1 Karon natabo ini nga ang ika-nobenta’y uno nga tuig nagligad kag anum ka gatos ka tuig na halin sa tion nga si Lehi nagbiya sa Jerusalem; kag sa amo sini nga tuig nga si Laconeus ang puno nga hukom kag ang gobernador sa kadutaan.

2 Kag si Nefi, nga anak ni Helaman, naghalin sa duta sang Zarahemla, nga nagtugyan sa iya anak nga si Nefi, nga iya kamagulangan nga anak nga lalaki, sang mga lamina nga saway, kag tanan nga kasulatan nga ginsulat, kag tanan nga butang nga ginatipigan nga sagrado halin sa paggwa ni Lehi sa Jerusalem.

3 Dayon naghalin sia sa kadutaan, kag kon diin sia nagkadto, wala sing tawo nga nakahibalo; kag ang iya anak nga si Nefi ang nagsulat sa mga kasulatan bulos sa iya, huo, ang kasulatan sining katawhan.

4 Kag natabo ini nga sa pagsugod sang ika-nobenta’y dos nga tuig, tan-awa, ang mga propesiya sang mga propeta nagsugod nga matuman sing lubos; kay nagsugod nga may dalagko nga mga tanda kag dalagko nga mga milagro nga nahimo sa katawhan.

5 Apang may pila nga nagsugod sa pagsiling nga ang tion nagligad na agud ang mga pulong matuman, nga ginhambal ni Samuel, ang Lamanhon.

6 Kag nagsugod sila sa pagkinasadya tungod sang ila mga kauturan nga nagasiling: Tan-awa ang tion nagligad na, kag ang mga pulong ni Samuel wala natuman; gani, ang inyo kalipay kag ang inyo pagtuo parte sini nga butang nangin wala’y pulos.

7 Kag natabo ini nga naghimo sila sing dako nga kinagamo sa bug-os nga kadutaan; kag ang katawhan nga nagpati sa mga pulong ni Samuel nagsugod nga mangin tuman kamasinulub-on, kay basi sa ano man nga paagi yadtong mga butang nga ginpanghambal indi matabo.

8 Apang tan-awa, nagbantay sila sing dalayon para sa sina nga adlaw kag sina nga gab-i kag sina nga adlaw nga mangin pareho sa isa ka adlaw nga daw wala sing gab-i agud mahibal-an nila nga ang ila pagtuo indi nangin wala’y kapuslanan.

9 Karon natabo ini nga may isa ka adlaw nga ginpain sang mga wala nagapati, nga ang tanan nga nagapati sa amo nga mga tradisyon pamatyon luwas lang kon matabo ang tanda nga ginhatag ni Samuel nga propeta.

10 Karon natabo ini nga sang nakita ni Nefi, nga anak ni Nefi, ining kalainan sang iya katawhan, ang iya tagipusuon nangin tuman kamasinulub-on.

11 Kag natabo ini nga naggwa sia kag nagluhod kag nagduko sa duta, kag nagpakitluoy sing hugot sa iya Dios para sa iya katawhan, huo, inang mga malapit na patyon tungod sang ila pagtuo sa tradisyon sang ila mga amay.

12 Kag natabo ini nga nagpakitluoy sia sing hugot sa Ginuo sa bilog sina nga adlaw; kag tan-awa, nabatian niya ang tingug sang Ginuo nga nagasiling:

13 Ibayaw ang imo ulo kag magkalipay ka; kay tan-awa, ang tion nag-abot na, kag sa sini nga gab-i ipakita ang tanda, kag sa buwas magakari ako sa kalibutan, agud ipakita sa kalibutan nga tumanon ko ang tanan nga akon ginpahanabo nga ihambal paagi sa baba sang akon balaan nga mga propeta.

14 Tan-awa, magakari ako sa akon kaugalingon nga katawhan, agud tumanon ang tanan nga butang nga akon ginpahayag sa mga anak sang katawhan halin pa sa pagtuga sang kalibutan, kag agud himuon ang kabubut-on, pareho sang Amay kag sang Anak—sang Amay tungod sa akon, kag sang Anak tungod sang akon unod. Kag tan-awa, ang tion nag-abot na, kag sa sini nga gab-i ipakita ang tanda.

15 Kag natabo ini nga ang mga pulong nga nag-abot kay Nefi natuman, suno sa pagkahambal sang mga ini; kay tan-awa, sa pagtunod sang adlaw wala sing kadulom; kag ang katawhan nagsugod nga matingala tungod wala sing kadulom sang pag-abot sang gab-i.

16 Kag may madamo, nga wala nagpati sa mga pulong sang mga propeta, nga nagkalatumba sa duta kag daw nangin mga patay, kay nahibal-an nila nga ang dako nga plano sang kalaglagan nga ila ginpahamtang para sinang mga nagapati sa mga pulong sang mga propeta napaslawan; kay ang tanda nga ginpahayag yara na.

17 Kag nagsugod nga nahibal-an nila nga ang Anak sang Dios pat-od gid nga magapakita sa indi madugay; huo, sa malip-ot nga pulong, ang tanan nga katawhan sa ibabaw sang bug-os nga duta halin sa weste padulong sa este, sa duta sa norte kag sa duta sa sur, tuman nga natingala sa bagay nga nagkalatumba sila sa duta.

18 Kay nahibal-an nila nga ang mga propeta nagsaksi sining mga butang sa sulod sang madamo nga tinuig, kag ang tanda nga ginpahayag yara na; kag nagsugod sila nga mahadlok tungod sang ila kalainan kag sang ila pagkawala’y pagtuo.

19 Kag natabo ini nga wala sing kadulom sa bug-os sina nga gab-i, kundi nga masanag ini nga daw udtong-adlaw. Kag natabo ini nga ang adlaw nagbutlak liwat sa aga suno sa nagakaigo nga paggiho sini; kag nahibal-an nila nga ini ang adlaw nga ang Ginuo igabun-ag, tungod sang tanda nga ginpakita.

20 Kag natabo ini, huo, ang tanan nga butang, ang tagsa ka tinipik, suno sa mga pulong sang mga propeta.

21 Kag natabo man ini, nga isa ka bag-o nga bituon ang nagtuhaw suno sa pulong.

22 Kag natabo ini nga halin sa sini nga tion nagsugod nga may mga pagbinutig nga ginpalapnag sa katawhan si Satanas agud patig-ahon ang ila mga tagipusuon sa tuyo nga indi sila magpati sa mga tanda kag mga katilingalahan nga ila nakita; apang sa pihak sining mga pagbinutig kag mga pagpatalang ang kalabanan sang katawhan nagpati, kag nahaylo sa Ginuo.

23 Kag natabo ini nga si Nefi naglibot sa katawhan, kag sa madamo nga iban pa, nga nagapangbunyag sa paghinulsol, nga sa sini may dako nga kapatawaran sang mga sala. Kag gani ang katawhan nagsugod liwat nga makaangkon sing paghidaet sa kadutaan.

24 Kag wala na sing mga pagbinaisay, luwas sa pila nga nagsugod sa pagwali, nga nagatinguha sa pagpamatuod paagi sa balaan nga mga kasulatan nga indi na kinahanglanon nga magsunod pa sang layi ni Moises. Karon sa sini nga butang nagsayop sila tungod wala nila nahangpan ang balaan nga mga kasulatan.

25 Apang natabo ini nga sa wala madugay nahaylo sila, kag nasanagan parte sa ila kasaypanan nga ila ginatindogan, kay ginpahibalo sa ila nga ang layi wala pa natuman, kag kinahanglanon gid ini nga matuman sa tagsa ka tinipik; huo, ang pulong nag-abot sa ila nga kinahanglan gid ini nga matuman; huo, agud nga ang isa ka pintok ukon kudlit indi madula tubtob nga ini tanan matuman; gani sa sining amo man nga tuig nadala sila sa ihibalo parte sa ila kasaypanan kag nagkumpisar sang ila mga sala.

26 Kag gani ang ika-nobenta’y dos nga tuig nagligad nga nagadala sang maayong balita sa katawhan tungod sang mga tanda nga natabo suno sa mga pulong sang propesiya sang tanan nga balaan nga mga propeta.

27 Kag natabo ini nga ang ika-nobenta’y tres nga tuig nagligad man sa paghidaet, luwas sa mga tulisan ni Gadianton, nga nagapuyo sa mga kabukiran, nga namugad sa kadutaan; kay sa pagkalig-on sang ila mga pamakod kag sang ila sekreto nga mga lugar nga ang katawhan indi makadaug sa ila; gani naghimo sila sang madamo nga pagpamatay, kag naghimo sing tuman nga paglaglag sa katawhan.

28 Kag natabo ini nga sa ika-nobenta’y kwatro nga tuig nagsugod sila sa pagdamo sing tuman, tungod may madamo nga nagsilipak sang mga Nefinhon nga nagpinalagyo pakadto sa ila, nga nagtuga sing tuman nga kasubo sa mga Nefinhon nga nagpabilin sa kadutaan.

29 Kag may kabangdanan man sang dako nga kasubo sa mga Lamanhon; kay tan-awa, madamo sila sing anak nga nagdalagko kag nagsugod nga mangin mga hamtong, nga nagapinagusto, kag nadala sang pila nga mga Zoramnon, paagi sa ila mga pagbinutig kag sa ila nagapang-into nga mga pulong, sa pagbuylog sa mga tulisan ni Gadianton.

30 Kag gani ang mga Lamanhon nag-antos man, kag nagsugod sa pagluya sa ila pagtuo kag pagkamatarong tungod sang kalainan sang ulihing tubo.