Si Haring Benjamin nga nagatudlo sang iya katawhan

Minerva K. Teichert (1888–1976), Pamulong-pulong sa Pagpaalam ni Haring Benjamin, 1935, oil sa masonite, 36 x 48 ka pulgada. Brigham Young University Museum of Art.

Abril 13–19

Mosias 1–3

“Puno sang Gugma tuhoy sa Dios kag sa Tanan nga mga Tawo”

Si Haring Benjamin naghatag sang isa ka rason sang pagsulat sang aton espirituhanon nga mga panghunahuna: “Kay indi mahimo nga ang aton amay nga si Lehi, makadumdom sining tanan nga mga butang, agud nga matudlo ang mga ini sa iya mga anak, kon indi sa bulig sining mga lamina” (Mosias 1:4).

Isulat Ang Imo Mga Panghunahuna

Kon mabatian mo ang tinaga nga hari, siguro ginapamensar mo ang mga korona, kastilyo, mga suluguon, kag mga trono. Sa Mosias 1–3, mabasahan mo ang parte sa lain nga klase sang hari. Imbes nga magpangabuhi sa kinabudlayan sang iya katawhan, si Haring Benjamin “nagpangabudlay paagi sa [iya] kaugalingon nga mga kamot” (Mosias 2:14). Imbes nga magpaserbisyo sa iban, ginserbisyuhan niya ang iya katawhan “sa bug-os nga ikasarang, kaisipan kag kusog nga [ginhatag] sang Ginuo sa [iya]” (Mosias 2:11). Indi gusto sining hari nga simbahon sia sang iya katawhan; kundi, gintudloan niya sila nga magsimba sa Hari nga mas dako pa sangsa iya, kay naintiendihan niya nga “ang Ginuo nga Makaako [amo ang] nagahari” (Mosias 3:5). Pareho sa tanan nga bantog nga mga lider sa ginharian sang Dios, ang mga pulong kag ehemplo ni Haring Benjamin nagatudlo sa aton sa Langitnon nga Hari, nga amo ang Manluluwas nga si Jesucristo. Si Haring Benjamin nagpamatuod nga si Jesus “nagpanaog gikan sa langit” kag magalakat “sa tunga sang mga tawo, nga nagahimo sang dalagko nga mga milagro. … Kag yari karon, magakari sia sa iya kaugalingon nga katawhan, agud nga ang kaluwasan mahimo man nga magaabot sa mga anak sang tawo bisan paagi sa pagtuo sa iya ngalan” (Mosias 3:5, 9).

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Mosias 2:1–9

Ang pagbaton sang pulong sang Dios nagakinahanglan sang preparasyon.

Sang ginpahibalo ni Haring Benjamin nga gusto niya makighambal sa iya katawhan, madamo kaayo nga mga tawo ang nag-abot “nga wala nila maisip ang mga ini” (Mosias 2:2). Nag-inabot sila, sa isa ka bahin, bangud sang ila kapasalamatan kag pagpalangga sa ila lider. Pero mas importante pa, nag-abot sila para matudloan sang pulong sang Dios.

Samtang imo ginabasa ang Mosias 2:1–9, pangitaa kon ano ang ginhimo sang katawhan para ipakita nga ginahatagan nila sang bili ang pulong sang Dios. Ano ang ginpangabay ni Haring Benjamin nga ila himuon para magpreparar sa pagpamati sang pulong sang Dios? (tan-awa sa bersikulo 9). Paano mo mas mahanda ang imo kaugalingon sa pagbaton sang pulong sang Dios sa imo personal kag pang-pamilya nga pagtuon kag sa tion sang mga miting sa Simbahan?

Tan-awa man sa Mateo 13:18–23; Alma 16:16–17.

Mosias 2:10–26

Kon nagaserbisyo ako sa iban, nagaserbisyo man ako sa Dios.

Nabudlayan ka bala sa paghatag sang tiyempo sa pagserbisyo ukon nagahandum nga ang imo pagserbisyo mas nagahatag sa imo sang kalipay? Ano ayhan ang ihambal ni Haring Benjamin kon pamangkuton mo sia kon ngaa nagserbisyo sia upod ang tanan niya nga “ikasarang, kaisipan kag kusog”? (Mosias 2:11). Sa imo pagbasa sang Mosias 2:10–26, pangitaa ang mga kamatuoran nga gintudlo ni Haring Benjamin parte sa pagserbisyo kag pamensara kon paano mo ina gamiton sa imo kabuhi. Halimbawa, ano ang kahulugan sa imo sang paghibalo nga kon nagaserbisyo ka sa iban, nagaserbisyo ka man sa Dios? (tan-awa sa Mosias 2:17). Magpamensar sang paagi nga makaserbisyo ka sa isa ka tawo sini nga semana!

Tan-awa man sa Mateo 25:40.

duha ka babayi nga nagahaksanay

Kon nagaserbisyo ako sa iban, nagaserbisyo man ako sa Dios.

Mosias 3:1–20

Malampuwasan ko ang kinaugali nga tawo kag mangin santos paagi sa Pagbayad-Sala ni Jesucristo.

Si Haring Benjamin, pareho sa tanan nga mga propeta, nagsaksi kay Jesucristo agud nga ang iya katawhan “mahimo nga makabaton sang kapatawaran sang ila mga sala, kag magakasadya sa tuman kadako nga kalipay” (Mosias 3:13). Nagpanudlo man sia nga ang Manluluwas, paagi sa Iya Pagbayad-Sala, wala lang nagatinlo sa aton kundi nagahatag man sang gahum para ubahon ang “kinaugali nga tawo” kag mangin “isa ka santos” (Mosias 3:19).

Si Elder David A. Bednar nagpaathag: “Ang Pagbayad-Sala ni Jesucristo nagahatag sang pareho nagatinlo kag nagatubos nga gahum nga nagabulig sa aton nga malampuwasan ang sala kag sang nagapakabalaan kag nagapabaskog nga gahum nga nagabulig sa aton nga mangin mas maayo sangsa aton malab-utan kon magsalig lang sa aton kaugalingon nga kusog. Ang wala dulonan nga Pagbayad-Sala para sa pareho makasasala kag santos sa sulod sang tagsa sa aton” (“Clean Hands and a Pure Heart,” Ensign ukon Liahona, Nob. 2007, 82).

Ari ang pila ka mga pamangkot nga dapat pamensaron sang maayo samtang imo ginabasa ang panaksihon ni Haring Benjamin parte sa Manluluwas sa Mosias 3:1–20:

• Ano ang akon matun-an sa sining mga bersikulo parte sa Manluluwas kag sa Iya misyon?

• Paano ako ginbuligan ni Jesucristo nga malampuwasan ang sala? Paano Niya ako ginbuligan nga bag-uhon ang akon kinaugali kag mangin mas isa ka santos?

• Ano ang aton matun-an parte sa pagkasantos sa Mosias 3:19?

Mosias 3:8

Ngaa gintumod ni Haring Benjamin si Jesus bilang “ang Amay sang langit kag duta”?

Si Pangulong Joseph F. Smith nagpaathag: “Si Jesucristo, nga kilala man naton bilang Jehova, amo ang tagpatuman sang Amay, nga si Elohim, sa buluhaton sang pagtuga. … Si Jesucristo, bilang Tagtuga, tayuyon nga ginatawag nga Amay sang langit kag duta … ; kag tungod ang Iya mga gintuga may wala katapusan nga kalidad nagakabagay nga tawgon Sia nga Wala Katapusan nga Amay sang langit kag duta” (Teachings of Presidents of the Church: Joseph F. Smith [1998], 357).

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Mosias 1:1–7

Paano ginbugayan sang mga lamina nga saway kag sang mga lamina ni Nefi ang katawhan ni Haring Benjamin? Paano ginabugayan sang balaan nga mga kasulatan ang aton pamilya?

Mosias 2–3

Mahimo nga makalingaw sa imo pamilya ang i-akto ang hitabo sang pamulong-pulong ni Haring Benjamin. Pwede ka maghimo sang gamay nga tore kag pabulos-buluson ang mga miyembro sang pamilya sa pagbasa sang mga pulong ni Haring Benjamin samtang nagatungtong diri. Ang iban sa pamilya pwede mamati sa ginhimo-himo nga tolda.

Mosias 2:9–19

Ano ang aton matun-an parte sa pagserbisyo halin sa pinanudlo kag ehemplo ni Haring Benjamin? Ano ang ginainspirar sa aton nga aton himuon?

Mosias 2:15–25

Ano ang mangin benepisyo sa imo pamilya sa paghambalanay parte sa pagpaubos? Ngaa wala ginatikal ni Haring Benjamin ang tanan niya nga hinimuan? Ano ang aton matun-an sa iya pinanudlo parte sa aton relasyon sa Dios?

Mosias 2:36–41

Ano ang gintudlo ni Haring Benjamin parte sa mga konsikwensya sang paghibalo sang kamatuoran pero wala ini ginapangabuhi? Ano ang iya ginatudlo parte sa pag-angkon sang matuod-tuod nga kalipay?

Mosias 3:19

Ano ang kinahanglan naton himuon para mangin mga santos? Ano ang kinaiya sa sining bersikulo nga pwede naton tutokan nga patubuon bilang pamilya?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Maghimo sang malab-ot nga mga tinutuyo. Ang paghatag sang bisan pila lang ka minutos sa pagtuon sang balaan nga mga kasulatan kada adlaw magabugay sang imo kabuhi. Magpangako nga magtuon tagsa ka adlaw, kag pangitai sang paagi nga pahanumdumon ang imo kaugalingon sang imo pangako.

Si Haring Benjamin nga nagawali sa iya katawhan

Pamulong-pulong ni Haring Benjamin, ni Jeremy Winborg