“Hulyo 27–Agosto 2. Alma 39–42: ‘Ang Dako nga Plano sang Kalipayan,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Hulyo 27–Agosto 2. Alma 39–42,” Dali, Magsunod sa Akon—Para sa Mga Indibidwal kag Mga Pamilya: 2020
Babayi, Ngaa Nagahibi Ka? ni Mark R. Pugh
Hulyo 27–Agosto 2
Alma 39–42
“Ang Dako nga Plano sang Kalipayan”
Sa imo pagtuon sang Alma 39–42, ang Balaan nga Espiritu makahatag sa imo sang pag-intiendi sa mga butang nga nagakatabo sa imo kabuhi.
Isulat Ang Imo Mga Panghunahuna
Kon ang tawo nga palangga naton nakahimo sang seryoso nga sala, daw indi kita makahibalo kon ano ang himuon. Isa ka rason nga nangin malahalon ang Alma 39–42 amo nga ginapakita sini kon paano ni Alma—isa ka disipulo ni Cristo nga may iya man sadto mabug-at kaayo nga mga sala nga hinulsolan—gin-atubang ang amo nga sitwasyon. Ang anak ni Alma nga si Corianton nakahimo sang sekswal nga sala, kag si Alma, pareho sang masami niya ginahimo, nagsalig sa gahum sang matuod nga doktrina agud itulod ang paghinulsol (tan-awa sa Alma 4:19; 31:5). Sa sining mga kapitulo, maobserbahan naton ang kaisog ni Alma sa pagkondenar sang sala kag ang iya kalulo kag pagpalangga kay Corianton. Kag sang ulihi, mabatyagan naton ang kompiyansa ni Alma nga ang Manluluwas “magakari sa pagkuha [sang mga sala kag] sa pagpahayag sang malipayon nga balita sang kaluwasan” sa mga maghinulsol (Alma 39:15). Ang kamatuoran nga si Corianton sang ulihi nagbalik sa buluhaton sang pag-alagad (tan-awa sa Alma 49:30) makahatag sa aton sang paglaum sa kapatawaran kag pagtubos kon kita “[gi]natublag” (Alma 42:29) sang aton kaugalingon nga mga sala ukon sang mga sala sang aton ginapalangga.
Mga Ideya para sa Personal nga Pagtuon sang Balaan nga Mga Kasulatan
Ang sekswal nga sala isa ka kangil-aran sa panulok sang Ginuo.
Para ipaintiendi sa iya anak ang kaseryoso sang sekswal nga sala, gintudlo ni Alma nga “ining mga butang isa ka kangil-aran sa panulok sang Ginuo” (Alma 39:5). Ngaa importante sa imo ang kaputli? Ngaa importante ini sa Ginuo? Basi makabulig ang masunod nga paathag ni Elder Jeffrey R. Holland:
“Maathag nga isa sang Iya labi nga ginakabalak-an sa mortalidad amo ang kon paano ang isa ka tawo nagaabot sa duta kag kon paano sia nagagwa. Nagbutang Sia sang istrikto kaayo nga mga limitasyon sa sining mga butang.
“… Ang sekswal nga relasyon ginareserba sa ginkasal nga mag-asawa tungod simbolo ini sang kompleto nga pag-isa, isa ka kabug-osan kag pag-upod nga gin-ordin kag ginpahamtang sang Dios. … Ang pag-asawahay gintuyo nga mangin ang kompleto nga paghiusa sang isa ka lalaki kag isa ka babayi. … Ini isa ka pag-upod nga tama kakompleto nga ginagamit naton ang tinaga nga selyo para ipahayag ang wala katapusan sini nga promisa” (“Personal Purity,” Ensign, Nob. 1998, 76).
Pamensara ang laygay nga ginhatag ni Alma kay Corianton sa Alma 39:8–15. Paano ka ginabuligan sini nga maintiendihan pa gid ang importansya sang layi sang pagkaputli kag kon paano malampuwasan ang tentasyon? Ang mga pinanudlo ni Alma nagapakita man kon daw ano kaluyag sang Ginuo nga patawaron kita kag nga may paglaum para sa aton tanan. Samtang imo ginabasa ang Alma 39-42 sini nga semana, pangitaa ang mga ebidensya sang kaluoy sang Dios. Paano ka nabugayan sang kaluoy sang Dios?
Mabanhaw ako kag magatindog sa atubang sang Dios para hukman.
Sang natalupangdan ni Alma nga may mga pamangkot si Corianton parte sa Pagkabanhaw, gintudloan niya ini kon ano ang matabo pagkatapos nga kita mapatay. Ano nga mga kamatuoran ang gintudlo ni Alma sa mga kapitulo 40–41 nga kuntani nakabulig kay Corianton—kag sa bisan sin-o nga nakasala—nga makaintiendi? Pwede mo iplastar ang imo natun-an paagi sa pagkilala sang mga topiko nga ginahambal ni Alma (pareho sang kalibutan sang mga espiritu, pagkabanhaw, kag pagpanumbalik) kag dayon isulat ang ginatudlo ni Alma parte sa kada isa. Paano ka ginabuligan sang pagdumdom sining mga kamatuoran kon daw ginatentar ka ukon nagapangayo sang kapatawaran?
Mahimo ako nga magpangayo sang mga sabat sa akon mga pamangkot parte sa ebanghelyo nga may pagtuo.
Kon kaisa ginapensar naton nga nahibal-an sang mga propeta ang sabat sa tagsa ka pamangkot parte sa ebanghelyo. Pero tandai nga sa bilog nga kapitulo 40, pila ka mga pamangkot ang wala masabat ni Alma parte sa kabuhi pagkatapos sang kamatayon. Ano ang iya ginhimo para mangita sang mga sabat? Ano ang iya ginhimo sang wala sia sang isabat? Hunahunaa kon paano ang ehemplo ni Alma makabulig sa imo sa mga pamangkot parte sa ebanghelyo.
Ang pangamuyo isa ka paagi nga makakita kita sang mga sabat sa mga pamangkot parte sa ebanghelyo.
Ang Pagbayad-Sala ni Jesucristo nagapatigayon sang plano sang pagtubos.
Nagpati si Corianton nga ang silot sa sala indi patas (tan-awa sa Alma 42:1). Pero gintudlo ni Alma nga may paagi para makapalagyo sa “kahimtangan sang pag-antos” nga ginatuga sang sala: paghinulsol kag pagtuo sa Pagbayad-Sala ni Jesucristo, nga pareho nga maluluy-on kag patas (tan-awa sa Alma 42:15). Samtang imo ginabasa ang Alma 42, pangitaa kon paano ginapatigayon sang Pagbayad-Sala sang Manluluwas nga makabaton ka sang kaluoy nga wala “[gina]kawatan ang hustisya” (bersikulo 25). Ano nga mga kamatuoran ang imo makita sa sining kapitulo nga nagabulig sa imo nga mabatyagan ang Iya kaluoy?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Alma 39:1–9
Ano ang mabenepisyo sang imo pamilya sa paghambalanay parte sa layi sang kaputli? Binagbinaga kon paano mo mabuligan ang imo pamilya nga maintiendihan ang mga bugay sang kaputli kag sang sekswal nga relasyon sa pag-asawahay (halimbawa, tan-awa ang video “How to Talk to Your Kids about Intimacy” sa ChurchofJesusChrist.org).
Alma 39:9–15
Ano ang aton matun-an sa sining mga bersikulo kon paano likawan ang sala?
Alma 42:4
Pwede kamo maghampang gamit ang magagmay nga mga papel nga ginsulatan sang Cristohanon nga mga kinaiya ukon mga prinsipyo sang ebanghelyo nga ginlapta sa balay. Tan-awa kon pila ka panid sang papel ang matipon sang mga miyembro sang pamilya sa partikular nga kalawigon, tapos hambali kon paano makabulig sa aton ang mga butang nga nasulat sa mga papel nga mangin mas pareho sa Dios. Paano nangin pareho ang “tion nga gintugot” sa aton sa duta sa oras nga gintugot sa sining hampang? Paano naton gamiton ang aton “tion sang pagtilaw” sa kalibutan para mangin mas pareho sa Manluluwas?
Alma 42:12–15, 22–24
Pwede mo man ilarawan ang relasyon sang hustisya kag kaluoy paagi sa pagdrowing sang simple nga timbangan para hambalan ang mga pamangkot pareho sini: Anong matabo sa timbangan kon makasala kita? Ano ang ginapangayo sang hustisya para mangin balanse ang timbangan. Paano ginasabat sang Manluluwas ang ginapangayo sang hustisya kag himuon ang kaluoy nga posible?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Tutoki ang mga prinsipyo nga magabugay sa imo pamilya. Samtang mainampuon mo nga ginatun-an ang pulong sang Dios, pamangkuta ang imo kaugalingon, “Anong makita ko diri nga mangin makahulugan gid sa akon pamilya?” Pangayoa ang direksyon sang Espiritu samtang imo ginabinagbinag kon paano buligan ang imo pamilya nga madiskubre ining mga kamatuoran.
Ini Anak Ko, ni Elspeth Caitlin Young