Agosto 17–23

Helaman 1–6

“Ang Bato sang Aton Manunubos”

Ang mga prinsipyo sa sining outline makabulig sa imo pagtuon sang Helaman 1–6, pero indi paglimitahi ang imo kaugalingon sa sini. Ang Balaan nga Espiritu magagiya sa imo sa mga kamatuoran nga kinahanglan mo matun-an.

Isulat Ang Imo Mga Panghunahuna

Ang libro ni Helaman nagarekord sang mga kadalag-an kag mga trahedya sa tunga sang mga Nefinhon kag mga Lamanhon. Nagasugod ini nga may “grabe nga kabudlayan sa tunga sang katawhan sang mga Nefinhon” (Helaman 1:1), kag nagasige abot ang mga kabudlayan sa bilog nga kasaysayan. Mabasahan naton diri ang parte sa intriga sa politika, mga grupo sang mga kawatan, pagsikway sa mga propeta, kag bugal kag kawala sing pagtuo sa bilog nga kadutaan. Pero makita man naton ang mga ehemplo pareho kay Nefi kag Lehi kag ang “mas mapainubuson nga bahin sang katawhan,” nga wala lang naglampuwas kundi nag-uswag sa espirituhanon (Helaman 3:34). Paano nila nahimo ini? Paano sila nagpabilin nga mabakod samtang ang ila sibilisasyon nagsugod sa pag-usmod kag pagkawasak? Sa pareho man nga paagi nga ang bisan sin-o sa aton nagapabilin nga mabakod sa “mabaskog nga dalimuos” nga ginapadala sang yawa sa “pagtupa sa [aton]”—paagi sa pagtukod sang aton mga kabuhi “sa bato sang aton Manunubos, nga amo si Cristo, ang Anak sang Dios, … isa ka [pundasyon] nga kon diin ang mga tawo magapasad indi sila [matumba]” (Helaman 5:12).

Mga Ideya para sa Personal nga Pagtuon sang Balaan nga Mga Kasulatan

Helaman 1–6

Ang bugal nagaseparar sa akon sa Espiritu kag kusog sang Ginuo.

Samtang imo ginabasa ang Helaman 1–6—kag ang bilog nga Libro ni Mormon—matalupangdan mo ang isa ka huwaran sa pamatasan sang mga Nefinhon: Kon ang mga Nefinhon matarong, ginabugayan sila sang Dios kag nagatin-ad sila. Pagligad sang tiyempo, nagabugalon kag nagamalaut sila, nga nagahimo sang mga pagpili nga nagapadulong sa pagkaguba kag pag-antos. Tapos nagapaubos sila kag nagakainspirar nga maghinulsol, kag bugayan naman sila liwat sang Dios. Ining huwaran nagasulit-sulit pirme nga ang pila ka mga tawo nagatawag sini nga “pagtiyog sang bugal.”

Ang “pagtiyog sang bugal.”

Pangitaa ang mga halimbawa sining pagtiyog samtang nagabasa ka. Basi gusto mo nga markahan ang mga halimbawa kon makita mo ang mga ini. Ari ang pila ka mga pamangkot para mabuligan ka nga maintiendihan ining pagtiyog kag kon paano ini mangin mapuslanon sa imo:

• Ano nga mga ebidensya sang bugal ang imo nakita sa mga Nefinhon? (tan-awa sa, halimbawa, Helaman 3:33–34; 4:11–13). Nakakita ka bala sang pareho nga mga halimbawa sang bugal sa imo kaugalingon?

• Ano ang mga konsikwensya sang bugal kag kalautan? (tan-awa sa Helaman 4:23–26). Ano ang mga konsikwensya sang pagpaubos kag paghinulsol? (tan-awa sa Helaman 3:27–30, 35; 4:14–16).

• Ano ang gusto ni Helaman nga tandaan sang iya mga anak? (tan-awa sa Helaman 5:4–12). Paano makabulig sa imo ang pagdumdom sining mga kamatuoran nga makalikaw nga mangin bugalon?

Tan-awa man sa Dieter F. Uchtdorf, “Pride and the Priesthood,” Ensign ukon Liahona, Nob. 2010, 55–58.

Helaman 3:24–35

Pwede ako mangin balaan samtang ginahatag ko ang akon pagbuot sa Dios.

Sa Helaman 3, ginlaragway ni Mormon ang tiyempo sang ang Simbahan nagtin-ad kag ginbugayan kaayo nga bisan ang mga lider nasorpresa (tan-awa sa mga bersikulo 24–32). Sang ulihi ang pila ka mga tawo nangin bugalon, samtang ang iban “nagbakod kag nagbakod sa ila pagkamapainubuson, … bisan tubtob sa pagpaninlo kag pagpakabalaan sang ila mga tagipusuon” (Helaman 3:35). Talupangda sa mga bersikulo 34–35 kon ano ang ginhimo sang mas mapainubuson nga mga tawo para mangin balaan. Paano nakabulig sa imo ining mga butang nga mangin mas balaan? Basi makabulig nga mahibal-an nga sa Giya sa Balaan nga mga Kasulatan (scriptures.ChurchofJesusChrist.org) ang kahulugan sang pagpakabalaan amo ang “proseso sang pagkahilway sa sala, puro, matinlo, kag balaan paagi sa Pagbayad-Sala ni Jesucristo.” Ano ang nabatyagan mo nga dapat mo himuon para sundon ang ehemplo sining mga disipulo? Ano ang imo ginahimo para ihatag ang imo pagbuot sa Dios?

Helaman 5:14–52

Ginapabakod ang akon pagtuo sang “kadako sang mga ebidensya nga [akon] nabaton.”

Si Elder Jeffrey R. Holland anay nagsiling sa mga ginabudlayan sa ila pagtuo: “Mas dako ang imo pagtuo sangsa ginapamensar mo tungod sa ginatawag sa Libro ni Mormon nga ‘kadako sang mga ebidensya’ [Helaman 5:50]. … Ang bunga sang pagkabuhi sang ebanghelyo makita sa mga kabuhi sang mga Santos sa Ulihing-mga-Adlaw” (“Lord, I Believe,” Ensign ukon Liahona, Mayo 2013, 94). Sa imo pagbasa sining mga bersikulo, pamensara ang mga ebidensya nga ginhatag sang Ginuo sa imo. Halimbawa, pwede nga wala mo literal nga mabatian ang tingug sang Ginuo, pero nakabatyag ka sang “hutik” sang Balaan nga Espiritu “nga naglapos bisan sa kalag mismo”? (Helaman 5:30; tan-awa man sa Doktrina kag mga Kasugtanan 88:66). Siguro naagyan mo nga ara ka sa kadulom, nagtawag sa Dios para sa mas dako nga pagtuo, kag “napuno sinang kalipay nga indi mahambal” (Helaman 5:40–47). Ano ang iban pa nga mga eksperiyensya nga nagpabakod sang imo pagtuo kay Cristo kag sa Iya ebanghelyo?

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Helaman 3:27–30

Sang ginpalip-ot ni propetang Mormon ang sagrado nga mga kasulatan, kon kaisa ginagamit niya ang dinalan nga “sa sini makita naton” para tutokan ang importante nga mga kamatuoran. Ano ang gusto niya nga makita naton sa Helaman 3:27–30? Sa bilog ninyo nga pagtuon sini nga semana, pwede ka mag-untat sing makadali para pamangkuton ang mga miyembro sang pamilya kon paano nila sugpunan ang dinalan nga “kag sa sini makita naton” halin sa ila ginbasa. Ano nga mga kamatuoran ang gusto nila tutokan?

Helaman 5:6–7

Ang napatay na nga lolo ni Pangulong George Albert Smith nga si George A. Smith nagpakita sa iya sa damgo kag nagpamangkot, “Gusto ko mahibal-an kon ano ang gin-obra mo sa akon ngalan.” Nagsabat si Pangulong Smith, “Wala ako sang may gin-obra sa imo ngalan nga dapat mo ikahuya” (sa Teachings of Presidents of the Church: George Albert Smith [2011], xxvi). Pagkatapos nga basahon ang Helaman 5:6–7, basi pwede mo istoryahon ang mga miyembro sang imo pamilya parte sa pagdumdom kag pagrespeto sang mga ngalan nga aton ginadala, lakip na ang ngalan sang Manluluwas.

Helaman 5:12

Para buligan ang imo pamilya nga mapanan-aw kon ano ang buot silingon sang mangin “isa ka pat-od nga [pundasyon],” pwede kamo ululupod nga maghimo sang gamay nga istraktura kag itungtong ini sa sari-sari nga mga pundasyon. Pwede kamo dayon maghimo sang “mabaskog nga dalimuos” paagi sa pag-spray sang tubig ukon paggamit sang electric fan ukon blower para maghimo sang hangin. Ano ang natabo sa istraktura sang gintungtong ini sa sari-sari nga mga pundasyon? Paano nangin “pat-od nga [pundasyon]” sa aton mga kabuhi si Jesucristo?

Helaman 5:29–33

Ano ang aton nangin mga eksperiyensya sa pagkilala sang tingug sang Dios sa aton mga kabuhi?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Mangin pasensyoso sa imo kaugalingon. Ang pundasyon sang pagtuo ginatukod isa ka parte sing amat-amat. Kon may pila ka mga doktrina nga mabudlay intiendihon sa subong, magmangin pasensyoso. Magsalig nga ang pag-intiendi magaabot samtang ginatukod mo ang imo pundasyon kay Jesucristo paagi sa paggamit sang pagtuo kag pagtuon sing matutom.

© The Book of Mormon for Young Readers, Si Nefi kag Lehi Ginapalibutan sang Haligi sang Kalayo, ni Briana Shawcroft; indi pwede kopyahon