Kristo ao Ana Abotoro, iroun Del Parson

Maati 30–Eberi 12

Itita

“E na Mangauti … ma te Kamaiu iaon Baina ni Kiba”

Ngkai ko wareware ni booki aika tabu n aron are a taekinaki ikai ao n Nakomai, Iriirai—Ibukiia Aomata n Tatabemaniia ao Utu, e na buokiko te Tamnei n ataia bwa tera ae ko kona ni katurua am taratara iaona ni buokiia ataei n namakina ana tangira te Tia Kamaiu n Tabatin Te Itita.

Korea Am Namakin

Kaungaa te Tibwatibwa

Taetae nakoia ataei ibukin bwaai ake ko karaoi ni kauringa te Tia Kamaiu n te Itita. Kaoiia bwa a na tibwaua te bwai are a karaoia.

Reirei te Reirei: Ataei aika a Uarereke

1 Nibwaai 11:27; Motiaea 3:5; 15:7; Ereman 14:16–17

Burabeti n Ana Boki Moomon a ataia ae e na manga roko Iesu Kristo.

N atakina bwa tera ae a reiakinna burabeti n Ana Boki Moomon ibukin ana mwakuri Iesu Kristo iaon te aba e kona ni kakorakorai aia onimaki ataei Irouna.

Waaki ni Kakukurei aika a Kona ni Karaoaki

• Kaota tamnein te Tia Kamaiu ae e bwabetitoaki, e katoki aorakiia tabeman, e tauraki n te kai, ao ngke e a mangauti (taraa iteraniban te waaki n te wiiki aei ke Te Boki n Tamnei n te Euangkerio, nambwa. 35, 41, 57, 59). Titirakiniia ataei bwa a na tuangko bwa tera ae e riki n taian tamnei. Kabwarabwaraa bwa inanon ririki aika a bati imwain rokon Iesu n te aonaaba, te Atua e kaotia nakoia burabeti n Ana Boki Moomon ae E na karaoi bwaai aikai. Wareka 1 Nibwaai 11:27; Motiaea 3:5; 15:7; ao Ereman 14:16–17, ao buokiia ataei ni katitebooi taian koroboki aika a tabu ma tamnei ae a irekereke ma ngaia.

• N aia tai ni mwakuri ataei iaon te iteraniba n te waaki ni kakukurei n te wiiki aei, marooro iaon tamnein te burabeti are e kaotaki ao tera ae a reireia ibukin Iesu Kristo. Tibwauaia ma ataei tabeua bwaai aika a kamiimi are e karaoi Iesu ibukira.

3 Nibwaai 11:1–17

E a mangauti Iesu Kristo.

Reireiia ataei bwa i rarikiia aomata ake a noora te Tia Kamaiu are e a mangauti i Ierutarem, ngaa n aomata ake a nooria ngke e kaoti i Amerika.

Waaki ni Kakukurei aika a Kona ni Karaoaki

• Kaota tamnein maten ao mangauti te Tia Kamaiu. Titirakiniia ataei bwa tera ae a ataia ae riki ni kanoan te tai aei. Ngkana e kainnanoaki, kabongana “Mwakoro 53: E Tauraki Iesu” ao “Mwakoro 54: E a Mangauti Iesu” (Karaki n te Nu Tetemanti , 136–38, 139–44, ke witeo ae a irekereke ma ngaia iaon ChurchofJesusChrist.org) n taekinna nakoia ataei karaki aikai.

• Ni kabonganai tamnei man Te Boki n Tamnei n te Euangkerio ke Nakomai, Iriirai—Ibukiia Aomata n Tatabemaniia ao Utu, tuangiia ataei rokon te Tia Kamaiu ae e a mangauti i Amerika, n aron are e kabwarabwaraaki n 3 Nibwaai 11:1-–17. Manga karakina te karaki ni kaokiokia, kaoiia ataei bwa a na buokiko. Katereterei kabwarabwaraana ake ko taku bwa a na manena nakoia ataei. N ae e onoti, katereterea bwa e ngae ngke e mate Iesu iaon te kaibangaki, a kona n nooria aomata ae E a mangauti ngkai. Kariaia ataei bwa a na manga karakina te karaki temanna imwin temanna ni bon oin aia taeka.

• Baane anenea “Easter Hosanna” ke te kabanea ni kibu ni “Karaki man Ana Boki Moomon” (Aia Boki n Anene Ataei, 68–69, 118–19). Kaoiia ataei bwa a na korei tamnein bwaai ake a kabwarabwaraaki n te anene. Ngkanne tuangiia ataei bwa a na tibwaua aia koro tamnei ao tera aia iango ae a na tia n namakinna n aron ae a mena n te tai arei ngke e kawariia Nibwaite Iesu.

Motiaea 3:7; Aramwa 7:11–12

E ataa aron kabebetean nanou Iesu Kristo.

Ibukina bwa Iesu Kristo e taonaki ni “marakiia ao aorakiia ana aomata” (Aramwa 7:11), E ataa are ti namakinna, e ngae ngke akea temanna ae namakinna.

Waaki ni Kakukurei aika a Kona ni Karaoaki

• Warekia nakoia ataei tabeua moan rain ni Motiaea 3:7, ao kaoiia bwa a na riki n ae aongkoa a namakina te “maraki … , te baki, te taka, ao te korakai [kainnano].” Tuangiia bwa a na tibwauaia ngke e reke te aekaki n namakin aei irouia. Ngkanne tuangiia ataei bwa te kibu aei e kabwarabwarai tabeua bwaai are e namakin Iesu Kristo ngke E maraki n te O n aroka are Ketetemwane. Ibukin aio, E ataa aron buokara ngkana ti namakini bwaai aikai.

• Wareka Aramwa 7:11 ni kabaibati, ao titirakiniia ataei ngkana a ataa te aomata temanna ae e aoraki ke e rootaki n te maraki. Taekina koauana bwa Iesu Kristo e namakin kainnanora ni kabane “ni maraki ao n aoraki” bwa E aonga n ataa aron karauan nanora (Aramwa 7:12).

Reirei te Reirei: Ataei aika a Ikawai

2 Nibwaai 9:10–15; Aramwa 11:41–45; 40:21–23

Ibukina bwa e a tia ni mangauti Kristo, N na bon mangauti naba.

Ana Boki Moomon e kabwarabwaraa ni kamataata tera ae nanonaki n te mangauti ao antai aika a na mangauti. Ko na kanga ni buokiia ataei ni kunei koaua aikai?

Waaki ni Kakukurei aika a Kona ni Karaoaki

• Tuangiia ataei bwa a na tuangko bwa tera ae a ataia ibukin maten ao mangautin Iesu Kristo. Korei iaon te burakibooti titiraki n aron Tera ae e nanonaki n te mangauti? ao Antai ae e na mangauti? Buokiia ataei bwa a na karekei kaekaia n 2 Nibwaai 9:10–15; Aramwa 11:41–45; ao Aramwa 40:21–23 ao tibwauaia ma kain te kiraati tera mwin aia kukune.

• Tuangiia ataei ibukin temanna ae ko kinaa ae e a tia ni mate. Tuangiia ae aongkoa ko aki ataa rongorongon te mangauti. A na kanga ni buokiko bwa ko na mataata bwa tera te mangauti? Kaungaia bwa a na kabongana 2 Nibwaai 9:10–15; Aramwa 11:41–45; ke Aramwa 40:21–23 n reireiniko ibukin te mangauti. Ao kaungaiia bwa a na kaota aia koaua iaon mangautin te Tia Kamaiu bwa reitan aia kaeka.

Ketetemwane, iroun Michael T. Malm

Enoti 1:2–8; Motiaea 27:8–24; Aramwa 13:11–12; 24:7–19

Ana Mwakuri ni Kamaiu Iesu Kristo e kaitiakai ao e bitai.

Ana Boki Moomon e anga katooto aika mwaiti iaoia aomata ake a tia ni bitaki ibukin ana Mwakuri ni Kamaiu te Tia Kamaiu. Iangoia bwa a na kanga tataneiai aikai n anganiia ataei te nano ni kan rairannano ao n nakon te Tia Kamaiu.

Waaki ni Kakukurei aika a Kona ni Karaoaki

• Kaota nakoia ataei te kabaraaki ae mainaina man itiaki ao te kabaraaki ae mainaina ae barekareka. Baane wareka Aramwa 13:11–12. A kanga aomata ni kaitiakaki man aia bure? E kanga ae ai aron aei n anganiia te namakin ibukin te bure? Maroroakinna bwa tera am namakin ngke ko rairananom ao ko karekea kabwaraan am bure, ao kaota am koaua ibukin mwaakan te Tia Kamaiu ni kaitiakiira man ara bure.

• Kaoiia ataei bwa a na rinea temanna te aomata ae a na reiakina arona: Enoti (taraa Enoti 1:2–8), Aramwa te Te Ataei (taraa Motiaea 27:8–24), ke kain Aentaai-Nibwaai-Riaai (taraa Aramwa 24:7–19). Inanon ami tai ni bane ni wareka te karaki, kaoiia ataei bwa a na nooria bwa e kanga te aomata aei ke te kurubu ni bitaki ibukin Ana Mwakuri ni Kamaiu Iesu Kristo. Ti na kanga n ira aia katooto aomata aikai?

Motiaea 3:7; 15:5; Aramwa 7:11

Iesu Kristo e katokaa Iaona au bure, marakiu, ao aorakiu nako.

Irarikin are e maraki ibukin ara bure, te Tia Kamaiu e maraki naba ibukin marakiu, aorakiu, ao kainnanou riki tabeua bwa e aonga n ataa aron karauan nanora.

Waaki ni Kakukurei aika a Kona ni Karaoaki

• Katannakoiia ataei n tatabemaniia bwa a na kakaei taian kibu aikai ao ni kunea bwa tera ae e maraki iai Iesu Kristo: Motiaea 3:7; Motiaea 15:5; ke Aramwa 7:11. Kaoiia bwa a na korei ni karinani iaon te burakibooti te bwai are a kunea ao n uringa te tai are a tia n namakini aekakin bwaai aikai. Ni kaineti ma Aramwa 7:12, e aera Iesu e rinanon kariiri aikai ni kabane? Bukin tera e kakawaki bwa ti na ataia ae E rinanon kariiri aikai ibukira?

• Baane anenea te kuna n taromauri ibukin te Tia Kamaiu, n aron “I Ataia E Maiu Iesu” (Kuna n Taromauri nambwa. 136). Kaoiia ataei bwa a na kakaea n te kuna n taromauri ibukin kibuntaeka are a kabwarabwaraa bwa e kanga te Tia Kamaiu ni karau nanora, ao maroroakinna bwa e aera ngkai kibuntaeka aikai a bongana ibukiia. Tibwaua am namakin ibukin Iesu Kristo, ao kaoiia ataei bwa a na tibwaua aia namakin.

Kaungaa te Kamatebwai n te Mweenga

Kaoiia ataei bwa a na kakaea temanna n te wiiki aei ae e kainnanoa karauan nanona. Kaungaiia bwa a na tibwauaia ma te aomata anne tera are a reiakinna ibukin te Tia Kamaiu are e katoka Iaona marakira bwa e aonga ni karau nanora.

Kanakoraoan Ara Angareirei

Kaungaa te tibwatibwa. Titirakiniia ataei ibukin aia iango, namakin ao aia tataneiai. Ko na kunea ae e na kaman iai aia nonoori ae e mangori ma e nano.