“Maati 9–15. Iakobwa 1–4: ‘Kam na Raoiakinaki nakon te Atua rinanon te Mwakuri ni Kamaiu iroun Kristo,’” Nakomai, Iriirai—Ibukin te Moanrinan: Ana Boki Moomon 2020 (2020)
Maati -9–15. Iakobwa 1–4,” ,” Nakomai, Iriirai—Ibukin te Moanrinan: 2020
E Kabwaraaki ana bure, iroun Greg K. Olsen
Maati 9–15
Iakobwa 1–4
Kam na Raoiakinaki nakon te Atua rinanon te Mwakuri ni Kamaiu iroun Kristo
Ngkai ko wareka Iakobwa 1–4, iangoia bwa baikara reirei man taian mwakoro aikai ae a rangi ni kakawaki ibukiia ataei bwa a na reiakiinna. Ukera te kairiiri mai iroun te Tamnei bwa ko na kanga n reireia te tua n te reirei aikai, ao korea am namakin.
Korea Am Namakin
Kaungaa te Tibwatibwa
Kaoiia ataei bwa a na tibwauai bwaai are e a tia ngaia ke aia utui ni karaoi n te wiiki aei n reirei man Iakobwa 1–4. Ko na bae n tuangiia bwa a na tibwaua te bwai are a uringnga n te reirei man te wiiki ae e nako. Tera titiraki ae ko kona titirakiniia bwa e na buokiia n ururingnga?
Reirei te Reirei: Ataei aika a Uarereke
Te Atua e weteiia taan kairiiri n te Ekaretia bwa a na buokai n iriira Iesu Kristo.
Buokiia ataei bwa a na ataia ae a na bon kakabwaiaaki man iriran aia reirei taan kairiiri n te Ekaretia.
Waaki ni Kakukurei aika a Kona ni Karaoaki
-
Karaoa katootongan te taoree ae e kona n taetae n tei ibukin Iakobwa ao Iotebwa, tarin Nibwaai ake a uarereke are taan kairiiri n te Ekaretia. Tibwauai tabeua kiibu man Iakobwa 1 ao 2 ni kabwarabwaraa bwa tera bukin weteaia taan kairiiri ae a na karaoia. Te katooto, taan kairiiri a kairoroira bwa ti na “kakoaua Kristo” (Iakobwa 1:8), a kaoira bwa ti na rairii nanora (taraa Iakobwa 2:5–6, 9–10), ao n “taekina ana taeka [te Atua]” (Iakobwa 2:2, 11). Kariaia ataei bwa a na kabonganaa te taoree are a na bwananna n taetae ni karaoi bwaai aikai.
-
Kaoiia ataei n atongi araia taan kairiiri n te Ekaretia ake a kinaia, n aron te tia kairiiri n te Moanrinan, kain te bitiobiriki, ao burabeti ao abotoro. Buokiia ataei ni iangoi kawai ae a kakabwaiaira iai taan kairiiri aikai.
Ara tia kairiiri n te Ekaretia a buokiira n irira Iesu Kristo.
I kona ni buokiia tabeman ake a kainnano ngkana I tibwatibwa ma ngaiia.
A ataia ataei ake ko reireiniia te kakabwaia ae roko ngkana a anga tibwatibwa ma te koraki ake a kainnano? Ko na kanga ni buokiia n ataia ae Tamara are i Karawa ao Iesu a tangiriia bwa a na buokiia tabeman?
Waaki ni Kakukurei aika a Kona ni Karaoak
-
Kabwarabwaraa ae tabeman aomata n ana tai Iakobwa a bon rangi ni kaubwai, ma a bon rawa ni kan tibwatibwai aia bwai ma aomata ake a kainnano. Wareka Iakobwa 2:17–19 ni buokiia ataei ni mataata n ana reirei Iakobwa nakoia aomata aikai. N am tai ni karaoa aei, anganiia ataei tamnei ke bwaai bwa a na taui ake a booraoi ma taeka ke mwakoro n taeka inanon kiibu aikai.
-
Kaoiia ataei bwa a na karaoia n te kaotioti kawai ake a kona n tibwatibwai baike iai irouiia ma tabeman ake a kainnano. Kaota koauan ae ti kakabwaiaaki ngkana ti tibwatibwa ma tabeman.
-
Uota nakon te kiraati te bwai ae ko kona n tibwaia ma ataei. Anganiia ataei n tatabemaniia tabeua mai iai, ao kabwarabwaraa ae ko tibwauai ma ngaiia. Titirakiniia bwa tera aia namakin ngkai ko a tia n tibwauai ma ngaiia. Tera aia namakin ngkana a tibwatibwa ma tabeman? Buokiia bwa a na iangoa te bwai ae a na kona n tibwauaia ni buoka temanna bwa e na namakina te kukurei.
I kona ni kakorakora au onimaki iroun Iesu Kristo.
Ngkai e maiu inanon te raoiroi Iakobwa e ngae ngke e otabwaniniaki n te buakaka, e rikirake ni korakora ana onimaki n te aro are e a aki kai kamwaeaki. Iangoia bwa kona kanga ni buokiia ataei n ataia bwa tera ae nanonaki n reken te onimaki ae e aki kai kamwaeaki.
Waaki ni Kakukurei aika a Kona ni Karaoaki
-
Buokiia ataei n iangoi bwaai ake a karaoi bwa e na karika rabwataia bwa e na marurung. Tera ae ti kona ni karaoia ni karika ara onimaki bwa e na korakora? Kauka te boki ae tabu nakon Iakobwa 4:6, ao buokiia ataei bwa a na kunea tera ae e karaoia Iakobwa ma ana aomata ni karika aia onimaki bwa “e na aki kai kamwaeaki.”
-
Anenea “The Wise Man and the Foolish Man” (Aia Boki n Anene Ataei, 281) ma ataei. N iteran te burakibooti, korea tamnein te auti ae e kateaki iaon te tano. Ao n iteran te burakibooti are teuana, korea te auti ae e kateaki iaon te bwaa. Ngkana e kona, uota te tano ao te atibu nakon te kiraati. Enga ae e bebete ioioana ke kamwaeana? Enga iai te tano ke te bwaa, ae ti tangira ara koaua bwa e na katotonga?
Reirei te Reirei: Ataei aika a Ikawai
Te Atua e weteiia taan kairiiri n te Ekaretia bwa a na buokai n iriira Iesu Kristo.
Ataei ake ko reireiniia a na kakabwaiaaki ngkai a onimaki ao a toui mwin aia reirei taan kairiiri n te Ekaretia.
Waaki ni Kakukurei aika a Kona ni Karaoaki
-
Warekia ma ataei Iakobwa 1:6–8 ao 2:1–6, 11, buokiia bwa a na noori mwakoro n taeka are a kabwarabwaraa bwa a kanga ana toro te Atua ni kaira ana Ekaretia. Tuangiia bwa a na korei mwakoro n taeka aikai iaon te moti ni beeba ao kaoti beeba akanne iaon te burakibooti. E aera te Atua ngkai e weteiia taan kairiiri n te Ekaretia bwa a na kairiira? Tuangiia ataei bwa a na tibwaua te bwai are a tia n rinanona n reiakinna ke ni karekei kairiiri mai irouia taan kairiiri n te Ekaretia ke taan reirei ao te kakabwaia are a karekei.
-
Tuanga te ataei bwa e na korea tamnein te tia kairiiri n te Ekaretia are e ataa arona, ao nikiraia kain te kirati bwa a na ketinna bwa antai are a korea tamneina. Tera ae a karaoia taan kairiiri aikai ni buokiira ni iriira Iesu Kristo? Kaoiia ataei bwa a na korea te reta nakoia taan kairiiri n te Ekaretia, ni karabwaia ibukin aia mwakuri ni ibuobuoki.
-
Kaoa te tia kairiiri n te Ekaretia n te tabo bwa e na tuangiia ataei bwa tera ae e karaoia ni kakoroa nanon te wewete are e weteaki iai. Tuangiia ataei bwa a na atongi tabeua bwaai ake a kona ni karaoia ni boutokaia taan kairiiri.
I kona ni buokiia tabeman n namakina te kukurei ngkana I tibwatibwa ma ngaiia.
Taan iriira ni koaua Iesu Kristo a kukurei n tibwauai bwaai ake irouia ma tabeman. Kaungaia ataei bwa a na uota te kukurei nakoia ake a kainnano ni ibuobuoki ma ngaiia.
Waaki ni Kakukurei aika a konaa ni Karaoaki
-
Tuangiia ataei bwa a mwaiti aomata n ana tai Iakobwa ae a rikirake ni kainikatonga ao a kairiribai ibukina bwa a tangira te kaubwai (taraa Iakobwa 2:12–14, 17–21). Kaoiia tabeman ataei bwa a na wareka Iakobwa Iakobwa 2:17–19 ni kabaibati, ao buokiia bwa a na mataata n nanon taian taeka aika a kaangaanga. Tera ae ti riai ni kakaea imwain ae ti ukoukora te kaubwai? Tera ae ti riai ni kakaea bwa ti na karaoia ma te kaubwai are ti karekei?
-
Wareka Iakobwa 2:17 nakoia ataei. Tera te kakabwaia ae tibwauaia Tamara are i karawa ma ngaira? Bukin tera E tangiriira bwa ti na tibwauaia imarenara? Kaoiia ataei bwa a na tibwaua te tai ngke a tibwaua te bwai teuana ma temanna, n raonaki ma aron aia namakin ao ana namakin te aomata are temanna.
I kona ni kakorakora au onimaki iroun Iesu Kristo.
Ana onimaki Iakobwa e riki n aki kai kamwaeaki ngke e ukoukori taeka ni burabeti ao e karekea bon oin ana kakoaua (taraa Iakobwa 4:6). Kona kangaa ni buoka nanoia ataei ni karikirakea te onimaki ae aki kona ni kamwaeaki?
Waaki ni Kakukurei aika a Kona ni Karaoaki
-
Buokiia ataei ni iangoa te bwai ae e riki ni korakora ao ni mano raoi inanon te tai ae maan, n aron te aroka ae e bubura. E kanga n riki te onimaki bwa ai aron te bwai are a iangoia? Tera mwakoro n taeka n Iakobwa Iakobwa 4:6, 10–11 ae kabwarabwaraa bwa tera ae ti kona ni karaoia ni karika ara onimaki bwa e na aki kai kamwaeaki? Tuangiia ataei bwa a na korei ni karinani iiaon te burakibooti kawai are a kona ni kakorakora aia onimaki iroun Iesu Kristo.
-
Tibwaua ana kabootau Unimwaane Neil L. Andersen n te aroka ae e bwebwerake n te tabo ae e angang, ae e kuneaki n ana rongorongo ae “Kaangaanga n te Maiu n Tamnei” (Ensign ke Riaona, Meei 2014, 18–21), ke kaotia n te witeo “Kaangaanga n te Maiu n Tamnei” (ChurchofJesusChrist.org). E aera bwa e kakawaki ibukin ara onimaki bwa e na aki kai kamwaeaki ao ni matoatoa n aron boton te aroka? Tera ae e tei ibukin te ukeukenanti? Tera ae ti na karaoia ni karika ara koaua bwa e na aki kai kamwaeaki? Buokiia ataei n iangoa teuana riki te kaikonaki are e reirei ibukin karekean te onimaki ae aki kona ni kamwaeaki.
Kaungaa te Kamatebwai n te Mweenga
Kaoiia ataei bwa a na iangoa te bwai teuana ae a kona ni tibwauaia ma aia utu—n ikotaki ma te bwai ae a reiakinna n te kiraati n te bong aei. Anganiia aia tai inanon tain te reirei aika imwaira bwa a na kaotia bwa tera ae a tibwauaia.
Kanakoraoan Ara Anga reirei
Kaungaa te Karinerine. Buokiia ataei bwa a na ataia ae iteran te karinerine ae moan te kakawaki bon ururingan Tamara are i Karawa ao Iesu Kristo. Ko riai ni kauringiia bwa a na karinerine n anene ni karaurau ke n ira tangitangin te anene ke ni kaota tamnein Iesu.