Duha ka Libo ka Lamharon nga mga Hangaway, ni Arnold Friberg

Agosto 10–16

Alma 53–63

“Gin-amligan sang Iya Makahalangyag nga Gahum”

Ang mga istorya sa Alma 53–63 makabulig sa imo nga makita ang mga konsikwensya sang pagpangabuhi sang mga kamatuoran sang ebanghelyo ukon pagsikway sang mga ini. Samtang imo ginabasa ang Alma 53–63, irekord ang mga pagpabatyag kag pamensara ang mga paagi nga pwede mo ipangabuhi ang mga kamatuoran nga imo matun-an.

Isulat Ang Imo Mga Panghunahuna

Kon ikumparar sa Lamanhon nga mga soldado, wala sang ibato ang “diutay nga kasuldadohan” ni Helaman (Alma 56:33) nga 2,000 ka lamharon nga mga Nefinhon. Magluwas nga diutay lang sila, ang mga soldado ni Helaman “tanan … tuman pa kalamharon,” kag “wala pa gid sila makapakig-away” (Alma 56:46–47). Sa pila ka aspeto, ang ila sitwasyon daw pamilyar sa pila sa aton nga kon kaisa daw mapirde sa kadamuon kag ginapangluyahan sa aton pagpakig-away kay Satanas kag sa mga pwersa sang kalainan sa kalibutan sa ulihing mga adlaw.

Pero ang mga soldado ni Helaman may pila ka bentaha sa mga Lamanhon nga wala sing koneksyon sa kadamuon ukon sa ikasarang sa pag-away. Ginpili nila si Helaman, nga isa ka propeta, agud manguna sa ila (Alma 53:19); “gintudloan sila sang ila mga iloy, nga kon indi sila magduhaduha, pagaluwason sila sang Dios” (Alma 56:47); kag sila may “tuman nga pagtuo sa sinang gintudlo sa ila.” Bilang resulta, gin-amligan sila paagi sa “milagroso nga gahum sang Dios” (Alma 57:26). Bisan pa nga napilasan sila tanan sa giyera, “wala sing isa ka tawo sa ila nga namatay” (Alma 57:25). Gani kon ang kabuhi nagapilas sa kada isa sa aton sa espirituhanon, pwede kita magmaisog—ang mensahe sang mga soldado ni Helaman amo nga “may [isa] ka matarong nga Dios, kag kon sin-o man ang wala [naga]duhaduha, [paga]amligan sang iya makahalangyag nga gahum” (Alma 57:26).

Mga Ideya para sa Personal nga Pagtuon sang Balaan nga Mga Kasulatan

Alma 53:10–22; 56:43–48, 55–56; 57:20–27; 58:39–40

Samtang nagapakita ako sang pagtuo sa Dios, bugayan niya ako sang Iya makahalangyag nga gahum.

Mahimo nga mabudlay intiendihon ang milagroso nga mga istorya pareho sang kadalag-an sang lamharon nga mga soldado ni Helaman tungod daw indi ini posible. Pero isa ka rason nga ara sa balaan nga mga kasulatan ining mga istorya amo ang ipakita nga kon kita may pagtuo, magahikot ang Dios sang milagro sa aton mga kabuhi. Samtang imo ginabasa ang parte sa lamharon nga mga hangaway sa masunod nga mga bersikulo, magpangita sang mga tanda kon paano nila ginpakita ang ila pagtuo sa Dios, kon ano ang nagpabakod sang ila pagtuo, kag kon ano ang nagahimo sang mga milagro nga posible: Alma 53:10–22; 56:43–48, 55–56; 57:20–27; kag 58:39–40. Ang masunod nga tsart nagapanugyan sang isa ka paagi nga pwede mo irekord ang kon ano nga imo nakita.

Mga kinaiya sang mga kasuldadohan ni Helaman:
Ano ang gintudlo sa ila:
Ano ang ila ginhimo:
Mga bugay nga ila nabaton:

Pagkatapos nga tun-an ining mga bersikulo, ano ang nabatyagan mo nga dapat mo himuon para ipakita ang imo pagtuo?

Ginmitlang ni Helaman ang papel sang mga iloy sa pagpabakod sang pagtuo sang lamharon nga mga hangaway (tan-awa sa Alma 56:47–48; 57:20–27). Ano ang nangin papel sang mga miyembro sang pamilya kag sang iban sa pagtukod sang imo pagtuo? Ano ang pwede mo himuon para pabakuron ang pagtuo sang imo pamilya kag mga kaabyanan?

Wala Gid Sila Nagduda, ni Joseph Brickey

Alma 58:1–12, 31–37; 61

Pwede ko pilion nga maghunahuna sang pinakamaayo sa iban kag indi masaklaw.

Si Helaman kag Pahoran pareho nga may maayo nga mga rason para masaklaw. Wala si Helaman nakabaton sang hustohan nga suporta para sa iya mga soldado, kag si Pahoran gin-akusar ni Moroni nga nagdinalok sinang suporta (tan-awa sa Alma 58:4–9, 31–32; 60). Ano ang nanamian mo sa ila mga reaksyon sa Alma 58:1–12, 31–37 kag Alma 61? Paano mo masunod ang ila mga ehemplo sa pareho sini nga mga sitwasyon?

Si Elder David A. Bednar nagtudlo: “Sa isa ka paagi kag sa isa ka tion, may ara gid sa sining Simbahan nga magahimo ukon magahambal sang bagay nga makabig nga makasalaklaw. Sigurado gid nga matabo ang amo sina nga sitwasyon sa kada isa sa aton—kag sigurado gid nga masobra pa sangsa makaisa. … Ikaw kag ako indi makakontrol sang mga intensyon kag batasan sang iban nga tawo. Ugaling, kita ang nagadesisyon kon paano kita mag-akto. Palihog panumduma nga ikaw kag ako mga tinuga nga ginbugayan sang moral nga kahilwayan sa pagpili, kag pwede naton pilion nga indi masaklaw” (“And Nothing Shall Offend Them,” Ensign ukon Liahona, Nob. 2006, 91).

Tan-awa man sa Mga Hulubaton 16:32; Moroni 7:45.

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Alma 53:10–17

Ang mga Anti-Nefi-Lehi nagpangako nga indi na magpaagay sang dugo. Ano nga mga kasugtanan ang aton ginhimo upod sa Dios? Ano ang aton mabasahan sa Alma 53:10–17 nga nagainspirar sa aton nga mangin mas matutom sa aton mga kasugtanan?

Alma 53:20–21

Paano kita mangin mas pareho sa mga lamharon nga lalaki ni Helaman? Mahimo nga makabulig ang hambalan kon ano ang buot silingon sang iban nga mga dinalan sa sining mga bersikulo; halimbawa, ano ang kahulugan sang “kasupog … sa kusog kag kapagsik”? Ano ang buot silingon sang “paglakat sing tadlong sa atubang sang [Dios]”?

Alma 58:9–11, 33, 37

Sa tiyempo sang dako nga panginahanglan, nagadangop bala kita sa Amay nga Langitnon, pareho sang ginhimo sang Nefinhon nga mga soldado? Paano Niya ginsabat ang ila mga pangamuyo? Paano Niya ginsabat ang inyo mga pangamuyo?

Alma 61:2, 9, 19

Ano ang aton matun-an kay Pahoran parte sa aton dapat mangin reaksyon kon ginaakusar kita sang indi husto?

Alma 62:39–41

Ari ang isa ka leksyon gamit ang bagay nga pwede magbulig sa imo pamilya nga maintiendihan nga pwede naton pilion nga mangin “matig-a” ukon “mahumok” sa aton mga pagtilaw: Ibutang ang hilaw nga patatas kag hilaw nga itlog sa kaldero sang nagabukal nga tubig. Ang patatas kag itlog nagarepresentar sa aton, kag ang tubig nagarepresentar sang mga pagtilaw nga aton ginaatubang. Samtang ginapabukalan ang patatas kag itlog, pwede ninyo hambalan ang pila ka mga pagtilaw nga ginaatubang sang imo pamilya. Ano ang lain-lain nga paagi nga dapat himuon sa mga pagtilaw pareho sini? Suno sa Alma 62:41, paano kita maapektuhan sang aton mga reaksyon sa mga pagtilaw? Pagkatapos nga maluto ang patatas kag itlog, hiwaa ang patatas kag buk-a ang itlog agud ipakita nga ang pareho nga “pagtilaw” nagpahumok sa patatas kag nagpatig-a sa itlog. Ano ang pwede himuon sang aton pamilya para sigurohon nga ang aton mga pagtilaw magapaubos sa aton kag magpalapit pa gid sa aton sa Dios?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Tugoti ang mga kabataan nga magpahayag sang ila pagkamatugahon [creativity]. “Kon imo hagaron ang [imo] kabataan nga maghimo sang isa ka butang nga may koneksyon sa isa ka prinsipyo sang ebanghelyo, ginabuligan mo sila nga mas maintiendihan ang prinsipyo, kag ginahatagan mo sila sang pahanumdom sang ila natun-an. … Tugoti sila nga magpatindog, magdrowing, magkolor, magsulat, kag maghimo” (Teaching in the Savior’s Way, 25).

Matuod Ina, Sir, Ara ang Tanan kag Naisip Na, ni Clark Kelley Price