“Maati 2–8. 2 Nibwaai 31–33: ‘Aio te Kawai,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Maati 2–8. 2 Nibwaai 31–33,” Nakomai, Iriirai—Ibukiia Aomata n Tatabemaniia ao Utu: 2020
Kristo ngke e Reireiniia Ana Reirei, iroun Justin Kunz
Maati 2–8
2 Nibwaai 31–33
“Aio te Kawai”
Aio are e kaoti reirei kabwarabwaraaki bwa a na kona n rang ibuobuoki n 2 Nibwaai 31–33. Ma te bwai ae moan te kakaawaki are ko reiakinna n am kamatebwai e na roko man ana wirikiriki te Tamnei. Ukoukora te kairi aei, ao korea te namakin are e roko.
Korea Am Namakin
Ibuakon ana kabanea n taeka Nibwaai ake a koreaki, ti kunea te katanoata aei: “bwa e a tia n tuatua te Uea bwa N na karaoia, ao I riai n ongeaba nakoina” (2 Nibwaai 33:15). Aio ae taraa ni bwarabwara raoi n rongorongon maiun Nibwaai ae kakimototoaki. E noora ana kantaninga te Uea ao e ninikoria n ongeaba nako iai—ke e kona ni kananona bwa e kona ni kabua maiuna man karekean te bwatua mairoun Raban, kabaan te booti n mwananga rinuukan taari, ke ni kakaonimaki n reireia ana reirei Kristo n ae matata man mwaaka. Nibwaai e kona n taetae n anainano ibukin kainnanoan ae “kam na waaki nako, inanon Kristo,” n ira te kawai “ae eti man irariki are e na kairingkami nakon te maiu ae akea tokina” (2 Nibwaai 31:20, 18), ibukina bwa aio te kawai are e iria. E ataia man te bwai are rinanona bwa aio te kawai, rinanona te tai ni kataaki, e kakukurei naba, ao bwa “akea riki te kawai ke te arana teuana iaan karawa are e kona ni kamaiuaki iai te aomata n abanuean te Atua” (2 Nibwaai 31:21).
Iango ibukin Kamatebwai ibon iroum ni Koroboki aika a tabu
Iesu Kristo ao Ana reirei bon ti te kawai nakon te maiu are akea tokina.
Ngkana ko na kakimototoa te kawai nakon te maiu are akea tokina inanon ti tabeua taeka, tera ae kona taekinna? Nibwaai, ma ana kamatata ao kabebeteana; e karaoia n te aro aei: te onimaki inanon Kristo, te rairannano, bwabetito, karekan ana bwaintangira te Tamnei ae Raoiroi, ao te teimatoa ni ua te toki. Imwiin kamatebwaian ana reirei Nibwaai n 2 Nibwaai 31–32, iangoia bwa ko na kanga ni kabwarabwarai nakon temanna ni bon oin am taeka. Iangoa aron kakabwaia ake a tia n reke iroum man maiuakinan reirei aikai. Ko na bae n iangoa ana reirei Nibwaai n 2 Nibwaai 31:18–20 ao n ukora mwiin am kekeiaki ni “waaki nako” ni kawain te euangkerio.
Taraa naba 3 Nibwaai 11:32–39; 27:13–22; D. Todd Christofferson, “The Doctrine of Christ,” Ensign ke Riaona, Meei 2012, 86–90; Brian K. Ashton, “The Doctrine of Christ,” Ensign ke Riaona, Nob. 2016, 106–9.
Iriirakin ana reirei Iesu Kristo e kairiira nakon te maiu ae akea tokina.
Iesu Kristo e katea te banna ni katoto n te ongotaeka ngke E bwabetitoaki.
Tao ngke am bwabetito e karaoaki ngkoananoa, ke 80 te ririki n nako, bon te tai ae kakaawaki—are koa rinnako iai ni maiuakinan te berita n iriira Iesu Kristo. Iangoa am bwabetito ngkai ko wareka taekan ana bwabetito te Tia Kamaiu n 2 Nibwaai 31:4–13. Bukin tera e bwabetitoaki te Tia Kamaiu? Tera kaokoron bukin bwabetitoana ni katiteboaki ma bwabetitoakim? Tera ae kona karaoia n te bong aei n reitinako n iriira ana banna ni katoto te Tia Kamaiu n te ongeaba?
Otenanti n te toa bon te tibwanga ibukin ni katoa wiiki are ko kabaeaki iai n iriira Iesu Kristo. Are imwiina ngkana ko kanga te toa, iangoa warekan 2 Nibwaai 31:13 ao iangoia bwa kona teimatoa n “iriira te Nati, ma nanomi ni kabane” ao ma am kantaninga“ni katoka iaom aran Kristo”
Te Tamnei ae Raoiroi e na kaotia nakoiu te bwai ae I riai ni karaoia.
Ngkana te bwabetito ao te kamatoa bon “te mataroa [ti] rin” te kawai ae irariki (2 Nibwaai 31:17), tera are ti karaoia ngke ti mena iaon te kawai? Anne are a iangoia ana aomata Nibwaai (taraa 2 Nibwaai 32:1). Tera te kaeka are e anga Nibwaai n 2 Nibwaai 31:19–20 ao mwakoro 32? Tera kaeka aika ko kunei ibon iroum?
Taraa naba David A. Bednar, “Receive the Holy Ghost,” Ensign ke Riaona, Nob. 2010, 94–97; “Holy Ghost,” Atuun Rongorongo n te Euangkerio, topics.ChurchofJesusChrist.org.
Ana Boki Moomon e kairii nano ni kabane bwa a na kakoaua Kristo.
N 2 Nibwaai 33, ngke Nibwaai e kaina ana koroboki, e kabwarabwara bukina ngke e korea te mwakoro aei n te moan tai. Tera bukina ake ko kunei n te mwakoro aei? Iango iaon bwaai ake koa tia ni wareki man te 1 Nibwaai ao 2 Nibwaai ao korei bwaai ake ko a tia ni karekei. E kanga rongorongon ao ana reirei Nibwaai ni kakoroan bukin te kantaninga ni mwakuri iroum? Te katooto, e kanga ni kaira am iango bwa kona “kakoaua [Kristo], ao n teimatoa n uaa te toki”? (kibu 4). Iangoa rawean taneiai aikai ke tibwakiia ma kain te utu ke rao.
Iango ibukin Kamatebwain booki aika tabu n te utu ao Bootaki n Utu n te Tairiki
Ngkai ko wareki koroboki aika a tabu ma am utu, te Tamnei e kona ni buokiko n atai bwa reirei raa aika kona kabwarabwarai ao ni maroroakin bwa ko aonga ni katoki kainnanoia am utu. Aikai tabeua iango.
2 Nibwaai 31:5–13
Iai kain te utu ae katauraoi ibukin te bwabetito, ke iai ae e a tibwa ti ni bwabetitoaki? Tao a kona n tibwaia bwa bukin tera a baireia bwa a na bwabetitoaki. Ni kaineti ma ana reirei Nibwaai, tera bukina tabeua ngkai ti riai ni bwabetitoaki? Tera tabeua kakabwaia ake ti karekei ngkana ti bwabetitoaki?
2 Nibwaai 31:17–21
Ko na kanga ni buokiia kain am utu n ota n ana karaki Nibwaai iaon te “kawai ae eti man irariki”? (2 Nibwaai 31:18). Te katoto, ko kona ni ikotaki n imwakuri ni korea te kawai are e kabwarabwara Nibwaai n 2 Nibwaai 31:17–21, n kanikinaea ma bwaai ake ti riai ni karaoi bwa tina rin n te kawai ao n reitinako iaona. E kanga te Tia Kamaiu ni buokiira n rikirake iaon te kawai?
2 Nibwaai 31:20
Ngkana ko tangiria ni buokiia am utu bwa a na matata riki n aron te teimatoa ni karokoa te toki, iteraniba 6 n Tataekina au Euangkerio iai ana kabwarabwara ae ibuobuoki; ai aron naba ana rongorongo Unimwaane Dale G. Renlund “Latter-day Saints Keep on Trying” (Ensign ke Riaona, Meei 2015, 56–58).
2 Nibwaai 32:8–9
Ni buokiia kain te utu bwa ana ota bwa ti kona n “tataro n tainako,” ko kona ni karaoi rinanin bwaai ake ko kona n tataro ibukina (ke korei tamnei ake a tei ibukiia). Imwiina am utu a kona n anenea te kua are e reirei taekan te tataro, n aron “Ko Kauti Nako n te Ingabong ao Ko Tataro?” (Anene n Taromauri, no. 140), n onei mwiin taeka tabeua n te anene ma taekaia n aia rinan. E kanga te Uea ni kakabwaiaira ngkana ti tataro n tainako?
2 Nibwaai 33:1–2
Tera ae e kona ni kairiia aomata bwa a na “kamatoai nanoia ni kaitara te Tamnei ae Raoiroi”? Ti na kanga ni kakoaua bwa te Tamnei ae Raoiroi iai “nnena inano [ra]”?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Ara Anga reirei
Iriirakin te Tia Kamaiu. E ibuobuoki kamatebwaian aron te Tia Kamaiu n reirei—kawai ake E kabonganai ao bwaai ake E taekini. Ma mwaakan Iesu n reirei ao n tabekiiarake tabeman n tokina e roko mai irouna ao arona ni maiu. Kakorakoraam ni kataia ni maiu n ai aron Iesu Kristo e tiku iaon mwaakana ni Kamaiu, arom ni kona riki n reirei n Ana kawai.
Kakoroi Bukin Bwaai ni Kabane aika a Raraoi, iroun Liz Lemon Swindle