“Mayo 11–17. Mosias 18–24: ‘Nagsulod Kita sa Kasugtanan upod sa Iya,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Mayo 11–17. Mosias 18–24,” Dali, Magsunod sa Akon—Para sa Mga Indibidwal kag Mga Pamilya: 2020
Minerva K. Teichert (1888-1976), Ang Pagpalagyo ni Haring Limhi kag sang Iya Katawhan, 1949-1951, oil sa masonite, 35 7/8 x 48 pulgada. Brigham Young University Museum of Art, 1969.
Mayo 11–17
Mosias 18–24
Nagsulod Kita sa Kasugtanan upod sa Iya
Si Pangulong Thomas S. Monson nagtudlo, “Samtang aton ginabasa kag ginabinagbinag ang balaan nga mga kasulatan, maeksperiyensyahan naton ang matam-is nga mga paghutik sang Espiritu sa aton mga kalag” (“We Never Walk Alone,” Ensign ukon Liahona, Nob. 2013, 122).
Isulat Ang Imo Mga Panghunahuna
Ang kasaysayan ni Alma kag sang iya katawhan sa Mosias 18; 23–24 nagapakita kon ano ang kahulugan sang “magsulod sa panong sang Dios” (Mosias 18:8). Sang ginbunyagan sila, naghimo sila sang kasugtanan sa Dios nga “mag-alagad sa iya kag magtuman sang iya mga kasuguan” (Mosias 18:10). Bisan pa nga tama ini ka personal nga pangako, may labot man ini sa kon paano nila ginatrato ang kada isa. Huo, ang pagpanglakaton pabalik sa Amay nga Langitnon personal kag indibidwal, kag wala sang pwede magtuman sang aton mga kasugtanan para sa aton, pero wala ina nagakahulugan nga nagaisahanon kita. Kinahanglan naton ang kada isa. Bilang mga miyembro sang Simbahan ni Cristo, nangako kita nga magserbisyo sa Dios paagi sa pagbulig kag pagserbisyo sa kada isa sa dalanon, “nga [naga]pas-an sang palas-anon sang isa kag isa” (Mosias 18:8–10). Sigurado nga ang katawhan ni Alma may mga palas-anon nga kinahanglan pas-anon, pareho man sa aton tanan. Isa sa paagi nga ginabuligan kita sang Ginuo nga “madala [naton] ang aton mga lulan sing mahapos” (Mosias 24:15) amo ang paghatag sa aton sang komunidad sang mga Santos nga nagpromisa nga magkasubo upod sa aton kag magpaumpaw sa aton, pareho sang aton ginpromisa nga himuon para sa ila.
Mga Ideya para sa Personal nga Pagtuon sang Balaan nga Mga Kasulatan
Ang bunyag may upod nga kasugtanan nga magserbisyo sa Dios kag magtindog bilang saksi Niya.
Ang Mosias 18:8–10 nagalakip sang mga pinanudlo ni Alma parte sa kasugtanan sa bunyag, ukon sang promisa nga aton ginahimo sa Dios sa bunyag. Samtang imo ginabasa ining mga bersikulo, pamensara sing maayo ang masunod nga mga pamangkot:
-
Ano ang imo natun-an sa sining mga bersikulo parte sa mga promisa nga imo ginhimo sa tion sang bunyag? Ano ang ginpromisa sang Dios sa imo?
-
Ano ang relasyon sang kasugtanan nga magserbisyo sa Dios (tan-awa sa bersikulo 10) sa aton mga pagpaninguha nga mag-minister sa isa kag isa? (tan-awa sa mga bersikulo 8–9).
-
Ano ang imo ginahimo para tumanon ang imo mga promisa?
-
Paano nagabulig sa imo ang pagtuman sang imo kasugtanan sa bunyag nga “mapuno sang Espiritu”? (Mosias 18:14). Paano ang Espiritu nagabulig sa imo nga matuman ang imo kasugtanan?
Kon maghimo ako sang mga kasugtanan sa Dios, mabaton ko ang Iya mga bugay.
Ining panaysayon nagapakita man sang husto nga paagi sang pagbunyag. Ano ang imo matun-an sa mga bersikulo 14–17 parte sa kon paano dapat himuon ang pagbunyag? Ano pa ang imo matun-an parte sa bunyag sa Mateo 3:16; Mga Taga-Roma 6:3–5; 3 Nefi 11:21–28; kag Doktrina kag mga Kasugtanan 20:72–74?
Tan-awa man sa Doktrina kag mga Kasugtanan 20:37, 77, 79.
Ang katawhan sang Dios dapat nga mag-isa.
Sa nadiskubrehan ni Alma kag sang iya katawhan, ang pagsunod kay Jesucristo kon kaisa nagakahulugan sang pagbiya sang pamilyar nga pamaagi sa kabuhi sa butang nga bag-o kag lain. Pero ang katawhan ni Alma nagkuha sang kusog sa kada isa bilang bahin sang “simbahan ni Cristo” (Mosias 18:17). Paano nagainspirar sa imo ang mga pinanudlo sa Mosias 18:17–30 nga mangin mas maayo nga miyembro sang Simbahan? Ano ang pwede mo himuon para makabulig sa mga miyembro sang imo ward ukon branch nga “mabugkos sing tingob sa paghiliusa kag sa gugma”? (Mosias 18:21).
Ang mga pulong sang mga propeta matuman.
Naghimo si Abinadi sang pila ka pat-od nga mga propesiya parte sa kon ano ang matabo kay Haring Noe kag sa iya katawhan kon magpamalibad sila sa paghinulsol. Ugaling, para sa iban ining mga propesiya daw indi mapatihan (tan-awa sa Mosias 12:1–8, 14–15), labi na kay madinalag-on nga napangapinan sang mga Nefinhon ang ila mga kaugalingon batok sa mga Lamanhon sa halos 50 na ka tuig (tan-awa sa Mosias 9:16–18; 11:19). Pero ang mga pulong sang mga propeta tanan matuman—sa aton panahon pareho sang sa tiyempo ni Abinadi.
Ano ang imo makita sa Mosias 19–20 nga nangin rason nga magdeklarar si Gideon nga ang mga propesiya ni Abinadi natuman na? (tan-awa sa Mosias 20:21). Paano ining panaysayon nagapabakod sang imo pagtuo sa mga paandam kag laygay sang mga propeta sang Dios kag sang imo pangako nga sundon ang ila mga pulong? Sang san-o ka nakakita nga ang mga tinaga sang propeta natuman sa aton panahon?
Mahimo sang Dios nga pamag-anon ang akon mga ginapas-an.
Ang mga katawhan ni Limhi kag Alma pareho nga nahulog sa pagkagapos, bisan pa nga sa lainlain nga mga rason kag sa lainlain nga mga sirkumstansya. Ano ang imo matun-an sa pagkumparar sang mga kasaysayan sang katawhan ni Limhi sa Mosias 19–22 kag katawhan ni Alma sa Mosias 18; 23–24? Pwede mo pat-inan kon ano reaksyon sang tagsa sining mga grupo sa pagkabihag ukon paano ang kada isa nahilway sang ulihi. Samtang ginahimo mo ini, magpangita sang mga mensahe nga magamit sa imo kabuhi. Halimbawa, ano ang imo matun-an sa sining mga panaysayon nga makabulig sa imo nga kargahon ang imo mga palas-anon?
Makasalig ako sa Ginuo.
Bisan pa nga naghinulsol na sila sang ila mga sala, si Alma kag ang iya katawhan ara gihapon sa pagkabihag. Ang ila eksperiyensya nagapakita nga ang pagsalig sa Ginuo kag pagpangabuhi sang aton mga kasugtanan wala pirme nagapugong sang mga kabudlayan, pero nagabulig ini sa aton nga malampuwasan ang mga ini. Samtang imo ginabasa ang Mosias 23:21–24 kag 24:8–17, tandai ang mga tinaga kag dinalan nga makabulig sa imo nga magtuon nga magsalig sa Dios, bisan ano pa ang imo mga sirkumstansya.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu sarang magbulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Mosias 18:1–4
May hulubaton nga maisip mo ang mga liso sa isa ka mansanas, pero indi mo maisip ang mga mansanas nga magahalin sa isa ka liso. Isa lang ka tawo ang namati sa panaksihon ni Abinadi, pero inang isa ka tawo—si Alma—nag-impluwensya sang mga henerasyon sang mga Nefinhon. Ayhan pwede ka maggamit sang prutas nga may mga liso para ipakita ining prinsipyo. Paano magamit ining mensahe sa aton pamilya? Ano ang pwede naton himuon para ipaambit ang aton mga panaksihon sa iban?
Mosias 18:8–10
Ano ang aton matun-an parte sa aton kasugtanan sa bunyag sa sining mga bersikulo? (tan-awa man sa Doktrina kag mga Kasugtanan 20:73, 77–79). Ano ang aton ginahimo para maghanda para sa ukon magtuman sang aton kasugtanan sa bunyag?
Mosias 18:30
Ano nga mga lugar ang may espesyal nga kahulugan sa aton tungod sang espirituhanon nga mga eksperiyensya didto?
Mosias 21:11–16; 24:10–15
Ano ang aton matun-an paagi sa pagkumparar sang pagkabihag sang katawhan ni Alma kag katawhan ni Limhi?
Mosias 21:15; 24:11–15
Ano ang ginatudlo sa aton sining mga bersikulo parte pila ka mga paagi nga ginasabat sang Ginuo ang aton mga pangamuyo?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Magpangita sang oras nga bagay sa imo. Masami mahapos magtuon kon makabasa ka sang balaan nga mga kasulatan nga wala sang istorbo. Magpangita sang oras nga bagay sa imo, kag himoa ang imo masarangan nga pirme magtuon sa amo nga oras kada adlaw.
Ang mga Tubig ni Mormon, ni Jorge Cocco