“Abril 27–Mayo 3. Mosias 7–10: ‘Sa Kusog sang Ginuo,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Abril 27–Mayo 3. Mosias 7–10,” Dali, Magsunod sa Akon—Para sa Mga Indibidwal kag Mga Pamilya: 2020
Minerva K. Teichert (1888-1976), Si Amon sa atubang ni Haring Limhi, 1949-1951, oil sa masonite, 35 15/16 x 48 ka pulgada. Brigham Young University Museum of Art, 1969.
Abril 27–Mayo 3
Mosias 7–10
“Sa Kusog sang Ginuo”
Sa imo pagbasa, ang Espiritu mahimo nga magdala sang imo atensyon sa pila ka mga dinalan ukon bersikulo. Isulat ang imo mga nabatyagan kon paano magamit inang mga dinalan sa imo.
Isulat Ang Imo Mga Panghunahuna
Samtang ang katawhan ni Haring Mosias nagakalipay sa “dalayon nga paghidaet” sa Zarahemla (Mosias 7:1), ang ila pamensaron nagliso sa isa pa ka grupo sang mga Nefinhon, nga sa madamo nga tinuig na naglakat para mag-estar sa duta sang Lehi-Nefi. Nagligad ang mga henerasyon, kag ang katawhan ni Mosias wala na makabati parte sa ila. Gani ginpangabay ni Mosias si Amon nga magpanguna sang grupo para pangitaon ang mga Nefinhon nga naghalin. Natukiban sang mga nagpangita nga ang mga Nefinhon, “tungod sang kalautan” (Mosias 7:24), ginbihag sang mga Lamanhon. Pero sa pag-abot ni Amon kag sang iya kauturan, gulpi lang nga nabuhi ang paglaum nga maluwas sila.
Kon kaisa daw pareho kita sa sining mga Nefinhon, nga nagaantos tungod sang aton mga sala, nga nagapamangkot kon bala makita pa naton liwat ang paghidaet. Kon kaisa pareho kita kay Amon, nga daw ginatulod sa paglab-ot sa iban kag sa ulihi makakita nga ang aton mga pagpaninguha nakainspirar sa ila nga “ibayaw ang [ila] mga ulo, kag magkasadya, kag ibutang ang [ila] pagsalig sa Dios” (Mosias 7:19). Bisan ano pa ang aton mga sirkumstansya, kinahanglan naton tanan nga maghinulsol kag “magdangop sa Ginuo sa bug-os nga katuyuan sang tagipusuon,” nga nagatuo nga “sia … magahilway [sa aton]” (Mosias 7:33).
Mga Ideya para sa Personal nga Pagtuon sang Balaan nga Mga Kasulatan
Kon magdangop ako sa Ginuo, magsalig sa Iya, kag magserbisyo sa Iya, Iya ako hilwayon.
Ang makilala si Amon, nga isa ka Nefinhon halin sa Zarahemla, naghatag kay Haring Limhi sang paglaum, kag gusto niya nga ipasa inang paglaum sa iya katawhan. Samtang imo ginabasa ang Mosias 7:14–33, pat-ini ang ginhambal ni Limhi sa iya katawhan para paisugon sila, pabakuron ang ila pagtuo, kag hatagan sila sang paglaum nga buligan sila sang Dios. Bisan nga indi pareho ang imo mga sala sa mga sala sang katawhan ni Limhi, paano makabulig sa imo ang iya mga pulong nga magdangop sa Ginuo? Halimbawa, matalupangdan mo, nga ginpadumdom ni Limhi ang iya katawhan parte sa mga istorya sadto sang paghilway sang Dios (tan-awa sa mga bersikulo 18–20). Paano ining mga istorya, lakip na ang iban pa nga mga panaysayon sa balaan nga mga kasulatan ukon personal nga eksperiyensya, nagabulig sa imo nga magsalig sa Dios?
Ano ang 24 ka mga lamina nga nakita sang katawhan ni Limhi?
Bisan nga wala nagmadinalag-on ang gamay nga grupo sang katawhan ni Limhi sa pagpangita sang duta sang Zarahemla, nakita nila ang 24 ka mga lamina sang bulawan nga may mga kinurit sa indi pamilyar nga lenggwahe. Ining mga lamina, nga sang ulihi ginlubad ni Haring Mosias, nagaistorya parte sa isa ka katawhan nga ginatawag nga mga Jarednon, nga nagkadto sa duta nga ginpangako halin sa Tore sang Babel kag sang ulihi napapas (tan-awa sa Mosias 28:11–19). Sang ulihi ginpalip-ot ni Moroni ining mga lamina (tan-awa sa Eter 1:1–2), nga amo ang nangin libro ni Eter. Pat-ini sa Mosias 28:18 ang epekto sining rekord sa katawhan ni Mosias.
Ang Ginuo nagahatag sang mga propeta, mga manugpanan-aw, kag mga manugpahayag sang rebelasyon para sa benepisyo sang katawhan.
Sang mabatian ni Limhi ang panaksihon ni Amon nga nagbangon ang Ginuo sang manugpanan-aw, si Limhi “nagkasadya sing tuman, kag naghatag sing pasalamat sa Dios” (Mosias 8:19). Ngaa sa banta ninyo nga amo sadto ang iya nabatyagan? Ano ang inyo matun-an parte sa mga manugpanan-aw halin sa mga pulong ni Amon sa Mosias 8:13–19? Sa aton tiyempo, “ang Unang Panguluhan kag ang Konseho sang Dose ginatib-ong bilang mga propeta, mga manugpanan-aw, kag mga manugpahayag sang rebelasyon” (Bible Dictionary, “Seer”). San-o ang pinakaulihi nga ginpamensar mo sing maayo ang bugay nga may mga propeta, mga manugpanan-aw, kag mga manugpahayag sang rebelasyon sa duta? Ayhan pwede mo irekord kon paano ang mga propeta, mga manugpanan-aw, kag mga manugpahayag sang rebelasyon nakahatag sang “dako nga benepisyo” sa imo (Mosias 8:18).
Si Propetang Joseph Smith isa ka dako nga manugpanan-aw nga nagatindog sa ulohan sining dispensasyon (tan-awa sa D&K 21:1; 124:125; Joseph Smith—History 1:62). Paano niya ginpakita ang ginlaragway ni Amon parte sa isa ka manugpanan-aw sa iya pagpangalagad?
Mahimo ko atubangon ang akon mga kabudlayan “sa kusog sang Ginuo.”
Gin-ako ni Zenif nga may mga kasaypanan sia. Nagadali-dali sia kon kaisa, kag ginbutang niya ang iya katawhan—ang mga kalolohan sang katawhan ni Limhi—sa mabudlay nga sitwasyon paagi sa paghimo sang wala ginpamensar sing maayo nga kasugtanan kay Haring Laman. Pero sang ulihi, sang nakig-away sia batok sa mga Lamanhon, ginbuligan niya ang iya katawhan nga atubangon ang ila mga kabudlayan nga may pagtuo. Samtang imo ginabasa ang Mosias 9–10, pangitaa kon ano ang ginhimo sang katawhan ni Zenif para ipakita ang ila pagtuo. Paano sila ginpabakod sang Dios? Ano ang kahulugan sa imo sang maglakat “sa kusog sang Ginuo”? (Mosias 9:17; 10:10–11).
Ang akon mga pagpili makaimpluwensya sang mga henerasyon.
Suno sa Mosias 10:11–17, paano ang mga aksyon kag pamatasan sang kalolohan sang mga Lamanhon nagpugong sa mga Lamanhon sa paghibalo sang kamatuoran? Paano ang mga pagpili sang mga kalolohan sang mga Lamanhon nakaapekto sang nagsunod nga mga henerasyon? Hunahunaa ang mga tawo nga pwede maimpluwensyahan sang imo mga pagpati kag pagpili; ano ang imo ginahimo para buligan sila nga mas magpati pa gid kay Cristo?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Mosias 7:19–20
Tandai ang mga halimbawa nga ginmitlang ni Limhi para paisugon ang iya katawhan nga magtuo. Ano nga mga halimbawa sa balaan nga mga kasulatan ang nagainspirar sa aton nga “magsalig sa Dios”? Ano ang kahulugan sang pagbutang sang aton pagsalig sa Dios? (tan-awa man sa Mosias 9:17; 10:19). Ano nga mga istorya sa aton kabuhi ukon sa mga kabuhi sang aton kalolohan ang pwede naton isugid para makainspirar sang mas dako nga pagsalig sa Dios?
Mosias 7:26–27
Ano ang aton matun-an parte sa Manluluwas sa sining mga bersikulo? (tan-awa man sa Doktrina kag mga Kasugtanan 130:22). Ngaa nagapasalamat kita nga mahibal-an ining mga butang?
Mosias 8:13–18
Para buligan ang mga miyembro sang pamilya nga maintiendihan kon ano ang manugpanan-aw, basi pwede mo ipakita sa ila ang mga litrato sang mga gamit nga nagabulig sa aton nga makakita sang mga butang nga kuntani indi naton makita, pareho sang mga binocular, teleskopyo, ukon mikroskopyo. Sa ano ining mga gamit daw pareho sa manugpanan-aw? (tan-awa sa Moses 6:35–36). Ano ang makita sang mga manugpanan-aw nga indi naton makita? Ano ang ebidensya naton nga si Joseph Smith isa ka manugpanan-aw?
Mahimo ka nga magpakita sang mga litrato sang aton buhi nga mga propeta, mga manugpanan-aw kag mga manugpahayag sang rebelasyon kag pamangkuta ang imo pamilya kon ano ang ila nahibal-an parte sa ila. Paano naton sila ginasunod?
Mosias 9:14–18; 10:1–10
Sang nag-atake ang mga Lamanhon, nangin handa ang katawhan ni Zenif sa pisikal kag espirituhanon. Ano ang aton matun-an kay Zenif kag sa iya katawhan parte sa paghanda para sa mga kabudlayan?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Magpangita sang imo kaugalingon nga espirituhanon nga ihibalo. Ining outline nagapanugyan sang mga dinalan kag prinsipyo nga tutokan, pero indi pagtugoti nga limitahan sini ang imo pagtuon. Mahimo nga matandog ka sang mga dinalan ukon makadiskubre sang mga prinsipyo nga wala masambit diri. Tugoti ang Espiritu nga maggiya sa imo.
Palanan-awon kay Joseph Smith, ni Clark Kelley Price