Ko na beku ibukin Atuam, iroun Walter Rane

Eberi 20–26

Motiaea 4–6

“Te Bitaki ae Moan te Korakora”

Ana reirei raa te Uea Beniamina inanon Motiaea 4–6 ae ibuobuoki riki nakoia ataei ake ko reireiniia bwa a na waaki ni karekea te “bitaki ae moan te korakora” (Motiaea 5:2) inanoia? Korea am namakin ngkai ko tataro mwaaka ni ukoukora te kairi.

Korea Am Namakin

Kaungaa te Tibwatibwa

Korei araia ataei n tatabemaniia n am kiraati iaon te mwakoro ni beeba, ao katikua inanon teuana nnena. Ngkai ko anai aara man nnena, kaoa te ataei anne bwa e na tibwaua te bwai ae e uringnga man te reirei n te wiiki ae nako ke te bwai are e reiakinna man Motiaea 4–6 ni mweengana n te wiiki aei.

Reirei te Reirei: Ataei aika a Uarereke

Motiaea 4:1–3, 10

Te rairannano e uota te kimwareirei.

Buokiia ataei bwa a na reiakina taekan te bwaintangira ae kamimi n te rairannano are e reke ibukin ana Mwakuri ni Kamaiu Iesu Kristo.

Waaki ni Kakukurei aika a Kona ni Karaoaki

• Kabongana Motiaea 4:1–3 ao 10 n reireiniia ataei tera ae e nanonaki n te rairannano. Ibukin te katooto, buokiia bwa a na kunea bwa ana aomata te Uea Beniamina e nanoangaiia ibukin aia bure ao e bubuti kabwaraan aia bure (kibu 1–2), ao te Uea Beniamina e tuangiia bwa a na katikui (ke ni katoka karaoan) te bure (kibu 10). Wareka te kibu 3 nakoia, ao titirakiniia bwa tera aia namakin aomata ngkana a tia n rairii nanoia.

• Titirakiniia ataei bwa tera aia namakin ngkana a barekareka oneaia. Tera aron ara namakin ngkana ti a manga itiaki? Kabwarabwaraa bwa n ai aron uatiakin kunnikai aika barekareka, ti kona n rairi nanora ngkana ti karaoa te kairua. Kaota tamnein Iesu Kristo, ao kakoaua bwa iai mwaakana ni kanakoi buure ao ni manga kaitiaki ngkana ti rairi nanora. Ikotaki anenea te kauoua ni kibu man “Help Me, Dear Father” (Aia Boki n Anene Ataei, 99). Titirakiniia ataei bwa tera ae reiakinaki man taekan te anene n rairannano.

Motiaea 4:13–26

I riai n tangira ao n akoi nakoia tabeman.

Ko na kanga ni kabongana Motiaea 4:13–26 n reireiniia ataei “n itangitangiri, ao n ibuobuoki imarenaia”? (kibu 15).

Waaki ni Kakukurei aika a Kona ni Karaoaki

• Korea tamnein te aati iaon te burakibooti. Kaoiia ataei bwa a na tibwauai kawai ake a kona iai n akoi nakoia tabeman. Ni katoatai are a tibwatibwa, kamauna te aati ao korea ae bubura riki. Kakoaua bwa ara tangira ibukiia tabeman e rikirake ngkai ti akoi nakoia. Anganiia ataei te aati ae te beeba, ao kaoiia bwa a na koreia iaon aia aati kawai ake a kona iai ni kaota aia tangira ao n akoi.

• Buokiia ataei bwa a na karekea kaina ngkai a anenea te kuna iaon tangiraia tabeman, n aron “Jesus Said Love Everyone” ke “Love One Another” (Aia Boki n Anene Ataei, 61, 136).

Motiaea 5:5–15

Ngkana I karaoa te berita ma te Atua, I katoka iaou aran Kristo.

Iangoia bwa ko na kanga ni buokiia ataei ake ko reireiniia bwa a na tauraoi ni karaoa te berita n te bwabetito ma te Atua ao a na “aranaki bwa natin Kristo” (Motiaea 5:7).

Waaki ni Kakukurei aika a Kona ni Karaoaki

• Buokiia ataei bwa a na karaoa te baeti ni kaota aran “Iesu Kristo” ao a kanimmwa nakon aia kabaraaki iaon bwabwaaia (taraa te iteraniba ni waaki ni kakukurei ibukin te wiiki). Kabwarabwaraa bwa te Uea Beniamina e reireiniia ana aomata bwa ngkana a karaoi berita aika tabu, ke berita, ma te Atua, kaanga ai aron uotakin aran Kristo “ni koreaki n tainako i nano [ra]” (Motiaea 5:12). Tera ae ti berita bwa ti na karaoia ngkana ti bwabetitoaki ao ti kana te toa? (taraa Motiaea 5:8; RB 20:37, 77, 79).

• Titirakiniia ataei bwa tera ae a na karaoia bwa a na riki bwa te rao nakon temanna (te katooto, marooro ma ngaiia, karaoi bwaai ma ngaiia, ke kabanea am tai ma ngaiia). Wareka Motiaea 5:13 nakoia ataei. Tera ae ti kona ni karaoia bwa ti na kinaa raoi Iesu Kristo bwa e aonga n aki riki bwa te “ianena” iroura?

Reirei te ReireI: Ataei aika a Ikawai

Motiaea 4:1–11

I Kona n rairananou.

Ko na kanga ni buokiia ataei n ota n tera ae nanonaki n te rairannano? Kibu raa man Motiaea 4:1–11 ae ko namakinna bwa e na kona ni buokiia?

Waaki ni Kakukurei aika a Kona ni Karaoaki

• Korea te taeka ae kabwarabure iaon te burakibooti. Baane wareka Motiaea 4:1–3, ao tuangiia ataei bwa a na kakaea te taeka inanon te kibu 3 are e kabwarabwara te kakabwaia are e roko ngkana ti rairi nanora ao ni karekea kabwaraan ara bure.

• Tuangiia ataei bwa a na atongi bwaai ake ti riai ni karaoi bwa ti aonga n rairi nanora ni koaua. Buokiia bwa a na karekei tabeua man bwaai aikai n Motiaea 4:10, ao maroroakin nanon taeka ao mwakoro n taeka ake a reke n te kibu anne. Tibwaua te karaki are e kabwarabwara te rairannano, tao bon mai iroum ke man te maekatiin man te Ekaretia ae e a tibwa otinako.

• Buokiia ataei bwa a na kunea te taeka n Motiaea 4:6, 9, ao 11 are e kabwarabwaraa Tamara are i Karawa. Bukin tera e kakawaki bwa ti na ataia bwa aekakira Tamara are i Karawa ngkana ti kainnanoia n rairi nanora? Kaota am koaua ao aron am namakin n ana tangira te Atua ngkai ko raira nanom.

Motiaea 4:12–26

Te euangkerio e kaunga nanou bwa N na tangiriia tabeman ao n akoia.

Te Uea ae Beniamina e reirei bwa ngkana ti nakon Kristo ao ti karekea kabwaraan ara bure, ti a “kaonaki n ana tangira te Atua” (Motiaea 4:12), are e kairiira bwa ti na tatangira ao n akoi nakoia tabeman.

Waaki ni Kakukurei aika a Kona ni Karaoaki

• Buokiia ataei bwa a na kakae n Motiaea 4:13–16, 26 ao ni kotei mwakoro n taeka ake a kabwarabwara aron arora ni buokiia tabeman. Kaoiia bwa a na katei kain bwaai aikai ke a na korei tamneia, ao anganiia ataei ake tabeman bwa a na keetina te mwakoro n taeka. Ti na kanga ni kaota te tangira ao te akoi n te mweenga, n te reirei, ke n te tabo n taromauri?

• Kaoiia ataei bwa a na tibwa te bwai are a rinanona ngke a tangira iai temanna ke a beku ibukin temanna ao tera aia namakin imwiin karaoakin anne. Bukin tera ngkai aomata tabeman a aki tangiria ni beku ibukiia tabeman? Titirakiniia ataei tera ae ana taekinna nakon temanna ni kaira nanona bwa ana buokiia aomata aika a kainnano. A kona ni karekeiango man Motiaea 4:16–26.

Iesu Kristo e reireiniira bwa ti na akoi nakoia tabeman.

Motiaea 5:5–15

Ngke I bwabetitoaki ao I kana te toa, I katoka iaou aran Kristo.

Angiina ataei ake ko reireiniia a bae n tia ni bwabetitoaki ao a manga kaboui aia berita rinanon te toa. Kauringiia bwa te mwakoro ae kakaawaki n aia berita n te bwabetito bon katokaan aran Iesu Kristo iaoia.

Waaki ni Kakukurei aika A Kona ni Karaoaki

• Korea te mronron iaon te burakibooti, ao katoka tamnein Iesu Kristo i nuukan te mronron. Kaoiia ataei bwa a na korei tamneia ngkai ko wareka Motiaea 5:8 n ikotaki. Tera ae e taekinaki n te kibu aei ae ti riai ni katoka iaora? Tera ae tia tia “n rinnako inanona”? Kaoiia ataei bwa a na korea aran Kristo iaon tamneia ao a katoka te tamnei inanon te mronron ma te Tia Kamaiu. Tera te berita ae ti karaoia ngkana ti bwabetitoaki ao ti anaa te toa? (taraa Motiaea 18:8–9; RB 20:77, 79).

• Marooro nakoia ataei iaon bukin tera aomata a katoka araia iaon bwaai, n aron bwaai n reirei ake a karaoaki, kunikai n takakaro, ao a bati riki (taraa Motiaea 5:14–15). Ti na kanga ni kaotia bwa e “koreaki n tainako i nano[ra]” aran Kristo? (Motiaea 5:12).

• Kaoa te ataeinimwaane ke te ataeinnaine man te uoote bwa e na kawara am kiraati ni kabwarabwara te berita are ti manga kaboua man kanakin te toa. Wareka te tataro n toa n Reirei ao Berita aika Tabu 20:77 ao 79 ma ataei, ni kaoiia bwa a na taratarai mwakoro n taeka ake a kabwarabwara bwa tera berita aika ti na karaoi ao tera berita ake e berita iai nakoira te Atua bwa e na reke iroura.

Kaunga te Kamatebwai n te Mweenga

Kaoiia ataei bwa a na korea te bwai are a reiakinna n te bong aei ao a na kabonganai aia tamnei n reireiniia aia utu.

Kanakoraoan Ara Angareirei

Reireiniia ataei bwa a na korea aia namakin. Ataei naba a kona n reiakina te anua ni kokorei aia namakin n tamnei—ibukin te katooto, man mwakenan koroboki aika tabu, korei tamnei, ke koroboki aika a beebete inanon aia tienoo.