“Septyembre 21–27. 3 Nefi 12–16: ‘Ako ang Layi, kag ang Kapawa’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Septyembre 21–27. 3 Nefi 12–16,” Dali, Magsunod sa Akon—Para sa Mga Indibidwal kag Mga Pamilya: 2020
Ikatlong Nefi: Ining Dose nga Akon Ginpili, ni Gary L. Kapp
Septyembre 21–27
3 Nefi 12–16
“Ako ang Layi, kag ang Kapawa”
Madamo nga mga prinsipyo ang makita sa 3 Nefi 12–16. Ang pila sini ginatutokan sa sining outline, pero may iban ka pa nga makita. Tugti nga tudloan ka sang Amay nga Langitnon, paagi sa Iya Espiritu sang kon ano ang imo kinahanglan subong.
Isulat Ang Imo Mga Panghunahuna
Pareho sa mga disipulo ni Jesus nga nagtililipon sa bukid sang Galilea, ang katawhan nga nagtililipon sa templo sang Bugana nagpangabuhi sa idalom sang layi ni Moises. Ginsunod nila ini tungod kay ginatudlo sila sini kay Cristo (tan-awa sa Jacob 4:5), kag karon nagatindog si Cristo sa ila atubangan, nga nagapahayag sang mas mataas nga layi. Pero bisan ang iban sa aton nga wala nagpangabuhi sang layi ni Moises makakilala nga ang talaksan nga ginpahamtang ni Jesus para sa Iya mga disipulo mas mataas nga layi. “Luyag ko nga kamo mangin [perpekto],” gindeklarar Niya (3 Nefi 12:48). Kon ginapabatyag sini sa imo ang imo kakulangan, tandai nga nagsiling man si Jesus nga, “Bulahan ang mga kubos sa espiritu nga nagakari sa akon, kay ila ang ginharian sang langit” (3 Nefi 12:3). Ang mas mataas nga layi isa ka imbitasyon—isa ka paagi sa pagsiling nga “Magkari kamo sa akon kag maluwas” (3 Nefi 12:20). Pareho sang layi ni Moises, ining layi nagatudlo sa aton padulong kay Cristo—ang Nagaisahanon nga makaluwas kag makaperpekto sa aton. “Yari karon,” siling Niya, “Ako ang layi, kag ang kapawa. Magtulok sa akon, kag magpadayon tubtob sa katapusan, kag kamo magakabuhi” (3 Nefi 15:9).
Mga Ideya para sa Personal nga Pagtuon sang Balaan nga Mga Kasulatan
Ang mga pinanudlo sang Manluluwas nagapakita sa akon kon paano mangin matuod nga disipulo.
Madamo sang mga kamatuoran, mga pulong sang paglaygay, kag mga paandam sa 3 Nefi 12–14. Ari ang isa ka paagi para tun-an kag ipangabuhi ang gintudlo sang Manluluwas sa sining mga kapitulo: Magpili sang grupo sang mga bersikulo, kag tilawi kon pwede mo palip-uton ang ginatudlo sang mga bersikulo sa isa ka pulong nga nagaumpisa sa “Ang matuod nga mga disipulo ni Jesucristo …” Halimbawa, ang pagpalip-ot sang 3 Nefi 14:1–5 pwede nga “Ang matuod nga mga disipulo ni Jesucristo wala nagapanghusga.” Pwede ka man magpili sang isa ka bersikulo sa sining mga kapitulo nga makahulugan gid para sa imo kag sauluha ukon kopyaha ini kag ibutang ini sa lugar nga makita mo ini pirme. Hunahunaa kon paano mo ipangabuhi ang imo natun-an sa imo personal nga pagtinguha nga mangin mas maayo nga disipulo ni Jesucristo.
Tan-awa man sa Mateo 5–7; Lucas 6:20–49.
3 Nefi 12:1–2; 15:23–24; 16:1–6
Bulahan yadtong mga nagapati nga wala makakita.
Kon ikumparar sa kabilugan nga kadamuon sang mga anak sang Dios, pila lang gid ang nakakita sa Manluluwas kag nakabati sang Iya tingug, pareho sang katawhan sa Bugana. Ang kalabanan sa aton daw pareho sa mga tawo nga ginlaragway sa 3 Nefi 12:2; 15:23; kag 16:4–6. Ano ang mga ginpangako sa amo nga mga tawo sa sining mga bersikulo? Paano natuman ining mga promisa sa imo kabuhi?
Tan-awa man sa Juan 20:26–29; 2 Nefi 26:12–13; Alma 32:16–18.
3 Nefi 12:21–30; 13:1–8, 16–18; 14:21–23
Ang matarong nga mga binuhatan kulang pa; kinahanglan man matinlo ang akon tagipusuon.
Isa ka tema nga mahimo imo natalupangdan sa ining mga kapitulo amo ang imbitasyon sang Manluluwas sa pagpangabuhi sang mas mataas nga layi—nga mangin matarong indi lamang sa panggwa nga mga aksyon kundi pati man sa aton mga tagipusuon. Pangitaa ining tema sang maghambal ang Manluluwas parte sa pagbinaisay (3 Nefi 12:21–26), imoralidad (3 Nefi 12:27–30), pangamuyo (3 Nefi 13:5–8), kag pagpuasa (3 Nefi 13:16–18). Ano pa ang iban nga mga halimbawa ang imo nakita? Ano ang pwede mo himuon para tinloan ang mga handum sang imo tagipusuon imbes nga magtutok lamang sa panggwa nga mga aksyon?
Kon mangayo ako sang “maayo nga mga butang” sa Amay nga Langitnon, makabaton ako.
Si Pangulong Russell M. Nelson nagsiling: “Ang Dios bala gusto gid nga mag-istorya sa imo? Huo! … O, kadamo pa kaayo ang gusto sang imo Amay sa Langit nga imo mahibal-an” (“Revelation for the Church, Revelation for Our Lives,” Ensign ukon Liahona, Mayo 2018, 95). Samtang imo ginabasa ang imbitasyon sang Ginuo sa 3 Nefi 14:7–11 nga magpangayo, magpangita, kag magpanuktok, binagbinaga kon ano nga “maayo nga mga butang” ang gusto Niya nga pangayuon nimo. Ang masunod nga dugang nga balaan nga mga kasulatan makabulig sa imo nga maintiendihan kon paano magpangayo, magpangita, kag magpanuktok. Basi makabulig man ini paathag kon ngaa ang iban nga mga pangamuyo wala ginasabat sa paagi nga imo ginapaabot: Isaias 55:8–9; Helaman 10:5; Moroni 7:26–27, 33, 37; kag Doktrina kag mga Kasugtanan 9:7–9.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu sarang magbulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
3 Nefi 12:48
Makakita ka man sang bulig sa Moroni 10:32–33.
3 Nefi 12:9, 38–42; 14:3–5, 12
Paano magamit ining mga bersikulo sa mga inter-aksyon sa tunga sang mga miyembro sang pamilya? Pwede nga magplastar ang imo pamilya sang mga tinutuyo sing ululupod nga ipangabuhi ining mga prinsipyo sing mas matinuohon.
3 Nefi 13:19–21
Ining mga bersikulo pwede magsugod sang diskusyon parte sa kon ano ang ginakabig sang imo pamilya nga mga manggad. May mga manggad bala sa duta nga nagapugong sa inyo nga magtipon sang mga manggad sa langit? Pwede mo pabakuron ining punto paagi sa pagpanguna sa imo pamilya sa isa ka treasure hunt para pangitaon sa inyo balay ang mga butang nga nagapadumdom sang mga miyembro sang imo pamilya sang mga manggad nga may wala katapusan nga bili.
3 Nefi 14:7–11
Basi masadyahan ang magagmay nga kabataan nga maghampang, nga ginainspirar sang 3 Nefi 14:8–9, sa diin mangayo sila sang isa ka butang kag magabaton sang lain nga butang. Ano ang gusto sang Manluluwas nga mahibal-an naton parte sa aton Amay sa Langit sang Iya gin-istorya ining halimbawa?
3 Nefi 14:15–20
Ano nga “maayo nga bunga” ang nagabulig sa aton nga mahibal-an nga si Joseph Smith, ukon ang Pangulo sang Simbahan sa karon, isa ka matuod nga propeta?
3 Nefi 14:24–27
Magpamensar sang mga paagi nga mabuligan mo ang imo pamilya nga mapanan-aw ang paanggid sa sining mga bersikulo. Basi pwede magdrowing ang mga miyembro sang pamilya sang mga litrato, maghimo sang mga aksyon, ukon magpatindog sang mga bagay sa mabakod kag balason nga mga pundasyon.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Maggamit sang mga leksyon gamit ang isa ka bagay. Ang Manluluwas nagpanudlo sang dalagko nga mga kamatuoran paagi sa pagtumod sa pamilyar nga mga butang. Pwede ka maghimo sang pareho man samtang ginabasa sang imo pamilya ang 3 Nefi 12–16. Halimbawa, kon imo basahon ang kapitulo 12, pwede ka magpakita sang asin, kandila, kag kunop. Pwede man ini magresulta sa isa ka hampang sa pagrebyu. Pagkatapos nga inyo mabasa ining mga kapitulo, i-display liwat ang mga bagay, kag pamangkuta ang mga miyembro sang pamilya kon ano ang gintudlo sang Manluluwas parte sa kada isa sini.
Ang Pagbisita sang Manluluwas sa Katawhan sa Amerika, ni Glen S. Hopkinson