Te Taetae ni Kaikonaki ibukin te Kai te Oriwa iroun Brad Teare

Maati 16–22

Iakobwa 5–7

E Mwakuri naba te Uea Irarikira

Warekan booki aika tabu e kaoa te kaotioti. Bukina bwa te wareware e kaoa te kaotioti ngkana ko wareka Iakobwa 5–7, ukoukori kairi mai iroun te Tamnei bwa e na buokiko ao am utu. Tera taian rongorongo aika iai iroun te Uea ibukim?

Koroa Am Namakin

A mwaiti kurikuri, aomata aika a tuai ongo taekan ana euangkerio Iesu Kristo. Ngkana ko namakinna bwa ko taonaki ma buburan te mwakuri n ikotakiia nako nanon ana Ekaretia te Uea, te taetae ni kaikonaki ibukin te kai te oriwa n Iakobwa 5 iai inanona te kauring ni kamatoa ae: te nne ni kurebe bon ana bwai te Uea. E a tia n anganiira n tatabemaniira te tabo ae uarereke n ibuobuoki n Ana mwakuri—ara utu, aia kurubu raoraora, aomata ke bwaai ake e tautaekan te aomata. Ao n tabetai te moan n aomata ae ti buokia ni kaokia boni ngaira. Bwa ti aki kona ni katukaki n tingaira n te mwakuri aei, bukina bwa Uean te nne ni kurebe e mwakuri irarikiia ana toro (taraa Iakobwa 5:72). Te Atua e kinaia ao e tangiriia Natina, ao E na katauraoa te kawai ibukiia n tatabemaniia bwa a na ongo Ana euangkerio, riki irouia naake a tia n aki Butimwaia n taai aika nako (taraa Iakobwa 4:15–18). Ao ngkanne, ngke e a tia te mwakuri, ni kabane naake a tia ni “kakaonimaki ni mwakuri ma [Ngaia] … kam na kimwareirei ma [Ngaia] ibukin uaan [Ana] nne ni kurebe” (Iakobwa 5:75).

Iango ibukin Kamatebwai ni Korobokii Aika Tabu

Iakobwa 5–6

Tera te taetae ni kaikonaki?

Taetae ni kaikonaki bon karaki aika a reirei koaua n te tamnei rinanon taian kanikina. N te taetae ni kaikonaki ibukin te kai te oriwa, te katooto, te nne ni kurube e tei ibukin te aonaaba, te kai te oriwa ae ribanaaki e tei ibukin Iteraera (naake a tia ni karaoi berita aika tabu ma te Atua), ao kaai aika oriwa aika riki irouia a tei ibukiia tientaire n te aba (naake a tuai karaoi berita aika tabu ma te Atua).

Ngkana ko kamatebwaia te taetae ni kaikonaki inanon Iakobwa 5, taraa te kanikina riki teuana ao iangoia bwa tera ae a nanonna. Te katooto, tera n am iango bwa e tei te uaa ae raoiroi ibukina? Tera ae na kona ni kanikinaea te uaa ae buakaka?

Iakobwa 5; 6:3–5

Iesu Kristo bon Uean te nne ni kurebe.

Imwain ae ko moana am kamatebwai n te taetae ni kaikonaki ibukin te kai te oriwa inanon Iakobwa 5, e na kona n ibuobuoki n rinanoa Iakobwa 4:10–18 n reiakinna bwa bukin tera Iakobwa e kaungaaki bwa e na tibwaua te taeka ni kaikonaki aei ma ana aomata. Inanon Iakobwa 6:3–5, ko kona ni kunei tabeua rongorongo ae e tangiria Iakobwa bwa e na kamataatai; tarai rongorongo aikai n te taetae ni kaikonaki. Tera rongorongo aika ko kunei inanon Iakobwa 5?

Iakobwa 5 bon te mwakoro ae abwabwaki—te kabanea n abwabwaki n Ana Boki Moomon. E kona n ibuobuoki n tibwauai nakon tiekition aikai, aika a kabwarabwarai taai ngkoa n rongorongon te aonaaba:

Kiibu 3–14:Uamaenakoia Iteraera imwain ana tai Kristo

Kiibu 15–28:Ana bootaki ni mwakuri Kristo ao Abotoro

Kiibu 29–49:Kitanan te Koaua ae Moan te Korakora

Kiibu 50–76:Ikotakiia Iteraera ni boong aika kaitira

Kiibu 76–77:Te Mereniam ao tokin te aonaaba

Ibukin atatai aika nano iaon te taetae ni kaikonaki, taraa te taeakuraem ae kairaki ma te kabwarabwara aei.

Ti bane ni kona ni beku ibukin te Atua ma ni Buokiia n ikotiia Ana ataei.

Iakobwa 5:61–75

E kaoai te Atua bwa e na Buokia n ikotiia Ana ataei.

Tooro ake “tabeman” (Iakobwa 5:70) ake a weteaki nakon ana nne ni kurebe te Uea a raonaki ma aomata n aromi—ngkai kaain te Ekaretia, bon tabera bwa ti na buoka te Atua ni ikotiia Natina. Tera taian reirei aika ko kunei inanon Iakobwa 5, riki kiibu 61–62 ao 70–75, ibukin te mwakuri n ana nne ni kurebe te Uea? Ko kanga n tia n Namakinna bwa e weteiko bwa ko na mwakuri n ana nne ni kurebe? Tera te taneiai aika ko a tia ni karekei ngke ko ibuobuoki n Ana mwakuri?

Taraa naba “Te Mwakuri ni Mitinare,” Atuun Reirein te Euangkerio, topics.ChurchofJesusChrist.org; “Te Nne ni Kurube n te O Tetemanti,” “Buoka te Ekaretia Bwa e na Rikirake” (taian witeo, ChurchofJesusChrist.org).

Iakobwa 7:1–23

I kona n teimatoa n onimaki ngkana a kataa au onimaki tabeman.

Taneiai n aron ake irouia Nibwaite ma Tierem e riki naba n te bong aei: iai aomata aika reireinaki, aika kinaaki aika kataia ni kamauna am onimaki. Ma Iakobwa “e na bon aki bwaka” (Iakobwa 7:5). E kanga ana kaeka Iakobwa ngke e kataaki ana onimaki? Tera ae ko reiakinna man ana kaeka? Tera ae ko kona ni katauraoia ngkai ibukin taai ngkana e na kataaki am onimaki?

Taraa naba “Answering Gospel Questions,” Atuun Rongorongo ibukin te Euangkerio, topics.ChurchofJesusChrist.org; Jeffrey R. Holland, “The Cost—and Blessings—of Discipleship,” Ensign ke Riaona, Meei 2014, 6–9.

Iango ibukin Kamatebwai ni Booki Aika Tabu ao Bootakin te Utu n te Tairiki

Ngkana ko wareki booki aika tabu ma am utu, e kona te Tamnei ni buokiko n atai reirei aika ko na kamataatai ao ni maroroakin n te aro bwa ko na buoki kainnanoia am utu. Aikai tabeua iango.

Iakobwa 5

A tia utu tabeua ni kunea bwa e ibuobuoki n anai kanikina man te taetae ni kaikonaki ibukin te kai te oriwa ngkana a warekia. A kona am utu ni kukurei n te kawai anne, ke e na iai te kawai riki teuana ae ko kona ni buokiia kaain te utu ni kamatenanoi kanikina n te taetae ni kaikonaki. Tao ko kona ni kanikinaea te tabo teuana iaon te taibora ke i aontano bwa e na tei ibukin te nne ni kurebe (ke te aonaaba) katea te kai te oriwa ae manana (ke te bata are Iteraera) ma te bwai, n aron te bwai ni kamwaninga, are e kona ni bwenauaki nakon mwakorokoro (n tei ibukin uamaenakoia Iteraera) ao manga botii (bwa e na tei ibukin ikotakiia Iteraera). Tera te bwai ae reireiniira te taetae ni kaikonaki aei ibukin te Uea? ibukin Ana toro?

Iakobwa 5:70–77

Ngkana ko wareka taekan te “kabanea n tai” bwa e mwakuri te Uea n Ana nne ni kurebe, tera ae kaungako ao kain am utu bwa ko na beku ibukin te Uea “ma korakoram ni kabane”? (Iakobwa 5:71). Ko kona ni kanikinaea te kibu 75 man karinakin araia n te kibu aei—te katooto, “Ko a kabwaia [arana].” Tao a kona n tibwaua aia taneiai ngke a namakina iai te kimwareirei ngke a mwakuri ibukin te Uea n te nne n ni kurebe, te katooto rinanon tibwauakin te euangkerio, ni beku inanon te tembora, ke ni kakorakoraia kaain te Ekaretia. (Taraa naba M. Russell Ballard, “Katuka Am Onimaki Iroun te Uea,” Ensign ke Riaona, Nobembwa. 2013, 43–45.)

Iakobwa 6:4–7

E kanga te Uea n tia n taakin baina n nanoanga nakoira? Tera nanon te taeka ae “nim” inanon kiibu aikai? E kanga te Uea n nim ma ngaira? Ti na kanga n nim ma Ngaia?

Iakobwa 7:1–12

Tera ae ti reiakinna man kiibu aikai bwa a na kanga aomata ni kataia ni kairiia tabeman bwa ana bua? Ti na kanga n ira ana katooto Iakobwa ao ni kateimatoaki n ara onimaki iroun Kristo?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Kanakoraoan Ara Anga reirei

Kamatenanoa te kibu. Rinea te kibu man booki aika tabu ae na uaana nakon am utu, ao baane kamatenanoa. E reirei Unimwaane Richard G. Scott, “Te kibu ae kamatenanoaki e riki bwa te rao ae teimatoa are e aki kamamaraaki ma kanoan te tai” (“Mwaakan Koroboki Aika Tabu,” Ensign ke Riaona, Nobembwa. 2011, 6).