“Mayo 18–24. Mosias 25–28: ‘Gintawag Sila nga Katawhan sang Dios,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Mayo 18–24. Mosias 25–28,” Dali, Magsunod sa Akon—Para sa Mga Indibidwal kag Mga Pamilya: 2020
Ang Pagbag-o ni Alma nga Lamharon, ni Gary L. Kapp
Mayo 18–24
Mosias 25–28
“Gintawag Sila nga Katawhan sang Dios”
Pagkatapos nga “ang tingug sang Ginuo nag-abot kay [Alma],” ginsulat niya ang mga butang nga ginsiling sang Ginuo sa iya “agud mahimo nga maangkon niya ang mga ini” (Mosias 26:14, 33). Paano mo sundon ang ehemplo ni Alma?
Isulat Ang Imo Mga Panghunahuna
Pagkatapos sang halos tatlo ka henerasyon sang pagpuyo sa separado nga mga lugar, nangin isa liwat ang mga Nefinhon. Ang katawhan ni Limhi, katawhan ni Alma, kag katawhan ni Mosias bisan ang katawhan sang Zarahemla, nga wala maghalin kay Nefi—tanan karon “gin-isip upod sa nga Nefinhon” (Mosias 25:13). Madamo sa ila gusto man nga mangin miyembro sang Simbahan nga gintukod ni Alma. Gani ang tanan nga “maluyag sa pagdala sa ila mga kaugalingon sang ngalan ni Cristo” ginbunyagan, “kag gintawag sila nga katawhan sang Dios” (Mosias 25:23–24). Pagkatapos sang tinuig sang inaway kag pagkabihag, daw makaangkon na gid man sa ulihi ang mga Nefinhon sang tinion sang kalinong.
Pero wala pa magdugay, ang mga wala nagatuo nagsugod na sa pagpanghingabot sa mga Santos. Ang nagpasakit pa gid kay madamo sining mga wala nagatuo mismo mga anak sang mga nagatuo—ang “ulihing tubo” (Mosias 26:1), dala na ang mga anak nga lalaki ni Mosias kag ang isa ka anak nga lalaki ni Alma. Dayon isa ka milagro ang natabo, kag ang istorya sinang milagro naghatag sang paglaum sa ginalisdan nga mga ginikanan sa madamo nga mga henerasyon. Pero ang istorya sang pagbag-o ni Alma indi lamang para sa mga ginikanan sang salawayon nga mga kabataan. Ang matuod nga pagbag-o isa ka milagro, nga bisan diin mo tan-awon, kinahanglan matabo sa tanan sa aton.
Mga Ideya para sa Personal nga Pagtuon sang Balaan nga Mga Kasulatan
Responsable ako sa akon kaugalingon nga pagtuo kag panaksihon.
Ang mga nakabati sang wali ni Haring Benjamin nakaeksperiyensya sang makatilingala nga pagbag-o (tan-awa sa Mosias 5:1–7), pero ang pagbag-o isa ka personal nga eksperiyensya nga indi pwede ipasa nga daw palanublion sa kabataan. Kinahanglan naton tanan mag-eksperiyensya sang aton kaugalingon nga pagkahaylo sa ebanghelyo ni Jesucristo. Sa imo pagbasa sang Mosias 26:1–6 parte sa “ulihing-tubo” sang wala nagatuo nga mga Nefinhon, pat-ini ang mga konsikwensya sang ila kawala sang pagtuo. Pwede mo man pamensaron ang mga tawo nga gusto mo dalhon kay Cristo. Bisan indi mo mahatag sa ila ang imo pagkahaylo, mahimo nga may mga ihutik sa imo ang Espiritu nga pwede mo himuon para buligan sila nga magtuo. Sa imo pagbasa sa Mosias 25–28 sang parte sa kon paano ginbuligan ni Alma kag sang iban nga mga miyembro sang Simbahan ang ulihing-tubo, mahimo nga may mag-abot sa imo nga dugang nga mga panghunahuna.
Tan-awa man sa Doktrina kag mga Kasugtanan 68:25–29.
Ang matinuohon nga mga alagad sang Dios nagatinguha nga himuon ang Iya pagbuot.
Kon kaisa ginapamensar naton nga ang isa ka lider sang Simbahan pareho kay Alma nakahibalo pirme sang husto nga buhaton. Sa Mosias 26 mabasahan naton ang parte sa problema sa Simbahan nga wala pa makaptan ni Alma, kag “nahangawa sia nga magahimo sia sang sayop sa panulok sang Dios” (Mosias 26:13). Ano ang ginhimo ni Alma sa sining sitwasyon? (tan-awa sa Mosias 26:13–14, 33–34, 38–39). Ano ang ginapanugyan sang eksperiyensya ni Alma kon paano mo atubangon ang mabudlay nga mga problema sa imo pamilya kag sa imo pagserbisyo sa Simbahan?
Siguro manami man nga ilista ang mga kamatuoran nga ginpahayag sang Dios kay Alma, nga makita sa Mosias 26:15–32. Pat-ini nga ang pila sining mga kamatuoran indi direkta nga sabat sa pamangkot ni Alma. Ano ang ginapanugyan sini sa imo parte sa pangamuyo kag pagbaton sang personal nga rebelasyon?
Tanan nga lalaki kag babayi kinahanglan nga matawo liwat.
Maathag nga kinahanglan ni Alma nga Lamharon sang espirituhanon nga pagkabun-ag liwat, kay sia kag ang mga anak ni Mosias amo ang “pinakatampalasan sang mga makasasala,” nga nagalibot sa “pagguba sang simbahan sang Dios” (Mosias 28:4; 27:10). Pero pagkatapos gid sang iya pagkahaylo, nagpamatuod si Alma nga ang pagbag-o posible—kag kinahanglanon—para sa tanan: “Indi magkatingala,” siling niya, “nga ang tanan nga tawo … kinahanglan gid nga mabun-ag liwat” (Mosias 27:25; mga italics gindugang). Siyempre, dala ka na dira.
Samtang ginabasa mo ang eksperiyensya ni Alma, nga makita sa Mosias 27:8–37, pwede mo testingan nga ibutang ang imo kaugalingon sa iya lugar. Wala mo ginatinguhaan nga gub-on ang Simbahan, pero sigurado nga may mapensaran ka nga mga butang nga kinahanglan mo bag-uhon sa imo kaugalingon. Sin-o, pareho sa tatay ni Alma, ang nagasuporta sa imo kag nagapangamuyo para sa imo “upod ang tuman kadako nga pagtuo”? Ano nga mga eksperiyensya ang nagbulig “sa pagpapati sa [imo] sang gahum kag pagbulut-an sang Dios”? (Mosias 27:14). Ano nga “dalagko nga mga butang” ang ginhimo sang Ginuo sa imo kag sa imo pamilya nga dapat mo “dumdumon”? (Mosias 27:16). Ano ang imo matun-an sa mga pulong kag aksyon ni Alma nga Lamharon parte sa kahulugan sang mabun-ag liwat? Ang mga pamangkot nga pareho sini mahimo nga makabulig sa imo nga rebyuhon ang imo pag-uswag sa proseso sang pagkabun-ag liwat.
Tan-awa man sa Mosias 5:6–9; Alma 36.
Ang Iya Amay Nagkasadya, ni Walter Rane
Nagapamati ang Dios sa akon mga pangamuyo kag masabat sang mga ini suno sa Iya pagbuot.
Siguro may nahibal-an ka nga ginikanan nga ara sa sitwasyon ni Alma nga Tatay, nga ang anak nga lalaki ukon babayi nagahimo sang makaguba nga mga pagpili. Ukon basi ikaw ang ginikanan nga ina. Ano ang imo makita sa Mosias 27:14, 19–24 nga nagahatag sa imo sang paglaum? Paano ayhan makaimpluwensya ining mga bersikulo sa imo mga pangamuyo para sa iban?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Mosias 25:5–11
Ano ang nabatyagan sang katawhan ni Mosias pagkatapos nga iya ginbasa sa ila ang mga rekord sang katawhan ni Zenif kag katawhan ni Alma? Nagatago bala ang imo pamilya sang bisan ano nga rekord nga pwede ninyo basahon sa ulihi? Pwede mo dugangan ang imo mga rekord ukon magsugod sa paghimo sang imo kaugalingon nga rekord. Ano ang imo ilakip nga makabulig sa imo pamilya (dala na ang palaabuton nga mga henerasyon) nga “mapuno sang tuman kadako nga kalipay” kag mahibal-an ang “gilayon nga kaayo sang Dios”? (Mosias 25:8, 10).
Mosias 25:16
Ngaa importante para sa katawhan ni Limhi nga dumdumon nga ginhilway sila sang Ginuo sa pagkabihag? Ano ang ginhimo sang Ginuo para sa aton nga dapat naton dumdumon?
Mosias 26:29–31; 27:35
Suno sa sining mga bersikulo, ano ang kinahanglan himuon sang isa ka tawo para makabaton sang kapatawaran?
Mosias 27:21–24
Sa imo pagbasa sining mga bersikulo, pamensara ang isa ka tawo nga pwede mo ipangamuyo kag puasahan.
Mosias 27–28
Para buligan ang imo pamilya nga mapanan-aw ang mga istorya sa sining mga kapitulo, pwede mo sila agdahon nga magdrowing sang mga litrato sang mga tawo nga natungdan kag gamita ang mga litrato para isugid liwat ang istorya. Ukon basi masadyahan sila nga drama-dramahon ang istorya; paano ayhan nila artehon ang pagbag-o nga naeksperiyensyahan ni Alma kag sang mga anak ni Mosias?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Maggamit sang larawan [art]. Ang Libro sang mga Larawan nga Pang-Ebanghelyo kag ang Media Library sa ChurchofJesusChrist.org nagaunod sang madamo nga imahe kag mga video nga makabulig sa imo pamilya nga mapanan-aw ang mga konsepto ukon mga hitabo.
Larawan sang anghel nga nagapakita kay Alma nga Lamharon ni Kevin Keele