“Agosto 3–9. Alma 43–52: ‘Magtindog sing Malig-on sa Pagtuo kay Cristo,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Agosto 3–9. Alma 43–52,” Dali, Magsunod sa Akon—Para sa Mga Indibidwal kag Mga Pamilya: 2020
Para sa mga Bugay sang Kahilwayan, ni Scott M. Snow
Agosto 3–9
Alma 43–52
“Magtindog sing Malig-on sa Pagtuo kay Cristo”
Mahimo nga ang mga hitabo nga ginlaragway sa Alma 43–52 daw wala sing partikular nga koneksyon sa imo. Pero pareho sa tanan nga balaan nga mga kasulatan, ang Ginuo may mensahe para sa imo. Pangayoa ini sing mainampuon.
Isulat Ang Imo Mga Panghunahuna
Kon basahon naton ining mga pulong sa puno sang Alma kapitulo 43—“Kag karon magabalik ako sa isa ka kasaysayan sang mga inaway sa tunga sang mga Nefinhon kag mga Lamanhon”—natural lang nga matingala ka kon ngaa gindala pa ni Mormon ining mga istorya sang giyera nga limitado ang iya espasyo sa mga lamina (tan-awa sa Mga Pulong ni Mormon 1:5). Matuod nga may ara man kita nga mga inaway sa ulihing mga adlaw, pero may balor sa iya mga tinaga nga masobra pa sangsa mga paglaragway sang stratehiya kag trahedya sang giyera. Ginahanda man kita sang iya mga tinaga sa giyera nga sa diin “kita tanan naentra” (Hymns, no. 250), ang giyera nga aton ginaaway kada adlaw batok sa pwersa sang malain. Matuod kaayo ining giyera, kag ang resulta nagaapekto sa aton mga kabuhi sa wala katapusan. Pareho sang mga Nefinhon, kita “ginpasilabo sang mas maayo nga kawsa,” nga amo ang “aton Dios, ang aton relihiyon, kag kahilwayan, kag aton paghidaet, aton [mga pamilya].” Gintawag ini ni Moroni nga “ang kawsa sang mga Cristohanon,” ang pareho nga kawsa nga ginaaway naton karon nga panahon (Alma 43:45; 46:12, 16).
Mga Ideya para sa Personal nga Pagtuon sang Balaan nga Mga Kasulatan
Ang mga giyera sa Libro ni Mormon nagatudlo sa akon parte sa akon mga giyera batok sa malain.
Ang pagbasa parte sa mga giyera sa tunga sang mga Nefinhon kag mga Lamanhon mahimo nga mangin mas makahulugan sa imo kon pangitaon mo ang mga kaanggid sa imo kaugalingon nga espirituhanon nga mga inaway. Sa imo pagbasa sang Alma 43–52, tandai kon ano ang ginhimo sang mga Nefinhon nga nagmadinalag-on sila (ukon napiyerdi). Dayon pamensara kon ano ang pwede mo magamit para mabuligan ka nga magdaog sa imo espirituhanon nga mga giyera. Sa imo pagtuon sang mga bersikulo pareho sang masunod, isulat ang imo mga panghunahuna kon paano mo sundon ang halimbawa sang mga Nefinhon:
-
Alma 43:19 Ang mga Nefinhon naghanda nga may panaming. (Pwede ko ihanda ang akon kaugalingon nga may espirituhanon nga panaming.)
-
Alma 43:23–24 Ginpangayo nila ang giya sang propeta.
Talupangda man kon paano gintinguhaan sang mga Lamanhon kag rebelde nga mga Nefinhon nga piyerdihon ang mga Nefinhon. Ining mga butang makapaandam sa imo kon paano magatinguha ang kaaway nga atakehon ka. Sa imo pagtuon, isulat kon paano mag-atake si Satanas sa imo sa pareho nga mga paagi:
-
Alma 43:8 Gintinguhaan ni Zerahemna nga paakigon ang iya katawhan para mapaidalom sila sa iya gahum. (Kon akig ako sa iban nga tawo, ginahatagan ko si Satanas sang gahum sa akon.)
-
Alma 43:29 Gusto sang mga Lamanhon nga bihagon ang mga Nefinhon.
Minerva•K. Teichert (1888–1976), Depensa sang Nefinhon nga Siyudad, 1935, oil sa masonite, 36 x 48 pulgada. Brigham Young University Museum of Art.
Samtang nagatinguha ako nga mangin matinuohon pareho kay Moroni, sarang ako nga mangin pareho sa Manluluwas.
Nagahandum ka bala nga kuntani mangin mas pareho ka sa Manluluwas kag buhinan ang gahum sang kaaway sa imo kabuhi? Isa ka paagi amo ang pagsunod sa laygay sa Alma 48:17 nga mangin “amo kay Moroni.” Tutoki ang mga kinaiya kag aksyon ni Moroni nga ginalaragway sa bilog nga Alma 43–52 pero labi na gid sa 46:11–28 kag 48:7–17. Ano ang nanamian mo sa sining “gamhanan nga lalaki”? Paano ginapaluya sang mga kinaiya kag aksyon pareho sa iya ang gahum sang yawa sa imo kabuhi? Binagbinaga kon ano ang ginapabatyag sa imo nga himuon para sundon ang ehemplo ni Moroni kag mangin mas pareho sa Manluluwas?
Si Satanas nagatentar kag nagapanginto sa aton sing amat-amat.
Nakahibalo si Satanas nga kalabanan sa aton indi gusto maghimo sang dalagko nga mga sala ukon magpati sa dalagko nga kabutigan. Gani, nagagamit sia sang pino nga mga kabutigan kag tentasyon nga nagadala sa aton sa daw gagmay lang nga mga sala—kutob sa pamatyag niya nga batunon naton. Padayon niya ini nga ginahimo hasta nga nagtalang na kita malayo sa seguridad sang matarong nga pagpangabuhi.
Makita mo ini nga sulundan sa kasaysayan ni Amalikia nga nagapanginto kay Lehonti, nga makita sa Alma 47. Sa imo pagtuon, pamensara sing maayo kon paano ayhan si Satanas nagatinguha sa pag-into sa imo, pareho sa ginlaragway ni Elder Robert D. Hales:
“Ang traydor nga Amalikia nagpangabay kay Lehonti nga ‘magdulhog’ kag tabuon sia sa kunsaran sang bukid. Pero sang nagpanaog si Lehonti, ginhiloan sia ‘sing amat-amat’ hasta nga mapatay sia, kag ang iya mga soldado nahulog sa mga kamot ni Amalikia (tan-awa sa Alma 47). Paagi sa pagbinaisay kag pag-akusaray, ginapaonan kita sang pila ka mga tawo nga magpanaog halin sa mataas nga lugar. Ang mataas nga lugar amo ang kon diin ang kasanag. … Amo ini ang hilway nga lugar” (“Christian Courage: The Price of Discipleship,” Ensign ukon Liahona, Nob. 2008, 74).
Tan-awa man sa 2 Nefi 26:22; 28:21–22.
Ang paghiliusa nagadala sang kahilwayan sa katalagman.
Sa mga sirkumstansya nga narekord sa puno sang Alma 50, kon tan-awon daw wala sang tsansa ang mga Lamanhon nga mapiyerde ang mga Nefinhon. Ang panaming, depensa, kag pagbinuligay sang mga Nefinhon naghimo sa ila nga indi basta mapiyerde (tan-awa sa Alma 49:28–30 kag 50:17–20). Pero wala madugayi nakuha na sang mga Lamanhon ang madamo sa ila mga siyudad—lakip na ang mga ginpabakod ni Moroni (tan-awa sa Alma 51:26–27). Paano ina natabo? Magpangita sang mga sabat samtang imo ginabasa ining mga kapitulo (tan-awa labi na sa Alma 51:1–12). Pamensara kon ano nga mga paandam ang ari sa sining kasaysayan para sa imo kag sa imo pamilya.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Alma 45:2–8
Ang pagbasa sining mga bersikulo sing ululupod mahimo nga makainspirar sa imo pamilya nga maghiwat sang tinag-isa-isa nga paghinambalanay parte sa ebanghelyo upod sa mga miyembro sang pamilya, pareho sa ginhimo ni Alma kay Helaman.
Alma 46:12–22
Ang tig-ulo sang kahilwayan nag-inspirar sa mga Nefinhon nga tumanon ang mga kasuguan sang Dios kag pangapinan ang ila pagtuo. Ano ang nagainspirar sa imo nga himuon man ini? Basi pwede kamo maghimo sang inyo kaugalingon nga tig-ulo sang kahilwayan—isa ka flag ukon bandera nga may mga tinaga ukon imahe nga nagapadumdom sa inyo nga sundon ang mga kasuguan sang Dios kada adlaw.
Alma 48:7–9; 49:1–9; 50:1–6
Samtang nagabasa ang imo pamilya parte sa mga pagpabakod sang mga Nefinhon, pwede ninyo hambalan kon paano ninyo ginapabakod ang inyo panimalay batok sa kaaway. Mahimo nga masadyahan ang mga bata sa pagpatindog sang pader gamit ang mga bagay pareho sang mga bangko kag habol, ukon pwede nila drowingon kon ano ang ila pagdumdom sang hitsura sang mga pagpabakod.
Alma 51:1–12
Ano ang ginatudlo sining mga bersikulo kon ano ang matabo sa sulod sang aton pamilya kon mag-ilinaway kita? Paano naton dugangan ang aton pag-isa?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Magpamangkot samtang nagatuon. Samtang imo ginatun-an ang balaan nga mga kasulatan, pamangkuta ang imo kaugalingon sang mga makabulig sa imo nga magbinagbinag kon paano mo ginapangabuhi ang imo ginbasa.
Tig-ulo sang Kahilwayan, ni Larry Conrad Winborg