“Maati 23–29. Enoti–Ana Taeka Moomon: E Mwakuri Inanou bwa N na Karaoa Are Nanona,” Nakomai, Iriirai—Ibukin te Moanrinan: Ana Boki Moomon 2020 (2020)
“Maati 23–29. Enoti–Ana Taeka Moomon,” Nakomai, Iriirai—Ibukin te Moanrinan: 2020
Iakobwa ao Enoti, iroun Scott Snow
Maati 23–29
Enoti–Ana taeka Moomon
E Mwakuri Inanou bwa N na Karaoa Are Nanona
Enoti, Iarom, Ominai, ao Ana Taeka Moomon bon booki aika kimototo ake iai inanoia reirei aika a mwaiti aika a kakaawaki ibukiia ataei ake ko reireiniia. Kakaei reirei aikai, ao iangoi kawai ake ko kona ni buokiia ataei bwa a na reiakini. Iango ake a koreaki n te te kabwarabwara iaon aei e kona n ibuobuoki.
Korea am Namakin
Kaungaa te Tibwatibwa
Buokiia ataei bwa a na uringii bwaai ake a tia n reikini man te reirei n te wiiki ae nako. A tibwaua te bwai are a reiakinna ma aia utu ke tabeman?
Reirei te Reirei: Ataei aika a Uarereke
I kona n tataro nakon Tamau are i Karawa rinanon te tataro.
Te bwai are e rinanona Enoti e reirei tabeua koaua ibukin te tataro. Ko na kanga ni kaungaia ataei bwa a na ira ana banna ni katooto Enoti ngkai a tataro?
Waaki ni Kakukurei aika a Kona ni Karaoaki
-
Kaota tamnein Enoti; ibukin te katoto, taraa te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu, ke kabonganai tamnei Enoti ngke e Tataro (Te Boki n Tamnei n te Euangkerio, no. 72). Tuangiia ataei bwa a na karakina te bwai are e riki n te tamnei, ao imwina tibwaua te bwai are e rinanona Enoti ma ngaiia. Kam kona ni kabongana “Mwakoro 11: Enoti” (Karaki man Ana Boki Moomon, 30–31, ke te witeo iaon te bwai are e irekereke ma ngaia ChurchofJesusChrist.org).
-
Tuangiia ataei bwa a na tibwauai bwaai ake a tatangiria n tibwauaia ma aia karo. Kabwarabwaraa bwa te tataro nakon Tamara are i Karawa bon aroia ni kona n taetae nakoina. Ngkai ko wareka Enoti 1:1–4 nakoia ataei, kaoiia bwa a na baka n riki bwa Enoti ae a karaoa te kaeman, katorobubua n tataro, ao a mwaiti riki. Kabwarabwaraa bwa Tamara are i Karawa e ongo ana tataro Enoti ao e kabwarai ana bure.
-
Ni kabane anenea te kuna n tataro, n aron “A Child’s Prayer” (Aia Boki n Anene Ataei, 12–13). Kaoiia ataei bwa a na kateibai ni katoa te tai are a ongo iai te taeka ae “tataro” ke te taeka ae okioki. Kakoaua mwaakan te tataro inanon maium.
Ngkai natin te Atua, ti kona n tataro nakon Tamara are i Karawa.
I kona ni kakabwaiaia tabeman ngkana I kakauongo nakon te Tamnei ae Raoiroi.
Ngke e kakimototoi kanoan ana Boki Moomon, Moomon e tuangaki bwa e na kairii bwataua aika uarereke ake ana bwaatua Nibwaai. E aki ataia bwa bukin tera e kainnanoaki bwaatua aika a uarereke, ma ni boong aikai ti kakabwaiaaki ibukina bwa e iriira te wirikiriki. Te banna ni katooto aei e kaungai nanoia ataei bwa a na iriira te Tamnei ae Raoiroi.
Waaki ni Kakukurei aika a Kona ni Karaoaki
-
Kaoiia ataei bwa a na tibwauai karaki ake a tia n reiakini man ana Boki Moomon inanon te ririki aei (tamnei man Nakomai, Iriirai—Ibukiia Aomata n Tatabemaniia ao Utu ke te Te Boki n Tamnei n te Euangkerio e kona ni buokiia n uringi). Kabwarabwaraa bwa ti karekei karaki aikai n Ana Boki Moomon ibukina bwa Moomon e kakauongo ngke e tuangnga te Tamnei ae Raoiroi bwa e na karini. Bukin tera e tangiriira Tamara are i Karawa bwa ti na karekei karaki aikai?
-
Tibwaua te karaki man ana maekatiin te Ekaretia ke man te maungatabu ni kabuta iaon temanna are e iriira ana wirikiriki te Tamnei ae Raoiroi. Ke tibwaua teuana man are ko rinanona. Kaoiia ataei bwa a na korei tamnei man te karaki. A kanga aomata man karaki aikai ni kakabwaiaki ibukina ngkai a iriira te Tamnei ae Raoiroi?
-
Tuanga kain te uoote bwa e na kawariia kain te kiraati n tibwaua te bwai ae e rinanona ngke teuanne ke neienne e ira ana wirikiriki te Tamnei ae Raoiroi. E kanga ana mwakuri teuanne ke neienne ni kakabwaiaia tabeman? Kabwarabwaraa bwa Tamara are i Karawa e tangiriira bwa ti na buokiia tabeman, ngaia are e kanakoa te Tamnei ae Raoiroi bwa e na kairiira.
-
Anenea ni kabane te anene iaon te Tamnei ae RaoiroI, n aron “The Still Small Voice” (Aia Boki n Anene Ataei, 106–7). Aneneia tabeua te tai n teina aika a kakaokoro, n aron ae waekoa, karaurau, ke n te wirikiriki. Ngkana kam wirikirikina te anene, kaukia nakon Ana Taeka Moomon 1:7, ao katereterea bwa Moomon e kabwarabwaraa te Tamnei ae Raoiroi n aron te wirikiriki.
Reirei te Reirei: Ataei aika a Ikawai
Tamara are i Karawa e ongo ao e kaekai au tataro ae mai nanou.
E kona ni bebete ara tataro bwa e na riki n okioki ke ni karaoaki n akea nanona. Te bwai are e rinanona Enoti bon te kauring ni karekean te kaeka nakon ara tataro n tabetai e kainnanoa te “kaangaanga” ao “te kakorakora n tataro nakoina” (Enoti 1:2, 11).
Waaki ni Kakukurei aika a Kona ni Karaoaki
-
Kaoiia ataei bwa a na kamakii mataia ao a na iangoia bwa a taetae ma Tamara are i Karawa n itaramata. Tera ae a tangiria ni maroroakinna ma Ngaia? Kaoia ataei bwa a na iangoia bwa a marooro ma Tamara are i Karawa n itaramata ni katoa aia tai are a tataro iai.
-
Kaoia ataei bwa a na ikatoatoa ao a na wareka Enoti 1:1–5. Tuangiia bwa a na kakaai ni kibu aikai taeka ke kibuntaeka ake a kabwarabwara ana tataro Enoti ao imwiina a na tibwa te bwai ae a kunea ma te kiraati. Tera ae a taekinna taeka aikai ibukin te bwai are e rinanona Enoti? Anganiia ataei bwa a na tibwa te bwai are e teke nanoia iai n ana tataro Enoti. Tibwa te tai are e “baki ” iai tamneim ao ko “bubuti nakon” te Uea (Enoti 1:4). Anganiia ataei bwa a na iangoa te bwai teuana are a kona ni karaoia bwa e na nano riki iai aia tataro.
-
Tuangiia ataei bwa a na korei rinanin bwaai tabeua ake a na tataro ibukina, a kona ni koreia iaon te burakibooti ke iaon te iteraniba ibukin waakin kakukurei n te wiiki aei. Ngkanne kaoiia bwa a na kakaea n Enoti 1:2, 9, 13–14, ao 16 bwaai ake e tataro ibukina Enoti, ao ni karini bwaai akanne nakon te rinan anne. Maroroakinna bwa a kanga ataei n ira ana banna ni katooto Enoti n aia tataro, n aron aei, ko kona ni maroroakinna bwa bukin tera Enoti e korakora nanona n tataro ibukiia Reimwanaite—ake bon ana kairiribai—ao kaoiia ataei bwa a na tataro n te wiiki aei ibukin temanna ae e a tia n aki rangi n akoi nakoia.
I kona ni kakabwaiaia tabeman ngkana I kakauongo nakon te Tamnei ae Raoiroi.
Te Uea E ataia bwa moan iteraniba ake 116 ake a rairaki man ana Boki Moomon a na bon bua (taraa RB 10; Saints, waorium 1, mwakoro 5). N onea mwiin te kabua aei, E kaunga Moomon rinanon te Tamnei bwa e na karinii ana bwataua Nibwaai ake a uarereke n Ana Boki Moomon. Ko na kanga ni kaungaia ataei bwa a na ira ana banna ni katooto Moomon ni kakauongo nakon te Tamnei?
Waaki ni Kakukurei aika a Kona ni Karaoaki
-
Tuangiia ataei bwa a na ikaruoruo ni wareki kibu man Ana Taeka Moomon 1:3–8 teuana imwiin teuana, ao imwiina buokiia ni kakimototoa te bwai are a tia n reiakinii man kiibu aikai. Kabwarabwaraa bwa Moomon e iriira te Tamnei ni karinii ana bwaatua Nibwaai aika a uarereke (are ti a karekea ngkai bwa 1 Nibwaai ni karokoa Ominai) n ana Boki Moomon. Ti kanga ni kakabwaiaki ibukin ae e kakauongo Moomon nakon te Tamnei? E na kanga ni kona ni bitaki Ana Boki Moomon ngke arona bwa Moomon e aki kakauongo? Tibwaua te taneiai are ko wirikirikinaki iai iroun te Tamnei bwa ko na karaoa te bwai teuana are e kakabwaiaki iai temanna. Kaoiia ataei bwa a na tibwaua te bwai ae a rinanona ae aekakin are ko a tia n rinanona.
-
Kaoa temanna te ataei bwa e na wareka Ana Taeka Moomon 1:7 ao temanna bwa e na wareka Reirei ao Berita aika Tabu 8:2–3. Tera ae a reireia kibu aikai n aron te Tamnei ae Raoiroi n taetae nakoira? Buokiia ataei n uringa te tai ae a tia n namakina iai ana wirikiriki te Tamnei ae Raoiroi. Kabongana Moronaai 7:12 ni kabwarabwaraa bwa ngkana e tamaroa te iango ao e kaungaira ni karaoi bwaai aika tamaroa, e roko mairoun Tamara are i Karawa. Te katooto, iangoia bwa ko na kaota te witeo “Preparation of Thomas S. Monson: Always Follow the Promptings of the Spirit” (ChurchofJesusChrist.org). Kaoiia ataei bwa a na kakauongo nakon wirikiriki ni karaoi bwaai aika a raraoi ao n irii nanoia.
Kaungaa te Kamatebwai n te Mweenga
Kaungaia ataei bwa a na tuangiia kain aia utu bwa a na tibwaua te bwai are a rinanona n te tataro ke te Tamnei ae Raoiroi.
Kanakoraoan Ara Anga reirei
Kabongana te katangitang. Kuna n te Moanrinan ao anene n taromauri a kona ni buokiia ataei n rooro ni kabane n oota ao n uringa koauan te euangkerio. Te anene e kona naba ni karikiia ataei bwa a na irekereke inanon te kakamwakuri n reiakinaki are a na taneiai iai. (Taraa Teaching in the Savior’s Way, 22.)