Sa Pag-alagad sang Inyo Dios, ni Walter Rane

Abril 20–26

Mosias 4–6

“Isa ka Dako nga Pagbag-o”

Samtang imo ginabasa kag ginabinagbinag ang Mosias 4–6, hatagi sing atensyon ang mga pagpabatyag sang Balaan nga Espiritu. Ano nga maayo nga mga butang ang nainspirar ka nga himuon? (tan-awa sa Mosias 5:2).

Isulat Ang Imo Mga Panghunahuna

Nakaagi ka bala nga nakapamati ka sa ginhambal sang isa ka tawo kag natandog ka nga bag-uhon ang imo kabuhi? Ayhan nagdesisyon ka, tungod sang imo nabatian, nga mangabuhi sing may diutay nga kinalain—ukon may dako nga kinalain. Ang pagwali ni Haring Benjamin daw amo sina nga klase sang pagwali, kag ang mga kamatuoran nga iya gintudlo may amo sina nga epekto sa mga tawo nga nakabati sini. Ginsugid ni Haring Benjamin sa iya katawhan kon ano ang gintudlo sa iya sang isa ka anghel—nga dalagko nga mga bugay ang posible paagi sa “[nagabayad-sala] nga dugo ni Cristo” (Mosias 4:2). Ginbag-o sang iya mensahe ang bilog nila nga panan-aw sa ila kaugalingon (tan-awa sa Mosias 4:2), nagliwat sang ila mga huyog (tan-awa sa Mosias 5:2), kag nag-inspirar sa ila nga mangako sa Dios nga ila pirme himuon ang Iya pagbuot (tan-awa sa Mosias 5:5). Amo sini ang nangin epekto sang mga pulong ni Haring Benjamin sa iya katawhan. Ano ang epekto sini sa imo?

Mga Ideya para sa Personal nga Pagtuon sang Balaan nga Mga Kasulatan

Mosias 4

Paagi kay Jesucristo, pwede ako magbaton kag maghupot sang kapatawaran sang akon mga sala.

Indi mahapos ang maglampuwas sang kinaugali nga tawo. Nagakinahanglan sang dako nga pagpaninguha ang mangin “santos paagi sa pagbayad-sala ni Cristo nga Ginuo” (Mosias 3:19). Kon kaisa, bisan pa nga nabatyagan mo nga napatawad ka na sang imo mga sala, mahimo nga ginabudlayan ka nga magpabilin ang ina nga balatyagon kag magpadayon sa dalan sang pagkamatarong. Gintudloan ni Haring Benjamin ang iya katawhan kon paano magbaton kag maghupot sang kapatawaran sang mga sala kag magpangabuhi nga tayuyon bilang santos. Sa imo pagtuon sang kapitulo 4 sang Mosias, mahimo mo pamangkuton ang imo kaugalingon sining mga pamangkot:

Mga bersikulo 1–12.Ano nga mga bugay ang gindala sang kapatawaran sang mga sala sa katawhan ni Haring Benjamin? Ano ang gintudlo ni Haring Benjamin para buligan sila nga maghupot sang kapatawaran sang ila mga sala? Ano ang iya ginatudlo parte sa kon paano naton mabaton ang kaluwasan? Tandai ang ginsiling ni Haring Benjamin nga dapat naton “dalayon nga huptan sa panumduman” (bersikulo 11). Ano ang ginapabatyag sa imo nga imo himuon para madumduman ining mga butang?

Mga bersikulo 12–16.Suno sa sining mga bersikulo, ano ang nagakatabo sa aton mga kabuhi kon himuon naton ang mga butang nga ginalaragway sa bersikulo 11? Naeksperiyensyahan mo na bala ining mga pagbag-o sa imo kabuhi? Ano ang koneksyon sini sa mga pagbag-o nga ginlaragway sa Mosias 3:19?

Mga bersikulo 16–30.Paano nagabulig sa aton ang pagkaalwan sa mga pigado nga maghupot sang kapatawaran sang aton mga sala? Paano mo gamiton ang bersikulo 27 sa imo mga pagpaninguha nga mangin pareho kay Cristo?

Mosias 5:1–7

Ang Espiritu sang Ginuo mahimo nga magtuga sang dako nga pagbag-o sa akon tagipusuon.

Komon para sa mga tawo nga magsiling, “Indi na ako magbag-o. Amo na ako sini eh.” Sa kabaliskaran, ang eksperiyensya sang katawhan ni Haring Benjamin nagapakita sa aton kon paano bag-uhon sing matuod-tuod sang Espiritu sang Ginuo ang aton mga tagipusuon. Si Pangulong Russell M. Nelson nagpanudlo: “Pwede naton bag-uhon ang aton pamatasan. Ang aton mga huyog pwede magbag-o. … Ang matuod-tuod nga pagbag-o—permanente nga pagbag-o—magaabot lamang paagi sa nagapang-ayo, nagatinlo, kag nagapabakod nga gahum sang Pagbayad-Sala ni Jesucristo. … Ang ebanghelyo ni Jesucristo isa ka ebanghelyo sang pagbag-o!” (“Decisions for Eternity,” Ensign ukon Liahona, Nob. 2013, 108).

Sa imo pagbasa parte sa pagbag-o nga naeksperiyensyahan sang katawhan ni Haring Benjamin, pamensara kon paano ang “dako nga pagbag-o” padulong sa matuod-tuod nga pagkahaylo natabo—ukon mahimo matabo—sa imo kabuhi. Pila bala ka “dako” nga mga tinion ang nagsugod sang imo pagbag-o sa tagipusuon, ukon ang imo pagbag-o natabo sing amat-amat?

Tan-awa man sa Ezequiel 36:26–27; Alma 5:14 .

Ang Manluluwas sarang magbag-o sang aton mga tagipusuon kag sang aton mga kabuhi. Nagapang-ayo nga mga Kamot, ni Adam Abram

Mosias 5:5–15

Ginadala ko sa akon kaugalingon ang ngalan ni Cristo kon maghimo ako sang mga kasugtanan.

Isa sa mga rason nga gusto ni Haring Benjamin maghambal sa iya katawhan amo ang “hatagan ang ining katawhan sang ngalan.” Ang iban mga Nefinhon kag ang iban mga kaliwat ni Mulek, pero indi ini ang mga ngalan nga iya ginapamensar. Gin-imbitar niya ang mga tawo nga dalhon sa ila mga kaugalingon “ang ngalan ni Cristo” bilang bahin sang ila kasugtanan sang pagtuman sa Dios (Mosias 1:11; 5:10). Ano ang imo matun-an sa Mosias 5:7–9 parte sa buot silingon sang pagdala sa imo kaugalingon sang ngalan ni Cristo?

Si Elder D. Todd Christofferson nagtudlo, “Ang ginhalinan sang [moral kag espirituhanon nga gahum] amo ang Dios. Ang paagi nga aton mabaton inang gahum amo ang aton mga kasugtanan sa Iya” (“The Power of Covenants,” Ensign ukon Liahona, Mayo 2009, 20). Samtang imo ginabasa ang Mosias 5:5–15, listaha ang mga bugay nga magaabot sa imo kabuhi samtang imo ginatuman ang mga kasugtanan nga imo ginhimo upod sa Dios. Paano ang pagtuman sang imo mga kasugtanan makabulig sa imo nga maghupot sang “dako nga pagbag-o” nga gintuga sa imo paagi kay Jesucristo kag sang Iya Pagbayad-Sala?

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Mosias 4:9–12

Paano ang imo pamilya mas lubos nga “magpati sa Dios” (Mosias 4:9) kag “dalayon nga huptan sa panumduman, ang pagkawala’y tupong sang Dios”? (Mosias 4:11). Ayhan pwede basahon sang mga miyembro sang pamilya ang Mosias 4:9–12 kag pangitaon ang mga dinalan nga nagabulig sa ila nga magpatubo sang ila pagtuo sa Dios. Tapos pwede nila isulat ining mga dinalan kag ibutang ini sa sulod sang balay bilang mga pahanumdom. Paano ang pagpanumdom sining mga butang makabulig sa aton nga “dalayon nga magkasadya” kag “huptan ang kapatawaran sang [aton] mga sala”? (Mosias 4:12).

Mosias 4:14–15

Ano ang aton matun-an parte sa pag-ilinaway kag pagkinamog sa sining mga bersikulo?

Mosias 4:16–26

Sa ano nga aspeto kita tanan mga manugpakilimos? Suno sa sining mga bersikulo, paano naton dapat tratuhon ang tanan nga mga anak sang Dios? (tan-awa sa Mosias 4:26). Sin-o ang nagakinahanglan sang aton bulig?

Mosias 4:27

Nagadalagan bala sing mas madasig ang imo pamilya sangsa inyo masarangan? Pwede mo imbitaron ang mga miyembro sang pamilya nga rebyuhon ang ila mga aktibidades para masiguro nga matutom sila kag maalamon.

Mosias 5:5–15

Ngaa ang pagdala sang ngalan ni Cristo sa aton kaugalingon nagasugid sang klase sang aton relasyon sa Iya? Mahimo nga makabulig nga hambalan kon ngaa ang mga tawo kon kaisa nagasulat sang ila mga ngalan sa ila mga gamit. Paano naton ipakita nga “Iya” kita sang Manluluwas?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magtuga sang mapinalanggaon nga palibot. Ang pamaagi nga ginatrato sang mga miyembro sang pamilya ang kada isa makaimpluwensya sing dako sa espiritu sang inyo puluy-an. Buligi ang tanan nga mga miyembro sang pamilya nga himuon ang ila parte sa paghimo sang mapinalanggaon, matinahuron nga puluy-an para nga ang tanan makabatyag nga hilway sa pagsugid sang mga eksperiyensya, mga pamangkot, kag mga panaksihon. (Tan-awa sa Teaching in the Savior’s Way, 15.)

Sa Iya Dalayon nga Pag-atipan, ni Greg K. Olsen