Larawan ni Nefi nga nagapangamuyo sa tore sang hardin ni Jerry Thompson

Agosto 24–30

Helaman 7–12

“Dumduma ang Ginuo”

Si Nefi, Lehi, kag ang iban pa nakaangkon sang “madamo nga bugna adlaw-adlaw” (Helaman 11:23). Ang masunson nga rebelasyon indi lang para sa mga propeta—para man ini sa imo. Ang pagsulat sang mga pagpabatyag sa imo makabulig sa imo nga makabaton sang rebelasyon sing mas tayuyon.

Isulat Ang Imo Mga Panghunahuna

Ang amay ni Nefi, nga si Helaman, nagpangabay sa iya mga anak nga “dumduma, dumduma”: gusto niya nga ila dumdumon ang ila mga kalolohan, dumdumon ang mga pulong sang mga propeta, kag labi sa tanan “ang aton Manunubos, nga si Cristo” (tan-awa sa Helaman 5:5–14). Maathag nga nakadumdum si Nefi, tungod amo man ini ang mensahe nga iya ginpahayag sa katawhan sa nagsunod nga mga tinuig “nga wala sing kakapoy” (Helaman 10:4). “Paano nga nalimtan ninyo ang inyo Dios?” (Helaman 7:20), pamangkot niya. Ang tanan nga pagpangabudlay ni Nefi—ang pagwali, pagpangamuyo, paghikot sang mga milagro, kag pagpangayo sa Dios sang tiggulutom—gintuyo para buligan ang mga tawo nga magliso sa Dios kag dumdumon Sia. Sa madamo nga paagi, ang pagkalipat sa Dios mas dako nga problema sangsa wala makakilala sa Iya, kag dasig lang sia malipatan kon ang aton mga hunahuna nakatutok sa “wala pulos nga mga butang sa sining kalibutan” kag nalipdan sang sala (Helaman 7:21; tan-awa man sa Helaman 12:2). Pero, sa ginapakita sa pag-alagad ni Nefi, indi pa ulihi nga magdumdom kag “magdangop … sa Ginuo nga inyo Dios” (Helaman 7:17).

Mga Ideya para sa Personal nga Pagtuon sang Balaan nga Mga Kasulatan

Helaman 7–11

Ang mga propeta nagapahayag sang pagbuot sang Dios.

Madamo sang mga propeta nga ginlaragway sa bilog nga Libro ni Mormon, pero ang Helaman 7–11 labi nga maayo nga lugar para matun-an kon ano gid ang propeta, ang iya ginahimo, kag kon paano naton batunon ang iya mga pulong. Samtang imo ginabasa ining mga bersikulo, tutoki ang mga aksyon, panghunahuna, kag mga inter-aksyon ni Nefi sa Ginuo. Paano ka ginabuligan sang pag-alagad ni Nefi nga mas maintiendihan ang papel sang propeta sa aton tiyempo? Ari ang pila ka mga ideya: Ano pa ang imo nakita?

Helaman 7:17–22.Ang mga propeta nagawali sang paghinulsol kag nagapaandam sa mga konsikwensya sang sala.

Helaman 7:29; 9:21–36.Ang mga propeta nakahibalo paagi sa rebelasyon halin sa Ginuo kon ano ang kinahanglan mabatian sang mga tawo.

Helaman 10:7.Ang mga propeta ginahatagan sang gahum sa pagselyo sa duta kag sa langit (tan-awa man sa Mateo 16:19; Doktrina kag mga Kasugtanan 132:46).

Helaman 10:4–7, 11–12.

Paano naimpluwensyahan sining mga bersikulo ang imo nabatyagan sa aton buhi nga propeta? Ano ang gintudlo niya sining nagligad lang? Ano ang imo ginahimo para mamati kag magsunod sa iya direksyon?

Helaman 9–10

Makabulig ang mga senyales kag mga milagro pero kulang pa ini sa pagpatubo sang nagadugay nga pagtuo.

Kon hustohan na ang mga senyales kag mga milagro para bag-uhon ang tagipusuon sang isa ka tawo, kuntani ang tanan nga mga Nefinhon nahaylo na sang dalagko nga mga senyales nga ginhimo ni Nefi sa Helaman 9. Sa baylo, naggwa ang “pagbinahin-bahin sa tunga sang katawhan” (Helaman 10:1) tungod kay “ginpatig-a pa nila gihapon ang ila mga tagipusuon” (Helaman 10:15). Ano sa masami ang reaksyon sang mga malaut sa mga senyales kag mga milagro? (tan-awa sa Helaman 10:12–15; tan-awa man sa 3 Nefi 2:1–2). Ano ang peligro sang paghimo sang mga senyales nga pundasyon sang panaksihon?

Helaman 10:2–4

Ang pagbinagbinag nagaimbitar sang rebelasyon.

Kon nakabatyag ka nga daw ginpigos, nagakabalaka, ukon ginaligban, mahimo nga may matun-an ka nga importante nga leksyon sa ehemplo ni Nefi sa Helaman 10:2–4. Ano ang iya ginhimo sang sia “nagakasubo”? (bersikulo 3).

Si Pangulong Henry B. Eyring nagpanudlo, “Kon nagabinagbinag kita, ginaimbitar naton ang rebelasyon paagi sa Espiritu. Ang pagbinagbinag, para sa akon, amo ang pagpamensar kag pagpangamuyo nga akon ginahimo pagkatapos basahon kag mahinalungon nga tun-an ang balaan nga mga kasulatan” (“Serve with the Spirit,” Ensign ukon Liahona, Nob. 2010, 60). Paano mo himuon nga pangginawi ang pagbinagbinag?  

Tan-awa man sa Mga Hulubaton 4:26; Lucas 2:19; 1 Nefi 11:1; 2 Nefi 4:15–16; 3 Nefi 17:3; Moroni 10:3; Doktrina kag mga Kasugtanan 88:62.

Helaman 12

Gusto sang Ginuo nga dumdumon ko Sia.

Sa Helaman 12, si Mormon, nga nagapalip-ot sang sinulatan, nagapalip-ot sang pila sa mga leksyon nga aton matun-an sa kasaysayan ni Nefi sa nagliligad nga mga kapitulo. Pamensara nga gamiton ang iya pagpalip-ot bilang oportunidad para tan-awon ang imo kaugalingon nga tagipusuon. Pwede mo man gani ilista ang mga butang nga ginsiling ni Mormon nga rason kon ngaa nagakalimtan sang mga tawo ang Ginuo. Ano ang nagabulig sa imo nga madumduman Sia? Ano ang nabatyagan mo nga dapat mo bag-uhon base sa imo natun-an?

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Helaman 7–9

Ano ang pulupalareho nga aton makita sa mga butang nga ginhimo ni Nefi kag ginahimo sang mga propeta sa karon? Ano ang ginatudlo sang aton propeta sa karon? Siguro pwede ka magpili sang pinakaulihi nga laygay nga ginhatag sang propeta kag hambali bilang pamilya ang mga paagi nga mas masunod ninyo ini.

Helaman 10:4–5, 11–12

Paano ginpakita ni Nefi nga ginatinguhaan niya nga sundon ang pagbuot sang Ginuo sangsa iya pagbuot? Paano naton sundon ang iya ehemplo? Ano ang pila sa mga paagi nga mas tinguhaan nga sundon sang aton pamilya ang pagbuot sang Ginuo?

Helaman 11:1–16

Ano ang handum ni Nefi kag ano ang iya ginhimo para sina? Ano ang aton matun-an parte sa pangamuyo sa halimbawa ni Nefi?

Helaman 11:17–23

Ano ang aton matun-an sa utod ni Nefi, nga si Lehi, sa Helaman 11:17–23? Sin-o ang kilala naton nga nagapangabuhi sang matarong nga wala nagabaton sang madamo nga pagkilala?

Helaman 12:1–6

Pwede ka magpamensar sang object lesson nga pwede mo gamiton para maintiendihan sang imo pamilya kon ano ang kahulugan sang “pagkamabaylo-bayluhon”? Halimbawa, pwede mo hagaron ang isa ka miyembro nga balansehon ang butang nga ara sa iya ulo. Pwede mo dayon imbitaron ang mga miyembro sang pamilya nga pangitaon sa Helaman 12:1–6 ang mga rason nga mangin mabaylo-bayluhon ang mga tawo sa pagsunod sang Ginuo. Paano kita magpabilin nga mapag-on sa espirituhanon?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Rebyu. Ari ang isa ka ideya para buligan ang mga miyembro sang pamilya nga tandaan ang balaan nga mga kasulatan nga ila ginatun-an: Magpili sang isa ka bersikulo nga makahulugan para sa inyo, kag i-display ini sa inyo balay para makita pirme sang mga miyembro sang pamilya. Imbitaha ang iban nga mga miyembro sang pamilya nga magbulos-bulos sa pagpili sang balaan nga mga kasulatan nga i-display, kag hambali ini sa pagtipon sang pamilya, pareho sa oras sang pagkaon ukon pangamuyo sa pamilya.

© The Book of Mormon for Young Readers, Si Seantum—Ang Manugpatay-Tawo Nadiskubrehan, ni Briana Shawcroft; indi pwede kopyahon