Si Alma nga Lamharon nga Nagawali, ni Gary L. Kapp

Mayo 25–31

Mosias 29–Alma 4

“Mga Malig-on Sila kag Indi Malingkang”

Ang pagbasa sang balaan nga mga kasulatan nagaimbitar sang rebelasyon. Mangin bukas sa mga mensahe nga gusto ihatag sa imo sang Ginuo.

Isulat Ang Imo Mga Panghunahuna

Mahimo nga ginakabig sang iban ang panugyan ni Haring Mosias nga islan ang mga hari sang pinili nga mga hukom bilang isa ka maalam nga reporma sa politika lamang. Pero sa mga Nefinhon, labi na gid sa mga nangabuhi sa idalom sang malaut nga Haring Noe, ining pagbag-o may espirituhanon man nga importansya. Nakita nila kon paano ang isa ka malaut nga hari nagtuga sang “kalautan” kag “dako nga kalaglagan” sa iya katawhan (Mosias 29:17), kag “tuman nga naghangad” nga mangin hilway sa amo sini nga impluwensya. Ining pagbag-o nagatugot sa ila nga mangin responsable para sa ila kaugalingon nga pagkamatarong kag “magsabat para sa [ila] kaugalingon nga mga sala” (Mosias 29:38; tan-awa man sa Doktrina kag mga Kasugtanan 101:78).

Siyempre, ang katapusan sang pagdumala sang mga hari wala nagakahulugan sang katapusan sang mga problema sang Nefinhon nga sosyedad. Ang tuso nga mga tawo pareho nanday Nehor kag Amlici nagpalapta sang butig nga mga ideya, ang mga wala nagatuo nagpanghingabot sang mga Santos, kag madamo nga mga miyembro sang Simbahan ang nangin bugalon kag nadula sa simbahan. Pero ang “mapainubuson nga mga sumulunod sang Dios” nagpabilin nga “malig-on kag indi malingkang” wala sapayan sa nagakatabo sa ila palibot (Alma 1:25). Kag tungod sang pagbag-o nga ginpasar ni Mosias, mahimo na sila nga “magpahayag sang ila mga tingug” agud impluwensyahan ang ila sosyedad para sa kaayuhan (Alma 2:6).

Mga Ideya para sa Personal nga Pagtuon sang Balaan nga Mga Kasulatan

Mosias 29:11–27; Alma 2:1–7

Sarang ako mangin positibo nga impluwensya sa akon komunidad.

Lima pa lang ka tuig sugod sang pagdumala sang mga hukom, nagtuhaw ang isa ka krisis nga magahangkat sang deklarasyon ni Mosias nga ang tingug sang katawhan masami magapili sang kon ano ang husto (tan-awa sa Mosias 29:26). Ang isyu nagasakop sang kahilwayan sa relihiyon: isa ka tawo nga ginhingadlan Amlici ang nagtinguha sa “pagkuha sa [mga tawo] sang ila kinamatarong kag mga pribelihiyo sang simbahan” (Alma 2:4). Nakatalupangod ka bala nga ang mga kinamatarong sa relihiyon ginahangkat sa imo pungsod ukon komunidad? Ano ang imo matun-an sa pamaagi nga gin-atubang sang mga Nefinhon ang ining katalagman? (tan-awa sa Alma 2:1–7).

Laban-laban may madamo nga importante nga mga isyu nga ginaatubang ang imo komunidad. Paano mo, pareho sa mga Nefinhon, masiguro nga ang imo tingug nalakip sa “tingug sang katawhan”? Ayhan nagaestar ka sa lugar nga ang tingug sang katawhan may limitado nga impluwensya sa gobyerno; kon amo, ano ang iban pa nga paagi nga ikaw mangin isa ka positibo nga impluwensya sa imo komunidad?

Alma 1

Mahimo ko makilala kag sikwayon ang butig nga doktrina.

Bisan pa nga sang ulihi nag-ako si Nehor nga butig ang iya ginpanudlo, ang iya mga pinanudlo nagpadayon sa pag-impluwensya sa mga Nefinhon sa madamo nga tinuig (tan-awa sa Alma 1:15–16; 2:1–2; 14:14–18; 15:15; 21:4; 24:28). Ngaa ayhan nga nakita sang mga tawo nga makaengganyo ang mga pinanudlo ni Nehor? Samtang imo ginabasa ang Alma 1:2–4, tan-awa kon makilala mo ang mga kabutigan sa pinanudlo ni Nehor; siguro matalupangdan mo nga ginatudlo ini upod sa medyo may kamatuoran.

Nakigsumpong si Gideon kay Nehor “paagi sa mga pulong sang Dios” (Alma 1:7, 9). May madumduman ka bala nga balaan nga mga kasulatan nga nagakontra sa mga kabutigan ni Nehor? Ari ang pila ka mga halimbawa, pero may madamo nga iban pa: Mateo 7:21–23; 2 Nefi 26:29–31; Mosias 18:24–26; kag Helaman 12:25–26. Paano ining balaan nga mga kasulatan makabulig sa imo nga kontrahon ang mga kabutigan nga ginapanudlo sa karon nga panahon?

Isa pa ka paagi sa pagtuon sang Alma 1 amo ang pagkumparar kay Nehor kag sang iya mga sumulunod (mga bersikulo 3–9, 16–20) sa “katawhan sang Dios” (mga bersikulo 25–30; tan-awa man sa 2 Nefi 26:29–31). Paano ka mangin mas pareho sa katawhan sang Dios? May natalupangdan ka bala nga bisan ano nga “priestcraft” sa imo kaugalingon nga pagserbisyo?

Alma 1:27–31; 4:6–15

Ang matuod nga mga disipulo ni Jesucristo wala nagahamtang sang ila mga tagipusuon sa mga manggad.

Ang mga kapitulo 1 kag 4 sang Alma pareho nga nagalaragway sang mga panahon sang ang Simbahan nag-uswag, pero ang reaksyon sang mga miyembro sang Simbahan sa sinang kabuganaan lainlain sa kada kaso. Ano nga mga kinalain ang imo natalupangdan? Base sa imo nakita, paano mo ilaragway ang pamatasan sang “mapainubuson nga mga sumulunod sang Dios” (Alma 4:15) sa manggad kag kabuganaan? Ano ang nabatyagan mo nga kinahanglan bag-uhon sa imo kaugalingon nga pamatasan?

Alma 4

Ang “pulong sang Dios” kag “pat-od nga panaksihon” sarang magbag-o sang mga tagipusuon.

Ano ang naghimo kay Alma nga “tuman kamasinulub-on” (Alma 4:15) sa Alma 4? Masiling ang iban nga ang posisyon sang punong hukom magabutang kay Alma sa pinakamaayo nga pwesto para solbaron ang mga problema nga iya nakita sa tunga sang iya katawhan. Pero nabatyagan ni Alma nga may mas maayo pa nga paagi. Ano ang nanamian mo sa iya pamaagi sa pagbulig sa iya katawhan? Ang imo pagtuon mahimo nga mag-inspirar sang mga panghunahuna kon paano mo impluwensyahan sing matarong ang ara sa imo palibot; kon amo, aktuhi inang mga pamensaron.

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Alma 1:19–25

Mahimo nga makabenepisyo ang imo pamilya sa pagkilala sang lainlain nga mga paagi nga ginsabat sang mga miyembro sang Simbahan ang pagpanghingabot sa sining mga bersikulo. Basi pwede man kamo magpraktis sang mga paagi nga magsabat sing nagakabagay kon ginaatake sang iban ang aton mga ginapatihan. Mahimo nga makabulig ang Religious Freedom Videos.

Alma 3:4

Ano ang mensahe nga gusto ipalab-ot sang mga Amlicianhon sang ila “ginmarkahan ang ila mga kaugalingon”? (tan-awa sa Alma 3:4, 13). Ano nga mga mensahe ang mahimo naton ginapalab-ot—sing hungod ukon indi hungod—sa aton hitsura? Mahimo nga maayo ini nga tion para rebyuhon ang “Dress and Appearance” sa For the Strength of Youth (2011), 6–8.

Alma 4:2–3

Ano nga mga butang ukon eksperiyensya ang “nagpukaw sa [aton] sa isa ka panumduman sang [aton] tulumanon” sa Dios? (Alma 4:3). Basi mangin epektibo nga istoryahan ining mga bersikulo pagkatapos nga pukawon ang imo pamilya sa aga. Dayon pwede ninyo hambalan kon paano ang mga kabudlayan sang pagbugtaw nagabulig sa aton nga maintiendihan ang mga kabudlayan sang pagbugtaw sa espirituhanon.

Alma 4:10–11

Paano naton malikawan ang mangin “kasandaran sa sadtong mga indi katapo sang simbahan”? (Alma 4:10). Mahimo nga makabulig man nga hambalan kon paano naton siguruhon nga ang mga aksyon sang iban, partikular sang pareho nga mga miyembro sang Simbahan, indi mangin kasandaran sa aton espirituhanon nga progreso.

Alma 4:19

Para buligan ang imo pamilya nga maintiendihan ang gahum sang panaksihon, pwede mo sila papamensaron sang tion nga natandog gid sila sang mabatian ang panaksihon sang isa ka tawo. Ngaa ayhan nga ginpili ni Alma nga gamiton ang panaksihon kag ang pulong sang Dios para tandugon ang tagipusuon sang mga tawo? (tan-awa man sa Alma 31:5). Ngaa mas epektibo ini sangsa iban pa nga pamaagi nga pwede gamiton sang mga tawo para engganyuhon ang iban nga magbag-o? May mga tawo bala nga mahimo naton pabakuron ang pagtuo paagi sa pagpaambit sa ila sang aton mga panaksihon?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Ipaanggid ang balaan nga mga kasulatan sa imo kaugalingon. Pamensara kon paano ang mga istorya kag pinanudlo sa balaan nga mga kasulatan magamit sa imo kabuhi. Halimbawa, mahimo nga makakita ka sang pagpalareho sa kalibutan karon kag sa mga problema sa sosyedad nga gin-atubang sang mga Nefinhon sa Alma 1–4.

Si Alma kag si Amlici, ni Scott M. Snow