“Septyembre 14–20. 3 Nefi 8–11: ‘Bangon kag Magpalapit sa Akon,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Septyembre 14–20. 3 Nefi 8–11,” Dali, Magsunod sa Akon—Para sa Mga Indibidwal kag Mga Pamilya: 2020
Ako ang Kapawa sang Kalibutan, ni James Fullmer
Septyembre 14–20
3 Nefi 8–11
“Bangon kag Magpalapit sa Akon”
Sa 3 Nefi 8–11, nabatian sang katawhan ang tingug sang Dios nga nagahambal sa ila. Samtang imo ginabasa ining mga kapitulo, hatagi sing atensyon ang ginahambal sang Iya tingug sa imo.
Isulat Ang Imo Mga Panghunahuna
“Yari karon, ako si Jesucristo, nga ang mga manalagna nagsaksi nga magaabot sa kalibutan” (3 Nefi 11:10). Sa sining mga tinaga, ginpakilala sang nabanhaw nga Manluluwas ang Iya Kaugalingon, nga nagatuman sang masobra 600 katuig nga mga propesiya sa Libro ni Mormon. “Inang pagpakita kag inang deklarasyon,” ginsulat ni Elder Jeffrey R. Holland, “amo ang pinakaimportante nga tion, ang pinakamataas nga hitabo, sa bilog nga kasaysayan sang Libro ni Mormon. Amo ato ang pagpakita kag ang deklarasyon nga nagpahibalo kag nag-inspirar sang tagsa ka Nefinhon nga propeta. … Ang tanan naghambalanay parte sa iya, nagkinanta parte sa iya, nagdamgo parte sa iya, kag nagpangamuyo para sa iya pagpakita—kag ari na gid sia. Ang adlaw sang mga adlaw! Ang Dios nga nagabaylo sang tagsa ka madulom nga gab-i sa kasanag sang aga nag-abot na” (Christ and the New Covenant [1997], 250–51).
Mga Ideya para sa Personal nga Pagtuon sang Balaan nga Mga Kasulatan
Si Jesucristo amo Kapawa sang Kalibutan.
Mahimo nga matalupangdan mo nga ang mga tema parte sa kadulom kag kasanag—sa pareho pisikal kag espirituhanon—ginasulit-sulit sa bilog nga 3 Nefi 8–11. Ano ang imo matun-an sa sining mga kapitulo parte sa espirituhanon nga kadulom kag kasanag? Ano ang nagadala sang kadulom sa imo kabuhi? Ano ang nagadala sang kasanag? Ngaa sa banta mo nga ginpili sang Manluluwas nga ipakilala ang Iya Kaugalingon nga “ang kapawa kag ang kabuhi sang kalibutan”? (3 Nefi 9:18; 11:11). Paano nangin kasanag si Jesucristo sa imo kabuhi?
Kon maghinulsol ako, ang Manluluwas magatipon, magaamlig, kag magaayo sa akon.
Ano sa pamatyagan mo ang nabatyagan sang katawhan pagkatapos nga maeksperiyensyahan ang kalaglagan kag kadulom nga ginlaragway sa 3 Nefi 8? Ano sa banta mo ang ila nabatyagan sang ila mabatian ang tingug sang Manluluwas nga nagahambal parte sa kasanag, kaluoy, kag pagtubos sa mga kapitulo 9 kag 10?
Bisan pa nga ang Manluluwas nagsiling nga ang grabe nga kalalat-an resulta sang mga sala sang katawhan, nagpromisa Sia nga Iya paayuhon ang mga magbalik sa Iya kag maghinulsol (tan-awa sa 3 Nefi 9:2, 13). Si Elder Neil L. Andersen nagsiling: “Nagakatingala ako sa nagapangsapupo nga mga braso sang kaluoy kag pagpalangga sang Manluluwas sa nagahinulsol, bisan ano pa ka maiyaiyahon ang sala nga ginsikway. Nagapamatuod ako nga ang Manluluwas mahimo kag handa nga magpatawad sang aton mga sala” (“Repent … That I May Heal You,” Ensign ukon Liahona, Nob. 2009, 40).
Pangitaa sa 3 Nefi 9–10 ang ebidensya sang kaluoy ni Cristo kag sang Iya kahanda sa pagpatawad. Halimbawa, ano ang imo makita sa 3 Nefi 9:13–22 kag 10:1–6 nga nagabulig sa imo nga mabatyagan ang pagpalangga kag kaluoy sang Manluluwas? Binagbinaga ang mga eksperiyensya sang nabatyagan mo Sia nga “nagtipon” kag “nagsagod” sa imo (tan-awa sa 3 Nefi 10:4). Pamensara nga irekord ining mga eksperiyensya sa isa ka journal ukon sa pag-istorya sini sa imo mga pinalangga.
Matun-an ko nga pamatian kag intiendihon ang tingug sang Dios.
Nakabatyag ka na bala nga ginabudlayan ka sa pag-intiendi sang mensahe nga ginapalab-ot sang Dios sa imo? Siguro makabulig sa imo ang eksperiyensya sang katawhan sa 3 Nefi 11:1–8 nga maintiendihan ang pila ka mga prinsipyo sang pagpamati kag pag-intiendi sang tingug sang Dios. Pwede mo pat-inan ang mga kinaiya sang tingug sang Dios nga nabatian sang mga tawo kag kon ano ang ila ginhimo para mas maintiendihan ini. Paano ayhan ining kasaysayan magamit sa imo mga pagpaninguha nga makabati kag makilala ang tingug sang Dios sa imo kabuhi paagi sa personal nga rebelasyon?
Ginaimbitar ako ni Jesucristo nga mag-angkon sang personal nga panaksihon parte sa Iya.
May malapit 2,500 ka mga tawo nga nagtipon sa Bugana sang nagpakita si Jesucristo (tan-awa sa 3 Nefi 17:25). Wala sapayan sining kadamuon sang tawo, gin-imbitar sila sang Manluluwas nga “tinag-isaisa” nga hikapon ang mga agi sang lansang sa Iya mga kamot kag mga tiil (3 Nefi 11:14–15). Ano ang ginapanugyan sini sa imo parte sa importansya sang pag-angkon sang personal nga mga eksperiyensya nga nagapatubo sang pagtuo kay Jesucristo? Sa ano nga mga paagi ang Manluluwas nagaimbitar sa imo nga “magbangon kag magpalapit sa” Iya? (3 Nefi 11:14). Ano nga mga eksperiyensya ang nagbulig sa imo nga makaagom sang saksi nga Sia amo ang imo Manluluwas? Pwede mo man pamensaron kon paano ang ehemplo sang Manluluwas sa sining mga bersikulo makainspirar sa imo mga pagpaninguha sa pagminister sa iban.
Tinag-isaisa, ni Walter Rane
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
3 Nefi 8–9
Para buligan ang imo pamilya nga maintiendihan ang mga eksperiyensya nga ginalaragway sa 3 Nefi 8–9, pwede ninyo isaysay liwat ukon pamatian ang ginrekord nga mga parte sining mga kapitulo sa madulom nga kwarto. Hambali kon daw ano ayhan nga ara kamo sa kadulom sing tatlo ka adlaw. Dayon pwede ninyo hambalan kon paano si Jesucristo nangin “kapawa … sang kalibutan” (3 Nefi 9:18).
3 Nefi 10:1–6
Ang larawan sang isa ka munga nga nagapanipon sang iya mga piso isa ka mabaskog nga gamit sa pagtudlo para buligan ang mga kabataan nga maintiendihan ang karakter kag misyon sang Manluluwas. Pwede ninyo basahon ining mga bersikulo samtang nagatan-aw ang imo pamilya sang litrato sang munga kag mga piso. Ngaa kinahanglan tipunon sang munga ang iya mga piso? Ngaa gusto sang Manluluwas nga tipunon kita palapit sa Iya? Ano ayhan ang matabo kon ang isa ka piso indi gusto magtipon kon tawgon?
3 Nefi 11:1–7
Basi pwede mo basahon ang pila sining mga bersikulo sa mahinay, “diutay nga tingug” (3 Nefi 11:3). Ano ang kinahanglan himuon sang mga tawo para maintiendihan ang tingug halin sa langit? Ano ang aton matun-an sa ila eksperiyensya?
3 Nefi 11:21–38
May ara bala sa inyo pamilya nga nagahanda nga magpabunyag? Ang pagbasa sang 3 Nefi 11:21–38 mahimo nga makabulig sa ila sa paghanda. Paano makabulig sa mga miyembro sang pamilya nga nabunyagan na ang pagbinagbinag sang mga pinanudlo sang Manluluwas?
3 Nefi 11:29–30
Ano ang ginatudlo sa aton sining mga bersikulo parte sa pagbinaisay? Paano naton “[paga]dulaon” ang pagbinaisay sa aton panimalay? (3 Nefi 11:30).
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Isulat ang mga panghunahuna. Si Elder Richard G. Scott nagsiling, “Ang kaalam nga ginsulat mangin kaalam nga magamit sa oras sang panginahanglan. … [Ang pagrekord sang espirituhanon nga mga panghunahuna] nagadugang sang tsansa nga makabaton ka sang dugang nga kasanag” (“Acquiring Spiritual Knowledge,” Ensign, Nob. 1993, 88).
Isa ka Manugpahalab, ni Howard Lyon