“Hulyo 13–19. Alma 32–35: ‘Itanom Ining Pulong sa Inyo mga Tagipusuon,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Hulyo 13–19. Alma 32–35,” Dali, Magsunod sa Akon—Para sa Mga Indibidwal kag Mga Pamilya: 2020
Hulyo 13–19
Alma 32–35
“Itanom Ining Pulong sa Inyo mga Tagipusuon”
Isulat ang espirituhanon nga mga panghunahuna nga imo mabaton samtang imo ginatun-an ang Alma 32–35. Ano ang ginapabatyag sa imo nga imo himuon bangud sang imo natun-an?
Isulat Ang Imo Mga Panghunahuna
Para sa mga Zoramnon, ang pangamuyo nasentro sa kaugalingon, ordinaryo nga hilimuon nga nagakatabo kaisa lang kada semana. Ginahimo ini paagi sa pagtindog sa kon diin makita sila sang tanan kag sa pagsulit-sulit sang wala pulos kag hinambog nga mga pulong. Siguro ang mas malain, ang mga Zoramnon nagkulang sa pagtuo kay Jesucristo—nagapanghiwala pa gani sa Iya—kag nagapanghingabot sang mga imol (tan-awa sa Alma 31:9–25). Sa kabaliskaran, si Alma kag Amulek maisog nga nagtudlo nga ang pangamuyo mas may koneksyon sa nagakatabo sa aton mga tagipusuon sangsa aton ginapakita sa publiko. Kon wala ini nagadala sang kaluoy sa mga nagakinahanglan, ini “wala sing kapuslanan, kag wala kamo sing … makuha” (Alma 34:28). Pinakaimportante, isa ini ka ekspresyon sang pagtuo kay Jesucristo, nga nagatanyag sang pagtubos paagi sa Iya “wala’y dulonan kag wala’y katapusan nga halad” (Alma 34:10). Ang ini nga pagtuo, paathag ni Alma, bunga sang pagpaubos kag “handum nga magpati” (Alma 32:27). Amat-amat ini nga nagatubo, pareho sang kahoy, kag nagakinahanglan sang sige-sige nga pagsagod. Samtang imo ginabasa ang Alma 32–35, pwede mo hunahunaon ang imo kaugalingon nga pagtuo kag mga pangamuyo; nakabatyag ka bala nga daw nagasulod ang mga pamatasan nga daw pareho sang iya ka mga Zoramnon? Paano mo saguron ang imo pagtuo kay Jesucristo para nga mahimo ini nga “kahoy nga nagatubo padulong sa kabuhi nga dayon”? (Alma 32:41).
Mga Ideya para sa Personal nga Pagtuon sang Balaan nga Mga Kasulatan
Pwede ko pilion nga mangin mapainubuson.
Nabatyagan ni Alma nga ang imol nga mga Zoramnon mapainubuson kag “yara sa isa ka pagpanghanda sa pagpamati sang pulong” (Alma 32:6). Samtang imo ginabasa ang Alma 32:1–16, pamensara kon paano ka nagahanda sa pagpamati sa pulong sang Dios.
Ano nga mga eksperiyensya ang nagpaubos sa imo? Ano ang imo ginhimo para mangin mas mapainubuson? Makatudlo ining mga bersikulo sa imo kon paano pilion ang pagkamapainubuson sangsa mapilitan nga magpaubos. Halimbawa, ano ang kinalain sang “imol sa bahin sa mga butang sang kalibutan” kag sang “kubos sa tagipusuon”? (bersikulo 3). Ano ang kahulugan sang “nagapaubos [sang imo kaugalingon] tungod sang pulong”? (bersikulo 14).
Ginapakita ko ang pagtuo kay Jesucristo paagi sa pagtanom kag pagsagod sang Iya pulong sa akon tagipusuon.
Ngaa sa banta mo nga naghambal si Alma parte sa pagtanom sang liso bilang sabat sa pamangkot sang mga Zoramnon parte sa pagsimba? Ano ang liso nga ginasiling ni Alma? (tan-awa sa Alma 32:28; 33:22–23). Samtang imo ginabasa ang Alma 32:17–43, tandai ang mga tinaga kag mga dinalan nga nagabulig sa imo nga maintiendihan kon paano magpakita sang pagtuo kay Jesucristo kag sa Iya pulong. Ano ang imo matun-an parte sa kon ano ang pagtuo kag sa kon ano ang indi? Tapos, samtang imo ginabasa ang mga kapitulo 33–34, pangitaa ang mga sabat sa mga pamangkot sang mga Zoramnon nga “Paano [namon dapat] itanom ang binhi?” (Alma 33:1).
May isa pa ka paagi para tun-an ang Alma 32–34: Magdrowing sang mga litrato nga nagarepresentar sang lainlain nga bahin sang pagdako sang liso. Dayon sulati ang tagsa ka litrato sang mga tinaga sa Alma 32:28–43 nga nagabulig sa imo nga maintiendihan kon paano magtanom kag magsagod sang pulong sa imo tagipusuon.
Tan-awa man sa Mateo 13:3–8, 18–23; Mga Hebreo 11.
Pwede ko simbahon ang Dios sa pangamuyo, bisan ano nga oras kag sa bisan diin.
Ang laygay ni Alma kag Amulek parte sa pagsimba kag pangamuyo gintuyo para tadlungon ang mga indi pag-intiendihanay sa mga Zoramnon (tan-awa sa Alma 31:13–23). Pero ang mga kamatuoran nga ginatudlo sini makabulig sa bisan sin-o sa aton nga mas maintiendihan ang pangamuyo kag pagsimba. Mahimo mo man ilista ang mga kamatuoran parte sa pangamuyo nga makita mo sa Alma 33:2–11 kag 34:17–29. Sa tupad sinang listahan, isulat ang posible nga sala nga mga pagpati parte sa pangamuyo nga ginatadlong sining mga kamatuoran (tan-awa sa Alma 31:12–23). Paano maapektuhan sang imo mga natun-an sa sining mga bersikulo ang imo pagpangamuyo kag pagsimba?
Sin-o sanday Zenos kag Zenoc?
Si Zenos kag Zenoc mga propeta nga nagpamatuod kay Jesucristo sang tiyempo sang Daan nga Katipan, pero ang ila mga pinanudlo indi makita sa Daan nga Katipan. May ara ang mga Nefinhon sang mga pinanudlo sining mga propeta, siguro tungod nga nalakip ini sa mga lamina nga saway nga nakuha ni Nefi kay Laban. Ginmitlang man ini sila sa 1 Nefi 19:10–12; Jacob 5:1; kag Helaman 8:19–20.
“Ini nga kabuhi amo ang tion … agud maghanda sa pag-atubang sa Dios.”
Sa imo pagbasa sang Alma 34:30–41, hunahunaa kon paano mo “kaayuhon ang [imo] tion samtang sa sini nga kabuhi” (bersikulo 33). Paano makabulig sa imo nga maghanda sa pag-atubang sa Dios ang paghinulsol kag pasensya? May mga pagbag-o ka bala nga kinahanglan himuon nga imo ginapadugay-dugayan? Siguraduha nga aktuhan ang bisan ano nga espirituhanon nga pagpabatyag nga imo mabaton.
Tan-awa man sa Alma 12:24.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Alma 32:9–11; 33:2–11; 34:38–39
Daw ano ayhan kon ginatugtan kita nga magsimba kag magpangamuyo kon Domingo lang? Samtang inyo ginabasa ining mga bersikulo sing ululupod, pwede hambalan sang mga miyembro sang pamilya kon paano sila makasimba adlaw-adlaw kag kon ngaa nagapasalamat sila nga mahimo nila ini.
Alma 32:28–43
May litrato sang kahoy upod sa sining outline; pwede mo ini gamiton para ilaragway ang mga pulong ni Alma sa sining mga bersikulo. Ukon pwede ang imo pamilya maggwa sa pagpangita sang mga tanom sa lainlain nga bahin sang pagtubo kag magbasa sang mga bersikulo sa Alma 32 nga nagakumparar sang nagatubo nga tanom sa aton pagtuo. Pwede magtanom sang liso ang tagsa ka miyembro sang pamilya kag hambalan kon ano ang kinahanglan naton himuon para magtubo ini. Sa magaabot nga sinemana pwede mo tan-awon ang inyo mga liso kag padumdumon ang kada isa nga kinahanglan padayon naton nga saguron ang aton mga panaksihon.
Alma 33:2–11; 34:17–29
Anong ginapanugyan sining mga bersikulo parte sa kon paano naton pauswagon ang aton indibidwal kag pang-pamilya nga pangamuyo?
Alma 34:31
Ano nga mga eksperiyensya ang nagapakita sa aton nga kon maghinulsol kita, maeksperiyensyahan naton “dayon” ang mga bugay sang plano sang pagtubos?
Alma 34:33–35
Nakahibalo bala ang imo pamilya sang buot silingon sang pagpadugay-dugay? Mahimo nga may isa nga magpaambit sang mga halimbawa sang pagpadugay-dugay kag ang negatibo sini nga mga konsikwensya. Ano ang kahulugan sang “ginpabuyan-buyanan ang adlaw sang [aton] paghinulsol”?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Magdrowing sang mga litrato. Pwede mo padrowingon ang mga miyembro sang pamilya samtang nagatuon sila gikan sa balaan nga mga kasulatan. Halimbawa, basi masadyahan sila nga magdrowing sang liso nga nagatubo nga mangin isa ka kahoy samtang ila ginatun-an ang Alma 32.
“Kag tungod sang inyo kaukod kag sang inyo pagtuo kag sang inyo pagpaumod sa pulong sa pagsagod sini, … yari karon, dugay-dugay magapamuksi kamo sang bunga sini, nga labing malahalon” (Alma 32:42).