“Septyembre 7–13. 3 Nefi 1–7: ‘Ibayaw ang Imo Ulo kag Magkalipay Ka,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Septyembre 7–13. 3 Nefi 1–7,” Dali, Magsunod sa Akon—Para sa Mga Indibidwal kag Mga Pamilya: 2020
Isa ka Adlaw, Isa ka Gab-i, kag Isa ka Adlaw, ni Jorge Cocco
Septyembre 7–13
3 Nefi 1–7
“Ibayaw ang Imo Ulo kag Magkalipay Ka”
Nasaksihan sang mga Nefinhon ang milagroso nga mga senyales, pero sa kadugayan nalipatan na nila ang ila naeksperiyensyahan (tan-awa sa 3 Nefi 2:1). Ang pagsulat sang imo mga panghunahuna makabulig sa imo nga madumduman ang imo espirituhanon nga mga eksperiyensya samtang ginatun-an ang 3 Nefi 1–7.
Isulat Ang Imo Mga Panghunahuna
Sa pila ka bahin, makakulunyag ato nga panahon para mangin tumuluo ni Jesucristo. Nagakatuman ang mga propesiya—ang dalagko nga mga senyales kag mga milagro sa tunga sang katawhan nagapatimaan nga ang Manluluwas malapit na mabun-ag. Sa pihak nga bahin, isa man ato ka makakululba nga tiyempo para sa mga tumuluo kay, wala sapayan sa tanan nga mga milagro, nagainsister ang mga wala nagapati nga “ang tion nagligad na” para mabun-ag ang Manluluwas (3 Nefi 1:5). Ining mga tawo nagtuga sang “dako nga [kinagamo] sa bug-os nga kadutaan” (3 Nefi 1:7) kag nagtalana pa gani sang petsa para pamatyon ang tanan nga nagapati kon ang senyales nga ginpropesiya ni Samuel nga Lamanhon—nga isa ka gab-i nga wala sang kadulom—indi matabo.
Sa sining mabudlay nga mga sirkumstansya, ang propeta nga si Nefi “nagtuaw sing hugot sa iya Dios para sa iya katawhan” (3 Nefi 1:11). Ang sabat sang Ginuo makainspirar sa bisan sin-o nga nagapangatubang sang pagpanghingabot ukon pagduhaduha kag nagakinahanglan makahibalo nga ang kasanag magapirde sang kadulom: “Ibayaw ang imo ulo kag magkalipay ka; … pagatumanon ko ang tanan nga akon ginpahanabo nga ihambal paagi sa baba sang akon balaan nga mga [propeta]” (3 Nefi 1:13).
Mga Ideya para sa Personal nga Pagtuon sang Balaan nga Mga Kasulatan
Tumanon sang Ginuo ang tanan Niya nga mga pulong.
Ano ayhan ang imo nabatyagan kon isa ka sa mga nagapati sa tiyempo nga ginalaragway sa 3 Nefi 1–7? Daw ano ayhan batyagon, halimbawa, ang maghulat sang gab-i nga wala sing kadulom nga magaanunsyo sang pagkabun-ag sang Manluluwas, nga nagapamensar nga pagapatyon ka kon indi ini matabo? Samtang imo ginabasa ang 3 Nefi 1:4–21 kag 5:1–3, pangitaa kon ano ang ginhimo ni Nefi kag sang iban pa nga nagapati para padayunon ang ila pagtuo sa sining mabudlay nga sitwasyon. Paano sila ginbugayan sang Ginuo? Ano ang imo matun-an nga makabulig sa imo kon masalapuan mo ang imo kaugalingon nga nagahulat sang mga bugay nga ginpromisa sang Ginuo?
Ang pagkalipat sang espirituhanon nga mga eksperiyensya nagapahuyang sa akon sa mga tentasyon ni Satanas.
Siguro ginapamensar mo nga ang makakita sang isa ka butang nga tama kamilagroso parehas sang gab-i nga wala sing kadulom magapabilin sa imo sa malawig nga panahon kag mangin angkla sang imo panaksihon. Pero ang mga handurawan sang mga senyales kag katingalahan nga nasaksihan sang mga Nefinhon daw nagtahaw sa pagligad sang panahon. Ano ang nagpalipat sa ila, kag ano ang mga resulta sang pagkalipat? (tan-awa sa 3 Nefi 1:22; 2:1–3).
Ano ang imo ginahimo para dumdumon kag bag-uhon ang imo saksi sang espirituhanon nga mga kamatuoran? Halimbawa, pamensara kon paano makabulig sa imo ang pagsulat sang imo espirituhanon nga mga eksperiyensya. Paano mo ipaambit ang imo panaksihon sa mga malapit sa imo para buligan sila nga magpati?
3 Nefi 2:11–12; 3:1–26; 5:24–26
Ginapabakod sang Ginuo ang Iya mga Santos batok sa espirituhanon nga katalagman.
Sa aton panahon, masami nga wala kita nagaatubang sang grupo sang mga kawatan nga nagapilit sa aton nga maghalin sa aton mga balay kag magtipon sa isa ka lugar. Pero nagapangatubang kita sang espirituhanon nga mga katalagman, kag ang eksperiyensya sang mga Nefinhon mahimo nga may mga leksyon nga makabulig sa aton. Pangitaa ining mga leksyon samtang imo ginabasa ang 3 Nefi 2:11–12 kag 3:1–26.
Sa 3 Nefi 5:24–26 mabasa naton ang pagtipon sang katawhan sang Ginuo sa ulihing mga adlaw. Ano ang ginatudlo sining mga bersikulo parte sa kon paano ginatipon sang Ginuo ang Iya katawhan sa karon nga panahon?
Isa ako ka disipulo ni Jesucristo.
Ano sa banta mo ang buot silingon sang mangin disipulo ni Jesucristo? (tan-awa sa Doktrina kag mga Kasugtanan 41:5). Sa 3 Nefi 5:12–26, gin-untatan ni Mormon ang iya pagpalip-ot sang Nefinhon nga mga kasulatan kag nagpahayag nga sia isa ka disipulo ni Jesucristo. Dayon, sa 3 Nefi 7:15–26, ginlaragway niya ang pag-alagad sang isa pa ka disipulo—ang propeta nga si Nefi. Ano ang makita mo sa sining duha ka mga dinalan nga nagabulig sa imo nga maintiendihan kon ano ang buot silingon sang mangin isa ka disipulo ni Jesucristo?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
3 Nefi 3:13–14, 25–26
Ano ang ginhimo sang mga Nefinhon para amligan ang ila mga kaugalingon batok sa kaaway nga ila ginaatubang? Ano ang aton ginahimo para himuon ang aton puluy-an nga lugar nga hilway sa katalagman kag proteksyon batok sa kalainan sa kalibutan?
3 Nefi 2:1–3; 6:15–17
Para buligan ang imo pamilya nga makatuon kon paano kita ginainto ni Satanas, magdrowing sang lawas, kag samtang nagabasa ang imo pamilya sang 3 Nefi 2:1–3 kag 6:15–17, markahi ang lainlain nga parte sang lawas nga ginmitlang. Suno sa sining mga bersikulo, ano ang pila sa mga paagi nga ginatentar kita ni Satanas para kalimtan ang Ginuo kag magliso sa sala?
3 Nefi 4:7–12, 30–33
Ano ang ginhimo sang mga Nefinhon sang makita nila ang mga tulisan nga Gadianton nga nagapalapit? Ano ang matun-an sang aton pamilya sa mga Nefinhon kon nagapangatubang kita sang mabudlay nga mga sitwasyon? Ano ang aton matun-an sa mga pulong sang mga Nefinhon pagkatapos nga ginbuligan sila sang Ginuo sa oras sang kabudlay?
3 Nefi 5:13; Doktrina kag mga Kasugtanan 41:5
Basaha ang 3 Nefi 5:13 kag ang Doktrina kag mga Kasugtanan 41:5, kag hambali kon ano ang kahulugan sang mangin disipulo ni Jesucristo. Basi pwede mag-istorya ang mga miyembro sang pamilya sang mga tion nga natalupangdan nila ang isa kag isa nga nangin mga disipulo. Kon may magagmay ka nga kabataan, pwede ka maghimo sang tsapa (badge) nga nagasiling, “Isa ako ka disipulo ni Jesucristo,” kag isibit sa ila ang tsapa kon makit amo sila nga ginasunod ang Manluluwas.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Buligi ang imo pamilya nga ipaanggid ang balaan nga mga kasulatan sa ila nga kaugalingon. Si Nefi nagsiling, “Kay gindapat ko ang tanan nga balaan nga mga kasulatan sa aton, agud nga mangin para ini sa aton kapuslanan kag tinun-an” (1 Nefi 19:23). Para buligan ang imo pamilya nga idapat ang balaan nga mga kasulatan sa ila kaugalingon, pwede mo sila imbitaron nga pamensaron kon ano ang ila himuon kon isa sila sa mga nagapati nga ginlaragway sa 3 Nefi 1:4–9. (Tan-awa sa Teaching in the Savior’s Way, 21.)
Isa ka Adlaw, Isa ka Gab-i, kag Isa ka Adlaw, ni Walter Rane