Wala Kamo Ginkalimtan, ni Jon McNaughton

Hunyo 1–7

Alma 5–7

“Naagyan Bala Ninyo Ining Dako nga Pagbag-o sa Inyo mga Tagipusuon?”

Ang Alma 5–7 makabulig sa imo sa pagbinagbinag sang imo nagapadayon nga pagkahaylo kay Jesucristo. Sa imo pagbasa, irekord kon ano nga ginatudlo sa imo sang Espiritu.

Isulat Ang Imo Mga Panghunahuna

Wala makahibalo si Alma parte sa nagapangluwas nga operasyon nga heart transplant sa karon nga panahon, nga nagailis sang depektibo ukon balatianon nga tagipusuon sang maayo nga tagipusuon. Pero nakahibalo sia parte sa mas milagroso nga “pagbag-o sang tagipusuon” (Alma 5:26)—kon sa diin ang Manluluwas nagahatag sa aton sang bag-o nga espirituhanon nga kabuhi, nga daw pareho sang “nabun-ag liwat” (tan-awa sa Alma 5:14, 49). Makita ni Alma nga ining pagbag-o sang tagipusuon amo ang kinahanglan mismo sang madamo nga mga Nefinhon. Ang iban manggaranon kag ang iban imol, ang iban bugalon kag ang iban mapainubuson, ang iban manugpanghingabot kag ang iban nagaantos sang pagpanghingabot (tan-awa sa Alma 4:6–15). Pero ang tanan sa ila kinahanglan nga magkari kay Jesucristo para mag-ayo—pareho man sa aton tanan. Kon kita nagatinguha nga malampuwasan ang bugal ukon nagabatas sang mga pag-antos, pareho lang ang mensahe ni Alma: “Magkari kag indi magkahadlok” (Alma 7:15). Tugoti ang Manluluwas nga bag-uhon ang nagtig-a, makasasala, ukon napilasan nga tagipusuon sa isa nga mapainubuson, matinlo, kag bag-o.

Mga Ideya para sa Personal nga Pagtuon sang Balaan nga Mga Kasulatan

Alma 5:14–33

Kinahanglan ko nga maeksperiyensyahan—kag padayon nga mabatyagan—ang dako nga pagbag-o sang tagipusuon.

Ang nagapangtakos nga mga pamangkot nga ginpamangkot ni Alma sa katawhan sang Zarahemla, nga makita sa Alma 5:14–33, makabulig sa imo nga binagbinagon ang imo kaugalingon nga kalag kag intiendihon ko ano ang kahulugan sang maeksperiyensyahan ang “dako nga pagbag-o sang tagipusuon” sa bilog mo nga kabuhi. Si Pangulong M. Russell Ballard nagpaathag sang bili sining mga pamangkot: “Kinahanglan ko nga maghatag sang regular nga tion para pamangkuton ang akon kaugalingon, ‘Kumusta na ako?’ Daw isa ini ka personal, pribado nga interbyu sa imo kaugalingon. … Bilang giya para sa akon sa sining pribado, personal nga rebyu, nanamian ako nga basahon kag pamensaron sang maayo ang nagapangtakos nga mga tinaga nga makita sa ikalima nga kapitulo sang Alma” (“Return and Receive,” Ensign ukon Liahona, Mayo 2017, 64).

Pamensara nga basahon ang mga pamangkot ni Alma nga daw ginainterbyu mo ang imo kaugalingon kag ginaeksamin ang imo tagipusuon. Mahimo nga gusto mo irekord ang imo nga sabat sa mga pamangkot. Ano ang ginapabatyag sa imo nga imo himuon bilang resulta sang imo interbyu?

Ang tagsa ka disipulo ni Cristo kinahanglan nga makaeksperiyensya sang “pagbag-o sing tagipusuon.”

Alma 5:33–62

Mahimo ko mabaton ang akon panaksihon parte sa Manluluwas kag sa Iya ebanghelyo paagi sa Balaan nga Espiritu.

Naghatag si Alma sang mabaskog nga panaksihon parte sa Manluluwas kag sa Iya ebanghelyo, kag iya man ginpaathag kon paano niya nabaton inang panaksihon. Samtang sia nagapamatuod, wala niya ginmitlang ang iya eksperiyensya sang makita kag mabatian ang isa ka anghel (tan-awa sa Mosias 27:10–17) kundi iya ginlaragway ang bili nga iya ginbayran para mahibal-an ang kamatuoran para sa iya kaugalingon. Ano ang aton matun-an sa Alma 5:44–51 kon paano ni Alma nahibal-an ang kamatuoran? Paano mo sundon ang iya ehemplo sa imo mga pagtinguha nga makabaton ukon pabakuron ang imo panaksihon? Ano ang imo matun-an parte sa Manluluwas sa mga pinanudlo ni Alma sa Alma 5:33–35, 48–50, and 57–60?

Alma 7

Ang matutom nga pagtuman magabulig sa akon nga magpabilin sa “banas nga nagapadulong sa ginharian sang Dios.”

Ang katawhan ni Gideon wala nagapangatubang sang pareho nga mga palaligban sa katawhan sang Zarahemla, gani ginbuligan sang Espiritu si Alma nga mabatyagan ang ila mga panginahanglan kag gintudloan sila sa lainlain nga paagi (tan-awa sa Alma 7:17, 26). Mahimo nga imo matalupangdan ang pila ka mga kinalain sa mga mensahe ni Alma sa Zarahemla (tan-awa sa Alma 5) kag sa Gideon (tan-awa sa Alma 7). Halimbawa, nasat-uman ni Alma nga ang katawhan ni Gideon yara “sa banas nga nagapadulong sa ginharian sang Dios” (Alma 7:19). Sa bilog niya nga pagwali sa ila, gintudloan sila ni Alma sang madamo nga mga butang kon paano magpadayon sa sinang banas (tan-awa sa Alma 7). Ano nga laygay ang iya ginhatag sa ila? Ano ang magamit mo sa imo kabuhi karon?

Alma 7:7–16

Gindala sang Manluluwas sa Iya Kaugalingon ang akon mga sala, mga kasakit, kag mga kahuyang.

Nakabatyag ka na bala nga wala sang may nakaintiendi sa imo mga kabudlayan kag mga problema? Kon amo, ang mga kamatuoran nga gintudlo sa Alma 7:7–16 makabulig. Si Elder David A. Bednar nagpamatuod: “Ang Anak sang Dios lubos nga nakahibalo kag nakaintiendi, kay nabatyagan Niya kag ginpas-an ang aton indibidwal nga mga palas-anon. Kag bangud sang Iya wala dulunan kag wala katapusan nga sakripisyo (tan-awa sa Alma 34:14), may perpekto Sia nga pag-intiendi kag sarang mag-untay sang Iya kamo sang kaluoy” (“Bear Up Their Burdens with Ease,” Ensign ukon Liahona, Mayo 2014, 90).

Samtang imo ginabasa ang Alma 7:7–16, hunahunaa kon ano ang ginabulig paintiendi sining mga bersikulo parte sa mga katuyuan sang sakripisyo sang Manluluwas. Paano naton mabaton ang Iya gahum sa aton mga kabuhi? Pamensara nga isulat ang imo mga panghunahuna.

Tan-awa man sa Isaias 53:3–5.

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Alma 5:6–13

Ngaa gusto ni Alma nga dumdumon sang iya katawhan ang kaluoy sang Ginuo sa ila mga katigulangan? Ano nga mga istorya sa kasaysayan sang imo pamilya ang nagatudlo sa imo parte sa Iya kaluoy? Mahimo mo bisitahon ang familysearch.org/myfamily para irekord ining mga istorya.

Alma 5:14–33

Mahimo nga nahibal-an sang mga miyembro sang imo pamilya kon ano ang pamatyag sang mangin handa—ukon indi handa—para sa kamping, test sa eskwelahan, ukon interbyu sa trabaho. Ano nga bag-o nga mga eksperiyensya ang pwede nila iistorya para ilarawan ang importansya sang mangin preparado? Pwede mo imbitaron ang mga miyembro sang imo pamilya nga rebyuhon ang Alma 5:14–33 kag pangitaon ang mga pamangkot nga ginpamangkot ni Alma para ihanda ang iya katawhan sa pag-atubang sa Dios. Basi pwede man magpili ang tagsa ka miyembro sang pamilya sang pamangkot kag isugid kon paano ini makabulig sa aton nga maghanda sa pag-atubang sa Dios. Pwede man i-display sang imo pamilya ang pila sa mga pamangkot ni Alma sa sulod sang inyo balay para binagbinagon sang mga miyembro sang pamilya.

Alma 6:4–6

Ano ang pila sa mga rason nga nagatipon kita bilang mga Santos? Paano naton himuon ang aton oras sa simbahan nga mas makabulig sa aton kaugalingon kag sa iban?

Alma 7:9–16

Ano ang aton matun-an sa sining mga bersikulo nga nagabulig sa aton nga “indi magkahadlok” (Alma 7:15) kon kinahanglan naton maghinulsol kag magbag-o? Ano ang ginatudlo sa aton sining mga bersikulo parte sa pagliso sa Manluluwas kon kinahanglan naton sang bulig? Ano ang iban pa nga butang nga aton ginhimo para mabaton ang Iya bulig? Paano Niya kita ginbuligan?

Alma 7:23

Si sin-o sa kilala naton ang maayo nga ehemplo sang isa ukon mas madamo pa nga mga kalidad nga nalista sa sining bersikulo? Ngaa importante nga patubuon ining mga kalidad?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magpamangkot sang mga pamangkot nga nagaimbitar sang mga miyembro sang pamilya nga mag-akto. Pamensara ang mga pamangkot nga nagatulod sa mga miyembro sang imo pamilya nga binagbinagon kon paano nila ipangabuhi ang ebanghelyo sing mas lubos. “Masami indi ini mga pamangkot sa diskusyon; para ini sa personal nga pagbinagbinag” (Teaching in the Savior’s Way, 31).

Ang Aton Mananabang, ni Jay Bryant Ward