“Mayo 4–10. Mosias 11–17: ‘Kapawa … Nga Indi Gid Magdulom,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Mayo 4–10. Mosias 11–17,” Dali, Magsunod sa Akon—Para sa Mga Indibidwal kag Mga Pamilya: 2020
Si Abinadi sa atubang ni Haring Noe, ni Andrew Bosley
Mayo 4–10
Mosias 11–17
“Kapawa … Nga Indi Gid Magdulom”
Ang mga pulong ni Abinadi nagtuga sang dako nga pagbag-o sa isa ka miyembro sang ginharian ni Haring Noe (tan-awa sa Mosias 17:2–4). Basaha ang Mosias 11–17 nga may pangamuyo sa imo tagipusuon nga makabaton ka sang impresyon kon paano ka magbag-o.
Isulat Ang Imo Mga Panghunahuna
Ang dalagko nga sunog nagasugod sa isa ka gamay nga igrab sang kalayo. Si Abinadi ang solo nga tawo nga nagpamatuod batok sa gamhanan nga hari kag sa iya ginharian. Ginsikway ang iya mga pulong sa dako nga bahin, kag ginsentensyahan sia nga mapatay. Pero ang iya panaksihon kay Jesucristo, nga amo ang “kapawa … nga indi gid magdulom” (Mosias 16:9), nagpa-igrab sang kon ano sa sulod sang lamharon nga pari nga si Alma. Inang igrab sang pagbag-o amat-amat nga nagdako samtang nagdala si Alma sang madamo nga iban pa sa paghinulsol kag pagtuo kay Jesucristo. Ang kalayo nga nagpatay kay Abinadi napalong sang ulihi, pero ang kalayo sang pagtuo nga gintuga sang iya mga pulong may nagatiner nga impluwensya sa mga Nefinhon—kag sa mga tawo nga nagabasa sang iya mga pulong sa karon. Kalabanan sa aton indi makaeksperiyensya sang inagyan ni Abinadi bangud sang aton mga panaksihon, pero kita tanan may tinion nga ang pagsunod kay Jesucristo isa ka pagtilaw sang aton kaisog kag pagtuo. Ayhan ang pagtuon sang panaksihon ni Abinadi magapadako man sang kalayo sang panaksihon kag kaisog sa imo tagipusuon.
Mga Ideya para sa Personal nga Pagtuon sang Balaan nga Mga Kasulatan
Sarang ko tindugan ang kamatuoran, bisan pa nga ako lang isa.
Pamensara kon ano ayhan ka makaluluya para kay Abinadi ang magsinggit sang paghinulsol sa katawhan nga daw wala sang bisan ano nga interes nga magbag-o sang ila malaut nga pagginawi. Sulit-sulit nga ginsikway ang iya mensahe. Pero wala nag-ampo si Abinadi.
Sang san-o ka nakabatyag nga daw ikaw lang isa ang nagatindog sa pagpangapin sang kamatuoran? Sa imo pagbasa sang Mosias 11–13 kag 17, ano ang imo natun-an nga makabulig sa imo nga mangin handa kon kinahanglan ka sang Ginuo nga manindugan para sa Iya ebanghelyo? Ano pa nga mga prinsipyo ang imo matun-an sa ehemplo ni Abinadi?
Kinahanglan ko nga ibutang sa akon tagipusuon ang pag-intiendi sang pulong sang Dios.
Pamilyar ang mga pari ni Haring Noe sa pulong sang Dios—masambit nila ang mga dinalan sa balaan nga mga kasulatan kag nagasiling nga ginatudlo nila ang mga kasuguan. Pero ang ina nga mga kasuguan “wala masulat sa [ila] tagipusuon,” kag wala nila “gindapat sa [ila] mga tagipusuon ang paghangop” sang mga ini (Mosias 13:11; 12:27). Ang resulta, wala gihapon nagbag-o ang ila mga kabuhi.
Samtang imo ginabasa ang Mosias 12:19–30, pamensara kon ano ang kahulugan sang pagdapat sa imo tagipusuon sang paghangop sang pulong sang Dios. Ginainspirar ka bala sini nga maghimo sang mga pagbag-o sa imo pamaagi sa pagtuon sang ebanghelyo?
Ang Ginuo magasakdag sang Iya mga alagad sa Iya buluhaton.
Sa isa ka bahin, ang eksperiyensya ni Abinadi nagahatag sang madamo nga mga ehemplo kon paano ginasuportahan sang Ginuo ang Iya mga alagad—makita mo ang pila ka amo sini nga mga halimbawa sa Mosias 13:1–9. Sa pihak nga bahin, gintugtan man sang Ginuo nga hingabuton, prisuhon, kag patyon si Abinadi para sa iya panaksihon. Ano ang imo makita sa sining mga bersikulo nga nagapakita nga nagasalig si Abinadi sa Ginuo? Paano nakaapekto ang ehemplo ni Abinadi sa imo panglantaw sa imo mga calling kag mga responsibilidad?
Nag-antos si Jesucristo para sa akon.
Si Haring Noe kag ang iya mga pari nagapati nga ang kaluwasan nag-abot paagi sa layi ni Moises. Gusto ni Abinadi nga mahibal-an nila nga ang kaluwasan nagaabot paagi sa Mesias, nga si Jesucristo. Sa Mosias 14–15, talupangda ang mga tinaga kag mga dinalan nga nagalaragway sa Manluluwas kag kon ano ang Iya gin-antos para sa imo. Ano nga mga bersikulo ang nagabulig pasangkad sang imo pagpalangga kag kapasalamatan sa Iya?
Paano si Jesucristo nangin pareho nga Amay kag Anak?
Ining mga dinalan kon kaisa makalilibog tungod nga daw nagatudlo si Abinadi nga ang Amay nga Langitnon kag si Jesucristo isa ka Persona, pero nakahibalo kita nga separado sila nga mga Persona. Ano ang buot silingon ni Abinadi? Ginpanudlo niya nga ang Dios nga Anak—si Jehova—amo ang mangin Manunubos (tan-awa sa Mosias 15:1), nga nagapuyo sa unod, nga nangin kabahin tawo kag kabahin Dios (mga bersikulo 2–3). Nagpaidalom Sia sing lubos sa pagbuot sang Dios nga Amay (mga bersikulo 5–9). Bangud sini, si Jesucristo nangin pareho nga Anak sang Dios kag ang perpekto nga dutan-on nga representasyon sang Dios nga Amay (tan-awa sa Juan 14:6–10).
Nagpadayon si Abinadi sa pagpaathag nga si Jesucristo amo man ang Amay sa punto nga sang ginbaton naton ang Iya pagtubos, kita nangin “iya mga kaliwat” (Mosias 15:11–12). Buot silingon, natawo kita liwat sa espirituhanon paagi sa Iya (tan-awa sa Mosias 5:7).
Tan-awa man sa Juan 5:25–27; 8:28–29; 17:20–23.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Mosias 11–13; 17
Sanday Abinadi kag Alma makainspirar nga mga ehemplo sang pagpabilin nga tampad sa kamatuoran bisan pa nga indi popular ang paghimo sini. Mahimo nga nagapangatubang ang mga miyembro sang imo pamilya sang sosyal nga impluwensya nga panubuon ang ila mga talaksan. Ano ang ila matun-an kay Abinadi kag Alma parte sa pagpanindugan sa kamatuoran? Ang larawan nga kaupod sining outline mahimo nga makabulig sa imo pamilya nga makita sa ila pamensaron ang istorya. Pagkatapos nga tun-an ining mga kapitulo, pamensara nga idrama-drama ang matuod-tuod nga mga hitabo para nga makapraktis ang mga miyembro sang imo pamilya sa pag-atubang sang impluwensya nga panubuon ang ila mga talaksan. Ukon pwede man kamo mag-istoryahanay sang inyo mga eksperiyensya sa kada isa parte sa pagtindog para sa kamatuoran.
Mosias 12:33–37; 13:11–24
Ano ang buot silingon sang mga kasuguan sang Dios “nga nasulat sa [aton] mga tagipusuon”? (Mosias 13:11). Pwede man ninyo isulat ang pila ka mga ideya (ukon magdrowing sang mga litrato sang inyo mga ideya) sa dako nga korte-tagipusuon nga papel. Ngaa malahalon para sa aton ang mga kasuguan? Paano naton ini masulat sa aton mga tagipusuon?
Ang pagtuon sang balaan nga mga kasulatan makabulig sa aton nga isulat ang mga kasuguan sa aton mga tagipusuon.
Mosias 14
Sa sining kapitulo makakita ka sang pila ka mga tinaga kag mga dinalan nga nagalaragway kay Jesucristo. Pwede ini isulat sang imo pamilya samtang ginapangita ninyo ang mga ini. Ano ang nabatyagan sang mga miyembro sang pamilya parte sa Manluluwas samtang ginatun-an naton ining mga tinaga kag mga dinalan?
Mosias 15:26–27; 16:1–13
Ining mga bersikulo nagalaragway sang kon ano ang matabo sa mga anak sang Dios kon si Jesus “wala makakari sa kalibutan” (Mosias 16:6) ukon kon wala nila Sia ginasunod. Ano ang maayo nga nagkalatabo tungod nagkari Sia kag nagbayad-sala para sa aton?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, magsunod sa Akon—Para sa Primary.
Pagpauswag sang Aton Pagpanudlo
Maggamit sang mga istorya kag mga halimbawa sa pagtudlo sang mga prinsipyo sang ebangheyo. Ang Manluluwas masami nga nagtudlo sang mga prinsiyo sang ebanghelyo paagi sa paggamit sang mga istorya kag mga paanggid. Magpamensar sang mga halimbawa kag mga istorya halin sa imo kaugalingon nga kabuhi nga makapatubo sang interes sang imo pamilya sa isa ka prinsipyo sang ebangheyo (tan-awa sa Teaching in the Savior’s Way, 22).
Ang Iya Nawong Nagsilak sa Sobra nga Kaidlak, ni Jeremy Winborg