauan taekan Iesu ake ko namakinna bwa a kakaawaki ibukiia ataei bwa a na atai.

Waaki ni Kakukurei aika a Kona ni Karaoaki

• Katekei tamnei tabeua ni bwaai ake a riki ake a taekinaki ni Motiaea 3:5–10 (taraa, te katooto, Te Boki n Tamnei ibukin te Euangkerio, nambwa 30, 41, 42, 57, 59). Titirakiniia ataei te bwai ae e riki n taian tamnei, ao buokiia ngkana e riai. Karaurau wareka Motiaea 3:5–10, ao kaoiia ataei bwa a na katei baia ngkana a wareka te bwai teuana man taian tamnei. Kaoiia ataei bwa a na tibwauai bwaai tabeua ake a ataia bwa e karaoi Iesu iaon te aba.

• Korea tamnein taai mai ieta iaon te burakibooti bwa e na tei ibukin karawa. Korei kawai tabeua ake a kairi nakon taabo aika a kakaokoro iaon te burakibooti ma ti te kawai teuana are e nako karawa. Tuangiia ataei bwa a na kakaea te kawai anne ao a na katoka tamnein Iesu iaona. Wareka Motiaea 3:17, ao kakoaua bwa iriirakin Iesu Kristo bon ti ngaia te kawai n okira Tamara are i Karawa.

Reirei te Reirei: Ataei aika a Ikawai

Motiaea 2:11–18

Ngkana I buokiia tabeman, I buoka naba Atuau.

Ko na kanga ni buokiia ataei bwa a na reireiaki man ana banna ni katooto te Uea ae Beniamina?

Waaki aika a Kona ni Karaoaki

• Kaota tamnein te Uea ae Beniamina nakoia ataei ngke e reireiniia ana botanaomata (taraa te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu ke Boki ibukin Korotamnei n te Euangkerio, nambwa. 74). Buokiia ataei bwa a na kakaea n Motiaea 2:11–18 bwa tera are e karaoia te Uea ae Beniamina n ibuobuoki. Bukin tera e buokiia ana botanaomata? Bukin tera ti riai ni ibuobuoki imarenara?

• Koreia iaon te burakibooti te kibuntaeka man Motiaea 2:16–17 ao kabuai taeka tabeua. Kaoiia ataei bwa a na taratarai taeka ake a bua man koroboki aika a tabu. Tuangiia bwa a na kabwarabwaraa bwa tera nanon kibu aikai nakoia. Kaoiia bwa a na tibwa te bwai are a tia n rinanona ngke tabeman a tia ni buokiia ke a tia ngaiia ni buokiia tabeman. Tera aron namakinan te bwai ae e a tia n riki aei irouia?

• Anganiia ataei mwakoro ni beeba bwa a na korei iaona kawai ake a kona iai ni buokiia kain aia utu, ao n anganiia ataei n tatabemaniia te baeki are a na katikui iai beeba. Kaungaiia ataei bwa a na anaa teuana te mwakoro ni beeba man te baeki ni katoa bong ao ni karaoa te ibuobuoki anne ibukin temanna.

Motiaea 2:15–25

I riai n aki kamoamoa n te ibuobuoki are I karaoia ao te mwakuri ae raoiroi.

Iangoia bwa ko na kanga ni buokiia ataei bwa a na ota bwa ara beku a riai ni kairaki man ara tangira ibukiia tabeman ao ibukin te Atua.

Waaki aika a Kona ni Karaoaki

• Kaoiia ataei bwa a na tibwauaia bwa a kanga ni kabwarabwaraa te taeka ae kamoamoa, ke buokiia ni kakaea kabwarabwaraana n te rikitionari. Buokiia ni kakakea Motiaea 2:15–24, taraakin bukina bwa bukin tera te Uea Benimaina e aki kamoamoa ibukin ana beku nakoia tabeman. Bukin tera ti buokiia tabeman? Imwiina ngkai a tibwaua aia iango ataei, buokiia bwa a na ota bwa ti riai ni buokiia tabeman ibukina bwa ti tangiriia ao te Atua, tiaki nanona bwa ti aonga n taraa n raoiroi nakoia tabeman.

• Tuangiia ataei bwa a na tibwauai aroaro are temanna e na kona iai ni kamoamoa ke ni kainikatonga ibukin te bwai teuana. Bukin tera e bure bwa ko na kamoamoa ibukin aroaro akanne? Kaoiia bwa a na kabonganai reirei man ana marooro te Uea ae Beniamina n Motiaea 2:15–24 ni buokiia n aia kaeka.

Motiaea 3:19

Iesu Kisto e kaitiakai man au bure ao e buokai n riki bwa te aomata ae itiaki.

N te aro bwa ti na riki n ai aron Tamara are i Karawa, ti kainnanoa riki ae raka iaon tii kaitiakan ara bure—nanora a riai ni bitaki. Ngkai e reirei te Uea ae Beniamina, ti riai n tokanikai man naano aika a bure ao n riki n ai aroia aika a itiaki rinanon ana Mwakuri ni Kamaiu te Tia Kamaiu.

Waaki ni Kakukurei aika a Kona ni Karaoaki

• Korei tamneia uoman aomata iaon te burakibooti—temanna e na tei ibukin te “aro n aomata” ao temanna e na tei ibukin “ae Itiaki.” (Ko na riai ni kabwarabwarai taeka aikai.) Ikotaki wareka Motiaea 3:19, ao kaoia ataei bwa a na kakaei bitaki are e riai ni karaoia te aro n aomata bwa e aonga n riki bwa te aomata ae itiaki. Tera riki taeka ke kibuntaeka ake a kainnanoa iai buokaia ataei bwa a na ataia?

• A tia ataei ake ko reireiniia ni buokiia aia karo ni katauraoa te amwarake ni kabongana te uretibii? Ngkana eng, ko na bae ni kaoiia bwa a na kabongana Motiaea 3:19 bwa a na karekea te “uretibii” ibukin arora ni kona n riki n ai aron Iesu Kristo. Bukin tera ana Mwakuri ni Kamaiu Iesu Kristo ngaia te “rengarenga” ae moan te kakaawaki?

Kaungaa te Kamatebwai n te Mweenga

Kaoiia ataei bwa a na kabongana te iteraniba ibukin te waaki ni kakukurei n te wiiki aei bwa a na tibwaia ma aia utu ke raraoia aroia are a na kona iai n iira ana banna ni katooto te Uea ae Beniamina ni buokiia tabeman.

Kanakoraoan Ara Anga reirei

Ataei a na karekea riki ngkana e kaokiokaki. Tai maaku ni kaokioki waaki ni kakukurei n te tai ae mwaiti, riki ma ataei aika a uarereke. Kaokiokana e na buokiia ataei n uringa te bwai are a tia n reiakinna.