“Agosto 31–Septyembre 6. Helaman 13–16: ‘Malipayon nga Balita sang Dako nga Kalipay,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Agosto 31–Septyembre 6,” Dali, Magsunod sa Akon—Para sa Mga Indibidwal kag Mga Pamilya: 2020
Si Samuel nga Lamanhon sa Pader, ni Arnold Friberg
Agosto 31–Septyembre 6
Helaman 13–16
“Malipayon nga Balita sang Dako nga Kalipay”
Samtang imo ginasulat ang imo mga panghunahuna sini nga semana, pamensara kon paano ang mga prinsipyo sa Helaman 13–16 nagapatubo kag nagapabakod sang iban nga mga bagay nga imo ginatun-an sa balaan nga mga kasulatan.
Isulat Ang Imo Mga Panghunahuna
Sang una nga beses nga gintinguhaan ni Samuel nga Lamanhon nga ipaambit ang “malipayon nga balita” sa Zarahemla (Helaman 13:7), ginsikway sia kag gintabog sang matig-a sing-tagipusuon nga mga Nefinhon. Masiling mo nga daw nagpatindog sila sang pader nga indi gid malutsan sa palibot sang ila mga tagipusuon nga nagpugong sa ila sa pagbaton sang mensahe ni Samuel. Naintiendihan ni Samuel ang importansya sang mensahe nga iya ginapaambit kag ginapakita ang pagtuo paagi sa pagsunod sang kasuguan sang Dios nga “dapat sia magbalik liwat, kag magpanagna” (Helaman 13:3). Pareho sang ginhimo ni Samuel, tanan kita may masugata nga mga pader samtang aton “ginahanda ang dalanon sang Ginuo” (Helaman 14:9) kag ginatinguhaan nga sundon ang Iya mga propeta. Kag pareho kay Samuel, kita man nagasaksi kay Jesucristo, “nga pat-od gid nga magkari sa kalibutan,” kag imbitahon ang tanan nga “magpati sa iya ngalan” (Helaman 13:6; 14:13). Indi tanan magapamati, kag ang iban mahimo nga aktibo nga magkontra sa aton. Pero ang mga nagpati sa sini nga mensahe nga may pagtuo kay Cristo makakita nga matuod gid ini nga “malipayon nga balita sang dako nga kalipay” (Helaman 16:14).
Mga Ideya para sa Personal nga Pagtuon sang Balaan nga Mga Kasulatan
Ang Ginuo nagapaandam paagi sa Iya mga propeta.
Sa balaan nga mga kasulatan, ang mga propeta kon kaisa ginakumparar sa mga manugbantay sa ibabaw sang pader ukon tore nga nagapaandam sa mga katalagman (tan-awa sa Isaias 62:6; Ezequiel 33:1–7).
Si Pangulong M. Russell Ballard nagtudlo: “Sa mga siglo, ang mga propeta nagtuman sang ila katungdanan kon ila ginapaandaman ang katawhan sang mga katalagman nga ara sa ila atubang. Ang mga Apostoles sang Ginuo nagpangako nga magbantay, magpaandam, kag maglab-ot para buligan ang mga nagapangita sang mga sabat sa mga pamangkot sang kabuhi” (“God Is at the Helm,” Ensign ukon Liahona, Nob. 2015, 25).
Samtang imo ginabasa kag ginabinagbinag ang Helaman 13, pwede mo markahan ang madamo nga mga paandam nga ginhatag ni Samuel. Halimbawa, ano ang iya gintudlo parte sa paghinulsol? parte sa pagpaubos kag manggad? Paano ayhan ining mga paandam magamit sa imo? Ano nga mga paandam ang ginhatag sining karon lang sang moderno nga mga propeta, kag ano ang nabatyagan mo nga dapat mo himuon sa sining mga paandam?
Ang propeta nagatudlo sa aton kay Jesucristo.
Ang Ginuo maluluy-on sa mga nagahinulsol.
Ang una-una gid, si Samuel ginpadala sa mga Nefinhon para magpaambit sang masinadyahon nga balita sang pag-abot sang Manluluwas (tan-awa sa Helaman 13:7). Bangud ginsikway nila sia, nagbalik sia nga may istrikto nga mga paandam sang mga paghukom sang Dios. Pero ining mga paandan sa gihapon nagalakip sang maluluy-on nga imbitasyon sa paghinulsol; pangitaa ining mga imbitasyon sa bilog nga Helaman 13–15 (tan-awa ilabi na sa Helaman 13:6, 11; 14:15–19; 15:7–8). Paano ining mga imbitasyon magamit sa imo? Ano ang imo matun-an sa sining mga bersikulo parte sa paghinulsol? San-o mo naeksperiyensyahan ang kaluoy sang Dios nga nagahalin sa paghinulsol?
Ang mga tanda kag katingalahan makapabakod sang pagtuo sang mga wala nagpatig-a sang ila mga tagipusuon.
Sa Helaman 14, ginpaathag ni Samuel ang rason nga naghatag ang Ginuo sang mga senyales sang pagkabun-ag kag kamatayon sang Manluluwas: “Sa tinutuyo nga basi pa lang nga magpati kamo sa iya ngalan” (Helaman 14:12). Sa imo pagtuon sang Helaman 14, tandai ang mga senyales sang pagkabun-ag sang Manluluwas sa mga bersikulo 1–8 kag ang mga senyales sang Iya kamatayon sa mga bersikulo 20–28. Ngaa sa banta mo nga ining mga senyales epektibo nga mga tanda sang pagkabun-ag kag kamatayon ni Jesucristo?
May mapensaran ka bala nga mga senyales nga ginhatag sang Ginuo para mabuligan ka nga magpati sa Iya? Halimbawa, ginpropesiya sang mga propeta ang mga senyales nga magapakita antes sang Ika-duha nga Pagkari sang Manluluwas (tan-awa sa “Signs of the Times,” Guide to the Scriptures, scriptures.ChurchofJesusChrist.org). Natuman na bala ang pila sining mga senyales sa aton panahon? Ang iban nga mga senyales nga nagadul-ong sa pagtuo kay Jesucristo mahimo nga mas personal kag indi kaayo matalupangdan. Hatagi sang tiyempro nga binagbinagon ang mga paagi nga nasaksihan mo ang Iya kamot sa imo kabuhi.
Ano nga paandam ang ginhatag parte sa mga senyales sa Helaman 16:13–23? Paano mo malikawan ang pamatasan sang mga tawo nga ginlaragway sa sining mga bersikulo?
Tan-awa man sa Alma 30:43–52; Ronald A. Rasband, “By Divine Design,” Ensign ukon Liahona, Nob. 2017, 55–57.
Ang pagsunod sa laygay sang propeta nagalapit pa gid sa akon sa Ginuo.
Si Elder Neil L. Andersen nagtudlo: “Natukiban ko nga kon mainampuon ko nga tun-an ang mga pulong sang propeta sang Dios kag mahinalungon, upod ang pasensya, nga tadlungon sa espirituhanon ang akon pagbuot sa iya inspirado nga mga pinanudlo, nagatubo gid pirme ang akon pagtuo sa Ginuong Jesucristo. Kon pilion naton nga ipahigad ang iya laygay kag magpensar nga nakahibalo na kita, ang aton pagtuo nagaantos kag nagakalipdan ang aton wala katapusan nga perspektibo” (“The Prophet of God,” Ensign ukon Liahona, Mayo 2018, 26–27). Paano ginpamatud-an sang mga pulong kag aksyon sang mga Nefinhon sa Helaman 16 ang gintudlo ni Elder Andersen? Ano sa banta mo ang personal nga mga pangako nga kinahanglan mo himuon may kaangtanan sa mga propeta sang Ginuo kag sa ila mga mensahe?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Helaman 13:3-4
Ano ang nagainspirar sa imo pamilya parte sa reaksyon ni Samuel sa sugo sang Ginuo sa Helaman 13:3–4? Sa inyo pang-pamilya nga pagtuon sini nga semana, basi pwede mo paisugon ang mga miyembro sang pamilya sa pag-istorya sang mga impresyon nga “nagasulod sa [ila] tagipusuon.”
Helaman 13:38
Komon sa aton panahon ang ideya nga ang kalipay makita sa “paghimo sang kalautan.” Sa ano nga pamaagi nga nagdala sa aton sang matuod nga kalipay ang pagpangabuhi sang ebanghelyo?
Helaman 15:3
Paano ginapakita sang pagtadlong sang Dios ang Iya pagpalangga sa aton? Agdaha ang mga miyembro sang pamilya nga mapainubuson nga ipamangkot sa Ginuo ang pwede nila himuon para mag-uswag.
Helaman 15:5–8
Ano ang aton matun-an parte sa pagbag-o sa mga Lamanhon nga ginlaragway sa sining mga bersikulo? Paano naton sundon ang ila ehemplo?
Helaman 16:1–3
Malingaw ayhan ang imo pamilya nga drama-dramahon ang istorya ni Samuel nga Lamanhon? Pagkatapos nga basahon ang kasaysayan, pwede magbulos-bulos ang mga miyembro sang pamilya sa pagtindog sa bangko kag sa pagbasa sang pila ka mga propesiya ni Samuel samtang ang iban nga mga miyembro sang pamilya kuno abi nagapangpana ukon nagapamato. Mabuligan sini ang imo pamilya nga maintiendihan kon ano ang nabatyagan ni Samuel kag sang mga Nefinhon. Mahimo nga masadyahan ang magagmay nga kabataan sa pagdrowing sang mga litrato sang ini nga istorya. Paano kita mangin pareho kay Samuel kag ipaambit ang ebanghelyo sa iban bisan pa nga ginakulbaan kita?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Magpangita sang mga sulundan. Ang sulundan isa ka plano ukon modelo nga pwede gamiton nga giya sa pagtapos sang isa ka buluhaton. Sa balaan nga mga kasulatan, makakita kita sang mga sulundan nga nagapakita kon paano ang Ginuo nagatapos sang Iya buluhaton, pareho sang pagpadala sang Iya mga alagad sa pagpaandam sa katawhan.
© The Book of Mormon for Young Readers, Si Samuel nga Lamanhon, ni Briana Shawcroft; indi pwede kopyahon