1 Kag sa pagkamatuod ginasiling ko sa inyo, ginahatagan ko kamo sing tanda, agud mahibal-an ninyo ang tion kon san-o ining mga butang malapit na nga mahanabo—nga akon tiponon, halin sa ila madugay na nga paglinapta, ang akon katawhan, O panimalay ni Israel, kag ipahamtang liwat sa ila ang akon Sion;

2 Kag tan-awa, amo ini ang butang nga akon ihatag sa inyo bilang tanda—kay sa pagkamatuod ginasiling ko sa inyo nga kon ining mga butang nga ginapahayag ko sa inyo, kag inang akon mismo ipahayag sa inyo pagkatapos sini, kag paagi sa gahum sang Balaan nga Espiritu nga ihatag sa inyo sang Amay, mapahibalo sa mga Gentil agud mahibal-an nila ang parte sining katawhan nga nagkalabilin sang panimalay ni Jacob, kag parte sining akon katawhan nga palaptahon nila;

3 Sa pagkamatuod, sa pagkamatuod, ginasiling ko sa inyo, kon ining mga butang mapahibalo sa ila sang Amay, kag magagwa halin sa Amay, halin sa ila padulong sa inyo;

4 Kay kinaalam sa Amay nga mapahamtang sila sa sining kadutaan, kag mapaluntad bilang hilway nga katawhan paagi sa gahum sang Amay, nga ining mga butang magagwa halin sa ila padulong sa nagkalabilin sang inyo kaliwatan, agud ang kasugtanan sang Amay mahimo matuman nga iya ginpakighisugot upod sa iya katawhan, O panimalay ni Israel;

5 Karon, kon ining mga buluhaton kag ang mga buluhaton nga pagahikoton sa inyo pagkatapos sini magagwa halin sa mga Gentil padulong sa inyo kaliwatan nga magausmod sa pagkawala’y pagtuo tungod sang kalainan;

6 Kag sa nasiling na pagbuot sang Amay nga magagwa ini halin sa mga Gentil, agud mapakita niya ang iya gahum sa mga Gentil, para sa sini nga katuyoan nga ang mga Gentil, kon indi sila magpatig-a sang ila mga tagipusuon, nga mahimo sila maghinulsol kag magpalapit sa akon kag mabunyagan sa akon ngalan kag makahibalo sang matuod nga mga bahin sang akon doktrina, agud nga maisip sila sa akon katawhan, O panimalay ni Israel;

7 Kag kon matabo ining mga butang nga ang inyo kaliwatan magsugod nga makahibalo sining mga butang—mangin tanda ini sa ila agud mahibal-an nila nga ang buluhaton sang Amay nagsugod na tuhoy sa pagkatuman sang kasugtanan nga iya ginhimo sa katawhan nga iya sang panimalay ni Israel.

8 Kag kon mag-abot ina nga adlaw, matabo ini, nga ang mga hari magakipot sang ila mga baba; kay inang mga wala nasugid sa ila makita nila; kag inang mga wala nila mabatii ila binag-binagon.

9 Kay sa sina nga adlaw, tungod sa akon ang Amay magahikot sing isa ka buluhaton, nga mangin dako kag dalayawon nga buluhaton sa tunga nila; kag mangin may yara sa ila nga indi magpati sini, bisan pa nga ang isa ka tawo magpahayag sini sa ila.

10 Apang tan-awa, ang kabuhi sang akon alagad mangin sa akon kamot; gani indi nila sia pagsakiton, bisan pa nga masamad sia tungod sa ila. Apang paayohon ko sia, kay ipakita ko sa ila nga ang akon kaalam labaw sangsa katuso sang yawa.

11 Gani matabo ini, nga ang bisan sin-o nga indi magpati sa akon mga pulong, ako nga si Jesucristo, nga isugo sang Amay nga iya dal-on sa mga Gentil, kag hatagan sia sing gahum nga dal-on niya ang mga ini sa mga Gentil, (pagahimuon ini bisan pareho sa ginsiling ni Moises) pagasikwayon sila halin sa akon katawhan sang kasugtanan.

12 Kag ang akon katawhan nga nagkalabilin ni Jacob magasimpon sa mga Gentil, huo, sa tunga nila pareho sing isa ka leon sa mga kasapatan sang lasang, pareho sing isa ka bataon nga leon sa mga panong sang mga carnero, nga, kon makalusot sia magatasak kag magagusnit sa mga tinipik, kag wala sing bisan sin-o nga makaluwas.

13 Ang ila kamot pagaalsahon batok sa ila mga kaaway, kag ang tanan nila nga mga kaaway magakalamatay.

14 Huo, kalisud sa mga Gentil luwas lang nga maghinulsol sila; kay matabo ini sa sina nga adlaw, siling sang Amay, nga pamatyon ko ang inyo mga kabayo halin sa tunga ninyo, kag panggub-on ko ang inyo mga karwahe;

15 Kag wasakon ko ang mga siyudad sang inyo kadutaan, kag rumpagon ang tanan ninyo nga mga pamakod;

16 Kag dulaon ko ang mga pagpanghiwit sa inyo kadutaan, kag mangin wala na kamo sang mga manugpakot pa;

17 Ang inyo tinigib nga mga imahen akon man wasakon, kag ang inyo ginpatindog nga mga imahen halin sa tunga ninyo, kag indi na kamo magsimba pa sa mga binuhat sang inyo mga kamot;

18 Kag panggabuton ko ang inyo mga kakahuyan halin sa tunga ninyo; kag amo man panggub-on ko ang inyo mga siyudad.

19 Kag matabo ini, nga ang tanan nga pagbinutig, kag mga pagpatalang, kag mga paghinisaay, kag mga pag-ilinaway, kag mga butig nga pagkapari, kag mga pagkamakihilawason, pagadulaon na.

20 Kay matabo ini, siling sang Amay, nga sa sina nga adlaw ang bisan sin-o nga indi maghinulsol kag magpalapit sa akon Hinigugma nga Anak, sila pagasikwayon ko halin sa akon katawhan, O panimalay ni Israel;

21 Kag pagahikoton ko ang pagtimalus kag kaakig sa ila, bisan pareho sa mga pagano, sa sahi nga wala pa nila maagyan.

22 Apang kon magahinulsol sila kag mamati sa akon mga pulong, kag indi magpatig-a sang ila mga tagipusuon, ipahamtang ko ang akon simbahan sa ila, kag magasulod sila sa kasugtanan kag maisip sa sining nagkalabilin ni Jacob, nga sa ila ginhatag ko ining kadutaan bilang ila palanublion;

23 Kag buligan nila ang akon katawhan, ang nagkalabilin ni Jacob, kag amo man ang tanan sang panimalay ni Israel nga magaabot agud makatukod sila sing isa ka siyudad nga pagatawgon nga Bag-ong Jerusalem.

24 Kag dayon buligan nila ang akon katawhan agud nga matipon sila, nga mga naglinapta sa bug-os nga ibabaw sang kadutaan, pasulod sa Bag-ong Jerusalem.

25 Kag dayon ang kagamhanan sang langit magapanaog sa ila; kag ako man mangin sa tunga nila.

26 Kag dayon ang buluhaton sang Amay magasugod sa sina nga adlaw, bisan sa tion nga ining ebanghelyo iwali sa nagkalabilin sining katawhan. Sa pagkamatuod ginasiling ko sa inyo, sa sina nga adlaw ang buluhaton sang Amay magasugod sa tanan nga naglinapta sang akon katawhan, huo, bisan ang mga tribo nga nadula, nga gindala sang Amay pagwa sa Jerusalem.

27 Huo, magasugod ang buluhaton sa tanan nga naglinapta sang akon katawhan, nga ang Amay amo ang magahanda sang alagyan nga sa sini makapalapit sila sa akon, agud nga makapanawag sila sa Amay sa akon ngalan.

28 Huo, kag dayon ang buluhaton magasugod upod ang Amay sa tanan nga nasyon sa paghanda sang alagyan nga sa sini ang iya katawhan mahimo matipon pauli sa duta nga ila palanublion.

29 Kag magagwa sila halin sa tanan nga nasyon; kag indi sila maggwa nga nagadali-dali, ukon maglakat nga nagapalagyo, kay magauna ako sa ila, siling sang Amay, kag ako mangin sa likod nila.