“Maati 23–29. Enoti–Ana Taeka Moomon: E Mwakuri Inanou bwa N na Karaoa Are Nanona,” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Maati 23–29. Enoti–Ana Taeka Moomon,” Nakomai, Iriirai—Ibukiia Aomata n Tatabemaniia ao Utu: 2020
Iakobwa ao Enoti, iroun Scott Snow
Maati 23–29
Enoti–Ana Taeka Moomon
E Mwakuri Inanou bwa N na Karaoa Are Nanona
Ngkai ko wareka Enoti rinanon Ana Taeka Moomon, taratarai rongorongo ake ana boongana ibukim ao am utu.
Korea Am Namakin
Enoti e nakon te buakonikai bwa e na kaeman, ma n tokin te tai e tiku ikekei n tataro “e bwanin au bong… ao ngke e a bong” (Enoti 1:3–4). Ibukina bwa tamneina e baki ni koaua ni kan karekea kabwaraan ana bure, Enoti e tataro ma nanona ibukin kabwaraan ana bure, Enoti e korakora nanona ni kan tataro n abwabwakin are e kainnanoaki riki n te “kanganga” i matan te Atua (Enoti 1:2). Anne te tataro ae nako man te nano: tiaki ni mwaitin bwaai ake ti tangiria ma te mwakuri ae nako man te nano n ikotaki ma te Atua ao ni kairii ara kantaninga Nakoina. Ngkana ko tataro n te aro aei, ngkana bwanaam “e roota karawa,” ko na kunea are e kunea Enoti ngke e karaoa anne bwa e ongo te Atua, ao E tabe ma ngkoe ni koaua, naake ko tangiriia, ao bon am kairiiribai (taraa Enoti 1:4–17). Inanon taai akanne, te Atua e kona ni karaoa Ana kantaniga bwa kona ataia, ao kona tatauraoi riki ni kona ni karaoi Ana kantaninga ibukina bwa ko booraoi ma Ngaia. N ai aron Moomon, ko bae n “I aki kona n atai kanoan bwaai aikai ni kabane; ma e atai bwaai ni kabane aika a na roko te Uea; … [ma ngaia] ae e mwakuri i [nanom] bwa ni karaoa are nanona” (Ana Taeka Moomon 1:7).
Iango ibukin Kamatebwaian koroboki aika tabu Ibon Iroum
Aia taeka kaaro iai mwiina ae tiku.
Tera rongorongo man kiibu aikai ibukiia kaaro ao nati?
Au tataro ake a nako mai inanou a na bon kaekaaki.
Te bwai are e rinanona Enoti n te tataro bon teuana man bwaai aika a rang ururingaki ni koroboki aika a tabu. Bwaai ake ko rinanona a kona n aki rang kamimi, ma a riai n aki rang memeere nanoia. Are e rinanona Enoti e kona n aki kaoti kawai ni kanakoraoan am tataro. Aikai tabeua titiraki aika ana iangoaki:
-
Tera taeka aika a kabwarabwara ana mwakuri Enoti ngke e tataro?
-
Tera ae e bon tataro ibukina Enoti? (taraa Enoti 1:4). Tera ae ko kona n reiakinna man ana kaeka Enoti imwiin reken te kaeka? (taraa Enoti 1:5–7).
-
E kanga aron Enoti n te kaeka are e karekea?
-
Tera ae ko kona n reiakinna mairoun Enoti ibukin aron karekean te onimaki “ae aki kamwaingaki” iroun te Uea? (Enoti 1:11).
Te Uea e na kakabwaiaai ngkana I kawakin tuua.
Teuana ana berita te Atua ae rang okioki n Ana Boki Moomon bwa ngkana Nibwaite a kawakin tuua, a na kakabwaiaaki iaon te aba (taraa 2 Nibwaai 1:20; Iarom 1:9–12; Ominai 1:6). Ana boki Iarom ao Ominai a kaoti tabeua kawai are e kakoroaki iai bukin te berita aei. Tera ae ko reiakinna man rongorongo aikai are e kona ni buokiko “ni maiuraoi iaon te aba”?
Antai ana botanaomata Taraemera?
Imwiina ngke a birinako Nibwaite man aban Nibwaai, a kunea bwa a mwaiti aomata ake a maeka n te tabo ae aranaki bwa Taraemera. Ana botanaomata Taraemera bon aia kariki te kurubu mai Iteraera ake, n aron ana utu Riaai, a kiitana Ierutarem ao a kairaki iroun te Atua nakon te aba ni berita. Ibuakoia te kurubu anne bon Mureki, temanna natin Etekia, uean Iuta are e reke irouia kain Baburon inanon te 587 BC (taraa Ieremia 52:1–11; Motiaea 25:2; Ereman 8:21).
Imwiin rokoia ana botannaomata Taraemera n te aba ni berita, a kaitibo ma Koriantamwa (taraa Ominai 1:21), te kabanea n aomata ae kinaaki ae maiu ibuakoia Iaretaite, are e karakinaki rongorongona n ana boki Ita.
Tera Ana taeka Moomon?
Ana taeka Moomon e riki bwa te buriiti imarenan uoua bwaatua ake a karika Ana Boki Moomon. Ikai Moomon e anga kabwarabwaraan rekooti aika uoua aikai, ao ana taeka e reirei te rongorongo ae kakaawaki ibukin onimakinan te Uea, riki ngkana ti aki mataata n Ana kaetieti.
Ngkai Nibwaai e korei rekooti iaoia ana aomata, te Atua e kairia bwa e na katei bwatua aika uoua, are e aranna bwa te bwaatua ae uarereke ao ana bwaatua Nibwaai ae bubura. Nibwaai e aki ataia bwa bukin tera e tuangaki bwa e na karaoi uoua bwaatua, ma e onimaki bwa te Uea iai bukina ae “wanawana irouia … , are I aki ataia” (1 Nibwaai 9:5; tara naba “Te Kabwarabwara ae Kimototo ibukin Ana Boki Moomon”).
Bubua n ririki imwiina, ngke Moomon e a tia ni korei kakimototoan kanoan ana bwaatua Nibwaai, e a noora te bwaatua ae uarereke. Bwaatua ae uarereke e taekin naba bwaai aika riki ake a kabwarabwaraaki ni bwaatua ake a bubura are e a tia ni kakimototoi taekaia Moomon, ma bwaatua ae uarereke e boboto riki iaon bwain te tamnei ao aia reirei ao aia taeka burabeti. Te Atua e kaira Moomon bwa e na karina te bwaatua are e uarereke n ana rekooti Nibwaai n raona te bwaatua are e bubura. N aron Nibwaai, Moomon e aki ata ana kantaninga te Atua ibukin karekean uoua bwaatua, ma e onimaki bwa iai bukina ae “wanawana irouia” (Ana taeka Moomon 1:7).
N te bong aei tia ataia bwa tera ana kantaninga te Atua anne. Inanon 1828, imwiina are e a tia Iotebwa Timiti ni kakimototoa mwakoro ana kakimototo Moomon n ana bwaatua Nibwaai are e bubura (116 iteraniba ake a koreaki n te bai), Martin Harris e kabuai iteraniba akanne. Te Atua e tuanga Iotebwa bwa e na aki manga raira te mwakoro anne ibukina bwa mwaane aika a buakaka a bae n tia ni biiti taekana ao ni kataia ni kabuakaka Iotebwa (taraa RB 10, atuun mwakoro; RB 10:14–19, 30–45). Ma te kakaitau, te Atua e a kaman noora aio ao e katauraoa te bwaatua ae uarerek, are e taekin rongorongon ngkoa ae titebo ma are e bua n te 116 iteraniba. Te bwaatua ae uarereke iai inanona booki ake a roko imwain ana Taeka Moomon, ao ana kakimototo Moomon are e moanaki imwain Ana Taeka Moomon.
Moomon e ikotii bwatua Ake Koora, iroun Jorge Cocco
Iango ibukin Kamatebwaian koroboki aika tabu n Utu ao Bootakin te Utu n te tairiki
ngkai ko wareki koroboki aika a tau ma am utu, te Tamnei e na buokiko n ata te reirei raa ae e na katuruturuaki ao ni maroroakinaki bwa e aonga ni kaitara kainnanoia am utu. Aikai tabeua iango.
Enoti 1:1–17
Am utu a kona n taraa tamnein Enoti ngke e tataro ao e kakae Enoti 1:1–17 ibukin kiibu ake a kona ni kabonganaaki bwa atuun te tamnei. Ko kona naba n titirakiniia kain te utu bwa a na korea tamnein te bwai are e rinanona Enoti. Tera ae ti reiakinna mairoun Enoti iaon ukoukoran te kabwarabure?
Iarom 1:2
E kanga ara kamatebwai n ana Boki Moomon ni “kaota te baire ni kamaiu” nakoira?
Ominai 1:12–22
Tera ae reireia kiibu aikai iaon kakaawakin karekan ana taeka te Atua inanon maiura?
Ana Taeka Moomon1:3–9
Tina kanga ni kakabwaiaaki man kawakinan oin ara rekooti ao aia rekooti te utu? Tina kanga ni karaoa ara rekooti bwa e na boboto riki iaon Kristo?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Ara Angareirei
Ikoikotaki n tainako. Beretitenti Henry B. Eyring e reirei: “Tai kabwaka te tai n ikotiia ataei n reiakin ana reirei Iesu Kristo. Taai aikai aki bati n rereke ni kabotauaki ma aia mwakuri ara kairiribai” (“The Power of Teaching Doctrine,” Ensign, Meei 1999, 74).
Enoti ngke e Tataro, iroun Robert T. Barrett