“Hunyo 22–28. Alma 17–22: ‘Himuon Ko Kamo nga Isa ka Instrumento,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Hunyo 22–28. Alma 17–22,” Dali, Magsunod sa Akon—Para sa Mga Indibidwal kag Mga Pamilya: 2020
Si Amon kag si Haring Lamoni, ni Scott M. Snow
Hunyo 22–28
Alma 17–22
“Himuon Ko Kamo nga Isa ka Instrumento”
Samtang imo ginabasa ang Alma 17–22, isulat ang mga panghunahuna nga nagaabot sa imo kag aktuhi ang mga ini. Ang paghimo sini magapakita sa Ginuo sang imo kahanda sa pagbaton sang dugang nga personal nga rebelasyon.
Isulat Ang Imo Mga Panghunahuna
Panumduma ang tanan nga mga rason nga ginahatag sang mga tawo para indi mag-istorya parte sa ebanghelyo: “Diutay lang ang akon nahibal-an” ukon “Indi ako sigurado kon mangin interesado sila” ukon basi “Paano kon masaklaw ko sila?” Siguro ikaw mismo nakapamensar sang pareho sini nga mga butang kon kaisa. May dugang pa nga rason ang mga Nefinhon sa indi pagwali sang ebanghelyo sa mga Lamanhon: mga “maila kag isa ka nagtig-a kag isa ka mabangis nga katawhan; isa ka katawhan nga nagakalipay sa pagpamatay sang mga Nefinhon” (Alma 17:14; tan-awa man sa Alma 26:23–25). Pero ang mga anak ni Mosias mas may mabaskog nga rason kon ngaa nabatyagan nila nga kinahanglan ipaambit ang ebanghelyo sa mga Lamanhon: “Nagahandum sila nga ang kaluwasan igapahayag sa tagsa ka tinuga, kay indi nila mabatas nga ang bisan sin-o nga tawhanon nga kalag mawala” (Mosias 28:3). Ang ining pagpagpalangga nga nag-inspirar kay Amon kag sa iya kauturan sarang man mag-inspirar sa imo sa pagpaambit sang ebanghelyo sa imo pamilya, kaabyanan, kag mga kakilala—bisan pa sa ila nga daw indi ang tipo nga magbaton sini.
Mga Ideya para sa Personal nga Pagtuon sang Balaan nga Mga Kasulatan
Mientras nga ginapabakod ko ang akon kaugalingon nga pagtuo, mahimo nga mapaambit ko ang ebanghelyo sing mas epektibo.
Nakaagi ka na bala nga nagkilit-anay kamo sang dugay mo na nga mga abyan kag nabatyagan ang nabatyagan ni Alma—nasobrahan sa kalipay nga nagpabilin sila nga mabakod sa pagtuo? (tan-awa sa Alma 17:1–2). Ano ang imo matun-an sa mga anak ni Mosias parte sa pagpadayon sang imo pagtuo sa ebanghelyo kag pangako nga tipigan ini nga mabakod? Samtang imo ginabinagbinag ang espirituhanon nga kusog sang mga anak ni Mosias, ano ang nabatyagan mo nga dapat himuon?
Paano nakaapekto ang espirituhanon nga preparasyon sang mga anak ni Mosias sa ila buluhaton upod sa mga Lamanhon? Ayhan magamit mo ining oportunidad sa pagrebyu sang imo mga pagpaninguha sa pagtudlo sang ebanghelyo “upod ang gahum kag pagbulut-an sang Dios” (Alma 17:3).
Sarang ako mangin instrumento sa mga kamot sang Dios sa pagdala sang kaluwasan sa Iya mga anak.
Si Pangulong Thomas S. Monson nagsiling, “Gusto ko gid nga mahibal-an sang Ginuo nga kon may kinahanglan Sia nga ipatapos, si Tom Monson ang magahimo sinang buluhaton para sa Iya” (“On the Lord’s Errand: The Life of Thomas S. Monson,” video, ChurchofJesusChrist.org). Samtang imo ginabasa ang Alma 17:6–12, pangitaa kon ano ang ginhimo sang mga anak ni Mosias para mangin mga instrumento sila sa mga kamot sang Dios. Paano ka mangin instrumento sa mga kamot sang Dios sa pagbugay sa iban? Ano ang imo matun-an sa ila mga halimbawa nga nagahatag sa imo sang kaisog nga himuon ang kinahanglan ipahimo sa imo sang Ginuo?
Pwede ko buligan ang iban nga maghanda sa pagbaton sang ebanghelyo.
Si Lamoni amo ang lider sang “maila kag nagtig-a kag mabangis nga katawhan” (Alma 17:14), pero nalampuwasan niya ang tinuig nga tradisyon kag ginbaton ang ebanghelyo ni Jesucristo. Samtang imo ginabasa ang sabtanay ni Amon kag ni Lamoni, tandai kon ano ang ginhimo ni Amon nga mahimo nakabulig kay Lamoni nga magpamati pa gid sa iya mensahe. Kon may mga panghunahuna nga nagaabot sa imo sa kon ano ang imo himuon para ipaambit ang ebanghelyo sa iban, isulat ining mga pagpabatyag.
Basi makabulig man nga markahan ukon isulat ang mga kamatuoran nga gintudlo ni Amon kay Lamoni (tan-awa sa Alma 18:24–39) kag ang mga kamatuoran nga gintudlo ni Aaron sa tatay ni Lamoni (tan-awa sa Alma 22:1–16). Ano ang ginapanugyan sining mga bersikulo sa imo parte sa mga kamatuoran nga pwede mo ipaambit sa iban para buligan sila nga mag-angkon sang panaksihon sang ebanghelyo?
Minerva K. Teichert (1888–1976), Ginsalbar ni Amon ang mga Panong sang Hari, 1935–1945, oil sa masonite, 35 x 48 pulgada. Brigham Young University Museum of Art.
Ang akon panaksihon mahimo nga malapad ang impluwensya.
Bisan pa nga ang mga istorya sang pagkahaylo nga aton mabasahan sa balaan nga mga kasulatan masami may upod nga makahalawhaw nga mga hitabo, sa tunga sini masami makita naton ang mga indibidwal nga may kaisog sa paghambal kag pagpaambit sang ila panaksihon sa iban. Isa sa paagi nga tun-an nga mga hitabo sa Alma 18–22 amo ang pangitaon ang malapad nga epekto sang isa ka tawo nga nagapahayag sang iya panaksihon. Basi pwede mo irekord ang imo makita sa isa ka diagram nga pareho sini:
|
Ginpaambit ni Amon ang ebanghelyo kay , nga nagpaambit sang ebanghelyo kay , kag ang nangin resulta amo nga . |
Ang kamot sang Ginuo nagauntay sa akon kon nagahinulsol ako.
Sa konklusyon sang istorya sang pagbag-o ni Lamoni, nagtudlo si Mormon sang importante nga butang parte sa karakter sang Ginuo. Ano ang ginapanugyan sang Alma 19:36 sa imo parte sa karakter sang Ginuo? Sang san-o mo nabatyagan nga nagauntay ang kamot sang Ginuo sa imo? Paano mo buligan ang imo mga pinalangga nga mabatyagan ang Iya kaluoy?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Alma 17–19
Paano mo himuon nga makawiwili ang mga istorya sa sining mga kapitulo para sa imo pamilya? Pwede ninyo drama-dramahon ang istorya ni Amon nga ginapangapinan ang mga carnero ukon ang istorya ni Abis nga nagatipon sang kadam-an para masaksihan ang gahum sang Dios. Ayhan pwede drowingon sang mga miyembro sang pamilya ang lainlain nga mga bahin sang istorya kag gamiton ang mga litrato sa pagsugid sang istorya. Ano ang himuon sang imo pamilya para sundon ang mga ehemplo ni Amon kag Abis?
Alma 18:24–39
Basi pwede basahon sang mga miyembro sang imo pamilya ang Alma 18:24–39 sing ululupod kag pangitaon ang mga kamatuoran nga gintudlo ni Amon kay Lamoni. Ngaa sa banta mo nga gintudlo anay ni Amon kay Lamoni ining mga kamatuoran? Ngaa importante para sa aton nga makaangkon sang panaksihon sa sining mga kamatuoran?
Alma 20:8–15
Ano ang aton matun-an sa sabat ni Lamoni sa iya amay? Paano naton sundon ang halimbawa ni Lamoni sa pagtindog sa kon anong husto?
Alma 22:15–18
Rebyuha ang Alma 20:23 para tan-awon kon ano ang handa buy-an sang amay ni Lamoni para luwason ang iya kabuhi. Pagkatapos rebyuha ang Alma 22:15 para makita kon ano ang handa niya buy-an para mabaton ang kalipay sang ebanghelyo. Ano ang handa niya buy-an para makilala ang Dios? (tan-awa sa bersikulo 18). Ayhan pwede isulat sang mga miyembro sang pamilya ang plano sa pagbuhi sang isa ka butang para mas makilala ang Dios sing lubos.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Pangitaa kag ipangabuhi ang mga prinsipyo. Bisan pa daw indi magamit sa imo ang mga detalye sa mga istorya sa balaan nga mga kasulatan, masami magamit mo ang mga prinsipyo sa sining mga istorya. Sa imo pagbasa sang parte kay Amon kag Aaron, ano nga mga prinsipyo parte sa pagpaambit sang ebanghelyo ang imo makita?
Ang asawa ni Haring Lamoni nagbangon sa duta, nga nagadayaw kay Jesus. O, Balaan nga Jesus, ni Walter Rane