“Hulyo 6–12. Alma 30–31: ‘Ang Gahum sang Pulong sang Dios,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Hulyo 6–12. Alma 30–31,” Dali, Magsunod sa Akon—Para sa Mga Indibidwal kag Mga Pamilya: 2020
Ang Tanan mga mga Butang Nagapakita nga may Dios (Alma kag Korihor), ni Walter Rane
Hulyo 6–12
Alma 30–31
“Ang Gahum sang Pulong sang Dios”
Si Alma nagapamatuod sang “gamhanan nga epekto” sang pulong sang Dios (Alma 31:5). Samtang imo ginabasa ang Alma 30–31, isulat ang imo mga panghunahuna samtang imo nabatyagan ang gamhanan nga epekto sang pulong sang Dios sa imo.
Isulat Ang Imo Mga Panghunahuna
Ang mga istorya sa Alma 30–31 maathag nga nagapakita sang gahum sang mga tinaga—sa kalainan kag sa kaayuhan. Ang “nagapang-utis” kag “mabaskog nga mga pulong” sang butig nga manunudlo nga ginhingadlan nga Korihor nagapamahog sa pagdala sang “madamo nga mga kalag paidalom sa kalaglagan” (Alma 30:31, 47). Sa amo man, ang mga pinanudlo sang rebelde nga Nefinhon nga ginhingadlan nga Zoram nagdala sang bilog nga grupo sang mga tawo nga mahulog sa “dako nga kasaypanan” kag “ginpatalang ang mga dalanon sang Ginuo” (Alma 31:9, 11).
Sa kabaliskaran, may indi maidog nga pagtuo si Alma nga ang pulong sang Dios may “mas gamhanan nga epekto sa mga kaisipan sang katawhan sangsa espada, ukon bisan ano pa man” (Alma 31:5)—lakip na sa mga pulong ni Korihor kag Zoram. Ang mga pulong ni Alma nagpahayag sang wala katapusan nga kamatuoran kag nagsandig sa gahum sang langit para pahipuson si Korihor (tan-awa sa Alma 30:39–50), kag ila gin-agda ang bendisyon sang langit sa mga nag-upod sa iya nga dalhon ang mga Zoramnon pabalik sa kamatuoran (tan-awa sa Alma 31:31–38). Malahalon ini nga mga halimbawa para sa mga sumulunod ni Cristo sa karon nga panahon, sa diin ang “mabaskog nga mga pulong” kag “dako nga mga kasaypanan” sa liwat may gamhanan nga epekto sa mga kaisipan sang mga tawo (Alma 30:31; 31:9). Pero pwede naton makita ang kamatuoran paagi sa pagsalig, pareho sa ginhimo ni Alma, “sa gamhanan nga epekto sang pulong sang Dios” (Alma 31:5).
Mga Ideya para sa Personal nga Pagtuon sang Balaan nga Mga Kasulatan
Ano ang anti-Cristo?
Sa Alma 30, gintawag si Korihor nga “Anti-Cristo” (bersikulo 6). Ang anti-Cristo “amo ang nagapakuno-kuno nga si Cristo pero sa matuod nagakontra kay Cristo (1 Juan 2:18–22; 4:3–6; 2 Juan 1:7). Sa kabilugan, bisan sin-o ukon bisan ano ini nga nagapeke sang matuod nga ebanghelyo ukon plano sang kaluwasan kag hayag ukon sekreto nga nagakontra kay Cristo” (Bible Dictionary, “Antichrist”).
Ano nga mga “imitasyon [sang] matuod nga ebanghelyo” ang imo natalupangdan sa karon nga panahon? Halimbawa, si Sister Julie B. Beck, anay Relief Society General President, nagtudlo, “Ang bisan ano nga doktrina ukon prinsipyo nga [aton] mabatian halin sa kalibutan nga kontra-pamilya isa man ka anti-Cristo” (“Teaching the Doctrine of the Family,” Ensign, Mar. 2011, 15).
Gin-atubang ni Korihor si Alma, ni Robert T. Barrett
Ang Libro ni Mormon makabulig sa akon nga pakigbatuan ang impluwensya sang mga nagatinguha nga intuon ako.
Samtang imo ginabasa ang Alma 30:6–31, mahimo nga daw pamilyar ang mga pinanudlo ni Korihor. Ina tungod kay, pareho sa gintudlo ni Pangulong Ezra Taft Benson, ang Libro ni Mormon nagapahayag kag nagapabakod sa aton batok sa “malain nga mga disenyo, stratehiya, kag mga doktrina sang yawa sa aton panahon. Ang klase sang mga tawo nga nagtalikod sa kamatuoran sa Libro ni Mormon pareho man sang ara sa aton panahon karon. Ang Dios, sa iya wala dulonan nga kaalam, naggiya sa paghimo sang Libro ni Mormon para makita naton ang sayop kag makahibalo kita kon paano batuan ang butig nga mga konsepto sa edukasyon, pulitika, relihiyon kag pilosopiya sa aton panahon” (Teachings of Presidents of the Church: Ezra Taft Benson, [2014], 132).
Pamensara nga ilista ang butig nga mga doktrina nga gintudlo ni Korihor sa Alma 30:6–31. Ano ang pila sa mga konsikwensya sang pagpati sining mga pinanudlo? Halimbawa, ano ang resulta sang pagpati nga “kon patay na ang isa ka tawo, ina na [ang] katapusan sini”? (Alma 30:18). Ano nga mga butig nga doktrina nga ginpanudlo ni Korihor ang pareho sa butig nga mga doktrina nga imo natalupangdan sa kalibutan karon?
Ang pagbasa sang sabtanay sa tunga ni Korihor kag Alma makabulig sa imo nga magpreparar para sa mga sitwasyon nga mahimo tinguhaan sang iban para patalangon ka. Basi makabulig nga tun-an ang Alma 30:29–60 para maintiendihan kon paano si Korihor naintuan (tan-awa ilabi na sa mga bersikulo 52–53). Ano ang imo matun-an sa sabat ni Alma sa mga pinanudlo ni Korihor? (tan-awa sa Alma 30:31–35).
Ang pulong sang Dios may gahum nga dalhon ang mga tawo sa pagkamatarong.
Ang problema sang pagseparar sang mga Zoramnon sa mga Nefinhon para sa iban daw kinahanglan sang solusyon-pulitika ukon militar (tan-awa sa Alma 31:1–4). Pero natun-an ni Alma nga magsalig sa “gamhanan nga epekto sang pulong sang Dios” (Alma 31:5). Ano ang imo matun-an sa Alma 31:5 parte sa gahum sang pulong sang Dios? Paano mo nakita ang pulong sang Dios nga nagtuytoy sang “katawhan sa paghimo [sinang] matarong”? (Alma 31:5). Pamensara kon paano mo “tilawan” (gamiton ukon testingan) ang pulong sang Dios para buligan ang tawo nga imo ginapalangga.
Para maintiendihan pa gid ang pamaagi ni Alma sa pagsalbar sang iban, pwede mo ikumparar ang iya pamatasan, balatyagon, kag mga aksyon sa iya sang mga Zoramnon, nga ginalaragway sa Alma 31. Basi makabulig ang tsart pareho sa masunod. Ano ang mga kinalain nga imo natalupangdan? Paano ka ayhan mangin daw pareho kay Alma?
|
Zoramnon |
Alma |
|---|---|
Zoramnon Nagapati nga ang wala sa ila grupo ginsumpa nga mahulog sa impiyerno (Alma 31:17). | Alma Nagapati nga ang mga Zoramnon iya “kauturan” kag “malahalon” ang ila mga kalag (Alma 31:35). |
Zoramnon Ginahamtang ang ila mga tagipusuon sa manggad (Alma 31:24, 28). | Alma Nagahandum nga magdala sang mga kalag kay Jesucristo (Alma 31:34). |
Zoramnon | Alma |
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Alma 30:44
Pamensara nga basahon kag hambalan sing ululupod ang Alma 30:44 samtang nagalakat kamo sa gwa ukon nagatan-aw sang mga litrato sang mga ginhimo sang Dios. Pwede man iistorya sang mga miyembro sang pamilya kon ano ang ila nakita nga nagapamatuod sa Dios. Paano nagabulig sa aton ining mga butang—ukon ang iban pa naton nga mga eksperiyensya—nga matuod ang Dios?
Alma 30:56–60
Ano ang aton matun-an sa Alma 30:56–60 kon paano ginatrato sang yawa ang iya mga sumulunod? Ano ang pwede naton himuon para protektahan ang aton panimalay batok sa iya impluwensya?
Alma 31:20–38
Pagkatapos nga basahon ang Alma 31:20–38 upod sa imo pamilya, pwede ninyo hambalan ang masunod nga mga pamangkot: Ano ang kinalain sang pangamuyo ni Alma sa pangamuyo sang mga Zoramnon? Paano naton sundon ang ehemplo ni Alma sa aton personal kag pang-pamilya nga mga pangamuyo?
Pwede magbutang ang magagmay nga mga bata sang bato sa idalom sang ila ulunan para buligan sila nga makadumdom nga magpangamuyo kada aga kag gab-i. Basi malingaw man sila nga koloran ang ila bato.
Alma 31:23
Ano ang aton ginahimo kada adlaw sa aton balay para magtuon parte sa kag makighambal sa Dios?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Ihanda ang imo palibot. “Ang aton palibot may dako nga epekto sa aton ikasarang sa pagtuon kag pagbatyag sang kamatuoran” (Teaching in the Savior’s Way, 15). Magpangita sang lugar para magtuon sang balaan nga mga kasulatan nga magaimbitar sang impluwensya sang Balaan nga Espiritu. Nagaimbitar man sang Espiritu ang nagainspirar nga musika kag mga litrato.
Ang Rameumptom, ni Del Parson