Larawan sang tawo nga nagapangamuyo ni Joshua Dennis

Hulyo 20–26

Alma 36–38

“Magtulok Ka sa Dios kag Mabuhi”

“Kon inyo mabatyagan ang kalipay nga nagaabot halin sa pag-intiendi sang ebanghelyo, gustuhon ninyo nga ipangabuhi ang inyo natun-an” (Preach My Gospel [2004], 19). Isulat ang imo mga panghunahuna kag impresyon sa kon paano ipangabuhi ang mga kamatuoran nga imo ginatun-an.

Isulat Ang Imo Mga Panghunahuna

Sang makita ni Alma ang kalainan sa iya palibot, nakabatyag sia sang mabug-at nga “kasubo,” “pag-antos,” kag “pagkagha sang kalag” (Alma 8:14). “Ang pagkamalaut sa tunga sining katawhan,” ginsiling niya parte sa mga Zoramnon, “nagasakit sang akon kalag” (Alma 31:30). Nakabatyag sia sang daw pareho sini pagbalik niya sa iya misyon sa mga Zoramnon—naobserbahan niya nga “ang mga tagipusuon sang katawhan nagsugod sa pagtig-a, kag nga nagsugod sila nga masaklaw tungod sang kaistrikto sang pulong,” kag nahimo ang iya tagipusuon nga “tuman kamasinulub-on” (Alma 35:15). Ano ang ginhimo ni Alma parte sa iya nakita kag nabatyagan? Wala sia ginpangluyahan ukon nagduda sa estado sang kalibutan. Kundi, “nagsugo sia nga ang iya mga anak nga lalaki magtililipon sing tingob” kag gintudloan sila parte sa “mga butang nga mahiangot sa pagkamatarong” (Alma 35:16). Gintudloan niya sila nga “wala na sing iban pa nga paagi ukon mga pahito nga sa sini ang tawo mahimo nga maluwas, lamang sa kalalangan kag paagi kay Cristo. … Yari karon, sia ang kabuhi kag ang kapawa sang kalibutan” (Alma 38:9).

Mga Ideya para sa Personal nga Pagtuon sang Balaan nga Mga Kasulatan

Alma 36

Pwede ako mabun-ag sa Dios kon mapainubuson ako kag nagahinulsol.

Pila lang ang makaeksperiyensya sang pagbag-o nga pareho ka makahalangyag sang iya ni Alma. Pero may mga prinsipyo sa iya eksperiyensya nga matun-an naton kag mapangabuhi, tungod ang tanan kinahanglan nga “mabun-ag sa Dios” (Alma 36:23). Samtang imo ginabasa ang Alma 36, pangitaa ang mga prinsipyo nga imo magamit. Halimbawa, ano ang nabatyagan sang tawo nga nabun-ag sa Dios parte sa sala? parte kay Jesucristo? Pwede ka man magpangita sang mga pagbag-o nga pwede mo makita sa mga pagpati kag aksyon sang tawo nga nabun-ag sa Dios.

Tan-awa man sa Mosias 5:7; 27:25–26; Alma 5:14; 22:15; Helaman 3:35.

Alma 36

Si Jesucristo nagbayad sang mga sala sang kalibutan.

Mahimo nga natalupangdan mo nga nagasulitsulit ang panaysayon ni Alma sang iya pagkahaylo sa sining kapitulo. Ina tungod nga ang Alma 36 isa ka maayo nga halimbawa sang klase sang binalaybay sa Hebreo nga ginatawag chiasmus, kon sa diin ang mga tinaga ukon mga ideya ginapresentar sa isa ka pasunod, padulong sa mayor nga ideya, kag dayon ginasulit pabaliskad. Sa Alma 36, ang ideya sa bersikulo 3 ginsulit sa bersikulo 27, ang ideya sa bersikulo 5 ginasulit sa bersikulo 26, kag madamo pa. Ang mayor nga ideya amo ang pinakaimportante nga mensahe sa chiasmus. Tan-awa kon makita mo ang mayor nga ideya sa mga bersikulo 17–18. Pat-ini kon paano ang “pagtutok sang kaisipan sa sining hunahuna” nakaapekto kay Alma kag nagbag-o sang iya kabuhi. Paano ka naapektuhan sining kamatuoran? Ano pa nga ginsulit nga mga ideya ang imo makita sa sining dinalan?

Paano ining panaysayon sang paghinulsol kag kapatawaran nakainspirar sa imo nga sundon ang ehemplo ni Alma kag magliso sa Manluluwas?

Alma 37

Ang balaan nga mga kasulatan gin-amligan “para sa isa ka maalamon nga katuyuan.”

Nahunahuna mo bala kon daw ano nga milagro kag bugay ang makaangkon sang balaan nga mga kasulatan sa karon? “Gintugyan sa [aton] sang Dios ining mga butang, nga sagrado” (Alma 37:14). Sa imo pagbasa sang Alma 37, pangitaa ang mga bugay nga nagaabot tungod sa balaan nga mga kasulatan. Paano mo naeksperiyensyahan ining mga bugay? Paano naton gamiton ang balaan nga mga kasulatan para “mapakita ang gahum sang [Dios] sa palaabuton ng mga henerasyon”? (Alma 37:18).

Sa Alma 37:38–47, ginkumparar ni Alma “ang pulong ni Cristo” sa Liahona. Samtang imo ginabinagbinag ining pagkumparar, pamensara ang mga paagi nga imo naeksperiyensyahan ang milagro kag gahum sang mga pinanudlo ni Cristo “adlaw-adlaw” (Alma 37:40).

Ang balaan nga mga kasulatan nagatudlo sa aton kon paano sundon ang Dios.

Alma 37:6–7

”Paagi sa diutay kag yano nga mga butang ginapahanabo ang dalagko nga mga butang.”

Kon kaisa pamatyag naton ang aton mga problema tam-an kadako kag kakomplikado nga ang mga solusyon kinahanglan man nga dalagko kag komplikado. Pero sa liwat-liwat, ang Ginuo nagapili nga gamiton ang “diutay kag yano nga mga butang” (Alma 37:6) para matuman ang Iya buluhaton kag bugayan ang mga kabuhi sang Iya mga anak. Samtang imo ginabasa ang Alma 37:6–7, binagbinaga kag isulat ang mga paagi nga nakita mo ining prinsipyo nga nagahikot sa imo kabuhi. Ano ang diutay kag simple nga mga butang nga ginagamit sang Ginuo para bugayan ka kag tumanon ang Iya buluhaton?

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Alma 36:5–26

Bisan pa nga indi kinaandan ang eksperiyensya ni Alma, ang iya pagkahaylo nagapakita sang pila ka mga prinsipyo nga pwede sa aton tanan. Imbitaha ang tagsa ka miyembro sang pamilya nga magpili sang isa ka dinalan sa Alma 36:5–26 nga nagatudlo parte sa pagka“bun-ag sa Dios.” Ano ang aton matun-an sa sining mga bersikulo? Basi pwede iistorya sang mga miyembro sang pamilya kon paano nila ginpangabuhi ang mga prinsipyo nga ginlaragway ni Alma.

Alma 36:18–21, 24

Paano naton magamit ining mga bersikulo para buligan ang isa ka tawo nga makita nga ang paghinulsol isa ka masadya nga eksperiyensya, kag indi kahaladlukan nga butang? Paano kita ginainspirar sang paghinulsol nga magpaambit sang ebanghelyo sa iban?

Alma 37:6–7, 38–46

Ano ang pila sa “diutay kag yano nga mga butang” (Alma 37:6) nga nagadala sang dalagko nga mga butang sa aton mga kabuhi? Sa ano nga pamaagi ang pulong ni Cristo daw pareho sa Liahona? Paano naton buligan ang kada isa nga magtuon sang balaan nga mga kasulatan sing mas matutom?

Alma 37:35

Ngaa maalamon ang magtuon para sundon ang mga kasuguan samtang ara “sa [aton] pagkalamharon”?

Alma 38:12

Nakahibalo bala ang imo pamilya kon ano ang busal (bridle)? Basi pwede mo ipakita sa ila ang isa ka litrato kag hambalan kon paano ini ginagamit para kontrolon ang isa ka sapat. Ano ang kahulugan sang “busalan ang mga silabo sang [aton] balatyagon”? Paano kita mabuligan sang pagbusal sang silabo sang aton mga balatyagon nga “mapuno sang gugma”?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Isulat ang imo mga impresyon. Kon imo ginarekord ang espirituhanon nga mga impresyon, ginapakita mo sa Ginuo nga ginahatagan mo bili ang Iya giya, kag bugayan ka Niya sang mas masunson nga rebelasyon. Samtang nagatuon ka, isulat ang imo mga panghunahuna. (Tan-awa sa Teaching in the Savior’s Way, 12, 30.)

Anghel Nagapakita kay Alma kag sa mga Anak nga Lalaki ni Mosias, ni Clark Kelley Price