“Hunyo 29–July 5. Alma 23–29: Sila ‘Wala Gid Bisan Kaisa Magtalikod,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Hunyo 29–July 5. Alma 23–29,” Dali, Magsunod sa Akon—Para sa Mga Indibidwal kag Mga Pamilya: 2020
Ginalubong sang mga Anti-Nefi-Lehi ang Ila mga Armas sa Giyera, ni Jody Livingston
Hunyo 29–Hulyo 5
Alma 23–29
Sila “Wala Gid Bisan Kaisa Magtalikod”
Samtang imo ginatun-an ang Alma 23–29, ano nga mga mensahe ang imo nakita para sa imo kaugalingon kag sa imo pamilya? Ano ang pwede mo ipaambit sa imo mga klase sa Simbahan?
Isulat Ang Imo Mga Panghunahuna
Kon kaisa nagapamangkot ka bala kon pwede gid bala magbag-o ang tawo? Basi nagakabalaka ka kon masarangan mo nga malampuwasan ang pigaw nga mga pagpili nga imo nahimo ukon malain nga mga pamatasan nga imo ginpatubo, ukon may pareho ka man nga mga pagkabalaka sa imo mga pinalangga. Kon amo, ang istorya sang mga Anti-Nefi-Lehi makabulig sa imo. Ini nga mga tawo amo ang mortal nga kontra sang mga Nefinhon. Sang nagdesisyon si Amon kag ang iya kauturan nga magwali sang ebanghelyo sa ila, ang mga Nefinhon “nag-utoy-utoy kadlaw para yagutaon [sila].” Daw mas makatarungan pa nga solusyon ang pamatyon ang mga Lamanhon sangsa hayluhon sila. (Tan-awa sa Alma 26:23–25.)
Pero nagbag-o matuod ang mga Lamanhon—paagi sa nagapanghaylo nga gahum sang Ginuo. Ang sadto nakilala nga “ginpatig-a kag mabangis nga katawhan” (Alma 17:14), “ginkilala sa ila kasidla tuhoy sa Dios” (Alma 27:27). Ang matuod, sila “wala gid bisan kaisa magtalikod” (Alma 23:6).
Siguro may butig ka nga mga tradisyon nga kinahanglan talikdan ukon mga “hinganiban sang … rebelyon” nga kinahanglan buy-an (Alma 23:7). Ukon basi kinahanglan mo lang sang diutay pa nga debosyon sa imo panaksihon ukon diutay pa nga pagpaiway sang pagtalikod sa kamatuoran. Kon ano man nga pagbag-o ang imo kinahanglan, ang Alma 23–29 makahatag sa imo sang paglaum nga, paagi sa nagabayad-sala nga gahum ni Jesucristo, posible ang dalayon nga pagbag-o.
Mga Ideya para sa Personal nga Pagtuon sang Balaan nga Mga Kasulatan
Kon batunon sang mga anak sang Dios ang ebanghelyo, dako nga mga bugay ang nagaabot.
Sang nagdeklarar ang hari sang mga Lamanhon nga ang pulong sang Dios “mangin wala sing upang” sa tunga sang iya katawhan (tan-awa sa Alma 23:1–5), ginbuksan niya ang pwertahan para sa dalagko nga mga bugay para sa ila. Samtang imo ginabasa ang Alma 23–29, pangitaa ining mga bugay. Paano mo siguruhon nga ang pulong sang Dios “wala sing upang” sa imo kabuhi ukon sa imo pamilya?
Ang akon pagkahaylo kay Jesucristo kag sa Iya ebanghelyo nagabag-o sang akon kabuhi.
Ang mga Lamanhon nga ginbisitahan ni Amon kag sang iya kauturan daw indi kinaandan nga mga kandidato sang pagbag-o—nasiod sila sang mga tradisyon sang ila kalolohan kag sang ila kaugalingon nga mga kalautan. Pero madamo sa ila ang nagbaton sang ebanghelyo ni Jesucristo kag naghimo sang tig-una nga mga pagbag-o sa ila mga kabuhi. Bilang simbolo sang ila kaugalingon nga pagbag-o, gintawag sining mga Lamanhon ang ila kaugalingon nga mga Anti-Nefi-Lehi. (Ang buot silingon sang “anti” sa sining hugada indi pareho sa “anti” sang “anti-Cristo.”)
Ang pagbinagbinag sang pagbag-o sining mga Lamanhon mahimo nga magatulod sa imo nga pamensaron sing maayo ang imo kaugalingon nga pagkahaylo “sa Ginuo” (Alma 23:6). Isa ka paagi agud tun-an ining mga kapitulo amo ang pangitaon kon paano ang pagkahaylo sang mga Anti-Nefi-Lehi nagbag-o sang ila mga kabuhi. Ang masunod nga mga bersikulo makabulig sa imo nga magsugod.
Samtang imo ginabinagbinag ang mga pagbag-o sa mga Anti-Nefi-Lehi, pamensara kon paano ka ginabag-o sang imo kaugalingon nga pagkahaylo kay Cristo. Ano sa pamatyag mo ang kinahanglan mo pa bag-uhon para ang ebanghelyo mangin mas may dako nga gahum sa imo kabuhi?
Ang Dios maluluy-on.
Bisan pa nga ang mga sala nga nalampuwasan ni Amon kag sang mga Anti-Nefi-Lehi lain sangsa bisan ano sa imo kabuhi, tanan kita nagasalig sa kaluoy sang Dios. Ano ang imo makita sa Alma 24:7–19 kag 26:17–22 nga nagabulig sa imo nga maintiendihan ang Iya kaluoy? Sa imo pagbasa, pwede mo hunahunaon ining mga butang: ang mga paagi nga gin-agda ka sa paghinulsol, ang imo nga eksperiyensya sa paghinulsol, kon paano mo gintinguhaan nga maglikaw sa pagpakasala liwat, kag ang mga bugay nga nag-abot sa imo paagi sa paghinulsol. Kon basahon mo ang mga bersikulo sa sining paagi, ano ang imo matun-an parte sa kaluoy sang Dios sa imo kabuhi?
Ang pagserbisyo sa Ginuo nagadala sang kalipay.
Wala sapayan sa lainlain nila nga mga eksperiyensya, nagpahayag si Amon kag Alma sang palareho nga balatyagon parte sa ila pang-misyonaryo nga mga pagpangabudlay. Pamensara nga basahon ang Alma 26 kag 29 kag ikumparar ang mga ini. Ano nga mga pagpalareho ang imo natalupangdan? Ano nga mga tinaga kag mga dinalan ang ginsulit? Ano ang imo matun-an kay Amon kag Alma kon paano makakita sang matuod nga kalipay wala sapayan sang imo mga kabudlayan? (Agud rebyuhon ang mga kabudlayan nga ginpangatubang ni Alma, tan-awa sa tig-ulo sang mga kapitulo sa Alma 5–16. Agud rebyuhon ang mga kabudlayan ni Amon kag sang iya kauturan, tan-awa sa tig-ulo sang mga kapitulo sa Alma 17–28.)
Ano ang mga tugday kag mga tambubo?
Sa tiyempo sang ani, ang humay masami ginatipon sa binugkos nga ginatawag tugday kag ginabutang sa mga kamalig, nga kon kaisa ginatawag nga tambubo. Si Elder David A. Bednar nag-istorya sang posible nga interpretasyon sang simbolismo sa Alma 26:5: “Ang mga tugday sa sining paanggid nagarepresentar sang bag-o ginbunyagan nga mga miyembro sang Simbahan. Ang mga tambubo amo ang balaan nga mga templo” (“Honorably Hold a Name and Standing,” Ensign ukon Liahona, Mayo 2009, 97). Pamensara kon ano ang ginatudlo sa imo sang paanggid sa Alma 26:5–7 parte sa importansya sang mga kasugtanan sa templo.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Alma 24:6–19
Ngaa ginpanglubong sang mga Anti-Nefi-Lehi ang ila mga armas “sing madalom sa duta”? (Alma 24:16). Mahimo nga masadyahan ang mga miyembro sang pamilya sa pagsulat sa ginunting nga mga papel sang mga butang nga gusto nila malampuwasan ukon bayaan. Dayon pwede sila magkutkot sang buho kag ilubong ang mga papel.
Alma 24:7–12
Ang pagtuon sining mga bersikulo makabulig sa imo pamilya nga maintiendihan ang matahum nga regalo sang paghinulsol. Ano ang ginhimo sang mga Anti-Nefi-Lehi agud hinulsulan ang ila mga sala? Paano sila ginbuligan sang Ginuo nga maghinulsol? Ano ang aton matun-an sa sining halimbawa?
Alma 24:20–27
Ano ang aton nakita nga nagapamatuod sang kamatuoran sang deklarasyon ni Mormon: “Gani makita naton nga ang Ginuo nagahikot sa madamo nga mga paagi tuhoy sa kaluwasan sang iya katawhan”? (Alma 24:27).
Alma 26:2
Paano sabton sang imo pamilya ang mga pamangkot ni Amon sa Alma 26:2? Mahimo ninyo ilista ang ila mga sabat sa dako nga panid sang papel kag isab-it ini sa lugar nga madali makita sang tanan. Paisoga ang mga miyembro sang pamilya nga dugangan ini kon may madumduman sila nga iban pa nga mga bugay nga “ginhatag sa aton” sang Dios.
Alma 29:9
Paano si Amon kag Alma nangin mga instrumento sa mga kamot sang Dios? Pamensara nga tan-awon ang mga gamit ukon instrumento sa inyo balay kag hambalan kon paano ang kada isa nakabulig sa inyo pamilya. Paano ini nagabulig sa aton nga maintiendihan kon paano kita pwede nga mangin “isa ka instrumento sa mga kamot sang Dios”?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Lainlaina ang pamaagi sa pagtudlo. Ang paggamit sang lainlain nga pamaagi sa pagtuon sang balaan nga mga kasulatan sa pamilya makabulig sa mga miyembro sang pamilya nga magpadayon nga interesado kag nagapartisipar. Halimbawa, pagkatapos basahon sang isa ka miyembro sang pamilya ang isa ka dinalan, pwede niya ini ipasulit sa iban nga mga miyembro sang pamilya gamit ang ila kaugalingon nga tinaga.
Larawan sang mga Anti-Nefi-Lehi nga nagalubong sang ila mga armas, ni Dan Burr