“Maati 9-15. Iakobwa 1-4: ‘Ko na Raoiakinaki nakon te Atua rinanon Ana Mwakuri ni Kamaiu Kristo,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon, 2020 (2020)
“Maati 9-15. Iakobwa 1-4,” Nakomai, Iriirai—Ibukiia Aomata n Tatabemaniia ao Utu: 2020
Kabwara bure, iroun Greg K. Olsen
Maati 9-15
Iakobwa 1–4
Ko na Raoiakinaki nakon te Atua rinanon ana Mwakuri ni Kamaiu Kristo
N te tai are ko taui mwiin am namakin, ko kaotia ikanne bwa ko tangira te Tamnei ae Raoiroi bwa e na reireiniko. N am tai ni wareka Iakobwa Iakobwa 1-4;iangoia ni korea am atatai.
Korea Am Namakin
Nibwaite a taraa Nibwaai bwa “te tia kamanoia” (Iakobwa 1:10). E buokia man ekinakoaia irouia aia kairiribai, ao e kauringiia kaangaanga ibukin te tamnei. Ngkai e a bua, ao te mwakuri ibukin kairaia Nibwaite n te aro n tamnei e a riki ngkai bwa ai taben Iakobwa, are e a tia ni katabuaki iroun Nibwaai bwa ngaia te ibonga ao te tia reirei ibukiia te botanaomata aio (taraa Iakobwa 1:18). Man ana kairiiri te tamnei ae raoiroi, E namakinna Iakobwa bwa a kainnanoa reireinaia ana aomata “n te aro ae matoatoa” ibukina bwa a “moana karaoan te bure” (Iakobwa 2:7, 5). Bure aikai a titebo ma ake a kaitarai aomata ni boong aikai; tangiran te kaubwai ao uruan tuan te Itiaki. Ao n te tai aei, e roko te namakin iroun Iakobwa bwa e na riai n boaia n ae matoa ibukin kabwakaia, e reita nanokawakin nanoia naake a rootaki; ake nanoia a “kananoaki ikoakiia” (Iakobwa 2:35). E anga ana koaua Iakobwa bwa te kamaiuaki ibukiia kurubu aika uoua aikai—- te tia bure ao ake a ikoaki tamneia—-e roko mai iroun te Tia Kamaiu Iesu Kristo. Ana rongorongo Iakobwa, ai aron naba ana rongorongo Nibwaai mai mwaina, bon te kairoro nakon te “raoiakinaki nakon te [Atua] rinanon ana Mwakuri ni Kamwaiu Kristo” (Iakobwa 4:11).
Iango ibukin Kamatebwaian Koroboki aika Tabu n ae onoti
E tangirai te Uea bwa N na karaoa nanon Weteau.
Iroun Iakobwa, te anga reirei n ana taeka te Atua e nano riki nakon ae ti te mwioko mai iroun tarina—bon anne te “wewete mai iroun te Uea,” ngaia are e beku korakora n “kamatoa [n] nakoana” (Iakobwa 1:17, 19). E reirei Beretitenti Gordon B. Hinckley. Hinkley bwa ti na kamatoai weteara “n te tai are ti beku iai ma te korakora, n te tai are ti anga reirei iai ma te onimaki ao te koaua, n te tai are ti tabeki ao ti kakorakorai ao ti karikirakei koaua aika matoa n te raoiroi ibukin ni maiuia naake ti reitaki mangaai” (“Magnify Your Calling,” Ensign, Meei 1989, 47). Iangoa oin “[weteam] mai iroun te Uea” ngkai ko wareka Iakobwa 1:6-8 15-19 ao 2:1-11. Bukin tera e beku ma te kakaonimaki Iakobwa? Tera ae e kaungako n ana katooto bwa ko na riai ni karaoi ao ni kamatoa weteam n te ekaretia ao tabem ni mweengam?
Taraa naba “Teirake nakoni Weteam” (video, LDSorg).
E kukurei te Uea n te Itiaki.
Te bure iai mwina ae e airi ma ngaia n rootiia aomata n tatabemaniia ao kain te kaawa. N maroroakinan te bure ni kaibwabwaru, e kauring Iakobwa e na riai ni iai mwiin bure akanne. Ngkai ko wareka Iakobwa Iakobwa 2:31-35 ao 3:10, tarai kawai are te aki Itiaki e rootiia taian Nibwaite ni kabaneia ao n aomata n tatabemaniia. A kanga kawai aikai n titebo ma mwiina ma te aki Itiaki ae ko nooria ni bong aikai n te aonaaba? Tera ae ko kunea n ana taeka Iakobwa ae e kona ni buokiko n reiakina temanna ae ko tangiria ibukin kakawakin te Itiaki? N te aro raa ae ko a tia ni kakabwaiaki n am kekeiaki n ira nanon tuan te Itiaki?
Taraa, Iakobwa e taetae naba iaon te waaki ae e kabonganaaki ibukin karekean buum te aine ae raka iaon temanna. Tera ae ko kunea n Iakobwa 2:23-30 ae e buokiko ni kamataatako bwa bukin tera te Uea e a tia, n taai tabetai, n tua nakoia ana aomata bwa a na maiuakina te tua ibukin te mare n ae e riaon temanna? Tera ana namakin nakoia ake a karaoa aei n akean ana kariaia?
I kona n raoiakinaki nakon te Atua rinanon ana Mwakuri ni Kamaiu Iesu Kristo.
E bubutiia ana aomata Iakobwa bwa a na “raoiakinaki nakon te [Atua] rinanon ana Mwakuri ni Kamaiu Kristo”(Iakobwa 4:11). “Tera nanon aei iroum? E na ibuobuoki taraan te taeka ae raoiakinaki n te Rikitinare? Tao ko kona ni kunei taeka ke iango n te mwakoro aei ae e kaotia nakoim bwa ko na kanga n nakon Kristo bwa ko aonga n raoiakinaki nakon te Atua. Te katooto, E reirei Iakobwa bwa e reke ana Tua Mote bwa e na kairiia aomata nakon Iesu Kristo (taara Iakobwa 4:5). Tera ae e a tia ni katauraoia te Atua ni kairiko nakon Kristo? N te aro raa ae ko kabonganai baikai ni kaniia te Atua?
Taraa naba 2 Nibwaai 10:24.
I kona n totokoi kamataki n tamnei man katuruan au taratara iaon te Tia Kamaiu.
N aron are e ukeria Iakobwa ni kairiia ana aomata n ae bwanin nakon te Uea, e tua nakoia bwa a na aki mataki n te tamnei ao n aki kakeai “taeka aika mataata” n te euangkerio. (taara Iakobwa 4:13-14). E kauring Unimwaane Quentin L. Cook n te aekaki ni kaangaaga aei n ara tai: “Iai te aekaki n nano irouia tabeman mai buakora n ‘taraan bwaai aika akea manenaia’ irarikin are ti na kateimatoa ara koaua n reirein te euangkerio aika a bebete. Ti karaoa aei n te tai are ti onea mwin wanawanaia aomata bwa ana koaua te euangkerio, iran te waaki are kamatebwaian ana reirei te euangkerio n ae e a rangi n riao, … ao ake a taku bwa a kakawaki riki kainibaire nakon reirei aika tabu. Totokoan aekaki n anua aikai a na buokiira n totokoa te mataki man kamatebwain aaro ao te bwaka are e kabwarabwaraa Iakobwa” (“Looking beyong the Mark,” Ensign, Maati. 2003 42).
Ni kaineti ma Iakobwa 4:8-18,, tera ae ti kona ni karaoi ni katurua ara taratara iroun te Tia Kamaiu ao n totokoi kamataki n tamnei?
Iango ibukin Kamatebwaian Koroboki aika Tabu n te Utu ao Bootakin te Utu n te Tairiki
N am tai are ni wareki koroboki aika tabu ma am utu, te Tamnei e na buokiko n atai baikara reirei aika ko na kamatatai ao n marooroakin bwa ko aonga n tobwa kainnanoia am utu. Aikai tabeua iango.
Iakobwa 1:6-8, 15-19; 2:1-11; 4:18
Tera taeka ao iango ni kiibu aikai aika a kabwarabwaraa te tangira are e namakinna Iakobwa nakoia naake e kairiia? Tera ae a tia ni karaoia ara Taan Kairiiri n te Ekareti ni buokiira n namakina aia “tabeaianga n aron [maiura] n tamnei”? (Iakobwa 2:3). Tao a kona kain am utu n tibwauai kawai are ti kona ni kamatoaia ara tia kairiiri n te Ekaretia. Kam kona ni babaire ni karaoa te bwai teuana n ami utu ibukiia Taan Kairiiri n te Ekaretia n oin ami tabo, n aron te kororeta ni karabwaia ibukin aia beku ke uringakiia ma aia utu n ami tataro.
Iakobwa 2:8
E kanga ana taeka te Atua ni kamaiua “te aomata ae e ikoaki tamneina”?
Iakobwa 2:12–21
Tera ae a reirei kiibu aikai iaon aron iangoan te kaubwai n aonaaba? Tera ae ti karaoia ni keiaki ni buokiia naake a kainnanoa ara ibuobuoki?
Iakobwa 3:1-2
Tera ae nanonaki n te “itiaki n te nano” ao “onimakina te Atua ma te nano ae matoatoa”?
Iakobwa 4:4-11
Teuana te kawai ni buoka am utu ni matata bwa tera ae nanonaki bwa aana “matoatoa” n aia onimaki bon kanga kakaean te aroka ae bubura ae e uakaan ao tuangiia kain am utu bwa a na ioioi mwaanga nako. Ngkanne anganiia aia tai bwa a na ioioa boton te aroka. E aera e kaangaanga ioioan boton te aroka? Tera ae ti kona n reiakinna man ana anga reirei Iakobwa iaon aron karikirakean te onimaki ae “matoatoa”?
N ai aron boton te aroka, ara onimaki iroun Kristo e na kona ni “matoatoa.”
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan te Kamatebwai ae Onoti
Kakauongo nakon te Tamnei. N am tai ni kamatebwai, kaonota am taratara nakon am iango ao am namakin (taraa R&B 8:2–3,), e ngae ngke kanga teina aki irekereke ma am wareware. Namakin ao iango akanne tao bon bwaai aika e tangiria te Atua bwa ko na atai ao ni karaoi.
N na Kaotinakoi Aia Taeka (Iakobwa te Tia Reirei), iroun Elspeth Caitlin Young