1 Kag karon natabo ini nga sang nasugid ni Jesus ining mga butang ginpaathag niya ini sa kadam-an; kag ginpaathag niya ang tanan nga butang sa ila, pareho nga dalagko kag magagmay.

2 Kag nagsiling sia: Ining balaan nga mga kasulatan, nga wala sa inyo, ang Amay nagsugo nga ihatag ko sa inyo; kay kinaalam sa iya nga ihatag ang mga ini sa palaabuton nga mga henerasyon.

3 Kag ginpaathag niya ang tanan nga butang, bisan halin sa ginsuguran tubtob sa tion nga magakari sia sa iya himaya—huo, bisan ang tanan nga butang nga magaabot sa ibabaw sang duta, bisan tubtob nga ang mga elemento matunaw sa tuman nga init, kag ang duta magalokot sing tingob pareho sang linokot nga papel, kag ang kalangitan kag ang duta magataliwan;

4 Kag bisan tubtob sa dako kag katapusan nga adlaw, kon san-o ang tanan nga katawhan, kag tanan nga kaliwat, kag tanan nga nasyon kag mga lengguahe magatindog sa atubang sang Dios, agud hukman sang ila mga binuhatan, kon ang mga ini maayo ukon ang mga ini malain—

5 Kon ang mga ini maayo, sa pagkabanhaw sa kabuhi nga wala’y katubtuban; kag kon ang mga ini malain, sa pagkabanhaw sa silot; nga magkatumbas, ang isa sa isa ka bahin kag ang isa sa pihak nga bahin, suno sa kaluoy, kag sa hustisya, kag sa pagkabalaan nga yara kay Cristo, nga yara na antes pa nagsugod ang kalibutan.

6 Kag karon indi sarang masulat sa sining libro ang bisan ika-isa ka gatos nga bahin sang mga butang nga matuod gid nga ginpanudlo ni Jesus sa katawhan;

7 Apang tan-awa ang mga lamina ni Nefi nagaunod sang laban nga bahin sang mga butang nga iya ginpanudlo sa katawhan.

8 Kag ining mga butang akon ginsulat, nga mas diutay nga bahin sang mga butang nga iya ginpanudlo sa katawhan; kag ginsulat ko ang mga ini sa tinutuyo nga madala liwat ang mga ini sa sining katawhan, halin sa mga Gentil, suno sa mga pulong nga ginhambal ni Jesus.

9 Kag sa tion nga mabaton na nila ini, nga kinahanglan gid nila anay nga mabaton, agud tilawan ang ila pagtuo, kag kon matuod nga magapati sila sa sining mga butang gani ang mas dalagko nga mga butang ipakita sa ila.

10 Kag kon indi sila magpati sa sining mga butang, gani ang mas dalagko nga mga butang idumili sa ila padulong sa pagkondenar sa ila.

11 Tan-awa, nagahana na ako kuntani nga isulat ang mga ini, ang tanan nga nakurit sa mga lamina ni Nefi, apang ang Ginuo nagdumili sini nga nagasiling: Tilawan ko ang pagtuo sang akon katawhan.

12 Gani ako, si Mormon, nagasulat sang mga butang nga ginsugo sa akon sang Ginuo. Kag karon ako, si Mormon, nagatapos sang akon mga ginapanghambal, kag magapadayon sa pagsulat sang mga butang nga ginsugo sa akon.

13 Gani, luyag ko nga tamdon ninyo nga ang Ginuo matuod gid nga nagpanudlo sa katawhan, sa sulod sang tatlo ka adlaw; kag pagkatapos sina masami sia nagapakita sang iya kaugalingon sa ila, kag masami nagasipad-sipad sang tinapay, kag ginapakamaayo ini, kag ginahatag ini sa ila.

14 Kag natabo ini nga nagpanudlo sia kag nag-alagad sa mga kabataan sang nasambit nga kadam-an, kag ginlugakan niya ang ila mga dila, kag nagpamulong sila sa ila mga amay sang dako kag dalayawon nga mga butang, nga labaw pa sangsa iya na ginpahayag sa mga katawhan; kag ginlugakan niya ang ila mga dila agud makahambal sila.

15 Kag natabo ini nga pagkatapos nga nakakayab na sia sa langit—sa ika-duha nga tion nga napakita niya ang iya kaugalingon sa ila, kag nakakadto sa Amay, pagkatapos nga napaayo ang tanan nila nga masakiton, kag ang ila mga piang, kag nabuksan ang mga mata sang ila mga bulag kag nakuhaan sing supon ang mga dulunggan sang mga bungol, kag bisan pa nahimo ang tanan nga sari sang pagpangbulong sa ila, kag napabangon ang isa ka tawo halin sa mga minatay, kag napakita ang iya gahum sa ila, kag nakakayab sa Amay—

16 Tan-awa, natabo ini sa pagkabuwas nga ang kadam-an nagtililipon sang ila mga kaugalingon, kag pareho nila nga nakita kag nabatian ining mga kabataan; huo, bisan ang mga lapsag nagtikab sang ila mga baba kag nagmitlang sang dalayawon nga mga butang; kag ang mga butang nga ila ginmitlang ginadumili sa bisan sin-o nga tawo nga isulat ini.

17 Kag natabo ini nga ang mga disipulo nga ginpili ni Jesus nagsugod halin sa sina nga tion sa pagpangbunyag kag sa pagpanudlo sa tanan nga nagpalapit sa ila; kag ang tanan nga nabunyagan sa ngalan ni Jesus napuno sang Balaan nga Espiritu.

18 Kag madamo sa ila ang nakakita kag nakabati sang di-mamitlang nga mga butang nga wala ginatugot nga isulat.

19 Kag nagpanudlo sila, kag nag-alagad sa isa kag isa; kag gintingob nila ang tanan nga butang agud gamiton sang tanan, nga ang tagsa ka tawo nagapakigbagay sing matarong, sa isa kag isa.

20 Kag natabo ini nga ginhimo nila ang tanan nga butang pareho sang ginsugo ni Jesus sa ila.

21 Kag sila nga mga nabunyagan sa ngalan ni Jesus gintawag nga simbahan ni Cristo.